Yohani

11 Mulopwana mmoha awiichaniwa Lasaro aaniiceliwa; owo aari o Petaniya, muceche yoowo Mariya ni murokora awe Marta yaakhalaayawo. 2 Aari Mariya yoola aamiinenle Apwiya makhurwa awunkhela nave apupucha inaani saya ni miihi awe; ola aari murokora a Lasaro yoowo iiceliwa. 3 Mwawiihiiha, arokora a Lasaro yaamurumihela Yesu michaka eriki: “Pwiya, nthamwene anyu yoole munamusivelaanyu vancipale onamwiiceliwa.” 4 Nyenya vaavaa Yesu iiwaleiye michaka iha, owo aaloca: “Ereca eyo tahi yookhwano, nyenya ti yoomucicimihano Muluku, wi Mwaana a Muluku acicimihiwe moorweela wa yeeyo.”

5 Yesu aanamusivela Marta, Mariya ni Lasaro. 6 Naamwi hiihaa, vaavaa iiwaleiye wi Lasaro onamwiiceliwa, owo aatitelela okhala nipuro nenlo aareiyewo mahiku meeli. 7 Voocharela, aaloca ni oohuserya awe ariki: “Hankooni nikookele o Yuteya.” 8 Oohuserya yaahi wa yoowo: “Rapi, hiihaanoru achu o Yuteya yaanachuna woovonyaani maluku, vano munachuna okookelawo?” 9 Yesu aawaakhula: “Othana hiwaano iwora khumi napiili? Wakhala wi muchu onneeca othana owo hanakwaculiwa nthowa nawi onnoona omwaleela wa elapo yeela. 10 Nyenya wakhala wi muchu onneeca ohiyu, owo onnakwaculiwa, woona wi omwaleela hori mwa yoowo.”

11 Aamanleiye oloca ichu seiha, owo aahaaceererya: “Lasaro nthamwene ahu onamurupa, nyenya kinaya weiwo wi kamviihe.” 12 Oohuserya yaahi wa yoowo: “Pwiya, waakhanle wi onamurupa, onamukhala phaama.” 13 Nto Yesu aaloca sa okhwa wa Lasaro. Nyenya awo yuupuwela wi aaloca sa orupa wa nthowa na ikhove. 14 Voocharela Yesu aaloca mookwakwaleya: “Lasaro ookhwa, 15 nave wa nthowa nanyu, kinnahakalala ohikhala waka weiwo, woona wi munahaala okeemererya. Nyenya hankooni weiwo oreiyewo.” 16 Mwawiihiiha, Tomasi, awiichaniwa Maphapo, aaloca ni oohuserya akhwaawe: “Hankooni hiyo tho wi nakhwe ni yoowo.”

17 Vaavaa Yesu aaphin’yeiye, aasuwela wi yaavinre mahiku maxexe Lasaro avithiwe mu nihiyeni.* 18 Muceche wo Petaniya waacamenle o Yerusalemu, orakamelana waya waari echu ya ikilomeeturu raru.* 19 Nave Ayuta ancipale yaaya omuhakararya Marta ni Mariya wanthowa na okhwa wa munnaya. 20 Vaavaa Marta iiwaleiye wi Yesu onnarwa, owo aamuthikirerya; nyenya Mariya aahanle owaani akiranthe. 21 Voocharela Marta aaloca wa Yesu ariki: “Pwiya, mwaari wenno, munnaka hakaakhwile. 22 Nyenya naamwi hiihaa, koosuwela wi yeeyo muneeraanyu mumveke Muluku, owo onamoovahaani.” 23 Yesu aaloca ni Marta ariki: “Munnaa onamvinya mookhwani.” 24 Marta aahi wa yoowo: “Koosuwela wi onarwa avinya mu ovinya mookhwani mu nihiku nookuchula.” 25 Yesu aahi wa yoowo: “Miyaano ka ovinya mookhwani ni okumi. Yoole onakiroromela, naamwi akhwile, onamukookela okhala mukumi; 26 nave oothene yoole ori mukumi nave onakiroromela miyo, harwa akhwa. Onnaroromela yeela?” 27 Marta aamwaakhula: “Aa Pwiya, kinnaroromela wi nyuwo mwa Kristu, Mwaana a Muluku, yoowo aahaala orwa veelaponi yavathi.” 28 Aamanleiye oloca yeela, aaya omwiichana murokora awe awiichaniwa Mariya, amuleela moovitheya ariki: “Muhusiha ori wenno nave onnawiichana.” 29 Vaavaa iiwaleiye masu yaala, aavinya mwawaakuveya amuthikirerya Yesu.

