Marku

14 Yaahanle mahiku meeli wi niphiye nihiku na Paska ni na Efesta ya Ipaau Soohiheliwa Yooruruvaliha. Ahooleli a alipa a mukucho ni alipa oorepa yaanaavyaavya meerelo a omphara Yesu mwamiruku nave wi emwiiphe; 2 nto yaanaloca: “Ehikhale elukuluku ya efesta; akhweya onamukhalavo mukhico variyari va achu.”

3 Vaavaa Yesu aareiye o Petaniya alyaaka* vaate va Simoni, yoowo khalai aarino mareca, aarwa muthiyana akunxe nipotoro na alapastru, yaarimo makhurwa awunkhela, a nartu aphaama ni oowalamelaxa. Owo aapwexa wi ahule nipotoro na alapastru nave apacerya omiinela vamuru va Yesu. 4 Mwawiihiiha, akina yaatikhina, enaloca yaawoyaawo eriki: “Makhurwa ala anayeehereliwa heeni? 5 Tiwi, makhurwa ala yaaphwanela otumihiwa ni itenaariyu opwaha masana mararu, nave ikhorowa sene evahiwe alipa oohaawa!” Awo yaatepa onyeenyeya ni muthiyana yoole.* 6 Nyenya Yesu aahi: “Mmuhiye. Ntakhara heeni munamuukhulaanyu muthiyana? Ola okeerenle echu yaphaama. 7 Tiwi achu oohaawa eni enakhala ni nyuwo mahiku oothene, nave munanwerya oweerelaka saphaama ophiyerya vaavaa munachunelaanyuvo, nto miyo nkikhala ni nyuwo mahiku oothene. 8 Muthiyana ola eenreno yeeyo owenryeiye; ehiphiyenrye elukuluku ya ovithiwa waka, ooyeeherya makhurwa awunkhela mwiili aka. 9 Chiri kinnooleelaani wi, mu elapo yoothene weiwo michaka saphaama ineeraaya ilaleeryiwewo, yeeyo muthiyana ola enreiye, ekaamulociwa uupuweliwaka yoowo.”

10 Yutasi Iskariyoti, mmoha a oohuserya Khumi Napiili, aaya wa ahooleli a alipa a mukucho wi amveleele Yesu. 11 Yiiwalaaya yeeyo, awo yaatepa ohakalala nave emuroromeliha omvaha ikhorowa sa eparata. Mwawiihiiha, owo aapacerya waavyaavya ekari ya omveleela Yesu.

12 Mu nihiku noopacerya na Efesta ya Ipaau Soohiheliwa Yooruruvaliha, ntoko yaakhovelenlaaya ovaha mukucho wa Paska, oohuserya yaahi wa Yesu: “Munachuna wi narehererye woowi wi mwamulyewo Paska?” 13 Mwa yeeyo, Yesu aahaaruma oohuserya awe apiili ariki: “Muye opooma, munamukumana ni mulopwana ateenxe muno wa maahi. Mmuchare yoowo, 14 empa oneereiye avolowe, muloce ni mwaneene a vaate muriki: ‘Muhusiha oriye: “Nri woowi nipuro na aleco, wi kimulyewo Paska ni oohuserya aka?”’ 15 Owo onanwoonihaani nipuro ntokweene noosulu nooreheryiwa phaama ni ichu saya. Munreheryele Paska weiwo.” 16 Mwawiihiiha, oohuserya yaacimula, evolowa opooma ni ephwanya hiihaa ntoko Yesu aaleenleiye, nave yaamurehererya Paska.

17 Wiilakavo, Yesu aaphiya ni oohuserya awe Khumi Napiili. 18 Nave yaahaamenlaaya meesa elyaaka, Yesu aaloca ariki: “Chiri kinnooleelaani wi, mmoha a nyuwo, yoowo onalya ni miyo, onamukiveleela.” 19 Oohuserya yaahitepa othanana, nave mmoha ti mmoha aapacerya omukoha: “Apwanne ti miyaano?” 20 Owo aawaakhula: “Mmoha a nyuwo Khumi Napiili, yoowo onarerya vamoha ni miyo mparathoni. 21 Mwaana a muchu onampwahavo, hiiha ntoko erempwaaya vooloca sa yoowo, nto ootakhaliwa ti yoowo oni amveleele Mwaana a muchu! Yaamukhala yaphaama wa muchu yoowo ahiyariweru.”

