Muhuserye Orweela wa Niphwanaphwaniho na Italento

“Nave wa mmoha ávaha icharama sa matalente thanu, ni wa mukina pili, ni wa mukína emoha.”​—MAT. 25:15.

MWAHAALA WAAKHULA HAI?

Ntakhara heeni Yesu aaloca niphwanaphwaniho na italento?

Ti liini Pwiya oneereiye arwe wi apake mulacu?

Tiheeni nnahuseryaahu orweela wa niphwanaphwaniho nenla?

1, 2. Ntakhara heeni Yesu oovaha niphwanaphwaniho na italento?

MU NIPHWANAPHWANIHO na italento, Yesu mwawooneya ohooniherya murici wa oomuchara awoocihiwa. Nnaphwanela wiiwexexa yootaphulela ya niphwanaphwaniho nenla, woona wi ninnaavolowela Akiristu oothene eeparipari, moohipwacha wakhala wi ewehereryo aya ti ya wirimu naari veelaponi yavathi.

² Yesu oovaha niphwanaphwaniho na italento ntoko yawaakhula ya nikoho na oohuserya vooloca sa “eneneryo ya ophiya [wawe], ni makutchuwelo a mahiku a vathi vano.” (Mat. 24:3) Mwawiihiiha, niphwanaphwaniho ninnakhwaanela mu elukuluku ahu nave nikupa na eneneeryo nnooniherya wi Yesu oophiya nave onnalamula ntoko Mwene.

 3. Soohuserya taani inahusihiwa mu maphwanaphwaniho anaphwanyeya mu Mateyu 24 ni 25?

³ Niphwanaphwaniho na italento nri nimoha na maphwanaphwaniho maxexe anaphwanyeya mu Mateyu 24:45 ophiyerya 25:46. Makina mararu​—vooloca sa kapuro oororomeleya ni amiruku, asimwali khumi, ni ipucepuche ni ipuri​—ari tho makupa a naakhulo na Yesu vooloca sa eneneeryo ya ophiya wawe. Mmaphwanaphwaniho yaala maxexe, Yesu aavuwiha meerelo yaawo yaahaala waahiyaniha oomuchara awe eeparipari mmahiku yaala ookuchula. Niphwanaphwaniho vooloca sa kapuro, asimwali, ni italento anaahiwa oomuchara awe awoocihiwa. Mu niphwanaphwaniho vooloca sa kapuro oororomeleya, Yesu aavuwiha ochuneya waya nikhuuru nikhaani na awoocihiwa yaawo aavanheiye murici wa ovaha yoolya nloko nawe, mmahiku yaala ookuchula wi ekhale oororomeleya ni amiruku. Mu niphwanaphwaniho na asimwali, Yesu ooceenyerya wi oomuchara awe awoocihiwa oothene anaphwanela okhala ooreheryeya ni oolipelela, esuwelaka wi Yesu onnarwa nave hasuwenle nihiku naari elukuluku. Mu niphwanaphwaniho na italento, Yesu ohooniherya wi awoocihiwa anaphwanela wiilipixerya waakhwaniherya murici aya Weekiristu. Yesu akuchulaka niphwanaphwaniho, aaloca niphwanaphwaniho na ipucepuche ni ipuri, wa yaale arino ewehereryo ya veelaponi yavathi. Aaceenyeryaka wi anaphwanela okhala oororomeleya ni ovaha nikhaviheryo nawaakhwanela wa anna awoocihiwa a Yesu veelaponi yavathi.a Hankooni vano nthokororye niphwanaphwaniho na italento.

PWIYA ONNAAKAWELA AKAPURO AWE MUHAKHU

4, 5. Taani mulopwana naari pwiya onasipheliwa, nave teevi eri esisapo yeeparipari ya etalento?

