Aroma

13 Achu oothene ewiiweleleke alamuleli, woona wi hiwaavo olamulelo oheemereryiwe ti Muluku; alamuleli yaawo ari mmapuroni mwaya eemereryiwe ti Muluku. 2 Mwawiihiiha, yoowo onavaanyihana ni alamuleli, onavaanyihana ni nlamulo ntikitheryiwe ti Muluku;* yaale anavaanyihana ni nlamulo nenla, enarwa ethorihiwa. 3 Tiwi alamuleli hanooviwa ni yaale aneera ichu saphaama, nyenya ni yaale aneera ichu soonanara. Apwanne onnachuna wi ohiwooveke alamuleli? Otitelele weerano yaphaama. Nave awo enarwa yoocicimiha; 4 woona wi ari anamuteko a Muluku wi yookhaviheryeke. Nto waaneerano yoonanara, wooveke, woona wi awo aavahiwa ophwanelela ni owerya wi yaalake yaale aneerano yoonanara. Awo anamuteko a Muluku, wi yinle ikuhu ni wooniherya esara* wa yaale aneerano yoonanara.

5 Mwawiihiiha, ti woochuneya wi mukhale awiiwelela, ohiya wa nthowa na esara yeela, nyenya tho nthowa na yawuupuxerya-ya-murima anyu. 6 Ti nthowa nene tho munalivaanyu mixokho; ntakhara awo ari anamuteko a Muluku nave annaphara muteko yoola moohihiyererya. 7 Mwaavahe oothene yeeyo enaaphwanela: Mwaavahe muxokho yaale anaveka muxokho; nlivelo yaale anaveka nlivelo; woova yaale anaphwanela wooviwa; ncicimiho wa yaale anaphwanela ocicimihiwa.

8 Muhikhaleno mankawu ni muchu mukina, voohikhala osivelana mukina ni mukhwaawe. Tiwi yoole onamusivela mwaacamani awe onnaakhwaniha nlamulo. 9 Woona wi malamulo awi: “Ohiraruwe, ohiiphe, ohiiye, ohikhalele nrima,” vamoha ni malamulo makina, oothene anuuraanyiwa mwa nlamulo nla: “Omusiveleke mwaacamani aa ntoko oniisivelaawe weyo mwaneene.” 10 Osivela honamweerela yoonanara mwaacamani; mwawiihiiha, osivela tonaakhwaniha nlamulo.

11 Nave mweereno yeela ntakhara moosuwela elukuluku nnakhalaahu, wi elukuluku ya ovinya mwiikhoveni, woona wi vano ovuluxiwa wahu onnaacamela opwaha elukuluku naaryaahu alipa oororomela. 12 Ohiyu onnavira; oxa onnaacamela. Mwawiihiiha, hankooni nikhooce miteko sa epiiphi nave niiwarihele ikaruma soowanano sa omwaleela. 13 Neeceke moophwanelela ntoko othana, nihipakeke ifesta sootakhala* ni ohapaliwa, naari okonihana woohiphwanelela ni meecelo awuuliha muru,* naari owanawana ni okhala a ehace. 14 Nto mwaaware* Apwiya Yesu Kristu, nave muhuupuweleke mmukhalelo wa weerano soochuna sa mwiili.