Luka

12 Elukuluku ene yeele, vaavaa muloko* wa achu macikhwi macikhweene waathukumannaaya ophiyerya enanyikalana mukina ni mukhwaawe, Yesu aapacerya oloca ni oohuserya awe, ariki: “Phoole, mwiikasoopeke ni yooruruvaliha ya* Afarisi, ori wiisootherya.” 2 Nyenya hiyaavo echu eri yoovitheya eni ehuupululiwe, naari hiyaavo echu eri yookhuweya eni ehisuweliwe. 3 Mwawiihiiha, yeeyo muneeraanyu muloce weephiini enarwa ewiriyaniwa vanlakani, nave yeeyo muneeraanyu muloce vathi-vathi mpa, enamulaleeryiwa vasulu va empa. 4 Asinthamwene aka, kinnooleelaani wi, muhiwooveke achu yaawo aniipha mwiili, nto muhoolo mwaya hanawerya oweerelaani echu ekina. 5 Nyenya kinamooleelaani muchu oophwanela omoova: Mmoove Yoole oni amanle wiipha, ookhalano owerya wa orihela o Kehena.* Chiryene, kinnooleelaani wi mmoove Yoowo. 6 Hanatumihiwa asipalame athanu ni ikhorowa piili sa* esisapo tonto? Naamwi hiihaa, hiyaavo emoharu mano enacuwaliwa* ti Muluku. 7 Ophiyerya tho wi miihi oothene a mmuruni mwanyu ahaalakhanyiwa. Muhoove; nyuwo muri ookhweleyaxa waapwaha asipalame ancipale.

8 “Kinnooleelaani wi oothene yoole onakeemererya vamiithoni va achu, Mwaana a muchu onahaala tho omweemererya vamiithoni va ankeelo a Muluku. 9 Nto yoole oni akikhooce vamiithoni va achu, onahaala okhoociwa tho vamiithoni va ankeelo a Muluku. 10 Yoole oni amulocele masu ooruwana Mwaana a muchu, onarwa aleveleliwa, nto yoole onanyemula munepa waweela harwa aleveleliwa. 11 Wakhala wi moosomeliwa mukerihiwa mmapuro oothukumanela,* wa alamuleli, ni wa asitokweene, muhikhale awuukhuwa vooloca sa mukhalelo wa wiisaakiha naari yeeyo munahaalaanyu oloca, 12 ntakhara mu elukuluku ene yeeyo, munepa waweela onamoohusihaani ichu munaphwanelaanyu oloca.”

13 Muchu mmoha aari variyari va muloko wa achu aaloca ni Yesu ariki: “Muhusiha, mmuleele munnaka wi akikawele muhakhu woohiyeriwa.” 14 Yesu aamukoha: “Mulopwana, taani okithanlile wi kikhale muthoriha naari mulipa ookawa muhakhu wa nyuwo apiili?” 15 Voocharela owo aahiloca: “Mwiikasoopeke nave musepe mukhalelo woothene wa nrima,* ntakhara naamwi muchu arino muhakhu wawaaca, okumi awe honarweela mu waaca wa ichu oreiyeno.” 16 Mwa yeeyo Yesu aaloca wa yaawo niphwanaphwaniho, ariki: “Emaca ya mulopwana mmoha ooreela, yaavaha yoolya yincipale. 17 Mwawiihiiha, owo aanuupuwela meekheiye ariki: ‘Vano, tiheeni kinaphwanelaaka weera woona wi nkaano wookhapelelamo yoolya aka?’ 18 Hiihaa owo aahi: ‘Kinahaala wi ha: Kinammwarya makhupi aka oothene nave kiteke matokweene, nave mwemmo kinamuthukumanyamo soolya saka ni sookhalano saka soothene, 19 nave kinamuloca wa miyo* kiriki: “Weyo* wookhalano ichu sincipale sikhapeleliwe soophiyeryano miyakha mincipale; vano wiichuuwe, olye, owurye ni opuhe.”’ 20 Nto Muluku aaloca wa yoowo: ‘Khamiruku we, ohiyu ene yoola okumi aa onamurweeliwa. Vano, taani oni ahaleno ichu seiho othukumannyaawe?’ 21 Ti yeela eneereya ni muchu yoowo oniithukumanyerya muhakhu, nto hari ooreela vamiithoni va Muluku.”

