Salmu

5 Khwoo Yehova, mwiiwe masu aka;

Muwiriyane phaama wuupulela waka.

 2 Nwiriyane okhuwela waka ntakhara nikhaviheryo,

Khwoo Mwene aka ni Muluku aka, woona wi kinavekela wa nyuwo.

 3 Khwoo Yehova, wooxiixelo munarwa mwiiwa nsu naka;

Wooxiixelo kinarwa kiloca wa nyuwo sa wuukhuwa waka nave kinarwa kiwehererya moopixa murima.

 4 Tiwi, nyuwo hamuri Muluku onasiveliwano ni yoonanara;

Haavo oonanara murima oni awerye otitelela okhala ni nyuwo.

Munnawiica amutakhali oothene;

 6 Munarwa mwaatoloxa yaale analoca sawootha.

 7 Nto miyo kinarwa kivolowa mpa mwanyu wanthowa na osivela wanyu woororomeleya otokweene;

Kinarwa kikokhora kiwehaka empa anyu yaweela* ni woova wa ncicimiho ntakhara nyuwo.

 8 Khwoo Yehova, mukihoolele mu wookololowa wanyu wanthowa na amwiicani aka;

Murehererye ephiro anyu ntakhara miyo.

 9 Tiwi, hiyaavo awo analocaaya enaphwanela ororomeliwa;

Mmurimani mwaya orimo pahiru otakhala;

Mmilo aya mahiye oohuleya;

Ni nlumi naya, awo annathamalela moowoka.*

10 Nto Muluku onamwaathoriha yaawo;

Apalanu aya ene ananwuuwiha.

Awo ekhoociwe wanthowa na soocheka saya sincipale,

Woona wi awo ahoomwaryeelaani.

11 Nto oothene yaale anachawela wa nyuwo enarwa ehakalala;

Ilukuluku soothene enarwa ekhuwela moohakalala.

Nyuwo munarwa mwaakhapelela,*

Nave oothene yaale anasivela nsina nanyu enarwa ehakalala mwa nyuwo.

12 Tiwi, munarwa mwaareeliha awookololowa murima, khwoo Yehova;

Nyuwo munarwa mwaakhuneela* ni weemereryiwa, ntoko ni eyaakiho etokweene.