22 Erikimulya hiihale, Yesu aakuxa epaau, areeliha, akawanya, nave aavaha yaawo ariki: “Kuxani; ela eneemelela mwiili aka.” 23 Nave aamukunxeiye koopho a eviinyu, aahivekela, aavaha yaawo, nave oothene yaawurya. 24 Nave owo aahi wa yaawo: “Ela eneemelela ‘nikhami na waataana’ nnarwa wa miyo, nenlo nnahaala oyeehiwa wi evuluxiwe ancipale. 25 Chiri kinnooleelaani wi, nkirwa kiwurya tho yawiima yeela ya uuva,* ophiyerya nihiku nenlo kineeraaka kiwurye evyaani mu Omwene wa Muluku.” 26 Wuukuchulani, emanle wiipa macipo oomucicimihano Muluku,* yaacimula eyaaka o Mwaako wa Asitona.

27 Yesu aahi wa yaawo: “Oothene nyuwo munamukwaculeya, vawi yoorempwa: ‘Kinammwiipha mukukhula, nave ipucepuche inammwalamwala.’ 28 Nto kimanle oviihiwa mookhwani, kinamuya ohoolo wanyu o Kalileya.” 29 Nyenya Petru aamwaakhula: “Naamwi oothene akina ekwaculen’ye, miyaano nkirwa kikwaculeya.” 30 Yesu aahi wa yoowo: “Chiri kinnooleela wi olelo, aa, ohiyu ene yoola, muthupi ohaakumve wiipa ikwaha piili, weyaano onamukikhooca ikwaha raru.” 31 Nto Petru aatitelela oloca ariki: “Naari erimwiiwa wi kikhwe ni nyuwo, nkirwa kookhoocaani.” Nave tho, oothene akina yaaloca emohamoha.

32 Hiihaa, yaahiphiya o nipuro nawiichaniwa Ketsemani, nave aahi wa oohuserya awe: “Mukiraathi vaava, kiyaaka ovekela.” 33 Aamukuxa Petru, Tiyaku, vamoha ni Yohani, nave aapacerya othananaxa ni wuukhuwa vancipale. 34 Owo aaloca ni yaawo: “Murima aka* wootepa othanana ophiyerya okhwa. Mukhale vaava nave mutitelele olipelela.” 35 Eenceiye vakhaani, owo aahuuramela vathi, anavekela wi, wakhala wooweryeya, elukuluku eyo yookacamiha ehiphiye. 36 Nave owo aanavekela ariki: “Aapa,* Tiithi, ichu soothene ti sooweryeya wa nyuwo; mumviihevo koopho ola wa miyo. Nto, oheereye okhwela waka, nyenya okhwela wanyu.” 37 Owo aahikooka aaphwanya erikimurupa, nave aaloca wa Petru ii: “Simoni, onamurupa? Hiwaarino ikuru sa otitelela olipelela mu ewora emoha mano? 38 Mutitelele olipelela nave mvekeleke moohihiyererya, wi muhuuwele muweehiwani. Mweeparipari, munepa onnakhwela,* nto mwiili ti wooceecheya.” 39 Owo aapwaha wanaawiili, anavekela alocaka echu emohamoha. 40 Aakookela tho wa yaawo aaphwanya erikimurupa, ntakhara miitho aya yaanaalimelaxa; mwawiihiiha, awo yaahaleela omwaakhula. 41 Nave aakonkeiye ekwaha yaneeraru, aaloca wa yaawo ariki: “Elukuluku si yeela munamurupa ni wiichuuwa! Waaca vaava! Yoophiya ewora wi Mwaana a muchu aveleeliwe mmatani mwa alipa oocheka! 42 Vinyani, nipwaheke. Onani! Yoole oni akiveleele onnaacamela.”

43 Yesu arikimuloca hiihale, moohilekela Yutasi mmoha a oohuserya Khumi Napiili, aaphiya vamoha ni muloko wa achu epharenle masipaaca ni ikopo, erummwale ni ahooleli a alipa a mukucho, alipa oorepa ni asitokweene. 44 Yoole aahaala omveleela, aahaavaha eneneeryo ariki: “Yoowo kineeraaka kimvahe epeexu,* ti yoowo; mumphare nave muhimuhiye wi achawe.” 45 Mwawiihiiha, Yutasi aaya wa Yesu, amwaacamela yoowo, aloca: “Rapi!” nave amvaha epeexu.* 46 Voocharela, achu yaamphara Yesu nave emmaka. 47 Nto mmoha a yaale yaari vaavale aahulula nsipaaca nawe, akwasa naaru na kapuro a mulipa a mukucho mutokweene. 48 Nyenya Yesu aaloca: “Nyuwaano munarweela okiphara, murino masipaaca ni ikopo ntoko wi ka mpava? 49 Nihiku nnihiku kaanakhala ni nyuwo mu empa ya Muluku kihusihaka, nto himwaakiphanre. Nyenya, iha soheereya wi saakhwanele Soorepa.”

