Atokweene Anaavyakiha Hai Akina wi Ephwanelele

“Hiho wíwalá wa miyo . . . owunnyererye atchu óroromeleya.”​—2 TIM. 2:2.

MWAHAALA WAAKHULA HAI?

Mmikhalelo taani atokweene anaphwanelaaya omulipiha munna omunepani?

Soorepa taani inahaala omukhaviherya munna yoowo onakhala ntoko toohipwacha otoroka moonelo awe?

Yaale anavyakihiwa enii emutakiherye hai Eliseu?

 1. (a) Ovinyerya khalai alapeli a Muluku anoona hai vooloca sa ovyakiha, nave ela enaphariheleya hai olelo? (b) Tiheeni nnahaalaahu othokororya mmwaha yoola?

OVINYERYA khalai alapeli a Muluku aasuwela wi ovyakiha onnakhaviherya okhumelela phaama. Aaparahamu “àhathukumanya atxhu awe” oovyakihiwa wi yamoopole Looti​—nave alopwana awo yaakhumelela phaama. (Map. 14:14-16, BNM) Mmahiku a Mwene Tavite, alipa wiipa a empa ya Muluku yaavyakihiwa “wi yipeke ovuwa w’Apwiya [Yehova]” ni omucicimiha yoowo. (1 Math. 25:7, BNM) Olelo, hiyaano nookhalano ekhoco yoomunepani ni Satana vamoha ni akhaviheryi awe. (Aef. 6:11-13) Nave tho, ninniilipixerya omucicimiha Yehova. (Ahe. 13:15, 16) Mwawiihiiha, moolikana ni alapeli a Muluku akhalai, wi nikhumelele phaama nnaphwanela ovyakihiwa. Mmulokoni, Yehova onnaavaha atokweene murici wa waavyakiha akina. (2 Tim. 2:2) Makhalelo taani atokweene oosuwela anapharihelaaya wi yaavyakihe anna wi ewerye okhapelela muhuwo?

MMULIPIHE OHUSERYA OMUNEPANI

 2. Ahaakumve omuhusiha munna okhalano mavyakelo, tiheeni mutokweene onaphwaneleiye weera, nave ntakhara heeni?

² Ntoko mutokweene, nyuwaano munalikanyihiwa ni namalima. Ahaakumve waala mmiso, namalima onahaala woona okhala woochuneya ohela manyowa va echaya wi evahe mphurelo. Moolikana, muhaakumve omuhusiha munna okhalano mavyakelo, ti woochuneya wuuka ni yoowo muupuwelo woolipiha wa Soorepa wi murima awe waakhulele phaama ovyakiha yoowo onahaaleiye waakhela.​—1 Tim. 4:6.

 3. (a) Masu a Yesu mu Marko 12:29, 30 enii ephariheliwe hai mu ochekula ni oohuserya? (b) Nivekelo na mutokweene nnahaala omvolowela hai oohuserya?

³ Wi musuwele ophiyerya mweero taani muupuwelo ni meerelo a oohuserya avoloweliwaaya ni eparipari ya Omwene, mmukohe: ‘Wiiveleela waa wa Yehova otoronke hai mukhalelo wa opharihela okumi aa?’ Nikoho nenla nnahaala wookhaviheryaani ochekula vooloca sa yeeyo eneeriha wi muteko ahu okhale wa murima woothene. (Mwaalakhanye Marko 12:29, 30.) Omakuchuwelo wa ochekula iwo, mpake nivekelo, mumvekaka Yehova wi amvahe oohuserya munepa awe waweela yoowo onachuneiye wi aakhwaniherye ovyakihiwa wawe. Owiriyana nivekelo nanyu noorweela mmurimani ntakhara yoowo enahaala omulipiha vancipale!

 4. (a) Mvahe sootakiherya sa saweereya sa Mpiipiliyani inahaala waaceererya wunnuwa woomunepani wa oohuserya. (b) Yoolakelela taani atokweene anakhalaayano vaavaa anaavyakihaaya akina?

