MWAHA WA EKAAPA | OVINYA MOOKHWANI TI WOOWERYEYA?

Yookhalavo Ewehereryo wa Alipa Ookhwa?

Achu ookhwa anamukhala wanaawiili?

NAAKHULO NA PIIPILIYA: “Nihiku ninnorwa, nenlo othene ari m’mahiyeni enarwa yiwa masu [a Yesu], ekhuma.”​—Yohane 5:28, 29.

Mmukhalelo yoola Yesu aaloca sa elukuluku ya omwaahiyu yeeyo moorweela wa Omwene, Mahiye anahaalaaya ohuleya. Fernanto onnaloca: “Kaatepa otikhiniheya vaavaa kaamwaalakhannyaaka Yohane 5:28, 29 mu ekwaha yoopacerya. Ela yaakivaha ewehereryo yeeparipari, nave kaapacerya wuupuwelela omwaahiyu ni moonelo waphaama.”

Mi ilukuluku sa khalai, Yupu aanaweherya wi amanle okhwa, Muluku aahaala omukookiherya okumi. Yupu aakoha: “Mutxhu okhwile onnakòka akhala?” Nave ni nroromelo aahaakhula: “Miyano, kinan’wehererya [mmahiyeni] ilukuluku saphama, . . . Nyuwano munamukitxhana nave miyano kinamwakhula.”​—Yobi 14:14, 15, BNM.

Ovinya mookhwani hiwaari mwaha muvyaani wa Malita murokora a Lasaro. Vaavaa Lasaro aakhwileiye, Yesu aaloca wa Malita: “Munná anarwa-avinyatho.” Malita aakhunle hai: “Kinnasuwela wi anarwa-avinyatho mu ovinyatho nihiku nokutchula.” Yesu aahi wa yoowo: “Miyo kiri ovinyatho ni okumi: óroromela mwa Miyo, nari akhwile, anarwa-akhala ni okumi.” (Yohane 11:23-25) Voocharela Yesu aamviiha Lasaro! Yaweereya yeela yootannya murima ennanooniherya yeeyo enahaala weereya omwaahiyu mmukhalelo wawunlaana. Mwaanyiherye achu eviihiwaka mookhwani mweelapo yoothene!

Apwanne aakhala anahaala oviihiwa wi eye wirimu?

NAAKHULO NA PIIPILIYA: Masu a Muluku annooniherya wi oviihiwa mookhwani wa Yesu onnahiyana ni ovinya mookhwani wa achu athanu nararu aromoliwe mu Piipiliya. Achu yaale athanu nararu yaaviihiwe wi ekhaleke veelaponi ya vathi. Nyenya vooloca sa ovinya wa Yesu, ninnaalakhanya: “Yesu Kristu; yowo anakhala va ntatani nolopwana na Muluku, avoloiye wirimu.” (1 Petro 3:21, 22) Apwanne Yesu aahaala okhala yooworu aahaala oviihiwa wi aye wirimu? Yesu aahaaleela oomuchara awe: “Nave karowa woryeheryelani nyuwo nipuro, kinakokatho, nave kinarwa-kiwakhelani nyuwo wa Miyo mekhaka; wi wiwo kiriakawo Miyo iwo, mwakhale nyuwotho.”​—Yohane 14:3.

Yesu aaya wirimu wi areherye nipuro ntakhara oohuserya awe. Ale anahaala oviihiwa wi eye wirimu waaca waya ari 144.000. (Yawupulula 14:1, 3) Mano tiheeni anahaalaaya weera wirimu iwo?

Anahaala okhalano muteko mutokweene! Soorepa sinnanleela: “Óréla ni awéla murima ti yowo anatakáhaneno muvinya wopacherya; va yawo okhwa wanawili hiwanono ikuru, nyenya enarwa-ekhala alipa-ephepa a Muluku ni a Kristu, nave enarwa-elamula vamoha ni Yowo miyakha eyo masanaru khumi.” (Yawupulula 20:6) Ale enii eviihiwe wi eye wirimu anaya olamula ntoko mamwene ni anamukucho vamoha ni Kiristu elamulelaka elapo ya vathi.

Taani anahaala oviihiwa muhoolo?

NAAKHULO NA PIIPILIYA: Piipiliya ookhalano masu ala ooveereliwa: “Okhalano yoweheryerya ya wa Muluku yeyo yawo mekhayatho enákhelaya, wi onarwa-okhala ovinyatho wa ékhaikhai ni óhikhala ékhaikhai.”​—Saweriwa Tarummwa 24:15.

Taani anahaala okhala mu nikhuuru nenlo murummwa Paulo aaromonleiye ntoko “ékhaikhai”? Muthokororye yootakiherya emoha. Mulopwana ororomeleya Taniyeli aaleeliwa omakuchuwelo wa okumi awe: “Weyano onamukhwa, nto onamuhuhumuwa mokhwani wi wakhele ntxhuwelo” (Daniyeli 12:13, BNM) Taniyeli aahaala ovinya mookhwani wi akhaleke woowi? “Ekhaikhai tiniriaya yakhele elapo ya vathi, Yikhalelaru mummo okhala wokhala.” (Salmo 37:29) Yesu aaloca: “Óréla ari awitchachála: ntakhara enarwa-yákhela elapo ya vathi.” (Mateyu 5:5) Taniyele ni achu akina ororomeleya anahaala oviihiwa wi ekhaleke veelaponi ya vathi wanaawiili, nave okhala wookhala.

Taani anahaala okhala mu nikhuuru nenlo murummwa Paulo aaromonleiye ntoko “óhikhala ékhaikhai”? Anaahiwa macikhwi aachu yaawo yaakhanle nave ekhwa ehisuwenle e paripari ya Mpiipiliya. Yamala oviihiwa mookhwani, anahaala okhalano ekari ya omusuwela Yehovaa ni Yesu. (Yohane 17:3) Yaale enii emwiiwelele Muluku anahaala okhalano okumi woolikana ni wa Yehova​—ti wi okhala wookhala.

Elapo ya vathi enii ekhale hai?

NAAKHULO NA PIIPILIYA: Muluku “anarwa-avuta mithori yothene ovíha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho sóvira.” (Yawupulula 21:4) “Atxhu aka anamuteka ipa ni anamukhalaka mwemmo, anamwàla miri nave anamulya sawima saya sene.”​—Isaiya 65:21, BNM.

Nkaanyiheryani okhala mweelapo yeeyo vamoha ni asuweli anyu ooviihiwa mookhwani! Nyenya nikoho ti nla: Munii muroromele hai wi oviihiwa mookhwani onahaala weereya chiryene?

[Nsu na vathi]

[Eruku va epaaxina 6]

Oothene anamwiiwelela Muluku anahaala okhalano okumi okhala wookhala erino okumi waphaama ni murecele