50 Nave oohuserya oothene yaamuhiya nave echawa. 51 Aakhalavo tho mmiravo aamuchara, yoowo iikhuneenle pahi ni yoowara ya eliinyu,* nyenya awo yaaheererya omphara, 52 nto owo aahiya yoowara awe ya eliinyu, achawa epwitikiri ene.*

53 Awo yaamukuxa Yesu emukeriha wa mulipa a mukucho mutokweene, nave ahooleli a alipa a mukucho, asitokweene ni alipa oorepa yaathukumana. 54 Nto Petru aanamuchara ari ocaicai, ophiyerya vaate va mulipa a mukucho mutokweene; nave aakiraathi vamoha ni anamuteko, anoora mooro. 55 Ahooleli a alipa a mukucho ni Sineetriyu* oothene, yaanawaavya anamoona wi emootherye Yesu ni yoolakelela ya omwiipha, nyenya hiyamphwanyenrye mathowa. 56 Mweeparipari, ancipale yaanavaha onamoona wawootha, nyenya onamoona aya hiwaari wawiiwanana. 57 Nave tho, akina yaaneemela, enavaha onamoona wawootha eriki: 58 “Noomwiiwa mulopwana ola ariki: ‘Kinamukumula empa ela ya Muluku etekiwe ni matata aachu, nave mmahiku mararu kinamuteka ekina yoohitekiwa ni matata aachu.’” 59 Naamwi hiihaa, onamoona aya hiwaari wawiiwanana.

60 Mwawiihiiha, mulipa a mukucho mutokweene aavinya, eemela ohoolo wa achu, amukoha Yesu ariki: “Weyaano honaakhularu echu? Apwanne honiiwa yeeyo achu ala anoosomelaaya?” 61 Nto owo aatitelela omaala nave haakhunleru echu. Mulipa a mukucho mutokweene aamukoha tho wanaawiili ariki: “Weyaano wa Kristu, Mwaana a Muluku Oocicimiheya?” 62 Voocharela Yesu aahi: “Ti yoomi; nave munammoona Mwaana a muchu akiraanthe omoono woolopwana wa Muluku Aikuru Soothene, arwaaka mmeekuni wirimu.” 63 Mwawiihiiha, mulipa a mukucho mutokweene aahaahula soowara sawe, alocaka: “Apwanne annachuneya anamoona akina? 64 Mohiiwa omunyemula wawe Muluku. Teevi eri yoolakelela anyu?”* Oothene yaalakelela wi owo aaphwanela wiiphiwa. 65 Nave akina yaapacerya omutaphera mara, emukhuneela owanoni wawe, enammana eriki: “Anyiherya!” Emanle omvaha mapuraata owanoni, anakhoco yaamukuxa.

66 Vano Petru, ari vaate vaavale vathi, aaphiya namuteko mmoha amwaamuthiyana a mulipa a mukucho mutokweene. 67 Aamonneiye Petru ooraka mooro, anweha, aloca ariki: “Weyaano tho waari ni Yesu, Munaasareti!” 68 Nto Petru aakhooca, ariki: “Nkimusuwenle naari mano nkinasuwela echu onalocaawe,” nave owo aapwahavo aya waacamela va mulako. 69 Namuteko mukina amwaamuthiyana aamoona nave apacerya waaleela yaale yaari vaavale ariki: “Ola mmoha a yaale.” 70 Owo aakhooca tho. Nave evinre elukuluku vakhaani, yaale yaari vaavale yaapacerya oloca ni Petru eriki: “Chiryene weyo wa mmoha a yaale, woona wi wa Mukalileya.” 71 Nyenya owo aapacerya wiisuulumela, alipelaka: “Miyaano nkimusuwenleru mulopwana yoola munamulocaanyu!” 72 Moohilekela muthupi waahiipa ekwaha yanaawiili, nave Petru aahuupuwela yeeyo Yesu aalonceiye ariki: “Muthupi ohaakumve wiipa ikwaha piili, weyaano onamukikhooca ikwaha raru.” Owo aasooseya murima nave apacerya winla.