1 Yohani

4 Oosiveliwa, muhiroromeleke masu oothene ooveereliwa,* nyenya mvarerye masu ooveereliwa* wi moone waakhanle wi awo anarweela wa Muluku, woona wi alipa a miririmu ancipale oowoka aasareya mweelaponi.

2 Ola mukhalelo muneeraanyu musuwele waakhanle wi masu ooveereliwa, anarweela wa Muluku: Masu oothene ooveereliwa aneemererya wi Yesu Kristu oorwa mwa mwiili anarweela wa Muluku. 3 Nyenya masu oothene ooveereliwa ahinamweemererya Yesu hanarweela wa Muluku. Ohiya yeeyo, ala masu ooveereliwa a yoole awiiseera kristu yoowo mwiiwalaanyu wi aahaala orwa, nave hiihaano ori mweelaponi.

4 Anamwane oosiveliwa, nyuwo munarweela wa Muluku nave mohaavootha yaawo, woona wi yoole ori mwawiiwanana ni nyuwo mutokweene ompwaha yoole ori mwawiiwanana ni elapo. 5 Alipa a miririmu oowoka yaala anarweela mweelaponi; ti nthowa nene wi yeeyo analocaaya enarweela mweelaponi nave elapo ennaawiriyana. 6 Hiyo nnarweela wa Muluku. Yoole omusuwenle Muluku onnaniwiriyana; yoole ohinarweela wa Muluku hananiwiriyana. Moorweela wa yeela ninnahiyaniha masu ooveereliwa a eparipari ni masu ooveereliwa a yoohesa.

7 Oosiveliwa, ntitelele osivelana mukina ni mukhwaawe, woona wi osivela onarweela wa Muluku, nave oothene yoole onasivela oyariwe wa Muluku nave oomusuwela Muluku. 8 Yoole ohirino osivela hamusuwenle Muluku, woona wi Muluku ti osivela. 9 Moorweela wa yeela, osivela wa Muluku wohuupululiwa wa hiyo, wi Muluku aamurumiha Mwanawe ooyariwa meekheiye wi niwerye okhalano okumi moorweela wa yoowo. 10 Osivela wene tuula: Ohiya wi hiyaano nimusivenle Muluku, nyenya wi owo tonisivenle nave amurumiha Mwanawe ntoko mukucho wooxipihano* soocheka sahu.

11 Waakhanle wi Muluku onisivenle hiiha, mwa yeeyo nnaphwanela tho osivelanaka mukina ni mukhwaawe. 12 Haavo ontonko omoona Muluku. Wakhala wi nootitelela osivelana mukina ni mukhwaawe, Muluku onamwiikhalelaru mwa hiyo, nave osivela wawe onnaakhwanela mwa hiyo. 13 Moorweela wa yeela ninnasuwela wi hiyaano ninnatitelela okhala mwawiiwanana ni yoowo nave owo mwawiiwanana ni hiyo, woona wi oonivaha munepa awe. 14 Mwawaaceererya, yeehu ene nohoona nave vano ninneerela onamoona wi Atiithi aamuruma Mwanaya ntoko mvuluxa a elapo. 15 Yoole oneemererya wi Yesu Mwaana a Muluku, Muluku onniikhalelaru mwawiiwanana ni yoowo nave owo mwawiiwanana ni Muluku. 16 Hiyaano noosuwela nave ninneemererya osivela yoowo Muluku oreiyeno wa hiyo.

Muluku ti osivela, nave yoowo onatitelela okhala mu osivela onniikhalelaru mwawiiwanana ni Muluku, nave Muluku onnatitelela okhala mwawiiwanana ni yoowo. 17 Mmukhalelo yoola osivela ti waakhwaniheryiwaaya mwa hiyo, wi hiyo niwerye oloca moohoovelela* mu nihiku na othoriha, woona wi hiiha ntoko owo* oreiye, hiyaano tho nri hiiha mu elapo yeela. 18 Mu osivela hiwaamo woova, nyenya osivela wawaakhwanela onniikara* woova, woona wi woova onnanihiiha. Chiryene, yoole onoova haakhwaniheryiwe mu osivela. 19 Hiyaano ninnasivela, woona wi Muluku tapacenrye onisivela.

20 Wakhala wi muchu ooloca: “Miyaano kinnamusivela Muluku,” nto naamwi hiiha anamwiica munnawe, owo mulipa a wootha. Woona wi yoole ohinamusivela munnawe, yoowo onamooneiye, hawerya omusivela Muluku, yoowo ohinamooneiye. 21 Nave nohaakhela nlamulo nla noorweela wa yoowo: Yoole onamusivela Muluku onaphwanela tho omusivelaka munnawe.