⁴ Mmakupa oopacerya a ovyakiha, muthokororye saweereya sa Mpiipiliyani inahaala omukhaviherya oohuserya woona ochuneya wa okhala awiiveleela, oophimelela ni awiiyeviha. (1 Mam. 19:19-21; Neh. 7:2; 13:13; Saw. 18:24-26) Mikhalelo seiya ti soochuneya wa oohuserya hiiha ntoko manyowa a echaya. Mikhalelo iha sinnaakuviha wunnuwa woomunepani. Jean-Claute, mutokweene a mmuloko o Fransa onnaloca: “Yoolakelela aka vaavaa kinavyakihaaka ti yawi oohuserya akhaleno moonelo woomunepani. Kinnapharihela ikari wi naalakhanye vamoha yoorepa wi ‘kihule mitho’ a oohuserya wa ‘sotikiniha’ seiyo inaphwanyeya mu Masu a Muluku.” (Sal. 119:18) Taavi ari makhalelo makina a omulipiha oohuserya?

MVAHE SOOLAKELELA​—MULOCE MATHOWA ENE

 5. (a) Tuuvi ori mphurelo wa ochekula ni oohuserya vooloca sa soolakelela soomunepani? (b) Ntakhara heeni atokweene anaphwanela waavyakiha yaale nlelo ari amiravo? (Moone masu a vathi.)

⁵ Mmukohe oohuserya, ‘Tiivi siri soolakelela saa soomunepani?’ Waakhala wi haano soolakelela, mmukhaviherye otikitherya yoolakelela emoha yoophwanelela ni yooweryeya ophwanya. Mmuleele yoolakelela emoha nyuwaano mwaapankaanyu, nave mmuleele ohakalala mwaaraanyuno vaavaa mwaaphwannyanyu. Naamwi weerano ela ekhalaka ntoko echu ekhaani, yookhalano mphurelo. Victor, yoowo ori mutokweene ni piyoneero o Afrika, onnaloca: “Kaaryaaka mmiravo, mutokweene mmoha aakipakela makoho vakhaani aphaama vooloca sa soolakelela saka. Makoho awo yaakikhaviherya opacerya wuupuwelela mwawiiseela orummwa waka.” Atokweene oosuwela annacicimiherya tho ochuneya wa opacerya waavyakiha anna eri amiravo​—mu iyaakha soopacerya sa omiravo aya​—moorweela wa waakawela muteko mmulokoni oniiwanana ni iyaakha saya. Ovyakiha yoowo wa woosiilo onahaala waakhaviherya amiravo okhalano mmuupuweloni soolakelela soomunepani vaavaa aninnuwaaya nave anakumanaaya ni sawuukhula sincipale.​—Mwaalakhanye Salmo 71:5, 17.a

 6. Tiheeni yaari yoochuneya mmukhalelo Yesu aavyakinheiye akina?

⁶ Munahaala tho waaceererya nchuno na oohuserya na orumeela moorweela wa omutharihela ohiya pahiru echu yaweera nyenya tho mathowa a weerano yeeyo. Moorweela wa oloca mathowa ene, munamutakiherya Muhusiha Mutokotoko, Yesu. Ntoko yawooniherya, ahaakumve waavaha arummwa awe muteko wa waapaka oohuserya, Yesu aahaaleela nthowa nene yaaphwanelaaya wiiwelela. Owo aahi: “Ikuru sothe sene sovahiwa wa Miyo Wirimu ni vathi vano.” Voocharela aahi: “Ntakhara awe rowani, husihani atchu a maloko othene.” (Mat. 28:18, 19) Munii mmutakiherye hai Yesu mmukhalelo wa ovyakiha?

7, 8. (a) Atokweene olelo enii emutakiherye hai Yesu mmukhalelo wa ovyakiha? (b) Tuuvi ori mphurelo wa omuthamalela oohuserya? (c) Sooleeliherya taani inahaala waakhaviherya atokweene waavyakiha akina? (Moone ekaaxa “Mukhalelo wa Waavyakiha Akina.”)