⁴ Mwaalakhanye Mateyu 25:14-30. Ovinyerya khalai, soolaleeryiwa sahu saanathariha wi mulopwana naari pwiya, mu niphwanaphwaniho ti Yesu nave mukwaha woorakama ti vaavaa aakookenleiye wirimu mu 33 E.K. Mu niphwanaphwaniho nikina, Yesu aahooniherya yookhwela awe ya opaka mukwaha woorakama, “wisakhelela mekhiye [ikuru sa ] omwene.” (Luka 19:12) Tahi wi Yesu mwawaakuveya aahaakhela ikuru sa Omwene vaavaa aakookenleiye wirimu.b Nyenya, ‘àkirathi. . . omono wolopwana wa Muluku, awehereryaka wi amwitxanawe othene ekuhiwe vathi va inani sawe.’​—Ahe. 10:12, 13, BNM.

⁵ Mulopwana mu niphwanaphwaniho aakhalano italento thanu nachaaru, muhakhu mutokweene mmahiku yaale.c Ahaakumve opaka mukwaha woorakama, aakawa italento wa akapuro awe, aweheryaka wi yaahaala waaceererya amanle weeca mukwaha. Ntoko mulopwana yoole, Yesu aavaha echu ya esisapo etokweene ahaakumve okookela wirimu. Echu taani? Naakhulo ninniiwanana ni muteko waari woochuneyaxa mu okumi awe.

6, 7. Italento inasiphela eheeni?

⁶ Yesu aavaha esisapo etokweene muteko awe wa olaleerya ni wa ohusiha. (Mwaalakhanye Luka 4:43.) Moorweela wa muteko yoowo, aapaka emaca etokweene. Woopaceryani, aaloca wa oohuserya awe: “Nvìhe mitho nave mone imatxa somalela inakhwela ohephiwa.” (Yoh. 4:35-38, BNM) Yesu aakhalano mmuupuwelo othukumanyiwa wa ancipale a mirima saphaama yaawo yaahaala okhala oomuchara awe. Ntoko emaca yaphaama, Yesu haaphwanela ohiya emaca yeeyo yaaphwanela ohephiwa. Mwawiihiiha, amanle oviihiwa nave ahaakumve okookela wirimu, aahaavaha oohuserya awe murici mutokweene: “Ntakhara awe rowani, husihani atchu a maloko othene.” (Mat. 28:18-20) Hiiha Yesu aahaavaha muhakhu wa esisapo, orummwa Weekiristu.​—2 Akor. 4:7.

⁷ Makuchuwelo taani nnaphwanelaahu okhalano? Vaavaa aavanheiye oomuchara awe muteko wa waapaka oohuserya, Yesu chiryene aavaha “muhakhu awe”​—italento sawe. (Mat. 25:14) Mmasu ookhweya, italento onaahiwa murici wa olaleerya ni waapaka oohuserya.

 8. Naamwi akapuro oothene yaakhenle italento soohiyana waaca waya, tiheeni pwiya aaweheryeiye?

⁸ Niphwanaphwaniho na italento ninnaloca wi pwiya ole aamvaha kapuro mmoha italento thanu, mukina piili ni kapuro mukina etalento emoha. (Mat. 25:15) Naamwi akapuro oothene yaakhenle italento soohiyana waaca waya, pwiya aaweherya wi oothene yaahaala owetha opharihela italento ihe, ela ti wi olapa ophiyerya anaweryelaayavo mu orummwa. (Mat. 22:37; Akol. 3:23) Mu nsana noopacerya, ovinyerya mu Pentekoste a 33 E.K., oomuchara a Kiristu yaapacerya othuma maroca ni italento seiyo. Owetha waya mmuteko wa olaleerya ni waapaka oohuserya woorempwa mu liivuru a Mpiipiliyani a Saweriwa Tarummwa.d​—Saw. 6:7; 12:24; 19:20.

OTHUMA MAROCA NI ITALENTO MU ELUKULUKU YOOKUCHULA

 9. (a) Akapuro eeli tiheeni yaapankaaya ni italento, nave eyo enooniherya eheeni? (b) Murici taani “ipuchepuche sikina” iryaayano?

