“Mwilipiserye Nroromelo”

“Mwilipiserye nroromelo, . . . ni òlipa.”​—1 KORINTO 16:13.

MACIPO: 60, 64

MWAHAALA WAAKHULA HAI?

Ntakhara heeni nroromelo echu yookhweleya?

Nnii nsuwele hai wi nroromelo nahu ninnaceecheya?

Ntakhara heeni ninnaphwanela ochariha yootakiherya ya Yesu?

 1. (a) Tiheeni yeeren’ye ni Petro variyari va echeku mu eniya ya Kalileya? (Moone eruku yoopacerya.) (b) Ntakhara heeni Petro aapacerya woova?

OHIYU omoha, murummwa Petro ni oohuserya akina yaahiilipixerya wi elapuwele ekhopela ekina ya Eniya ya Kalileya variyari va echeku. Mootutuxa yaamoona Yesu eecaka vasulu va eniya. Petro aamwiichana Yesu nave amveka wi eece vasulu va maahi. Vaavaa Yesu aamweemerenryeiye, Petro aakhuma mmwaaceyani nave apacerya weeca ayaaka weiwo aariwo Yesu. Moohilekela, Petro aapacerya opwina. Ntakhara heeni? Nthowa nawi aavarerya echeku ni macumuca ni apacerya woova. Petro aakhuwela avekaka nikhaviheryo nave Yesu ampharela nave aloca: “Okhweleleni minikwa, mulopwana a nroromelo vakhani?”​—Mateu 14:24-32.

 2. Tiheeni nnahaalaahu othokororya?

² Hankooni nthokororye ichu chaaru vooloca sa nroromelo orweela wa yaweereya ya Petro: (1) Woopaceryani Petro aaroromenle hai wi Yehova aahaala omukhaviherya, (2) Petro aapacenrye hai oyeleela nroromelo, nave (3) tiheeni yaamukhavihenrye ophwanya wanawiili nroromelo nawe. Othokororya miyaha seiya enahaala onikhaviherya osuwela yeeyo nnahaalaahu weera wi ‘nlipiserye nroromelo.’​—1 Korinto 16:13.

OROROMELA WI MULUKU ONAHAALA ONIKHAVIHERYA

 3. Ntakhara heeni Petro aakhuma mmwaaceyani, nave ichu taani soolikana nipankaahu?

³ Petro aakhalano nroromelo noolipa. Ntakhara heeni nnalocaahu hiihaa? Vaavaa Yesu aamwichanneiye Petro, owo aakhuma mmwaaceyani nave eeca vasulu va maahi. Aaroromela wi ikuru sa Muluku saahaala omvaha owerya hiiha ntoko samvanhaaya Yesu. Moolikana, vaavaa Yesu aaniwompeiye wi nimuchare naahiiveleela wa Yehova ophiyerya opatisiwa. Ntakhara heeni? Nthowa nawi naaroromela wi Yehova ni Yesu yaahaala onikhaviherya.​—Yohani 14:1; mwaalakhanye 1 Pedro 2:21.

4, 5. Ntakhara heeni nroromelo echu yookhweleya?

⁴ Nroromelo echu yookhweleyaxa. Nroromelo naamweeriha Petro weeca vasulu va maahi, yeeyo yooneya okhala yoohiweryeya wa muchu. Nroromelo tho nnanwerya onikhaviherya opaka ichu sinooniwa okhala soohiweryeya. (Mateu 21:21, 22) Akina a hiyo nootoroka omuchu ahu ophiyerya wi achu yaanisuwenle khalai ehinawerya onisuwela. Noopaka matorokelo yaawo nthowa nawi ninnamusivela Yehova, nave owo oonikhaviherya opaka matorokelo yaawo. (Mwaalakhanye Kolosi 3:5-10.) Nroromelo naaneeriha wiiveleela wa Yehova, ni okhala asinthamwene awe, echu nahaahaalaahu owerya opaka nihirino nikhaviheryo nawe.​—Éfeso 2:8.

⁵ Nroromelo ninnaneeriha okhala oolipa. Ntoko yootakiherya, ninnanikhaviherya owana ni mwiicani ahu akuru, Musaserya. (Éfeso 6:16) Nave tho nthowa na omuroromela Yehova, hinnaphwanela woova vaavaa nnakumanaahu ni makacamiho. Yehova onnaroromeliha wi onahaala onivaha yeeyo nnachunaahu wakhala wi nookhalano nroromelo mwa yoowo nave ninnahela Omwene awe va nipuro noopacerya. (Mateu 6:30-34) Opwaha soothene, nthowa na nroromelo nahu, Yehova onahaala onivaha okumi woohimala.​—Yohani 3:16.