⁷ Mmutharihele oohuserya mathowa a mu Soorempwa aniiwanana ni yeeyo onavekiweiye weera. Weerano hiiha munamuhusiha wuupuwela mwawiiwanana ni mathipelo a Mpiipiliyani. Wi nooniherye, mwaanyiherye wi momveka munna wi arehererye Empa ya Omwene wi ekhale yooreera. Akhweya muthokororye Tito 2:10 nave mutharihe ti mwawiihai muteko awe wa orehererya Empa ya Omwene onahaalaaya ‘oreriha mahusiheryo a Mvulushahu Muluku.’ Nave tho, mumveke oohuserya owuupuwela awuuluvala a mmulokoni ni mukhalelo weerano muteko awe onahaalaaya waakhaviherya yaawo. Ochekula yoola ni oohuserya ntoko makupa a ovyakihiwa wawe onahaala omukhaviherya wuukhuwa ni achu ohiya wuukhuwa ni malamulo. Owo onahaala okhalano ohakalala onarweela wa woona mukhalelo anna ni arokora mmulokoni anaphuraaya orweela wa muteko onaphareiye.

⁸ Mwawaacererya, mmuthamalele oohuserya nthowa na opharihela sooleeliherya sanyu. Tuuvi ori mphurelo wa weerano yeeyo? Othamalela weeparipari onnamweeriha oohuserya wunnuwa​—hiiha ntoko maahi aninnuwihaaya mwiri.​—Mulikanyihe ni Mateyu 3:17.

NIKACAMIHO NIKINA

 9. (a) Mmwaha wa ovyakiha, nikacamiho taani atokweene akina anakumanaayano mu ilapo sooreela? (b) Ntakhara heeni eparipari henakhala mmakupa oopacerya mu okumi wa anna akina ari amiravo?

⁹ Atokweene a mmulokoni a ilapo sooreela aakhalano nikacamiho nikina: waaceenyerya anna a iyaakha 20 naari 30 wi yiivoliiherye mmiteko sa muloko. Nohaakoha atokweene a ilapo 20 onayawo nsuwa wi enileele mathowa anaweeriha amiravo akina okhooca ikari mmulokoni. Variyari va maakhulo mancipale yaavanhaaya, mmoha aaloca: Vaavaa yinnuwaaya, amiravo akina hiyaaceenyeryiwa okhalano soolakelela soomunepani. Vakina vaya, amiravo yaawo yaarino mathitimanelo a otikitherya soolakelela seiyo, asitiithi aya yahaaceenyerya okhalano soolakelela sa mweelaponi! Eparipari hiyitonko okhala mmakupa oopacerya a okumi wa amiravo yaala.​—Mat. 10:24.

10, 11. (a) Mutokweene onii amukhaviherye hai munna yoowo onakhala ntoko toohipwacha otoroka moonelo awe? (b) Muupuwelo taani wa mu Soorempwa mutokweene onaphwaneleiye othokororya ni munna yoowo, nave ntakhara heeni? (Moone masu a vathi.)

¹⁰ Onachuneya wiilipixerya ni opixa murima wookolola muupuwelo wa munna yoowo onakhala ntoko toohipwacha, nyenya ti yeeyo enaphwanela weeriwano. Hiiha ntoko namalima onaweryeiye wookolola wunnuwa wa miri moorweela wa wookolola mirai saya, nyuwaano tho munanwerya vakhaani vakhaani waakhaviherya anna woona ochuneya wa wookolola moonelo aya vooloca sa weemererya ikari. Mwawiihai?

¹¹ Mwaavye elukuluku wi munnuwihe onthamwene ni munna owo. Mmuleele wi tookhweleya mmulokoni. Nave moovira wa elukuluku, mukiraatheno wi mvaaneleno yoorepa yoothanliwa ni omukhaviherya wuupuwelela sa wiiveleela wawe wa Yehova. (Ekle. 5:4; Yes. 6:8; Mat. 6:24, 33; Luka 9:57-62; 1 Akor. 15:58; 2 Akor. 5:15; 13:5) Mmukohe: ‘Tiheeni waalakannaawe ni Yehova vaavaa wiivelenlaawe wa yoowo?’ Mweererye otannya murima awe moorweela wa omukoha: ‘Onuupuwela wi Yehova onne hai vaavaa waapatisiwaawe?’ (Masi. 27:11) ‘Tuuvi waari moonelo wa Satana?’ (1 Pet. 5:8) Musuwele wi munna onahaala ovoloweliwa vancipale ni makupa a Mpiipiliyani athanliwe phaama.​—Mwaalakhanye Ahepri 4:12.b

OOHUSERYA NYU, MUKHALE OOROROMELEYA

12, 13. (a) Mukhalelo taani Eliseu oonihenryeiye ntoko oohuserya? (b) Yehova aamureelinhe hai Eliseu nthowa na ororomeleya wawe?

