Luka

9 Voocharela Yesu aahaathukumanya oohuserya Khumi napiili, aavaha owerya ni ikuru sa wiikara masololo ni waapenuxa awiiceliwa. 2 Nave aahaarumiha wi yalaleerye michaka sa Omwene wa Muluku ni waapenuxa awiiceliwa, 3 nave owo aahaaleela: “Mmukwahani, muhikuxeke echu, naari yoolya naari epaau naari ikhorowa,* naari mano soowara piili.* 4 Nto empa vyakala muneeraanyu mvolowemo, mukhale vaavaa ophiyerya opwaha wanyu. 5 Nave weiwo achu aneeraaya ehiwaakheleeni, mwaavinyaka mu epooma eyo, mutathe nchupi mu inaani sanyu ntoko namoona wa yaawo.” 6 Hiihaa, yaacimula, eneeceeca muceche ni muceche, elaleeryaka michaka saphaama, yaapenuxaka achu voothevene.

7 Vano, Heroti* yoowo aalamulela o Kalileya, iiwaleiye ichu soothene seereya, aatepa ohaleeliheya, woona wi akina yaanaloca wi Yohani ooviihiwa mookhwani, 8 nto akina yaanaloca wi ti Eliya oruule, nlelo akina yaanaloca wi aari mmoha a alipa a miririmu akhalai oviihiwe mookhwani. 9 Heroti aahiloca: “Miyaano koomuhita Yohani. Vano, taani yoola oneerano ichu soothene seiha kiniiwaaka?” Mwawiihiiha, owo aanamwaavya wi amoone.

10 Vaavaa arummwa yaakoonkaaya, awo yaamuleela Yesu ichu soothene yeenraaya. Voocharela, Yesu aahaakuxa yaaworu, ayano makupa a epooma yawiichaniwa Petisaita. 11 Nyenya muloko wa achu waasuwenlaaya yeela, waamuchara yoowo. Yesu aawaakhela phaama, apacerya waaleela sa Omwene wa Muluku, nave tho aahaapenuxa yaale yaachuna openuxiwa. 12 Oxekuwakavo, oohuserya Khumi napiili yaaya wa Yesu elocano eriki: “Mwaarowihe ala wi eye mmawaani ni mu ipooma sawaacamela wi yaavye soolya ni mapuro oohayamo, woona wi wenno homakiwewo.” 13 Nto Yesu aawaakhula: “Yeenyu ene mwaavahe echu ya olya.” Awo yaahi: “Hinaano echu ekina, voohikhala ipaau thanu ni ihopa piili, akhweya yeehu ene nathume* yoolya wa achu yaala oothene.” 14 Chiryene, yaakhalavo vaavale echu ya alopwana macikhwi mathanu. Nto owo aahi wa oohuserya awe: “Mwaarume wi ekiraathe nikhuuru ti nikhuuru achu makhumi mathanu.” 15 Oohuserya yaaheerano, yaaruma oothene wi ekiraathi. 16 Aakunxeiye ipaau ihe thanu ni ihopa piili, aaweha wirimu nave areeliha. Voocharela, owo aakawanya apacerya waavaha oohuserya awe, nave oohuserya awe yaahaakawela achu. 17 Mwawiihiiha, oothene awo yaalya evona, nave yaathukumanya ipaau saahalenle isareya micanka khumi napiili.

18 Ohoolo waya, Yesu arikimvekela vameekheiye, oohuserya yaamwaacamela, nave owo aahaakoha ariki: “Muloko* wa achu onakeera wi miyo kaani?” 19 Yaamwaakhula eriki: “Yohani Mpatisi, nto akina anaweeraani Eliya, nave akina analoca wi mwa mulipa a miririmu akhalai yoowo oviihiwe mookhwani.” 20 Voocharela, Yesu aahaakoha: “Hanka nyuwaano, munakeera wi miyo kaani?” Petru aahaakhula: “Mwa Kristu a Muluku.” 21 Voocharela, Yesu aahaalopola oohuserya awe wi ehimuleele muchu mukina vooloca sa yeela, 22 nto aahi wa yaawo: “Mwaana a muchu onahaala ohooxiwa ichu sincipale, okhoociwa ni asitokweene, ahooleli a alipa a mukucho ni alipa oorepa, ophiyerya wiiphiwa, nave mu nihiku naneeraru naya onamviihiwa mookhwani.”

