Liivuru Anaawiili a Matharihelo

29 Esekiya aakhanle mwene arino iyaakha makhumi meeli nathanu, nave aahilamulela mu iyaakha makhumi meeli nathanu naxexe o Yerusalemu. Amama awe yiichaniwa Apiya, mwaana a Sakariya. 2 Owo aaneerano yeeyo yaari yawookololowa vamiithoni va Yehova, hiiha ntoko Tavite, nikholo nawe, enreiye. 3 Mu eyaakha yoopacerya ya olamulelo awe, mu mweeri woopacerya, owo aahihula masele a empa ya Yehova nave arehererya. 4 Voocharela, owo aahaawopa alipa a mukucho ni Alevi nave aathukumanya mmapuro awaaciwamo, mmakupa onakhumawo nsuwa. 5 Owo aahaaleela ariki: “Mukiwiriyane, Alevi. Vano mwiiseelihe nave mweelihe empa ya Yehova, Muluku a makholo anyu, nave mviihemo mu nipuro naweela yeeyo eri yooriipiheya. 6 Tiwi, makholo ahu yaari oohiroromeleya nave yaaheera yeeyo yaari yoonanara vamiithoni va Yehova, Muluku ahu. Awo yaamunyanyala, emmwareela tapernaakulu a Yehova nave emurukunuwela Yoowo. 7 Yaawala tho masele a va nipithela nave exipiha ipanthi. Yaamaala opaha sawiinkhela ni ovaha mikucho soopahiwa wa Muluku a Isarayeli mu nipuro naweela. 8 Mwa yeeyo, esara ya Yehova yaamurweela Yuta ni Yerusalemu, nave aahaaruuhela epahu, ophiyerya wi yaale yoona ni yiiwa vooloca sa yeela yaanakhala awoova, ootikhiniheya ni waaroha yaawo, ntoko munaweryaanyu woona ni miitho anyu. 9 Mwawiihiiha, makholo ahu yaahiiphiwa ni nlema nave anamwane ahu aasilopwana ni aasithiyana vamoha ni asaarihu yaakerihiwa wookapuroni wa nthowa na ichu seiha. 10 Vano yookhwela ya murima aka ori opaka nlakano ni Yehova, Muluku a Isarayeli, wi esara awe yoovarela enrapele. 11 Anaaka, vano tahi elukuluku ya okhala ooyere,* woona wi Yehova ohoothanlaani wi mweemele vamiithoni vawe, wi mmurumeele ni opaha mikucho sawe.”

12 Mwa yeeyo, Alevi akina yaapacerya olapa: Wa Akowatita: Mati, mwaana a Masai, ni Yoweli, mwaana a Asariya; wa Amerari: Kixi, mwaana a Apiti, ni Sakariya, mwaana a Xehaleleli; wa Axersoni: Yowa, mwaana a Sima, ni Eteni mwaana a Yowa; 13 wa anamwane a Elifani: Simiri ni Xeuweli; wa anamwane a Asafi: Sakariya ni Mataniya; 14 wa anamwane a Hemani: Xeiyeli ni Simei; wa anamwane a Yetutumi: Semaiya ni Usiyeli. 15 Awo yaahaathukumanya asinnaya, yiiseeliha nave eya yeeliha empa ya Yehova, hiiha ntoko mwene aalamulenleiye, mwawiiwanana ni masu a Yehova. 16 Alipa a mukucho yaavolowa mu empa ya Yehova wi yeelihemo nave yaaviihamo ichu soothene saari sooriipiheya seiho yaaphwannyaaya mu empa ya Yehova nave yaakumiherya va n’yate na empa ya Yehova. Voocharela, Alevi yaakuxa ekumiherya vaate ompopa wo Kitroni. 17 Mwawiihiiha, yaapacerya muteko wa weeliha mu nihiku noopacerya na mweeri woopacerya nave ephiya va nipithela na Yehova mu nihiku naneethanu nararu na mweeri. Awo yaaheeliha empa ya Yehova variyari va mahiku mathanu namararu nave emaliha mu nihiku naneekhumi nathanu nammoha na mweeri woopacerya.

18 Voocharela, yaamphwanya mwene Esekiya nave eloca eriki: “Noheeliha empa yoothene ya Yehova, altare a soovaha soopahiwa ni ikaruma sawe soothene, vamoha ni meesa a ipaau sootheteiwa* ni ikaruma saya soothene. 19 Nave ikaruma soothene seiho mwene Akasi aananarinheiye elukuluku ya olamulelo awe vaavaa owo eenreiyeno ichu moohiroromeleya, noorehererya nave neeliha, nave iho iri vakhiviru va altare a Yehova.”

