Tiheeni Eri Yoophwanela Weera Nihiku Nawoorowa

Nawoorowa mukina, Yesu onnasekurya esinakooka, akhweya o Kalileya. Owo onnamphwanya weiwo muchu orino ntata nawuuma. (Luka 6:6) Alipa oorepa ni Afarisi annanweha Yesu. Ntakhara heeni? Awo ennahiya mwa wooneya taavi ari mathowa aya vaava anamukohaaya: “Onnaweryeyavo onpenusa mutxhu nihiku naworowa?”—Mateu 12:10.

Ahooleli a malapelo a Ayuta anneemererya wi ori waweemereryeya ompenusa mureca nihiku Nawoorowa pahiru wakhala wi okumi awe ori va yawoopiha. Ntoko yootakiherya, nihiku nawoorowa hiyeemereryiwa orehererya nikhuva naari omaka, vaavaa yooniwaaya wi haahaala okhwa. Chiryene Alipa oorepa ni Afarisi hanamukoha Yesu nthowa na okhala ootemwatemwa ni ekoi ya mulopwana ola oohaawa. Awo anaavya mathowa wi emuthorihe Yesu.

Nyenya Yesu, oosuwela miyuupuwelo saya sooheseya. Oosuwela wi vaya arino moonelo woonanara ohirino mathipelo a Mpiipiliyani vooloca sa yeeyo enataphulela onanariha nlamulo nnakhoociha olapa nihiku Nawoorowa. (Mukwaha 20:8-10) Yesu aahaakaahiwa nthowa na miteko sawe saphaama. Vano owo onnapaka echu enakumiherya ovaanyihana moorweela wa oloca ni mulopwana oorakala ntata: “Vinyá ni orwe veri va!”—Marko 3:3.

Aawehaka alipa oorepa ni Afarisi, Yesu onnaloca: “Tani wa nyuwo arino eputxeputxhe emoha ni yamorelà munlitxini nihiku naworowa, ahiyawo okumiha?” (Mateu 12:11) Epucepuche enapaka makupa a muhakhu mutokweene, mwawiihiiha awo hiyaahaala ohiya munlicini ophiyerya nihiku nikina; eyo yaahaala okhwa mwemmo nave awo yaamuyeleela. Opwaha yeeyo, Soorempwa sinnaloca: “Awokololowa onnakhapelela muhuwo awe.”—Masiposipo 12:10.

Ni moonelo mmohamoha, Yesu onnatitelela: “Vano mutxhu òtepa opwaha eputxeputxhe! Tiva, onnaphwanela wera saphama nihiku naworowa.” (Mateu 12:12) Mwawiihiiha, Yesu haananariha nihiku Nawoorowa moorweela wa ompenusa mulipa awiiceliwa. Asitokweene a malapelo hanawerya ovaanya moonelo yoola, woophwanelela ni wa ikharari. Awo annatitelela okhala oomala.

Moohaleeliheya, ni awuukhuwa vooloca sa muupuwelo aya wookotakota, Yesu onnaweha moorukurerya. Voocharela onnaloca ni mulopwana: “Okolà ntata!” (Mateu 12:13) Vaavaa mulopwana onookoleiye ntata nawe nawuuma, nno ninnakhala phaama. Eyo ennamuhakalaliha mulopwana yoole, nyenya eyo enaavolowela hai yaale aneererya omphara Yesu?

Opwaha okhala oohakalala ni mulopwana ntata nawe nipenusiwe, “Afarisi ni atxhu a Heróde erikinvyinyaruwo vavale, yàmpakanela omwipha.” (Marko 3:6) Nikhuuru nenlo noolamulela mwawooneya nnaphitaanyerya nikhuuru na malapelo nniichaniwa Asatuki. Woopaceryani Asatuki ni Afarisi hiyiiwanana, nyenya vano ari awiiwanana mu omwiica waya Yesu.