23 Voocharela Yesu aahiloca wa oothene ariki: “Yoole onachuna okichara, iikhooce mukhateiye, nave nihiku ti nihiku, akuxe mwiri awe wa ohooxiwavo* nave atitelele okichara. 24 Woona wi yoole onachuna ovuluxa okumi awe, onamuyeleela, nto yoole onayeleela okumi awe wanthowa naka, onamvuluxa. 25 Vano, muchu onaphuramvo aakhela elapo yoothene yavathi nto ayelenle okumi awe naari wiiruuhela epahu? 26 Tiwi, yoole onuuliwa muru ni miyo vamoha ni masu aka, Mwaana a muchu onahaala tho wuuliwa muru ni muchu yoowo, vaavaa oneereiye arwe mu ncicimiho nawe ni na Atiithi awe, vamoha ni ankeelo aweela. 27 Chiri kinnooleelaani wi akina a nyuwo muri vaava, helawiha okhwa ehipacenrye woona Omwene wa Muluku.”

28 Chiryene, evinre mahiku mathanu namararu amanle oloca masu yaala, owo aamukuxa Petru, Yohani vamoha ni Tiyaku, yaaworu, aayano omwaako wi avekele. 29 Nto arikimvekela hiihale, ethoi awe yaatorokeya nave soowara sawe saakhala sawaarya ni saweela. 30 Mootutuxa, yaarwa alopwana eeli, Mose ni Eliya, epacerya oloca ni yoowo. 31 Ala yoonen’ye mu ncicimiho, nave epacerya oloca sa ocimula wawe, yoowo waahaala waakhwanela o Yerusalemu. 32 Petru ni yaale aareiyeno yaapacerya otuthela, nto vaavaa ikhove saachanwaaya,* yaahoona ncicimiho na Yesu vamoha ni alopwana eeli yeemenle ni yoowo. 33 Epwahakavo alopwana yaale, Petru aaloca ni Yesu ii: “Muhusiha, ti yaphaama wi nikhale wenno. Nnahaala oteka mixakala miraru, mmoha wawinyu, mukina wa Mose ni mukina wa Eliya.” Owo haasuwela echu aaloceiye. 34 Arikimuloca ichu seiha, naahooneya neeku, nipacerya waahuruwela oothene. Vaavaa awo yaavolowaaya muneekuni, yaapacerya woova. 35 Nave naahiiweya nsu muneekuni nriki: “Ola ti Mwanaka, yoowo kimuthanlilaaka. Munwiriyaneke.” 36 Elukuluku yeeyo nsu niiwen’yaaya, Yesu aahanlevo meekheiye. Nto mmahiku yaale, awo yaamaala nave ehimuleela muchu mukina vooloca sa ichu soothene yoonnaaya.

37 Nihiku noocharela, vaavaa awo yaakhurunwaaya omwaako, muloko mutokweene wa achu waamuthikirerya yoowo. 38 Nave mulopwana mmoha aari ni muloko yoole wa achu, aakhuwela ariki: “Muhusiha, kinnoovekaani wi mmukhaviherye mwanaka, woona wi kirino mmoharu yoola. 39 Onnarwa munepa woonanara, omphara, nave mootutuxa onnanyakula, omuuwiherya vachayani, anuupureya akhumaka niphweru mwaano; onnalekela omuhiya nave onnamukukhumula. 40 Kaahaaveka oohuserya anyu wi yiikare, nto awo hawenrye.” 41 Yesu aahaakhula, ii: “Muyareriwo woohiroromela ni woohuwela, ophiyerya liini kineeraka kititelele okhala ni nyuwo ni ophiyerya liini kineeraaka koovileleeni? Okiruuhele va mwaanaa.” 42 Vaavaa mmiravo aamwaacameleiye Yesu, nsololo naamuuwiherya vachayani, nnamuupuruxa moowali. Nto Yesu aasamela munepa woonanara, ampenuxa mmiravo nave amukookiherya wa apapa awe. 43 Nave oothene yaatikhiniheya ni owerya otokotoko wa Muluku.

