Ahepri

1 Khalai, Muluku aaloca ni makholo ahu moorweela wa alipa a miririmu, mu ilukuluku sincipale ni mmakhalelo mancipale. 2 Vano, omakuchuwelo wa mahiku yaala, owo ooloca ni hiyo moorweela wa Mwaana, yoowo omuthanlileiye okhala mukelampa a ichu soothesene nave moorweela wa yoowo opankeiye mikhalelo sa ichu.* 3 Owo mooneiho wa ncicimiho na Muluku, eruku yeeparipari ya okhala wawe nave onalipiha ichu soothene ni masu awe akuru. Nave amanle weeliha soocheka sahu, owo ookiraathi omoono woolopwana wa Mutokweene wirimu. 4 Mwawiihiiha, owo aakhala mutokweene a ankeelo, woona wi ohaakhela nsina naphaamaxa opwaha nawaya.

5 Ntoko yootakiherya, munkeelo taani Muluku aatonkeiye olocano ariki: “Weyo wa mwanaka; olelo miyo kookhala tiithi aa”? Nave tho: “Miyo kinarwa kikhala tiithi awe, nave owo onarwa akhala Mwanaka”? 6 Nto aamuruuhaleiye wanaawiili veelaponi yavathi Mwanawe oopacerya oyariwa, owo aaloca: “Ankeelo oothene a Muluku emucicimihe.”*

7 Nave tho, owo onnaloca sa ankeelo awe: “Owo onnaweera ankeelo awe minepa sakuru,* nave arummwa awe makalume a mooro.” 8 Nto vooloca sa Mwaana, owo aahi: “Muluku ti munyukhu aa okhala wookhala, nave ekopo ya Omwene aa eni ekhale ekopo yawookololowa.* 9 Nyuwo munnasivela wookololowa, nave munniica sootakhala. Ti nthowa nene Muluku, Muluku anyu, oomiinenleiyeni makhurwa a ohakalala waapwaha akhwiinyu.” 10 Nave: “Voopaceryani nyuwo Pwiya, mwatikitherya mathipelo a elapo nave irimu ti miteko sa matata anyu. 11 Iho inamurimeela, nto nyuwo munamutitelela okhala; nave hiiha ntoko soowara, iho inahaala othaala, 12 nyuwo munarwa muupaanya ntoko ekuwo, nave ntoko soowara, iho inarwa itorokiwa. Nto nyuwo hamunatorokeya, nave iyaakha sanyu hirwa ikhalano makuchuwelo.”

13 Nyenya munkeelo taani owo aatonkeiye olocano ariki: “Okiraathi o ntata naka noolopwana, ophiyerya kaakunhe amwiicani aa vathi va inaani saa”? 14 Apwanne oothene awo hari minepa anaphara muteko waweela, nave anarummwa wi yaakhaviherye yaawo anahaala ovuluxiwa?