22 Voocharela, owo aahi wa oohuserya awe: “Wanthowa na yeela kinnooleelaani wi, muhuukhuweke ni ekumi* anyu vooloca sa yoolya, naari ni mwiili anyu vooloca sa yoowara. 23 Woona wi okumi ti woochuneyaxa opwaha yoolya nave mwiili opwaha yoowara. 24 Mwaavarerye anakhuku: Awo hanamisa naari ohaca,* haano mano nikhupi naari ntatha; nto Muluku onnaavaha yoolya. Apwanne nyuwo hamuri oochuneyaxa opwaha ipalame seiho? 25 Taani mwa nyuwo onawerya waaceererya ekumi awe elukuluku tonto* nthowa na okhala awuukhuwa? 26 Mwawiihiiha, waakhanle wi hamunawerya weera echu naari ekhaani mano, ntakhara heeni okhala awuukhuwa vancipale ni ichu ikina? 27 Muthokororye mukhalelo ithutu sinannuwaaya: Iho hasinalapa naari osona; nto kinnooleelaani wi naari mano Solomoni, mu ncicimiho nawe noothene, hantonko owarela ntoko ithutu seiho. 28 Vano, woona wi Muluku onnawariha hiihaa manaxi a mutakhwani, yaawo anakhala olelo ni mmeeloni mwaya yeeyeliwa, apwanne hoowarihaani opwaha ithutu seiho, nyuwo a nroromelo tonto? 29 Mwawiihiiha, muhuukhuweke ni yeeyo munayaanyu olya naari ni yeeyo munayaanyu owurya, nave muheeteteyeke ni seiha; 30 ichu seiha soothene, ti seiho amalapo aneeteteelaaya, nto Atiithi anyu aasuwela wi munnachuna ichu seiha. 31 Ohiya yeeyo, mutitelele waavya Omwene awe, nave ichu seiha sinarwa saaceereryiwa wa nyuwo.

32 “Muhoove, muhuwo mukhaani, woona wi Atiithi anyu aheemererya woovahaani Omwene. 33 Tumihani sookhalano sanyu nave mvahe samahala sa ikharari.* Mpake mirupa sanyu sakhorowa seiho sihinathaala, muhakhu ohinamala wirimu, weiwo ampava ahinaphiyaayawo, naari oweexe ohinalyaayawo. 34 Woona wi weiwo oriwo muhakhu aa, murimaa tho onahaala okhala weiwo.

35 “Mukhale oowara ene ni ooreheryeya,* mukunxe ipanthi sanyu sivarelaka, 36 munaphwanela okhala ntoko achu ananweherya pwiyaya onakooka woothelani, wi vaavaa onamaneiye nsele, mmuhulele mwawaakuveya. 37 Oohakalala akapuro yaawo anaphwanyiwa ni pwiyaya elipelelaka! Chiri kinnooleelaani wi yoowo mwaneene, onanwara soowara sa orumeelano,* aakilaathihe vameesa, aavaheke yoolya. 38 Nave wakhala wi oorwa mu elukuluku ya oweherya wanaawiili,* naari waneeraru,* nave aaphwanya eri ooreheryeya, oohakalala ti yaawo! 39 Nyenya musuwele ela, waakhanle wi mwaneene a vaate onnasuwela elukuluku mpava onahaaleiye orwa, haahaala weemererya wi empa awe ekhuculiwe. 40 Nyuwo tho, mwiirehererye, woona wi mu elukuluku muhinaanyiheryaanyu, Mwaana a muchu toneereiye arwe.”