30 Nlelo Yesu haavolonwe mpooma, nyenya aari nipuro nenle aakumanneiyevo ni Marta. 31 Ayuta yaale yaari ni Mariya vaate vaavale emuhakararyaka, yaamonnaaya akhumaka mwawaakuveya, yaamuchara yuupuwelaka wi onaya winlaka omahiye.* 32 Vaavaa Mariya aaphin’yeiye nipuro nenle aareiyevo Yesu nave amoona, aakokhora va manaani awe aloca ariki: “Pwiya, mwaari wenno, munnaka hakaakhwile.” 33 Vaavaa Yesu aamonneiye inlaka vamoha ni Ayuta yaawo yinlaka tho, owo aahuukhuwaxa mpuwa mwawe* nave aathanana. 34 Owo aakoha: “Mumvinthe woowi?” Awo yaamwaakhula: “Pwiya rwaani moone.” 35 Yesu aapacerya winla. 36 Mwa yeeyo, Ayuta yaapacerya oloca eriki: “Nkoonani, aanatepa omusivela!” 37 Nyenya akina yaanaloca eriki: “Mulopwana ola ohunle miitho a mulipa eevaasi, hakaawenrye weeravo echu wi Lasaro ahikhwe?”

38 Hiihaa, nlelo ari awuukhuwaxa, Yesu aaya o nihiye.* Mweeparipari, nla naari nikhuku nave mulako aya waaciyeliwe ni nluku. 39 Yesu aahi: “Mviihevo nluku.” Marta, murokora a mulipa ookhwa, aaloca ni Yesu ariki: “Pwiya, woonaru owo oopacerya wunkha, vawi aaviravo mahiku maxexe.” 40 Yesu aamwaakhula ariki: “Nkooleenle wi waroromela onamoona ncicimiho na Muluku?” 41 Mwawiihiiha, awo yaaviihavo nluku. Voocharela, Yesu aaviiha miitho awe aweha wirimu aloca ariki: “Tiithi, kinnoothamalelaani vawi mookiiwa. 42 Mweeparipari, koosuwela wi munnakiiwa ilukuluku soothene, nto kilonce yeela wa nthowa na muloko wa achu weemenle vaava, wi ororomele wi nyuwo mukirumme.” 43 Aamalinheiye oloca yeela, Yesu aaloca ni masu oovuwa ariki: “Lasaro, khuma!” 44 Mulopwana yoole aakhwile, aakhuma apicikheleliwe ni ikuwo mmeconi ni mmatani nave ekhuneeliwe ethoi awe ni ekuwo. Yesu aahi wa yaawo: “Mutaphuleeni nave mmuhiye aroweke.”

45 Mwawiihiiha, Ayuta ancipale yaawo yaakele omuxekurya Mariya, yoonnaaya yeeyo Yesu enreiye yaamuroromela yoowo, 46 nyenya akina yaaya waaleela Afarisi yeeyo Yesu enreiye. 47 Mwawiihiiha, ahooleli a alipa a mukucho ni Afarisi yaathukumanya Esineetriyu* enaloca eriki: “Tiheeni nnaphwanelaahu weera, woona wi mulopwana ola onnapaka ineneeryo sincipale?” 48 Namuhiya hiiha, achu oothene anammuroromela yoowo nave Aroma anamurwa ekuxe nipuro nahu* ni nloko nahu.” 49 Nyenya mmoha a yaawo, awiichaniwa Kayafa, yoowo aari mulipa a mukucho mutokweene mu eyaakha yeele, aaloca wa yaawo ariki: “Nyuwaano hamusuwenle echu, 50 naari hamunoona wi ti yaphaama wa nyuwo wi muchu mmoha akhwe ntakhara achu, ohiya wi nloko noothene ntoloxiwe.” 51 Yoola haalonce yeela mwa meekheiye, nto aalonce mwa miririmu wi Yesu aaya okhwa wanthowa na muloko, vawi aari mulipa a mukucho mutokotoko muyakha yoole. 52 Nyenya ohiya pahiru okhwa ntakhara muloko, nto wi aathukumanye anamwane a Muluku amwalamwanle wi ekhale muloko mmoharu. 53 Mwawiihiiha, ovinyerya nihiku nenle awo yaavaanela omwiipha.

54 Mwa yeela, Yesu heeca variyari va Ayuta ooniwaka, nyenya aacimula ayaaka muceche yoowo waacamenle otakhwani, epooma yawiichaniwa Efarayimu, nave aakhala weiwo ni oohuserya awe. 55 Vano Paska a Ayuta aanaacamela, nave achu ancipale yaanavinya mmawaani ewelaka eyaaka o Yerusalemu ahaakumve Paska wi yiiseelihe mwawiiwanana ni nlamulo. 56 Awo yaanamwaavya Yesu, nave yaanaloca mukina ni mukhwaawe mu empa ya Muluku eriki: “Munoona hai? Apwanne chiryene harwaru va efesta yeela?” 57 Ahooleli a alipa a mukucho ni Afarisi yaalamulela wi yoole oni asuwele Yesu oreiyewo, aaleele, wi yamphare.*