Mukhalelo Woomuluku Wa Esisapo Opwaha Maluku a Esisapo Yoowalamela

Achu anoona maluku a esisapo yoowalamela ntoko muhakhu. Akina annamaliha macikhwi a itoolare. Apwanne yookhalavo echu Muluku onooneiye okhala ya esisapo yoowalamela opwaha maluku a esisapo naari muhakhu mukina?

Haikanusi, mulaleeryi oohipatisiwa o Amerika, aacoca ecikwama waacamela owannyawe. Mpuwa mwaya waakhalamo ikartau sa opanku ni ikhorowa sincipale. Muthiyana ola aamuleela iyawe, yoowo tho aari mulaleeryi oohipatisiwa, vooloca sa ecikwama eyo.

Mutheli ola aakhalano makacamiho a othoiwa ikhorowa nave aakhalano evaale. Nyenya yaalakelela okookiha ikhorowa epharihelaka nsina naari va epaaxo yeeyo yaaphwanyeya mucikwamani. Mulopwana yoowo arimeeliwe ecikwama aatepa otikhiniheya, nave aawoona ntoko amusi aya. Haikanusi ni iyawe yaamuleela wi yaari oororomeleya nthowa na yeeyo yaahuseryaaya orweela Mpiipiliyani. Voocharela yaapharihela ekari yeeyo wi emuleele vooloca sa Anamoona a Yehova ni omvaha soolaleeryiwa ntakhara emusi awe.

Emusi eyo yaachuna omvaha Haikanusi ikhorowa ntoko phatamari, nyenya owo heemerenrye. Nihiku noocharela mwaara a yoowo aarimeeliwe ecikwama aamuxekurya Haikanusi ni iyawe, wi ooniherye othamalela wawe, nave aamutiteleliha Haikanusi omweemererya muneela a nluku na esisapo.

Ntoko emusi yeele, achu ancipale yaahaala otikhiniheya nthowa na ororomeleya wa Haikanusi ni iyawe. Apwanne Yehova tho aatikhiniheya? Owo onne hai ororomeleya wawe? Apwanne ororomeleya wawe waakumiherya mphurelo?

MIKHALELO SA ESISAPO YOOWALAMELA OPWAHA ICHU SOOMWIILINI

Maakhulo a makoho yaala tahi oovila. Ntakhara heeni? Nthowa nawi akapuro a Muluku aasuwela wi otakiherya mikhalelo sa Yehova ti yookhweleya wa yoowo opwaha maluku a esisapo yoowalamela, ewooro, ni ichu ikina soomwiilini. Chiryene, yeeyo Yehova onooneiye ntoko yasisapo ti yoohiyana ni yeeyo achu ancipale anavahaaya esisapo. (Isaiya 55:8, 9) Nave akapuro awe annoona wi wiilipixerya waya otakiherya mikhalelo sa Yehova echu yookhweleyaxa.

Nnahaala woona yeeyo Piipiliya onaloceiye sa osuwela ni miruku. Masiposipo 3:13-15 onii: “Òrèriwa ti mutxhu opwannye miruku, òrèriwa t’ule ori òsuwela! Opwanya miruku ti worèrasa opwaha eparata; ti worèrasa opwaha eworo. Miruku ti sotxhuneyasa opwaha muhakhu; hiyavo etxhu enalikanayano.” Mweeparipari, Yehova onnavaha esisapo mikhalelo seiya opwaha muhakhu.

Vano, hanka vooloca sa ororomeleya?

Yehova toororomeleya. Nave ‘hanotha.’ (Tito 1:2) Owo aamveerela murummwa Paulo waarepela Akiristu a Aheepri a nsana noopacerya: “Munivekeleleke hiyo. Hiyano ninnupuwela wi murimahu ti waphama, wona wi ninnakhwela wetxa ni wokololowa [ororomeleya] mwa sothene.”—Ahebri 13:18.

Yesu Kiristu oovaha yootakiherya yaphaama ya ororomeleya. Ntoko yootakiherya, vaavaa Mutokweene a Anamukucho Kaifa aalonceiye, “kinnolipeliha wa nsina na Muluku wi onlèle wari weyo, Mwana a Muluku,” moororomeleya, Yesu aahiisooneiha ntoko Mesiya. Owo aaloca eparipari naamwi aasuwela wi Nikhuuru na othoriha naahaala oloca wi ooruwana nave eyo yaahaala ohoolela wiiphiwa wawe.—Mateu 26:63-67.

Hanka vooloca sa hiyo? Apwanne naahaala okhala oororomeleya wakhala wi nri mmukhalelo yoowo waahaala oneeriha ophura ichu soomwiilini moorweela wa ohimuleela muchu iparipari soothene naari otoroka iho?

NIKACAMIHO NA OKHALA OOROROMELEYA

Onamukhala woovila okhala oororomeleya mmahiku yaala ookuchula vaavaa ancipale anakhalaaya “awisivela mkhataya, ósivela icharama.” (2 Timoteo 3:2, Nlakano Nahihano) Vaavaa onakhalaayavo othowa wa ikhorowa naari muteko, ancipale hanoona okhala yoonanara wiiya, ohiiwelela nlamulo naari opaka ichu ikina moohiroromeleya. Muupuwelo yoola ti wawunlaana ophiyerya wi ancipale anoona wi mukhalelo woophwanya ichu soomwiilini ori okhala oohiroromeleya. Ophiyerya wi Akiristu akina annapaka soolakelela soonanara ni “ophura woronya” eweerihaka oyeleela mukhalelo aya waphaama mmulokoni.—1 Timóteo 3:8; Tito 1:7.