41 Voocharela Petru aahi: “Pwiya, niphwanaphwaniho nenla munanlocela yeehuru naari wa oothene?” 42 Apwiya yaahi: “Taani ori namuteko oororomeleya,* ori amiruku,* yoowo pwiya awe omuthanlileiye wa akhweiye,* wi aavaheke yoolya mu elukuluku yoophwanelela? 43 Oohakalala kapuro yoowo onaphwanyiwa ti pwiyawe eerakano yeeyo! 44 Mweeparipari kinnooleelaani wi, pwiya awe onammweera mutokweene a othokororya muhakhu awe woothene. 45 Nto, wakhala wi kapuro ole onnaloca mmurimani mwawe ariki: ‘Pwiyaka onnalekela,’ nave apacerya waamana akapuro akhwaawe, olya, owurya ni ohapaliwa, 46 pwiya a kapuro ole oni arwe mu nihiku ohinamuweheryeiye, ni elukuluku yeeyo ohinasuweleiye, nave pwiya awe onarwa amulaka ni olaka otokweene, nave onammukeriha o nipuro na oohiroromeleya. 47 Nto kapuro yoole iiwexenxe yookhwela ya pwiyaa awe, nyenya ahiirehererya naari weerano yeeyo ovekiweiye* ni pwiya awe, onarwa awaxuliwa vancipale. 48 Nyenya kapuro yoowo ohiiwexenxe yookhwela ya pwiyawe nave eerano ichu soohiphwanelela onahaala owaxuliwa tonto. Mwawiihiiha, oothene yoole ovahiwe sawaaca, ennaweheryiwa sincipale wa yoowo; nave yoowo innyereryiwe sawaaca, ennaweheryiwa sincipalexa wa yoowo.

49 “Koorwa wi kiparihe* mooro veelaponi yavathi, vano echu taani ekina kinachunaaka, woona wi owo woovarela? 50 Chiryene, kookhalano opatiso yoowo kinaphwanelaaka opatisiwano, nave kinnuukhuwa ophiyerya owo okhwaanenle! 51 Munuupuwela wi kirweenle oruuha murecele veelaponi yavathi? Hooye; chiri kinnooleelaani wi kirweenle omwalanya. 52 Tiwi opacerya hiihaano oya muhoolo, achu athanu vachokoni anamukawanyeya, araru hekiiwanana ni eeli nave eeli hekiiwanana ni araru. 53 Awo anamukawanyeya, apapa ni mwanaya amwaamulopwana, mwaana amwaamulopwana ni apapa awe, maayi ni mwanawe amwaamuthiyana, mwaana amwaamuthiyana ni amama awe, asookora ni pwiyamwana aya, pwiyamwana ni asookora awe.”

54 Yesu aaloca tho wa muloko wa achu ariki: “Moona neeku nrwaaka makupa a weiwo nnaneelawo nsuwa, munnaloca muriki, ‘Epula enamurupa,’ nave enneereya hiihaa. 55 Nave vaavaa munoonaanyu echeku yoopaka ekhumaka makupa oohico, munnaloca tho: ‘Oviha onamurwa,’ nave enneereya hiihaa. 56 Anawiisootherye nyu, munnasuwela otaphulela makhalelo a elapo yavathi ni a wirimu, vano ntakhara heeni muhinasuwelaanyu otaphulela elukuluku yeela? 57 Ntakhara heeni muhinathorihaanyu tho meekhiinyu sa yeeyo eri yawookololowa? 58 Ntoko yootakiherya, wakhala wi ori ni mwiicani aa oyaaka omulacuni, wiilipixerye wiiwanana ni yoowo mphironi, wi ahookerihe wa mulipa oothoriha, nave mulipa oothoriha ooveleele wa mpilisa, nave owo ookerihe mukariposo. 59 Kinnooleela: Horwa okhumamo ophiyerya omulimve mwaakhorowaa ookuchulela.”*