Nehemiya

1 Masu a Nehemiya* mwaana a Hakaliya: Mu mweeri wa Kixilewu,* mu eyaakha ya makhumi meeli, miyaano kaari o Susa o empa yoolipihiwa.* 2 Mu elukuluku yeele, Hananiya, mmoha a asinnaka, aaphiya vamoha ni alopwana akina erwaaka o Yuta, nave kaahaakoha vooloca sa Ayuta oohalela yaawo yaakophonle wookapuroni, nave tho vooloca sa Yerusalemu. 3 Awo yaahaakhula: “Yaawo ahanle o eprovinsiya* nave akophonle wookapuroni ari mmukhalelo woothananiha ni wawuuliha muru. Ixiri so Yerusalemu sookumuliwa, nave milako saya soosukiwa ni mooro.”

4 Vaavaa kiiwalaaka masu yaala, kaakiraathi, kipacerya winla ni othanana mahiku mancipale, nave kaahiinanela olya ni ovekela vamiithoni va Muluku a wirimu. 5 Kaaloca kiriki: “Khwoo Yehova, Muluku a wirimu, Muluku mutokweene ni awoopiha yoowo onakhapelela nlakano nawe, nave onooniherya osivela woororomeleya wa yaale anamusivela yoowo nave anakhapelela malamulo awe, 6 muhineera, miitho anyu ekhale oohuleya nave iwaru sanyu siiwe nivekelo na mulapeli anyu, nenlo olelo kinapakaaka vamiithoni vanyu. Kinnavekela othana ni ohiyu, vooloca sa alapeli anyu Aisarayeli, kilokohaka soocheka sa nloko na Isarayeli seiho yoochekenlaayaani. Hiyaano noocheka, oothene miyaano ni echoko ya atiithi aka. 7 Chiryeene hiyaano nohoochekelaani moorweela wa ohiiwelela malamulo, malakiheryo ni mathorihelo yaawo mwaamvanhaanyu mulapeli anyu Mose.

8 “Khwoo, muupuwele masu yaawo mwaamulamulenlaanyu* mulapeli anyu Mose wi: ‘Wakhala wi moheerano ichu moohiroromeleya, kinamoomwaramwasaani variyari va maloko. 9 Nyenya wakhala wi mookookela wa miyo, muniiwelela ni okhapelela malamulo aka, naamwi nyuwaano mmwalamwalenle ophiyerya weiwo elapo ekotenlaayawo, kinamoothukumanyaani ni wookerihaani mu nipuro nenlo kaathanlilaaka wi nikhalewo nsina naka.’ 10 Awo alapeli anyu ni achu anyu yaawo mwaavulunxaanyu moorweela wa owerya wanyu otokweene ni ntata nanyu nakuru. 11 Khwoo Yehova muhineera, nwiriyane nivekelo na mulapeli anyu ni mavekelo a alapeli anyu, yaawo anasiveliwa woova nsina nanyu. Khwoo, mweerihe wi mulapeli anyu akhumelele phaama olelo ni wi mulopwana ola* ooniherye niphwanya wa miyo.”

Mu elukuluku yeeyo, kaari muhooleli a soowurya sa mwene.