WOOVA ONNEERIHA OYELEELA NROROMELO

6, 7. (a) Nnii nlikanyihe ni eheeni echeku ni macumuca yaamoopopinhe Petro? (b) Ntakhara heeni ninnaphwanela osuwela wi ti wooweryeya oyeleela nroromelo nahu?

⁶ Petro eecaka vasulu va maahi, aahoova. Ntakhara heeni? Nthowa na echeku ni macumuca. Ichu iho inanwerya olikanyihiwa ni saweeha seiyo Akiristu anakumanaayano olelo. Moohipwacha wunnuwa wa makacamiho, nnanwerya okhala oolipa nnikhaviheryo na Yehova. Nyenya nuupuwele yeeyo yeeren’ye ni Petro. Owo haapwinne nthowa na echeku ni macumuca. Opwaha yeeyo Piipiliya onii: “Onneiye etxheku, àhòva.” (Mateu 14:30) Petro aahiya oteteiwa ni Yesu, nave aateteiwe ni wuupa wa echeku. Mwa yeeyo nroromelo nawe naapacerya oceecheya. Moolikana, wakhala wi ninnateteiwa ni makacamiho ahu, nnampacerya okhwa minikwa okhaviherya wa Yehova.

⁷ Nnaphwanela osuwela wi ti wooweryeya oyeleela nroromelo nahu. Mwawiihai? Piipiliya onaloca wi oyeleela nroromelo “yotxheka [yawaakuveya] enanirwela.” (Ahebri 12:1) Moolikana ni Petro, wakhala wi ninnaweha ichu sawuupa, nroromelo nahu nnahaala oceecheya mwawaakuveya. Nnii nsuwele hai wi nroromelo nahu nri va yawoopiha? Makoho anacharela anahaala onikhaviherya wiisaalikhela.

 8. Ti mwawiihai nnahaalaahu oyeleela ocicimiha soororomeliha sa Muluku?

⁸ Soororomeliha sa Muluku ti seeparipari wa miyaano hiihaano ntoko koonaaka khalai? Ntoko yootakiherya, Muluku oolaiherya otoloxa elapo ya Satana. Apwanne ninnasiveliwa ni mathatelo a elapo yeela? Wakhala hiihaa, nnampacerya okhwa minikwa sa waacamela wa makuchuwelo. (Hapakukhi 2:3) Muupuwele yootakiherya ekina. Yehova oovaha woopola, wi alevelele soocheka. Wakhala wi ninnuupuwelela soocheka sahu sa khalai, nnahaala opacerya okhwa minikwa waakhanle wi Yehova oonikhurumuwela chiryene. (Saweriwa T’arummwa 3:19) Ntoko yookhumelela, nnahaala oyeleela ohakalala wahu mmuteko wa Muluku nave nnahaala ohiya waalaleerya akina.

 9. Tiheeni enahaala weereya wakhala wi nnathokororya sookhwela sahu?

⁹ Kinnamurumeela Yehova ophiyerya kinaweryelaakavo? Vaavaa nnalapaahu mwakuru mmuteko wa Yehova, eyo ennanikhaviherya okhapelela ewehereryo ahu ya omwaahiyu. Hanka wakhala wi noopacerya othokororya vancipale sookhwela sahu? Ntoko yawooniherya, nnahaala weemererya muteko onaliva phaama nyenya ohinaneemererya omulapela Yehova. Eyo yaahaala oceecheiha nroromelo nahu nave naahaala okhala “òporora,” neerakano vakhaani opwaha nnaweryelaahuvo.​—Ahebri 6:10-12.

10. Vaavaa nnaakhurumuwelaahu akina, nnooniherya hai omuroromela Yehova?

¹⁰ Onnakivila okhurumuwela? Vaavaa akina ananiphucaaya, apwanne ninnaakuvela onyeenyeya naari ohiya oloca ni yaawo? Wakhala wi ti hiiha, nnateteiwa xaxaxa ni moonelo ahu. Ninnooniherya nroromelo nahu wa Yehova vaavaa nnaakhurumuwelaahu akina. Mwawiihai? Vaavaa muchu onanichekeleiye, owo ookhalano mankaawa ni hiyo. Vaavaa nnamuchekelaahu Muluku, ninnakhalano mankaawa ni yoowo. (Luka 11:4) Mwawiihiiha, vaavaa nnaakhurumuwelaahu akina, ninnooniherya nroromelo wa Yehova. Ninnaroromela wi owo onahaala onireeliha nthowa na okhurumuwela, nave mareeliho awe tasisapo opwaha omweeriha muchu wiisoona okhalano nthowa wa yeeyo oneerenleiye. Oomuchara a Yesu yaanasuwela wi ti woochuneya nroromelo wi naakhurumuwele akina. Vaavaa Yesu aaleenleiye wi yaaphwanela waakhurumuwela yaale anaachekela ikwaha sincipale, awo yaamveka: “Atxereryà mwa hiyo nroromelo.”​—Luka 17:1-5.

