Titu

2 Vano weyo, otitelele oloca masu ari mwawiiwanana ni mahusiheryo aphaama.* 2 Alopwana awuuluvala anaphwanela okhala awiiphimelela mu ichu soothene, oocicimiherya, awiisuumaaliha, aphaama mu nroromelo, mu osivela, mu ovilela. 3 Moolikana tho, athiyana awuuluvala anaphwanela okhalano meecelo oomucicimiha Muluku, ehikhale awaapa naari akapuro a eviinyu. Ekhale ahusiha a yeeyo eri yaphaama, 4 wi yaavaheke miruku* athiyana akhaani wi yaasiveleke asiiyaya, yaasiveleke anaaya, 5 wi ekhale amiruku, ekhaleno meecelo aphaama, oowetha mmiteko sa vaate,* ooreera murima, oowiiwelela asiiyaya, wi masu a Muluku ehilociwe moonanara.

6 Moolikana tho, otitelele waaceenyerya amiravo wi ekhale amiruku, 7 nave yoowe ene okhale yootakiherya ya miteko saphaama mu soothene. Ohusihe yeeyo eri yeeparipari moohoovelela, 8 opharihelaka masu aphaama* yaawo ahinawerya ovaanyihiwa, wi amwiicani yuuliheye muru, ehirino echu yoonanara* ya oloca sa hiyaano. 9 Akapuro ewiiweleleke asipwiyaya mu ichu soothesene, yaavyaka waahakalaliha, ohiya waahucukula.* 10 Ehiwiiyeryaka yaawo, nto yooniheryaka wi ari oororomeleya mwawaakhwanela, wi mu soothene, ereerihe mahusiheryo a Mvuluxa ahu, Muluku.

11 Woona wi mahala matokweene a Muluku ahoonihiwa, eruuhaka ovuluxa wa achu a mukhalelo woothene. 12 Mahala yaala annanivyakiha okhooca ichu soothene sihiniiwanana ni yookhwela ya Muluku, minkhela seelapo, nave wi nikhale amiruku, awookololowa nimucicimihaka Muluku veeri wa mukhalelo yoola wa ichu wa mutano,* 13 niweheryaka ewehereryo yoohakalaliha ni woonihiwa wa ncicimiho na Muluku mutokotoko ni na Mvuluxa ahu Yesu Kristu, 14 yoowo iivelenle wa hiyo wi anivuluxe* wa soonanara soothene ni wiiseeliherya mwaneene nloko navameekhaaya wi nikhale nawawe, na mvai mmiteko saphaama.

15 Otitelele ohusiha ichu seiha, oceenyerya* ni waasamela akina woona wi wookhalano owerya wa opaka ichu seiha. Oheemererye wi muchu oonyemule.