Osuwela Murici Yoowo Muluku Omvanheiye Kristu

“VOOPACERYANI, Muluku aapatusha erimu ni elapo ya vathi,” nave ichu soothene owo aapatunxeiye “saatepa okhala phaama.” (Map. 1:1, 31) Yehova aahaapatuxa achu ni yoowehererya ya okhalano omwaahiyu waphaama. Nto, omwareya weeren’ye, mu emaca ya Eteni waahaakanyerya murecele wa achu mu elukuluku ya vakhaani. Mweeparipari, yoochuna ya Yehova ntakhara elapo yavathi ni achu hetoroken’ye. Muluku aahiloca wi yaahaala okhalamo anamwane a Atamu awiiwelela. Malapelo eeparipari yaahaala orehereryiwa, nave Muluku aahaala omutoloxa mwiicani vamoha ni miteko sawe soothene soonanara. (Map. 3:15) Voocharela, ichu soothene saahaala ‘otepa okhala phaama.’ Yehova aahaala waakhwaniherya yeela moorweela wa Mwanawe, Yesu Kristu. (1 Yoh. 3:8) Chiryene, ti yoochuneya wi nsuwele murici wa Kristu mmarehereryo a Muluku.—Saw. 4:12; Fil. 2:9, 11.

² Vaavaa nnuupuwelaahu sa murici wa Kristu mmarehereryo a Muluku, ninnasuwela wi murici awe wookhalano makupa oohiyanahiyana. Yesu onarumeela ntoko Mvuluxa aachu, Mutokweene a mukucho, Muru wa muloko Weekristu, nave hiihaano Mwene a Omwene wa Muluku. Wuupuwelela mirici seiya onnaaceererya othamalela wahu marehereryo a Muluku ni omusivela wahu Kristu Yesu. Piipiliya onnaloca mirici mikina sa seiho.

³ Variyari va muteko wa Kristu veelaponi, waari wawooneya wi waataanyihiwa wa achu ni Muluku waahaala waakhwanela moorweela wa Yesu. (Yoh. 14:6) Ntoko Mvuluxa aachu, Yesu oovaha okumi awe ntoko mukucho wi awoopole ancipale. (Mat. 20:28) Yesu tahi pahiru yootakiherya ya omucicimiha Muluku. Nto owo yoohulela ya waakhwaniherya yookhwela ya Yehova ntakhara achu. Ti yoowo pahiru onaataanyinhe ni Muluku. (Saw. 5:31; 2 Kor. 5:18, 19) Mukucho wa Yesu ni ovinya wawe yoohula ephiro wa achu awiiwelela wi ekhaleno mareeliho oohimala mu olamulelo wa Omwene wa Muluku.

⁴ Ntoko Mutokweene Amukucho, Yesu ori ookhwaanela “omoriwa ikharari ni oceecheya wahu” ni okhurumuwela soocheka sa achu awe veelaponi yeela ya vathi. Murummwa Paulo oothariha: “Haniinono mulipa a mukucho mutokotoko ohinawerya omoriwa ikharari ni oceecheya wahu. Nto, aayi, nookhalano aweereriwa mu soothene ntoko hiyo, owo ahichekaru.” Voocharela Paulo aahaalipiha oothene yaale yooniherya nroromelo mwa Yesu Kristu wi ephure vancipale marehereryo a waatanyihiwa ni Muluku, ariki: “Vaavaa, naacamele onipuroni na mwaneene a mahala nihoovelelaka, wi naakheliwe phaama ni omoreliwa ikharari, nikhaviheriwaka mu elukuluku yoophwanelela.”—Ahe. 4:14-16; 1 Yoh. 2:2.

⁵ Yesu tho Muru wa Muloko Weekristu. Hiiha ntoko oomuchara awe mu nsana noopacerya, hiyaano tho olelo hinaanono muhooleli oomuchu. Yesu oovaha ohoolela moorweela wa munepa waweela ni moorweela wa waathanla ahooleli, yaawo anahaala waakhula mulacu vamiithoni vawe ni wa Atiithi awe a wirimu mu othokororya waya muhuwo wa Muluku. (Ahe. 13:17; 1 Ped. 5:2, 3) Alocaka mooloherya sa Yesu, Yehova aariye: “Yoowo kooheerelamo onamoona aka wa maloko, muhooleli aka oolamula wa maloko a achu.” (Isa. 55:4) Yesu aahaakhwaniherya moororomeleya yooloherya yeela vaavaa aaleenleiye oohuserya awe ariki: “Muhiichaniweke muhooleli, vawi muhooleli anyu ori mmoharu, Kristu.”—Mat. 23:10.

⁶ Ntoko yawooniherya ya ikharari sawe ni okhala ookhwaanela onikhaviherya, Yesu onnapaka nwopelo ariki: “Rwaani wa miyo oothene nyuwo mvenle munyokoliwa, miyo kinamuwiichuuwihaani. Teeshani murici aka, huseryani wa miyo, kiri ooreera murima ni awiiyeviha nave munamphwanya wiichuuwa wa okumi anyu, ntakhara nipisi naka hannalimela ni murici aka ori wooveya.” (Mat. 11:28-30) Moorweela wa ohoolela muloko Weekristu mooreera murima ni mwawiichuuwiha, Yesu Kristu ohiisooneiha meekheiye okhala “mukukhula aphaama” amutakiheryaka Tiithi awe awirimu, Yehova Muluku.—Yoh. 10:11; Isa. 40:11.