⁹ Mweelukuluku yookuchula, xaxaxa opacerya 1919 oya ohoolo, awoocihiwa a Kiristu veelaponi yavathi annathuma maroca ni italento sa Pwiya. Moolikana ni akapuro apiili oopacerya, anna ni arokora awoocihiwa anneera yeeyo anaweryaaya ni yeeyo aryaayano. Hori woochuneya weererya omusuwela taani aakhenle italento thanu naari taani aakhenle italento piili. Mu niphwanaphwaniho, akapuro oopiili yaahaaceererya yeeyo pwiya aya aavanheiye, mwawiihiiha oopiili yaawetha. Tuuvi ori murici wa yaale arino ewehereryo ya veelaponi yavathi? Murici woochuneyaxa! Niphwanaphwaniho na Yesu na ipucepuche ni ipuri ninnanihusiha wi yaale arino ewehereryo ya veelaponi yavathi aakhalano muteko woocicimiheya wa waakhaviherya anna awoocihiwa a Kiristu mmuteko wa olaleerya ni ohusiha. Variyari va mahiku ookuchula, makhuuru oomeeli annalapa vamoha ntoko “muloko mmoha” mwa mvai yaakhwaniheryaka muteko wa waapaka oohuserya.​—Yoh 10:16.

10. Tiivi eri yawooniherya etokweene ya eneneeryo ya ophiya wa Yesu?

¹⁰ Chiryene Pwiya onnawehererya yookhumelela. Ntoko noonnaahu, oohuserya oororomeleya mu nsana noopacerya yaahaaceererya muhakhu awe. Hanka vooloca sa elukuluku yeela yookuchula vaavaa niphwanaphwaniho na italento nnakhwanelaaya? Oororomeleya a Yesu mwakuru annaphara muteko mutokweene wa olaleerya ni waapaka oohuserya. Wiilipixerya waya onnakumiherya mphurelo mu waathukumanya macikhwi a oohuserya avyaani yaawo anapaka makupa mmuteko wa olaleerya eyaakha eri yoothene, yeerihaka muteko wa olaleerya okhala muteko onakhwaaniherya eneneeryo ya ophiya wa Yesu mu ikuru sa Omwene. Mwevelevelo Pwiya aya onnahakalala!

TI LIINI PWIYA ONAHAALEIYE ORWA WI ATHORIHE?

11. Tiheeni enaneeriha oloca wi Yesu onahaala othoriha mu yoohooxa etokotoko?

¹¹ Yesu onahaala orwa wi apake mulacu ni akapuro awe omakuchuwelo wa yoohooxa etokotoko. Tiheeni enaneeriha oloca yeela? Mu yooloherya awe mu Mateyu ekapitulu 24 ni 25, mwawuuluulela Yesu aaromola orwa wawe. Alocaka sa othoriha variyari va yoohooxa etokotoko, Yesu aaloca wi achu enarwa “yona Mwana a mutchu arikimórwa va mekuni a wirimu.” Aahaalopola oomuchara awe a mahiku ookuchula wi ekhale oolipelela, ariki: “Hamunasuwela nihiku naya nophiya Apwiya anyu” nave “mu elukuluku yeyo muhinupuwelanyu, Mwana a mutchu anarwa.” (Mat. 24:30, 42, 44) Mwawiihiiha, vaavaa Yesu aalonceiye wi “ákoka pwiya a akapuro awo, álakhanyeryano vamoha,” owo aaloca sa elukuluku yeeyo aneereiye apake othoriha omakuchuwelo wa mukhalelo ola wa ichu.e​—Mat. 25:19.

12, 13. (a) Pwiya onawaakhula hai akapuro apiili oopacerya, nave ntakhara heeni? (b) Ti liini awoocihiwa eneeraaya yaakhele eneneeryo aya yookuchula? (Moone ekaaxa “Othoriha wookuchula.”) (c) Phatamari taani yaale enii yooniwe ntoko ipucepuche anahaalaaya omwaakhela?