11. Tiheeni enahaala oneeriha ohiiwelela ekano?

¹¹ Kinnanyeenyeya vaavaa kinavahiwaaka ekano? Muhuserye ovarerya ekano opwaha ovarerya sooheseya mu ekano naari sooheseya sa yoowo onavaha ekano. (Masiposipo 19:20) Muhiyeleele ekari ya okhalano muupuwelo ntoko wa Yehova!

12. Ntakhara heeni tahi yaphaama waaloca moonanara yaale anahoolela?

¹² Kinnaaloca moonanara yaale anahoolela mmulokoni? Vaavaa Aisarayeli yaathokoronryaaya masu a anamahocela khumi, yaamuloca moonanara Moose ni Aaroni. Mwa yeeyo Yehova aamukoha Moose: “Ophiyerya lini atxhu ala eneraya etitelele okikhòtxa?” (Namarepela 14:2-4, 11) Chiryene Yehova aasuwela wi Aisarayeli hiyaamuroromela woona wi yaamuloca moonanara Moose ni Aaroni, alopwana yaawo aathanlileiye. Moolikana, wakhala wi ninnaaloca moonanara yaale Yehova onaaphariheleiye wi yaahoolele achu awe olelo, eyo enahaala wooniherya wi nroromelo nahu ninnaceecheya.

13. Ntakhara heeni hinnaphwanela okhulumuwa wakhala wi nohoona wi nroromelo nahu ninnaceecheya?

¹³ Mmanle othokororya makoho yaala, muhikhulumuwe wakhala wi mohoona wi nroromelo nanyu ninnaceecheya. Muupuwele wi murummwa Petro aahoova nave aakhwa minikwa. Mu elukuluku yeele, Yesu aahaalopola oohuserya oothene wi yaari a “nroromelo noyeva.” (Mateu 16:8) Chiryene, nnamuhuserya echu yookhweleya moorweela wa yaweereya ya Petro. Moone yeeyo enreiye amanle opacerya okhwa minikwa ni opwina mu eniya.

MUMVARERYE YESU WI MULIPIXE NROROMELO NANYU

14, 15. (a) Vaavaa Petro aapacenryeiye opwina tiheeni enreiye? (b) Nnii nimvarerye hai Yesu?

¹⁴ Tiheeni Petro aapankeiye vaavaa aapacenryeiye opwina? Petro aasuwela phaama weekha, mwawiihiiha aahaala weekha akookelaka mmwaaceyani. (Yohani 21:7) Ntakhara heeni henreno? Owo hiiroromenle. Aamuroromenle Yesu nave aaheemererya nikhaviheryo nawe. Wakhala wi nohoona wi nroromelo nahu ninnaceecheya, nnaphwanela omutakiherya Petro. Nnii neereno hai?

¹⁵ Ntoko Petro aaroromenleiye nikhaviheryo na Yesu, nnaphwanela tho omvarerya Yesu. (Mwaalakhanye Ahebri 12:2, 3.) Nyenya hinnawerya omoona ni miitho ahu hiiha ntoko Petro aamonneiye. Vano nnii nimvarerye hai Yesu? Nnanwerya ohuserya ichu aahusinheiye ni omutakiherya phaama. Vaavaa nneerahuno yeeyo, nnahaala ophwanya nikhaviheryo nnahaala olipiha nroromelo nahu. Hankooni nthokororye makhalelo a omutakiherya Yesu.

16. Piipiliya onii anikhaviherye hai olipiha nroromelo nahu?

¹⁶ Mulipihe nroromelo nanyu mu Piipiliya. Yesu aalekecheya wi Piipiliya Masu a Muluku nave onnanivaha ohoolela waphaama. (Yohani 17:17) Wi nimutakiherye Yesu nnaphwanela omwaalakhanya ni omuhuserya Piipiliya mahiku oothene, ni wuupuwelela yeeyo nnahuseryaahu. Nnaphwanela tho otholathola maakhulo a makoho nryaahuno. Ntoko yootakiherya, munnaroromela wi nnakhala mmahiku ookuchula? Mulipihe nroromelo nanyu wi makuchuwelo ahaacamela moorweela wa ohuserya sooloherya sinooniherya wi nnakhala mmahiku ookuchula. Munnachuna olipiha nroromelo nanyu mu soolaiherya sa Muluku vooloca sa omwaahiyu? Muhuserye sooloherya sa Piipiliya sinaakhwaniheryeya. Munneemererya wi Piipiliya onnaphara muteko mmahiku ahu? Muhuserye vooloca sa anna ni arokora yaawo anatoroka okumi nnikhaviheryo na Piipiliya.a (Moone masu a vathi.)​—1 Tesalónika 2:13.