¹² Hanka vooloca sa amiravo nyu yeenyu nikhaviheryo nanyu nri noochuneya? Tiheeni enahaala wookhaviheryaani okhumelela phaama? Wi naakhule, hankooni nthokororye saweereya sa oohuserya mmoha akhalai.

¹³ Waacamela iyaakha 3.000 muculi, mulipa miririmu Eliya aanwopa mmiravo Eliseu wi akhale mukhaviheryi awe. Eliseu aaheemererya ni murima woothene nave moororomeleya aamukhaviherya mulopwana ole moorweela wa ophara miteko sawiiyeviha. (2 Mam. 3:11) Ohoolo waya, sivinre iyaakha thanu nammoha sa ovyakihiwa, Eliseu aasuwela wi muteko wa Eliya o Isarayeli waahaala omala. Mweelukuluku yeeyo, Eliya aamuleela Eliseu wi ahiye omuchara, nyenya mu ikwaha raru Eliseu aaloca wa Eliya: “Nkirwa kohiya mekhà!” Owo aari oolakelela okhala ni muhusiha awe elukuluku yincipale. Ntoko yookhumelela, Yehova aamureeliha Eliseu nthowa na ororomeleya wawe moorweela wa omweeriha woona olaanya wootikhiniha wa Eliya.​—2 Mam. 2:1-12, BNM.

14. (a) Olelo oohuserya enii emutakiherye hai Eliseu? (b) Ntakhara heeni ti woochuneya wi oohuserya akhale oororomeleya?

¹⁴ Olelo munii mmutakiherye hai Eliseu? Mweemererye orummwa ni murima woothene, ophitaanyerya miteko sawiiyeviha. Mmooneke muhusiha anyu ntoko nthamwene, nave mmuleele othamalela wanyu wiilipixerya wawe ntakhara nyuwaano. Mukhalelo munaakhulelaanyu, ori ntoko munamuleela wi: “Nkirwa kohiya mekhà!” Opwaha soothene, mukhale oororomeleya waakhwaniherya muteko munavahiwaanyu. Ntakhara heeni ela ti yoochuneya? Ntakhara atokweene anahaala osuwela wi Yehova onachuna wi mvahiwe mirici mikina mmulokoni pahiru wakhala wi muhooniherya wi muri oororomeleya ni oophimelela.​—Sal. 101:6; mwaalakhanye 2 Timoteo 2:2.

MOONIHERYE NCICIMIHO NTOKWEENE

15, 16. (a) Mmikhalelo taani Eliseu oonihenryeiye ncicimiho wa muhusiha awe? (Moone eruku yoopacerya.) (b) Meerelo taani a Eliseu yaaroromelinhe alipa miririmu akhwaawe?

¹⁵ Yaweereya ya Eliseu yoowo aamuracenle Eliya, ennooniherya tho wi anna olelo anaphwanela wooniherya ncicimiho ntokweene wa atokweene. Eliya ni Eliseu emanle oxekurya nikhuuru na alipa miririmu o Yeriko, Alopwana ala apiili yaaheeca eyaaka o Muhice Yoortano. “Eliya àkusa malaya awe, arutha ni amanano mahi a muhitxe Yordano; ni awo yàkawanyeya.” Emanle olapuwa va muhice wawuuma, awo yaatitelela ‘olotxa yetxaka.’ Chiryene, Eliseu huupuwenle wi aasuwela soothene. Ophiyerya elukuluku Eliya amuhin’yeiye, Eliseu aakhapelela mmurimani masu oothene muhusiha awe aalonceiye. Voocharela Eliya aarimeela mu nayuupuru. Ohoolo waya, akookelaka o Yoortano, Eliseu aamana maahi ni yoowara ya Eliya akhuwelaka: “Pwiya, Muluku a Eliya, muri wowi?” Maahi yaakawanyeya wanawiili.​—2 Mam. 2:8-14, BNM.

