MAKOHO A ALIPA WAALAKHANYA

Masu a Tavite anaphwanyeya mu Salmo 37:25 ni masu a Yesu mu Mateyu 6:33 enataphulela wi Yehova harwa eemererya wi mukiristu arammwe yoolya?

▪ Tavite oorepa wi hantonko omoona “ékhaikhai ahiyiwaka, nari imusi sawe sivekaka solya.” Owo aaloca masu yaala mwawiiwanana ni saweereya sa okumi awe. Owo aasuwela phaama othokororya woohihiyererya wa Muluku. (Sal. 37:25) Nyenya masu a Tavite, henataphulela wi alapeli a Yehova hanarammwa soolya.

Yaakhalavo elukuluku Tavite mukhateiye aakumanneiyeno mikhalelo sookacamiha. Elukuluku emoha yaari vaavaa aamuchaweiye Sawuli. Soolya sa Tavite saamala, nave aaveka soolya ntakhara yene ni asinthamwene awe. (1 Sam. 21:1-6) Mmukhalelo yoola, Tavite aathoiwa “solya.” Naamwi mmukhalelo yoola, owo aasuwela wi Yehova haamunyanyanle. Eparipari ti wi, hiwaavo orempwevo wi Tavite aari nasimola avekaka yoolya wi akhale mukumi.

Mateyu 6:33, ninnaphwanya yoororomeliha ya Yesu wi Muluku onahaala waakhwaniherya soothowa sa akapuro awe yaawo anahela soothowa sa Omwene va nipuro noopacerya mu okumi aya. Yesu aaloca: “M’pacherye wavya Omwene awe ni ekhaikhai awe, nave sothe sene iho [ophitaanyerya soolya, soowurya, ni soowara] sinarwa-sachereryiwa wa nyuwo.” Nyenya tho, Yesu aahooniherya wi nthowa na wiikariwa ‘annawe’ yaahaala okhalano etala. (Mat. 25:35, 37, 40) Yeeyo yaaheereya ni murummwa Paulo. Owo mu ilukuluku ikina aanavoliwa etala ni nchanana.​—2 Akor. 11:27.

Yehova onnanleela wi nnahaala wiikariwa mmakhalelo oohiyanahiyana. Owo onanwerya weemererya wi nthoiwe vaavaa nnakhaviheryaahu waakhula waakaaha otannyiwe ni Musaserya. (Yupu 2:3-5) Ntoko yootakiherya, Akiristu akhwiihu, ntoko yaawo yaavonyeriwe mmuteko woophareliwa wa Nasista, yaahooxeya nthowa na wiikariwa. Anamoona ohivahiwa yoolya yaphaama yaari yaweeha ya Musaserya wi apahule ororomeleya waya. Anamoona oororomeleya yaahiikhalela oororomeleya wa Yehova; owo haacuwanle yaawo. Owo aaheemererya wi awo ehooxeye, ntoko vaavaa owo oneemereryeiye wi Akiristu oothene ekumaneke ni saweeha soohiyanahiyana. Nyenya, hiwaavo minikwa wi Yehova onnaakhaviherya oothene anahooxeya nthowa na nsina nawe. (1 Akor. 10:13) Hiyaano nnaphwanela wuupuwela masu a Afilipi 1:29: “Wi tuvahiwaya wa nyuwo mahaléne ntakhara a Kristu, tahi omuroromelaru Yowo, nyenyatho wona masóso ntakhara a Yowo.”

Yehova onnaroromeliha okhala ni akapuro awe. Ntoko yootakiherya, Isaiya 54:17 (BNM.) onii: “Hinavo nivaka nni nophoreihe.” Yoolaiherya yeela ni ikina sinnaroromeliha okhapeleleya wa achu a Muluku ntoko nikhuuru. Nyenya Mukiristu mmoha ti mmoha, onahaala okumanano saweeha, ophiyerya okhwa.