⁷ Mu ekaarata awe yoopacerya wa Akorinto, Paulo aahithariha echu ekina ya murici wa Yesu Kristu mmasu ala: “Onnaphwanela wi Kristu alamuleke ophiyerya aakunhe amwiicani awe oothene vathi va manaani awe. Vaavaa mwaana oneereiye analamulela soothene, yoowo onamwiiveleela wi alamuleliweke ti Atiithi yaawo amvanhe olamulela seiye soothene, wi Muluku akhale soothene wa oothene.” (1 Kor. 15:25, 28) Ahaakumve orwa veelaponi, Yesu aari “kapara . . . ooteka” a Muluku, woona wi yoopatuxiwa yoopacerya. (Masi. 8:22-31) Vaavaa Muluku aamurummeiye Yesu orwa veelaponi, owo aaneerano yookhwela ya Muluku ilukuluku soothene. Owo aahivilela va yaweeha etokweene, nave akhwa moororomeleya wa Atiithi awe. (Yoh. 4:34; 15:10) Woona wi mwanawe aari oororomeleya ophiyerya okhwa, Muluku aahimviiha oya wirimu ni amvaha ophwanelela okhala Mwene a Omwene wa wirimu. (Saw. 2:32-36) Mwa yeeyo, Kristu Yesu ookhalano owerya woorweela wa Muluku wi ahooleleke macikhwi a soopatuxiwa soomunepani mu oviihavo olamulelo wa achu veelaponi ni orehererya elapo ahu wa sootakhala soothene. (Masi. 2:21, 22; 2 Tes. 1:6-9; Wup. 19:11-21; 20:1-3) Voocharela Omwene wa wirimu wa Muluku ohooleliwaka ni Kristu onahaala okhala mmoha yoowo oni olamuleleke pahi veelaponi yoothene ya vathi.—Wup. 11:15.

⁸ Yesu Kristu, Yootakiherya ahu, toophaameya. Owo oovahiwa owerya wa onikhapelela. Wi nikhaviheryeye orweela wa osivela wawe, nnaphwanela otitelela ororomeleya wa Yehova ni otitelela weeca ni marehereryo a Yehova.

⁹ Oomuchara a Yesu a nsana noopacerya yaanasuwela phaama murici wa Yesu mmarehereryo a Muluku. Awo yaahooniherya yeela moorweela wa olapa vamoha mwawiiwanana mu ohoolela wa Kristu, yiiwelelaka ohoolela wawe, waavahiwa moorweela wa munepa waweela. (Saw. 15:12-21) Murummwa Paulo aahicicimiherya wiiwanana wa muloko Weekristu wa oothanliwa vaavaa aarempeiye: “Nto, neecaka mweeparipari ni moosivela, ninnuwe mu soothesene wi niphwanaphwaneno yoowo ori muru, ti Kristu. Yoowo toneeriha wi mwiili woothene ocopaanyeriwe ni oluceleliwa vamoha mmashikhani moothemwene, makupa ni makupa elapaka mookhaviheryana, wi mwiili woothene winnuwe, otikitheryeye mu osivela.”—Éfe. 4:15, 16.

¹⁰ Vaavaa munna ti munna a mmulokoni onalapeiye ni akina, nave oothene enalapa mwawiiwanana ni ohoolela wa Kristu, wiiwanana ni munepa woosivela onnaacereryeya, yoowo “onalucelela ichu seiya soothene mwawaakhwana.”—Yoh. 10:16; Kol. 3:14; 1 Kor. 12:14-26.

¹¹ Moohikhwa minikwa, saweereya sa mweelaponi sinnaakhwaniherya sooloherya sa Mpiipiliyani wi Yesu Kristu ohaakhela owerya wa Omwene mu 1914. Vano owo onalamulela veeri va amwiicani awe. (Sal. 2:1-12; 110:1, 2) Eyo enataphulela eheeni wa yaale anakhala veelaponi ya vathi olelo? Voohilekela Yesu onahaala opharihela murici awe ntoko Mwene a mamwene ni Pwiya asipwiya vaava oneereiye aathorihe amwiicani awe. (Wup. 11:15; 12:10; 19:16) Yoolaiherya ya woopoliwa yeeyo Yehova aalonceiye woopaceryani wa omwaryeya wa achu enahaala waakhwanela wi yaakhaviherye yaale ari aweemereryiwa ni yoowo. (Mat. 25:34) Ninnahakalala osuwela murici yoowo Muluku omvanheiye Kristu. Hankooni ntitelele okhala awiiwanana nipakaka muteko wa veelaponi yoothene onahooleliwa ni Kristu mmahiku yaala ookuchula.