Akiristu ancipale annamutakiherya Yesu. Awo annasuwela wi okhalano mikhalelo ntoko sa Muluku ti yookhweleyaxa opwaha mphurelo vyakala. Ti nthowa neni amiravo Eekiristu ahiniiyaaya iporova wi ekhumelele phaama. (Masiposipo 20:23) Okhala oororomeleya honataphulela omwaakhela phatamari, hiiha ntoko Haikanusi. Nlelo, okhala oororomeleya ti yeeyo Muluku onaloceiye wi ti yaphaama, nave ennaneeriha okhalano yawuupuxerya-ya-murima yaphaama, yeeyo eri echu yasisapo.

Yootakiherya ya Kaxik ennooniherya yeeyo. Owo onnaloca: “Kihaakumve okhala Mukiristu, kaalapa va ekompaniya yeeyo mukaneene aasepeiye oliva misokho moorweela wa olokoha mphurelo vakhaani wa ekompaniya. Ntoko muhooleli, kaaweheryiwa omana makhwankwa ni mulipa a musokho. Ntoko yookhumelela, kaasuweliwe ntoko muchu oohiroromeleya. Vaavaa kaahusenryaaka eparipari, kaakhooca otitelela weerano yeeyo, naamwi kaalimvwa phaama. Ohoolo waya, kaakhalano nakoso aka. Ovinyerya woopaceryani kaarehererya ipaaxo saka nave kaaliva misokho soothene.”—2 Korinto 8:21.

Kaxik ooloca: “Miyaano kaapwata vakhaani, mwawiihiiha waakhala woovila ovakulela echoko aka. Vano kiri oohakalala. Kookhalano yawuupuxerya-ya-murima yaphaama vamiithoni va Yehova. Kinnavaha yootakiherya yaphaama wa anamwane aka apiili nave kookhalano mikhalelo soophwanelela sa waakhela mirici mmulokoni. Alipa a musokho vamoha ni yaawo kinammweecaakano nakoso, akisuwenle ntoko mulopwana oororomeleya.”

YEHOVA ONNANIKHAVIHERYA

Yehova onnaasivela yaale anaruuha ncicimiho wa yoowo moorweela wa otakiherya mikhalelo sawe saphaama, ophitaanyerya ororomeleya. (Tito 2:10) Nave vaavaa nneerahuno yeela, onnanroromeliha onikhaviherya. Owo aamveerela Mwene Tavite oloca: “Kàri mmiravo, vano kohuluvala; nkintonko omòna awokololowa anyanyaliwe, nari anàwe evekaka yolya.”—Salumu 37:25.

Yaweereya ya ororomeleya wa Rute ennooniherya yeela. Moororomeleya aakhala ni apwiyamwana awe, Nowemi, opwaha omuhiya nthowa na wuuluvala. Rute aaya o Isarayeli, weiwo aahaaleiye omulapa Muluku eeparipari. (Ruthi 1:16, 17) Owo aari oororomeleya nave aanalapa mwakuru wi ahephe, acharihaka marehereryo a nlamulo wa alipa oohaawa. Moolikana ni yeeyo Tavite oonneiye, Yehova haamunyanyanle Rute ni Nowemi. (Ruthi 2:2-18) Yehova aapaka sincipale opwaha omvaha Rute ichu soomwiilini. Aamuthanla okhala muyareriwo wa Mwene Tavite ophiyerya tho wa Mesiya oolaiheryiwa!—Ruthi 4:13-17; Mateu 1:5, 16.

Enamukhala yoovila wa akapuro akina a Yehova ophwanya ikhorowa sawaakhwanela wi yiivakuleleno. Mwawiihiiha opwaha waavya mukhalelo wookhweya onooniherya ohiroromeleya, awo annalapa mwakuru. Moorweela wa weerano yeela, annooniherya wi mikhalelo sootikhiniha sa Muluku, ophitaanyerya ororomeleya, ti sa esisapo wa yaawo opwaha ichu vyakala soomwiilini.—Masiposipo 12:24; Éfeso 4:28.

Ntoko Rute, Akiristu orukurerya elapo annooniherya nroromelo ikuru sa Yehova wi saakhaviherye. Awo aakhalano nroromelo nawaakhwanela mwa Yehova yoowo onaroromeliha: “Nkirwa kohiya, nari nkirwa konyanyala.” (Ahebri 13:5) Wiiliwiili, Yehova onnooniherya wi onnawerya nave onahaala waakhaviherya yaale ari oororomeleya mu ilukuluku soothene. Moohihiyererya onnakhwaaniherya yoororomeliha yeela aavahaka akapuro awe yeeyo enaathowa.—Mateu 6:33.

Mweeparipari, achu anacicimiherya maluku a esisapo yoowalamela ni ichu ikina soomwiilini. Nyenya nnaphwanela osuwela wi Tiithi ahu awirimu onnavaha esisapo etokweene ororomeleya wahu ni mikhalelo mikina, opwaha muhakhu vyakala woomwiilini!