¹⁶ Mohoona wi yootikhiniha yoopacerya ya Eliseu yaari yootakiherya ya yootikhiniha yookuchula yeeyo Eliya aapankeiye? Ntakhara heeni ela ti yoochuneya? Eliseu huupuwenle wi woona wi owo vano taahoolela, aaphwanela otoroka ichu mwawaakuveya. Ohiya yeeyo, moorweela wa ochariha mukhalelo Eliya aakhwanihenryeiye orummwa wawe, Eliseu aahooniherya ncicimiho ntokweene wa muhusiha awe, eyo yaahaaroromeliha alipa miririmu akhwaawe. (2 Mam. 2:15) Ohoolo waya, mu iyaakha 60 sa muteko wa Eliseu ntoko mulipa miririmu, Yehova aamweeriha opaka sootikhiniha sincipale ompwaha Eliya. Teevi eri yoohuserya wa nyuwaano ntoko oohuserya?

17. (a) Oohuserya a olelo enii etakiherye hai moonelo wa Eliseu? (b) Moovira wa elukuluku, Yehova onii aapharihele hai oohuserya oororomeleya?

¹⁷ Muhuupuwele wi vaavaa munaakhelaanyu murici mmulokoni, munaphwanela opharihela wi mutoroke ichu​—weera ichu soohiyana ni mukhalelo seeriwaayano khalai. Otoroka oneeriwano ohiya moorweela wa ochuna wanyu otoroka, nto moorweela wa soothowa sa muloko ni ohoolela nnaakhelaahu orweela wa marehereryo a Yehova. Hiiha ntoko Eliseu aaroromelinheiye alipa miririmu akhwaawe moorweela wa miteko ni wooniherya ncicimiho wa muhusiha awe moorweela wa otitelela opharihela mikhalelo sa Eliya, nyuwaano munahaala waaroromeliha akhwiinyu a mu nroromelo ni wooniherya ncicimiho wa atokweene moorweela wa otitelela opharihela mavyakelo aya oorweela Mpiipiliyani. (Mwaalakhanye 1 Akorinto 4:17.) Vaavaa munaaceereryaanyu osuwela wanyu, moohikhwa minikwa munahaala opaka makupa mmatorokelo yaawo anahaala okhaviherya muloko okhala mwawiiwanana ni oya vahoolo wa marehereryo a Yehova. Hiiha ntoko yeeren’yaaya ni Eliseu, moovira wa elukuluku nyuwaano ntoko oohuserya oororomeleya, Yehova onahaala oweerihaani opaka miteko mitokweene opwaha sa ahusiha anyu.​—Yoh. 14:12.

18. Ntakhara heeni waavyakiha anna mmulokoni wookhalano nipuro noopacerya olelo?

¹⁸ Ennaweheryiwa wi sooleeliherya mmwaha yoola ni mmwaha ovinre inahaala waakhaviherya atokweene wiivaha elukuluku wi yaavyakihe akina. Haya anna oophwanelela mweemererye ovyakiha wuuwu ni murima woothene ni opharihela mwa miruku vaavaa munakhaviheryaanyu okhapelela ipucepuche sa Yehova. Weerano yeeyo enahaala olipiha miloko sa elapo yoothene ni omukhaviherya mmoha ti mmoha a hiyo okhala oororomeleya mu ilukuluku sookacamiha inoorwa.

[Masu a vathi]

[Ekaaxa va epaaxina 13]

Mukhalelo wa Waavyakiha Akina

ATOKWEENE yaawo anakhumelela phaama mu waavyakiha akina aavaha sooleeliherya iha:

1. Mvahe yootakiherya yaphaama mmasu ni mmiteko.

2. Mmuceenyerye oohuserya wunnuwiha makupa oomunepani moorweela wa omwaalakhanya Piipiliya oothene mu eyaakha emoha.

3. Mulaleerye vamoha. (Moone eruku va ekaapa.)

4. Mmuhusihe weeciha phaama mithukumano sa olaleerya.

5. Vaavaa munapakaanyu mwaha wa vanlakani, mumvahe ekaarata ya mwaha anyu achariheke wi awerye woona mukhalelo mureherenryaanyu.

6. Vakina vaya munwope vamoha ni emusi awe wi mukhale vamoha mu malapelo anyu a echoko.

7. Mumveke wi owo ni emusi awe mulaleerye vamoha ni emusi anyu mu ekulucu evyaani naari ohinalaleeryiwawo mwawuuluulela.c

[Nsu na vathi]

[Ekaaxa va epaaxina 16]