¹² Mwawiiwanana ni niphwanaphwaniho, vaavaa pwiya onarweiye, owo onnoona wi akapuro apiili oopacerya​—yoowo aamvanheiye italento thanu ni mukina aamvanheiye italento piili​—yaari oororomeleya, mmoha ti mmoha aahaaceererya italento sawe. Pwiya onaloca echu emohamoha wa oopiili: “Yaphama kapuro weyo aphama ni óroromeleya; wári óroromeleya ni itchu sikhani, kinakilathiha weyo va itchu sinchipale.” (Mat. 25:21, 23) Tiheeni enahaala weereya vaavaa Pwiya Yesu oneereiye arwe wi athorihe omwaahiyu?

¹³ Yaale anaweemelela akapuro apiili oopacerya​—oomuchara awe awoocihiwa ni oowetha​—anahaala waakhela eneneeryo aya yookuchula ehaakumve opacerya yoohooxa etokotoko. (Yaw. 7:1-3) Armaketo ahaakumve, Yesu onahaala waavaha phatamari aya a wirimu. Yaale arino ewehereryo ya veelaponi yavathi yaawo yaakhavihenrye anna a Kiristu mmuteko wa olaleerya anahaala othorihiwa ntoko ipucepuche ni ochiciwa ekari ya okhala veelaponi yavathi elamuleliwaka ni Omwene.​—Mat. 25:34.

KAPURO OONANARA NI OOYERE

14, 15. Apwanne Yesu aathoonyerya wi anna awe ancipale awoocihiwa yaahaala okhala oonanara ni ooyere? Tharihani.

¹⁴ Mu niphwanaphwaniho, kapuro ookuchula aavitha etalento awe ohiya othumano maroca naari waavahererya alipa oopoleiha italento. Kapuro yoola aahooniherya mukhalelo woonanara, ntakhara wi aaheera moovanyihana ni yoochuna ya pwiya. Moophwanelela pwiya aamweera “Kapuro . . . ónanara ni óyere.” Pwiya aamwaakha etalento nave amvaha yoole aarino italento khumi. Kapuro ole oonanara aavonyeryiwa “wipiphini ya vate.” “Wiwo [aakhalano] wunla ni okhuriha minno.”​—Mat. 25:24-30; Luka 19:22, 23.

¹⁵ Kapuro mmoha a pwiya aavitha etalento awe, mwawiihiiha apwanne Yesu aathoonyerya wi oomuchara awe akina awoocihiwa yaahaala okhala oonanara ni ooyere? Hooye. Muthokororye mwaha woothene. Mu niphwanaphwaniho na kapuro oororomeleya ni a miruku, Yesu aaloca sa kapuro oonanara yoowo onaahooxa akapuro akhwaawe. Tahi wi Yesu aaloherya wi naahaala okhumelela nikhuuru noonanara. Ohiya yeeyo, owo aamulopola kapuro awe oororomeleya wi ahooniherye mikhalelo sa kapuro oonanara. Moolikana, mu niphwanaphwaniho na asimwali khumi, tahi wi Yesu ooniherya wi emeya ya oomuchara awe awoocihiwa yaahaala okhala ntoko asimwali athanu oolosowa. Ohiya yeeyo, owo aalopola anna awe oomunepani vooloca sa yeeyo yaahaala weereya wakhala wi aahiya okhala oolipelela ni ooreheryeya.f Mwawiihiiha, ti woophwanelela oloca wi mu niphwanaphwaniho na italento, tahi wi Yesu aaloca wi anna awe ancipale yaahaala okhala oonanara ni ooyere mmahiku ookuchula. Moohiyana, Yesu aamwaalopola oomuchara awe awoocihiwa ochuneya waya okhala oowetha​—“othuma marocha” ni italento saya​—ni osepa moonelo ni meerelo a kapuro oonanara.​—Mat. 25:16.

