Marku

5 Voocharela, awo yaaphiya okhopela wa ephareya, elapo ya Axeresane. 2 Yesu akhuruwaka mmwaaceyani, aathikireryiwa ni mulopwana yoowo aaphariwe ni munepa woonanara, akhumaka o mahiye.* 3 Owo aakhala omahiye, nave mu elukuluku yeele haavo aawerya ommaka, naari mano ni mithipo. 4 Ikwaha sincipale owo aanamakiwa ni mithipo matata ni manaani, nyenya owo aanathikila mithipo sa mmatatani ni onyaanya sa mmanaani; haavo aarino ikuru sa omvootha. 5 Nave moohihiyererya othana ni ohiyu, owo aanakhuwela omahiye ni mmiyaakoni, nave tho aaniiphoreiha ni maluku. 6 Nto aamoonneiye Yesu ari woorakamawo, owo aachimaka amukokhorela yoowo. 7 Voocharela, aakhuwela ni masu oovuwa ariki: “Tiheeni onachunaawe ni miyo, Yesu, Mwaana a Muluku Aikuru Soothene? Olipele mu nsina na Muluku wi hokihooxa.” 8 Mulopwana owo aakhuwela mmukhalelo yoola, woona wi Yesu aaloca wa yoowo ariki: “Khumamo mwa mulopwana ola, weyo munepa woonanara.” 9 Nto Yesu aamukoha: “Nsina naa taani?” Owo aahaakhula: “Kineeriwa Lexiyawu, ntakhara hiyo nootepa waaca.” 10 Nave owo aanatitelela omveka Yesu wi ahiikarele elapo ekina minepa ihe soonanara.

11 Naakhalavo nikhuuru ntokotoko na ikupa seiho saalyihiwa va mwaako vaavale. 12 Mwawiihiiha, minepa saahimveka Yesu iriki: “Onirume wi nivolowe mu ikupa ihe.” 13 Yesu aaheemererya. Mwawiihiiha, minepa soonanara saakhuma, ivolowa mu nikhuuru na ikupa, nave ikupa soothene saahiivonyerya mphareya, imoraka va nikumukumu,* yaari echu ya ikupa macikhwi meeli* saamiriwe mphareya. 14 Nyenya alipa oolyiha ikupa yaachawa, elokoha yeela mmicecheni ni mmawaani, nave achu yaarwa wi yoone echu yeeyo yeeren’ye. 15 Hiihaa, awo yaamwaacamela Yesu nave emoona mulopwana yoole aarino masololo, yoole aarino lexiyawu, akiraanthe, awanre ni iisuwelaka; nave achu yaale yaatepa woova. 16 Nave tho, yaale yoonne ichu iha seereyaka, yaalokoha wa achu vooloca sa mulopwana aarino masololo ni otholowa wa ikupa. 17 Mwawiihiiha, awo yaapacerya omveka Yesu wi avinyemo mweelaponi mwaya.

18 Nto, Yesu awelaka mmwaaceyani, mulopwana yoole aarino masololo aamveka wi amuchare. 19 Nyenya Yesu haamweemerenrye, nto aamuleela ariki: “Hawe owannyaa, waaphwanye ahima aa, nave waaleele ichu soothene Yehova oweerenleiye ni mukhalelo oomorenleiye ikharari.” 20 Mulopwana ole aarowa, apacerya olokoha o Tekapoli* ichu soothene Yesu aamweerenleiye, nave achu yaanatikhina.

21 Yesu amanle olapuwela okhopela ni mwaaceya, waathukumana wa yoowo muloko* mutokweene, nave owo aari muxerexere mwa ephareya. 22 Hiihaa, aarwa mmoha a asitokweene a mu nipuro na malapelo* awiichaniwa Xairu, nave aamoonneiye Yesu, aakokhora va manaani vawe. 23 Owo aamveka Yesu ikwaha sincipale ariki: “Mwanaka amwaamuthiyana ootepa wiiceliwa.* Khwoo, murwe mmukuherye matata anyu wi apenuwe ni akhale phaama.” 24 Hiihaa, Yesu aacimula ni yoowo, nave muloko muncipale wa achu waamuchara onanwomaanya.

25 Aakhalavo muthiyana aahooxeya ni ereca ya okhuma nikhami* mu iyaakha khumi napiili. 26 Owo aatepa ohooxeya* aapeeliwaka ni alipa a murece ancipale, nave aayeeha muhakhu awe woothene ahipenuwaka, ohiya yeeyo, owo aamvira atepaka. 27 Iiwaleiye vooloca sa Yesu, owo aamwaacamela oculi wawe, variyari va muloko, nave aatannya yoowara awe, 28 woona wi aanuupuwela mmurimani mwawe, ariki: “Pahiru wakhala wi kootannya yoowara awe, kinahaala openuwa.” 29 Moohilekela, owo aamaala okhuma nikhami, nave aahoona mmwiilini mwawe wi aapenuwa wa ereca yeele yootakhala.

30 Vahilekenle, Yesu aasuwela wi saakhuma mwa yoowo ikuru, nave owo aarukunuwa aloca wa muloko ariki: “Taani otannyile yoowara aka?” 31 Oohuserya awe yaalocano: “Pwiya, nyuwaano munnoona wi muloko onnoowomaanyaani, vano munakoha muriki: ‘Taani okitannyile?’” 32 Nyenya Yesu aanavarerya muloko wa achu wi amoone yoowo aamutannyile. 33 Muthiyana, athukumelaka nthowa na woova, nave asuwelaka yeeyo yeeren’ye wa yoowo, aarwa nave akokhora vamiithoni va Yesu, amuleela eparipari yoothene. 34 Yesu aaloca wa yoowo: “Mwanaka, nroromelo naa nohoopenuxa. Hawe mmureceleni, nave penuwa wa ereca aa yootakhala.”

35 Arikimuloca hiihale, yaaphiya alopwana oorweela vaate va mutokweene a mu nipuro na malapelo,* eloca: “Mwaninyu amwaamuthiyana ookhwa! Munamuukhulelani Muhusiha?” 36 Nto Yesu iiwaleiye masu yaawo, aaloca wa mutokweene a mu nipuro na malapelo:* “Ohoove,* pahiru ororomele.” 37 Nave heemerenrye wi muchu mukina amuchare, omuhiya Petru, Tiyaku, ni munnawe awiichaniwa Yohani.

38 Yaaphiyalaaya vaate va mutokweene a nipuro na malapelo,* yaaphwanya niwoowo, achu yinlaka ni yoopaka ikucho. 39 Aavolonweiye, aaloca ni yaawo ariki: “Munanlelani, mutannyaka niwoowo? Mwaana hakhwile, nto onamurupa.” 40 Mwa yeeyo, achu yaapacerya omutheya mwa munyemu. Nyenya amanle waaruma achu okhumela vaate, Yesu aahaakuxa apapa awe mwaana vamoha ni amama awe ni yaale aareiyeno, eya weiwo aariwo mwaana. 41 Voocharela, apharaka ntata na mwaana, aalocano: “Talitha kumi,” masu yaawo anataphulela: “Nahano, kinnooleela, vinya!” 42 Moohilekela, nahano aavinya apacerya weeca. (Owo aarino iyaakha khumi napiili.) Mwawiihiiha, makholo a mwaana hiyaawenrye okhuwa ohakalala waya otokweene. 43 Nyenya, aahaalopola* wiiliwiili wi ehimuleele muchu mukina sa yeela, nave tho aahaaleela wi emvahe yoolya.