Salmu

65 Ncicimiho ninnoweheryaani o Siyoni, khwoo Muluku;

Nnahaala waakhwaniherya malakano ahu wa nyuwo.

 3 Soonanara saka sinnakinyaanya,

Nto nyuwo munnakhuneela soohesa sahu.

 4 Oohakalala ti yoole nyuwo munamuthanlaanyu nave mmuruuha vakhiviru vanyu,

Wi akhaleke mmayateni mwanyu.

Nnahaala okhala awaakhwaneliwa ni ichu saphaama sa mpa mwanyu,

Empa anyu yaweela.*

 5 Nyuwo munahaala onaakhula ni saweera sootikhiniha sa wookololowa,

Khwoo Muluku a nivuluxo nahu;

Nyuwo muri Ororomela wa makupa oothene elapo ekotenlaayawo

Nave wa iphareya seiho siri woorakamela.

 6 Nyuwo mootikitherya* moolipa miyaako ni ikuru sanyu;

Nyuwo mohiiwarihela* owerya.

 7 Nyuwo munnamaaliha* owali wa iphareya,

Onyakula wa macumuxa aya ni namvutuka a maloko.

 8 Achu a mapuro oorakamela anamusareya woova wa nthowa na ineneeryo sanyu sootikhiniha;

Munahaala weeriha wi okhalevo okhuwela wa ohakalala ovinyerya weiwo nnakhumawo nsuwa ophiyerya nnaneelaayawo.

 9 Munnakhapelela elapo yavathi,

Mweerihaka eyo okhala yawuucelana vancipale* ni yooreelaxa.

Muhice wa Muluku onnachimaka osaren’ye maahi;

Nyuwo munnaavaha yaawo soolya

Ti hiiha mureherenryaanyu echaya.

10 Munnasareiha ni maahi mikoti saya, murehererya echaya aya elimmwe;

Nyuwo munnoolowiha ni epwila yawaaca, munnareeliha sawiima saya.

11 Nyuwo munnareeriha eyaakha ni mahala anyu ntoko nwarinhe korowa;

Iphiro sanyu soosareya ni ichu saphaama.*

12 Mapuro oolyihamo mihuwo a mutakhwani* aasareya,*

Nave miyaako mikhaani* soowara ohakalala.

13 Mapuro a waalyihamo axinama aasareya ni mihuwo,

Nave mipopa soosareya ni soolya

Iho sinnakhuwela moohakalala, aa, sinniipa.