1 Atesalonika

5 Vano anna, vooloca sa mahiku ni ilukuluku, tahi woochuneya woorepelaani echu. 2 Tiwi, nyeenyu ene moosuwela phaama wi chiryene nihiku na Yehova nnarwa ntoko mpava. 3 Vaavaa eneeraaya eloceke eriki: “Murecele ni okhapeleleya!” vaavanto, toneeraaya waaphwanye otoloxa wootutuxa, hiiha ntoko masooso a oyara anamurweelaaya muthiyana orupanle, nave awo herwa ekophola. 4 Nto nyuwo anna, hamuri mu epiiphi, wi nihiku nno neeremoophwanyaani ntoko mpava, 5 tiwi, oothene nyuwo muri anamwane a omwaleela ni anamwane a othana. Hiyaano hanri a ohiyu naari a epiiphi.

6 Mwawiihiiha, nihirupeke ntoko ancipale aneeraaya, nto nikhale oovinya ni okhapelela mavyakelo ahu a wuupuwela. 7 Tiwi, yaawo anarupa, anarupa ohiyu, nave yaawo anahapaliwa, anahapaliwa ohiyu. 8 Nyenya hiyo nri a othana, nikhapelele mavyakelo ahu a wuupuwela ni owara yawiisaakihano ya nroromelo ni ya osivela nave ewehereryo ya ovuluxa ntoko kapaseti. 9 Ntakhara Muluku oonithanla, ohiya wi naakhele esara, nto wi naakhele ovuluxiwa moorweela wa Apwiya ahu Yesu Kristu. 10 Owo ookhwa ntakhara hiyo, wi naari nri oovinya naari nrupaka,* nnaphwanela okhalaka vamoha ni yoowo. 11 Mwawiihiiha, mutitelele olipihana* mukina ni mukhwaawe ni otikitheryana mukina ni mukhwaawe, hiiha ntoko chiryene muneeraanyu.

12 Vano ninnoovekaani anna, wi mwaacicimiheke yaale analapa moowetha variyari vanyu, anoohoolelaani nyuwo mwa Apwiya ni anoovahaani miruku; 13 nave mwaacicimihekexa vancipale moosivela, wanthowa na muteko aya. Mukhaleke a murecele mukina ni mukhwaawe. 14 Nave tho, ninnooceenyeryaani anna wi mwaalopoleke* yaawo aneeca moohiphwanelela, mwaahakararyeke oovolola,* mwaakhaviheryeke ooceecheya, mukhaleke oopixa murima ni oothene. 15 Mukhaleno ephoole wi ahikhalevo mukina oni amukookiherye mukhweiye yoonanara ni yoonanara, nto mahiku oothene mwaavyeke weerelana saphaama mukina ni mukhwaawe ni wa oothene.

16 Mukhaleke oohakalala mahiku oothene. 17 Mvekeleke moohihiyererya. 18 Muthamaleleke wa ichu soothene. Ela yookhwela ya Muluku ntakhara nyuwo, mwa Kristu Yesu. 19 Muhixipihe mooro wa munepa. 20 Muhikhalihe mwa munyemu masu a miririmu. 21 Mwaalikhele ichu soothene; mwaakeelele yeeyo eri yaphaama. 22 Muthanyeke makhalelo oothene ootakhala.

23 Muluku a murecele mwaneene, aweeliheeni mwawaakhwanela. Nave munepa, okumi ni mwiili anyu anna, ikhapeleliwe moohikhalano nthowa, ni mwaphaama mmikhalelo soothene variyari va orwa wa Apwiya ahu Yesu Kristu. 24 Yoowo onawiichanaani toororomeleya nave chiryene onamweerano.

25 Anna, mutitelele onivekelela.

26 Mwaavahe mooni anna oothene ni epeexu yaweela.

27 Kinnoovekaani mu nsina na Apwiya wi ekaarata ela yaalakhanyiwe wa anna oothene.

28 Mahala matokweene a Apwiya ahu Yesu Kristu ekhale ni nyuwo.