20 Mwawiihiiha, mwene Esekiya aavinya wooxiixelo aathukumanya asitokweene a epooma, nave awo yaawela eyaaka o empa ya Yehova. 21 Awo yaahaaruuha asaana amope athanu napiili, asaana a ipucepuche athanu napiili, ipucepuche seelopwana thanu napiili, ni ipuri seelopwana thanu napiili ntoko yoovaha ya soocheka ntakhara omwene, ntakhara nipuro naweela ni ntakhara Yuta. Mwawiihiiha, owo aahaaleela alipa a mukucho, muyareriwo wa Aroni, wi evahe mikucho va altare a Yehova. 22 Mwa yeeyo, yaahiwiipha asaana amope nave alipa a mukucho ekuxa nikhami emiserya va altare; voocharela yaahiwiipha asaana a ipucepuche nave emiserya nikhami nene va altare; nave yaahiipha ipucepuche seelopwana emiserya nikhami nene va altare. 23 Voocharela, awo yaaruuha ipuri seelopwana ntakhara yoovaha ya soocheka vamiithoni va mwene ni wa muloko, nave yaakuherya mata aya. 24 Alipa a mukucho yaahiipha nave nnikhami naya epaka yoovaha ntakhara yoocheka va altare, wi ileveleliwe soocheka sa Isarayeli oothene, woona wi mwene aahiloca wi yoovaha yoopahiwa ni yoovaha ya yoocheka yaaphwanela okhala yamphurelo wa Isarayeli oothene.

25 Mu elukuluku emohamoha, mwene aahaakuha Alevi mmapuro aya a muteko mu empa ya Yehova, yaapharenle apankwe, ikaruma sa mikoyi ni achakare, mwawiiwanana ni nlamulo na Tavite, Kati mulipa aawoona a mwene, ni Natani mulipa a miririmu, woona wi nlamulo naavahiwe ni Yehova moorweela wa alipa a miririmu awe. 26 Mwawiihiiha, Alevi yaari aweemela ene epharenle ikaruma sa mikoyi sa Tavite, nave alipa a mukucho epharenle mapeca.

27 Voocharela, Esekiya aahilamulela wi mukucho woopahiwa oveleeliwe va altare. Vaavaa mukucho woopahiwa waapaceryiwaaya, yaapacerya omwiipela Yehova ni mapeca echarihiwaka tho ni ikaruma sa mikoyi sa Tavite, mwene a Isarayeli. 28 Nave muloko woothene waanakokhora eniiha macipo yiipiwaka nave mapeca yoopiwaka. Ela yaanatitelela weereya ophiyerya yoovaha yoopahiwa ekwaasiwe. 29 Vaavaa yaamanlaaya opaka yooveleela, mwene vamoha ni oothene yaale yaari ni yoowo, yaakokhora nave yuuramiha miru saya. 30 Mwene Esekiya ni asitokweene yaahaaleela Alevi wi emucicimihe Yehova ni masu a Tavite ni a Asafi mulipa awoona. Mwa yeeyo, awo yaamucicimiha ni ohakalala otokweene, nave yaakokhora yuuramiha miru saya.

31 Voocharela, Esekiya aahi: “Vano, nyuwo mvalaanyiwe* ntakhara muteko wa Yehova murwe nave muruuhe mikucho ni soovaha sa othamalela empa ya Yehova.” Mwawiihiiha, muloko waapacerya oruuha mikucho ni soovaha sa othamalela, nave oothene ni murima woolakelela yaanaruuha mikucho soopahiwa. 32 Waaca wa soovaha soopahiwa saaruuhiwe ni muloko saari imope makhumi mathanu nameeli, asaana eepucepuche nsana ni ipucepuche seelopwana masana meeli. Soovaha soothene seiha saari ntoko soovaha soopahiwa wa Yehova. 33 Nave wa soovaha saweela saari imope masana mathanu nammoha* ni ipucepuche macikhwi mararu.* 34 Nto hiyaarivo alipa a mukucho awaakhwanela wi eviihemo manyapara a asinama oothene ntakhara mikucho soopahiwa. Mwa yeeyo, asinnaya Alevi, yaahaakhaviherya ophiyerya omaliha muteko nave ophiyerya alipa a mukucho yiiseelinhe, woona wi Alevi yaari amvaixa* mu wiiseeliha waapwaha alipa a mukucho. 35 Nave tho, saakhalavo soovaha sincipale soopahiwa, vamoha ni ipaanya sa mikucho sa waataana ni sa soovaha sa yoowurya ntakhara mikucho sa soopahiwa. Mwawiihiiha, muteko wa empa ya Yehova waarehereryiwa. 36 Nave Esekiya ni achu oothene yaahakalala wa nthowa na yeeyo Muluku eeparipari eenreiye ntakhara achu, woona wi soothene seiha seeren’ye moohiwehereryeya.