16. (a) Ichu taani nnahuseryaahu orweela wa niphwanaphwaniho na italento? (b) Mwaha ola wookolonle hai wiiwexexa wahu niphwanaphwaniho na italento? (Moone ekaaxa “Wiiwexexa Niphwanaphwaniho na Italento.”)

¹⁶ Ichu taani piili nnahuseryaahu orweela wa niphwanaphwaniho na italento? Yoopacerya, Pwiya, Kiristu ohaavaha akapuro awe awoocihiwa echu onooneiye okhala yasisapo​—muteko wa olaleerya ni waapaka oohuserya. Yanaawiili, Kiristu onaweherya wi oothene hiyo nikhale oowetha mmuteko wa olaleerya. Wakhala wi ninneerano yeeyo, nroromele wi Pwiya onahaala oreeliha nroromelo, olipelela ni ororomeleya wahu.​—Mat. 25:21, 23, 34.

[Masu a vathi]

[Eruku va epaaxina 23]

Olikanela wa Maphwanaphwaniho a Italento ni Icarama

Maphwanaphwaniho a italento ni icarama aakhalano makhalelo oolikana. Maphwanaphwaniho oomeeli anamuloca mulopwana a olamulelo yoowo ahaakumve opaka mukwaha onnawiichana akapuro awe nave aavaha muhakhu, aaleelaka wi yaaceererye muhakhu awe. Voocharela, vaavaa onakookeiye, owo onnaveka osuwela mukhalelo apharihenlaaya muhakhu ole. (Mat. 25:14-30; Luka 19:12-27) Mmaphwanaphwaniho oomeeli, pwiya (1) onasiphela Yesu, nave akapuro (2) anaasiphela oomuchara awe awoocihiwa. Mmaphwanaphwaniho oomeeli, pwiya onnaavaha akapuro awe muhakhu (3), yoowo onasiphela ekari etokweene ya waapaka oohuserya. Saweereya soopiili sookhalano tho olopola vooloca sa yeeyo enahaala weereya wakhala wi oomuchara a Kiristu ahooniherya mikhalelo sa kapuro oonanara.

[Ekaaxa va epaaxina 25]

Othoriha Wookuchula

Ovinyerya nsana noopacerya oya ohoolo, awoocihiwa annaakhela italento, nave anahaala othorihiwa mukhalelo anaakhwaniheryaaya muteko wa olaleerya. Yaale anakhwa moororomeleya ehaakumve yoohooxa etokotoko annaakhela eneneeryo aya yookuchula mweelukuluku anakhwaaya. Nyenya, niphwanaphwaniho na Yesu na italento nnaloca sa othorihiwa wa awoocihiwa yaawo enii ekhale akumi mweelukuluku ya yoohooxa etokotoko.

[Ekaaxa va epaaxina 26]

Wiiwexexa Niphwanaphwaniho na Italento

Ti Liini Pwiya Onahaaleiye Waavaha Akapuro awe Phatamari.

Wiiwexexa wakhalai: Mu 1919, Yesu aahaavaha phatamari akapuro awe awoocihiwa veelaponi yavathi moorweela wa waavaha mirici mincipale.

Wiiwexexa wahiihaano: Vaavaa Kiristu oneereiye arwe omwaahiyu,onahaala waavaha phatamari awoocihiwa oororomeleya moorweela wa waaviiha ntakhara okumi wa wirimu.

Kapuro Oonanara ni Ooyere.

Wiiwexexa wakhalai: Kapuro oonanara ni ooyere anaahiwa awoocihiwa mweelukuluku ya 1914 yaawo yaakhonce ophara muteko wa olaleerya.

Wiiwexexa wahiihaano: Tahi wi Yesu aaloherya wi nikhuuru na oomuchara awe awoocihiwa yaahaala okhala kapuro oonanara. Ohiya yeeyo, owo aalopola oomuchara awe vooloca sa yeeyo yaahaala weereya wakhala wi annahusiha naari anneera mmukhalelo waahaala omweeriha owoona ntoko oonanara ni ooyere.