Achu etikhinihen’ye hiihale ni ichu soothene eereiye, Yesu aaloca wa oohuserya awe: 44 “Nwiriyane phaama nave muupuweleke masu ala, Mwaana a muchu onamveleeliwa mmatani mwa amwiicani awe.” 45 Nto awo hiyiiwexexa yeeyo owo aaloceiye. Mweeparipari, eyo yaari yoovitheya wa yaawo wi ehiiwexexe, nave yaanoova omukoha vooloca sa masu yaala.

46 Voocharela, yaanavaanyihana yaawoyaawo vooloca sa taani mwa yaawo ori mutokweenexa. 47 Yesu, asuwelaka muupuwelo wa murima aya, aamukuxa mwaana, amweemexa vakhiviru vawe, 48 nave aahi wa yaawo: “Yoole onamwaakhela mwaana yoola mukhaani mu nsina naka, onakaakhela tho miyo; nave yoole onakaakhela miyo, onamwaakhela tho Yoole okirumme. Woona wi yoole oniiseera mukhaanixa mwa nyuwo oothene, tori mutokweene.”

49 Yohani aahi: “Muhusiha, noomoona muchu iikaraka masololo mu nsina nanyu, nave neererya omuhiiha, woona wi hananchara.” 50 Nyenya Yesu aahi: “Muheererye omuhiiha, ntakhara yoole ohinavaanyihana ni nyuwo, ori ni nyuwo.”

51 Yaacamelaka* mahiku wi awelihiwe wirimu, owo aalakelela* oya o Yerusalemu. 52 Mwawiihiiha, owo aahaarumiha anamichaka ohoolo wawe. Nave awo yaayawo, evolowa muceche wa asamariya wi epake marehereryo wa yoowo. 53 Nyenya asamariya hiyaamwaakhenle, woona wi aalakelenle* oya o Yerusalemu. 54 Oohuserya awe, Tiyaku ni Yohani, yonnaaya yeela, yaaloca: “Pwiya, munnachuna wi niveke mooro okhuruwe wirimu wi oweeyele?” 55 Nto Yesu aarukunuwa, aasamela yaawo. 56 Mwawiihiiha, awo yaacimula eyaaka muceche mukina.

57 Eyaaka mphironi, muchu mmoha aaloca ni Yesu: “Kinahaala woocharakaani weiwo muneeraanyu muyeekewo.” 58 Nyenya Yesu aamwaakhula: “Ananthala aakhalano makhuku aya nave ipalame sa wirimu sookhalano ipuuru saya, nto Mwaana a muchu haano nipuro na okuhavo muru awe.” 59 Voocharela, Yesu aaloca ni mukina: “Okhale oohuserya aka.” Nto owo aahi: “Pwiya, mukeemererye toko kapacerye waavitha apapa aka.” 60 Nyenya owo aamwaakhula ariki: “Waahiye wi alipa ookhwa yaavitheke alipa ookhwa aya, nto weyo hawe walaleeryeke Omwene wa Muluku.” 61 Mukina tho aahi: “Pwiya, kinamoocharaani, nto mukeemererye toko kapacerye waalaanya achu owaani.” 62 Nto Yesu aamwaakhula: “Haavo onaphara ehipa, arukunuwa anaweha oculi, anaphwanela tho Omwene wa Muluku.”