17. Ntakhara heeni Yesu aawerya ovootha saweeha itokweene, nave nnii nimutakiherye hai?

¹⁷ Muroromele mareeliho Yehova olaihenryeiye. Yesu aanaroromela mareeliho a omwaahiyu, nave eyo yaamukhaviherya ovilela saweeha itokweene. (Ahebri 12:2) Owo hatonko oweiwa ni ichu sa elapo. (Mateu 4:8-10) Nnii ncharihe hai yootakiherya ya Yesu? Muupuwelele soolaiherya sootikhiniha seiyo Yehova opankeiye. Mwiisaanyiherye mu elapo ya hiihaano. Murepe yeeyo munachunaanyu opaka Mparataiso. Naari mwaarepele achu anahaala oviihiwa mookhwani munachunaanyu waakoha naari waaleela echu. Moone ichu seiyo ntoko soolaiherya wa nyuwo mukhatiinyu, ohiya wa achu oothene.

18. Nivekelo nnii nookhaviheryeni hai olipiha nroromelo?

¹⁸ Mveke nroromelo nawaaca. Yesu aahaahusiha oohuserya awe omveka Yehova munepa waweela. (Luka 11:9, 13) Vaavaa munavekaanyu munepa waweela, mveke tho nroromelo nawaaca. Owo mukhalelo mmoha wa yawiima ya munepa waweela. Munaphwanela okhala ooluluwanya mmavekelo anyu. Ntoko yootakiherya, wakhala wi munnoona wi hamunawerya waalevelela akina, mumveke Yehova wi alipihe nroromelo nanyu nave ookhaviheryeeni olevelela.

19. Nnii naathanle hai asinthamwene aphaama?

¹⁹ Mwaathanle asinthamwene arino nroromelo noolipa. Yesu aahaathanla asinthamwene awe mweephoole. Asinthamwene awe yaari oororomeleya nave yaanamwiiwelela. (Mwaalakhanye Yohani 15:14, 15.) Mmutakiherye Yesu nave mwaathanle asinthamwene anyu mweephoole. Anaphwanela okhala achu arino nroromelo noolipa yaawo anamwiiwelela Yesu. Asinthamwene eeparipari anaphwanela okhala oororomeleya mukina ni mukhwaawe, vaavaa onachuneyaaya ovaha naari waakhela ekano.​—Masiposipo 27:9.

20. Tiheeni enahaala weereya wakhala wi nohaakhaviherya akina olipiha nroromelo naya?

²⁰ Mwaakhaviherye akina olipiha nroromelo naya. Yesu aahaakhaviherya oohuserya awe olipiha nroromelo naya moorweela wa masu ni saweera. (Marko 11:20-24) Nnaphwanela ochariha yootakiherya ya Yesu. Vaavaa nneeraahu yeeyo, nnahaala olipiha nroromelo nahu ni nroromelo na akina. (Masiposipo 11:25) Munii mwaakhaviherye hai achu mu ekulucu anyu? Vaavaa munaahusihaanyu achu Piipiliya, muceenyerye wi Muluku ookhala, wi onnanthokororya, nave wi Piipiliya Masu a Muluku. Munii mwaakhaviherye hai anna ni arokora anyu olipiha nroromelo naya? Wakhala wi moomoona muchu aalocaka moonanara yaawo anahoolela, muhaakuvele omusepa. Mpharihele masu aphaama wi mmukhaviherye orehererya nroromelo nawe. (Yuda 22, 23) Wakhala wi mwa naxikola nave muhusiha anyu onnaloca sa othatuwa wa ichu, mooniherye epewe nave mwaakihe nroromelo nanyu mu opatuxiwa wa ichu. Waakhulela wa muhusiha ni asinthamwene anyu onamootikhinihaani.

21. Tiheeni Yehova onalaiheryeiye wa muchu ti muchu a hiyo?

²¹ Yehova ni Yesu yaamukhaviherya Petro ovootha minikwa ni woova. Ohoolo waya, Petro aakhala yootakiherya yoolipiha ya nroromelo wa akina. Mmukhalelo mmohamoha, Yehova onnanroromeliha onikhaviherya oothene yeehu wiithipela mu nroromelo. (Mwaalakhanye 1 Pedro 5:9, 10.) Ennachuneya wiilipixerya oteka nroromelo okhala noolipa, nyenya Yehova onahaala onikhaviherya vaavaa nneeraahu yeeyo.

[Nsu na vathi]

[Ekaaxa va epaaxina 22]

MASU ATHARIHIWE

Ninnamutakiherya Yesu vaavaa nnahuseryaahu ichu seiyo ohusinheiye ni opankeiye