Akalatiya

4 Kinnaloca wi, mukelampa akhala nikwiya, hanahiyana ni kapuro, naamwi owo ari pwiya a ichu soothene, 2 nto owo onnakhapeleliwa ni alipa oomphuwa ni oomukhaviherya, ophiyerya elukuluku yoolamuleliwa ti atiithi awe. 3 Moolikana, hiyaano tho, vaavaa naaryaahu anamwane naari akapuro a ichu soopacerya sa veelaponi. 4 Nyenya yaakhwanenlaaya elukuluku, Muluku aamurumiha Mwanawe, ayariwa mwa muthiyana nave owo aaniiwelela nlamulo, 5 wi awoopole moorweela wa waathuma yaawo aniiwelela nlamulo, wi naakhele weeriwa anamwane a Muluku.

6 Vano, woona wi nyuwaano mwa anamwane, Muluku oorumihela munepa wa Mwanawe mmurimani mwahu, nave munepa onnakhuwela oriki: “Apa,* Tiithi!” 7 Hiiha, weyo vano hori tho kapuro, nto mwaana; nave wakhala wi wa mwaana, vano Muluku ooweera tho okhala mukelampa.

8 Nyenya vaavaa mwahaamusuwenlaanyu Muluku, nyuwo mwaari akapuro a amuluku yaawo ahiri eeparipari. 9 Nto, vano nyuwo mmusuwenlaanyu Muluku, naari wi, musuweliwaanyu ti Muluku, munawerya hai okookela ichu soopacerya, sooceecheya ni soohiphuriha echu, nave munachuna okookela okhala akapuro aya? 10 Nyuwaano munnatepa ocicimiherya mahiku, miyeeri, ilukuluku ni miyakha. 11 Kinnoova wi wiilipixerya kipankaaka wi kookhaviheryeeni ti wasiiyo.

12 Anna, miyo kinnoovekaani, mukhale ntoko miyo, woona wi miyo tho kaari ntoko nyuwo. Nyuwo hamukeerenle yoonanara. 13 Nto nyuwo moosuwela wi waari wa nthowa na wiiceliwa waka, kaawenryaaka olaleerya michaka saphaama ekwaha yoopacerya. 14 Nave naamwi oceecheya wa mwiili aka waari yaweeha wa nyuwo, hamwaakinyemunle naari okithanya;* nto mwaakaakhela ntoko munkeelo a Muluku, ntoko Kristu Yesu. 15 Ori woowi ohakalala mwaaraanyuno? Kinnaweerelaani onamoona wi, waakhanle wi eyo ti yooweryeya, mwaahaala owosola miitho anyu ene wi mukivahe miyo. 16 Vano apwanne kikhanle mwiicani anyu woona wi kohooleelaani eparipari? 17 Awo annaavya mwa mvai wi yoovootheeni, nto ohiya ni yoolakelela yaphaama; awo anachuna woomwalanyaani wa miyo, wi mwaachareke yaawo. 18 Nyenya, ti yaphaama wi muchu awaavyekeeni ilukuluku soothene ni yoolakelela yaphaama, ohiya pahiru kiri ni nyuwaano, 19 anamwane aka, yaawo kinoonaakano masooso ntoko a oyara ophiyerya Kristu atikitheryiwe* mwa nyuwo. 20 Kaanakhwela kaari vamoha ni nyuwo wi kihiyanihe oloca waka, woona wi kiri awuukhuwa wa nthowa nanyu.

21 Mukileele, nyuwo munachuna ochariha nlamulo, apwanne hamuniiwa Nlamulo? 22 Ntoko yootakiherya, yoorempwa wi Aparahamu aakhalano anamwane eeli, mmoha moorweela wa kapuro a mwaamuthiyana nave mukina moorweela wa muthiyana aari ootaphuwa; 23 nto mwaana a kapuro a mwaamuthiyana aayariwe mmukhalelo woomuchu,* nave mukina, mwaana a ootaphuwa aayariwe moorweela wa yoororomeliha. 24 Saweereya seiha sookhalano sootaphulela soosiphela; athiyana yaala aneemelela malakano meeli, nimoha no Mwaako Sinai, nnaayara anamwane a wookapuroni, yoowo ori Hakare. 25 Vano Hakare onamweemelela Sinai, mwaako ori o Arapiya, nave onamweemelela Yerusalemu amutano, woona wi ori mookapuroni vamoha ni anamwane awe. 26 Nto Yerusalemu oosulu ori ootaphuwa, nave owo ti amama ahu.

27 Vawi yoorempwa: “Hakalala, muthiyana we oohiyara, ohintoko okhalano anamwane, nave ochape moohakalala muthiyana we ohintoko woona masooso a oyara; woona wi anamwane a muthiyana onyanyaliwe ari awaaca waapwaha a yoole orino mulopwana.” 28 Vano anna, muri anamwane a yoororomelihiwa hiiha ntoko Isaki aareiye. 29 Nto hiiha ntoko mu elukuluku yeele ooyariwa mmukhalelo woomuchu* aapacenryeiye omwiikara ooyariwa moorweela mwa munepa, enneereya tho emohamoha hiihaano. 30 Nyenya, tiheeni soorepa inalocaaya? “Omwiikare kapuro amwaamuthiyana ni mwanawe, woona wi mwaana a kapuro amwaamuthiyana harwa akhala mukelampa ni mwaana a muthiyana ootaphuwa.” 31 Mwawiihiiha anna, nri anamwane, ohiya a kapuro a mwaamuthiyana, nto a muthiyana ootaphuwa.