Arummwa Annuuluula Owanela Otokweene

Vaavaa Yesu ni amuhuserya awe anaakwaniheryaaya mukwaha aya orweela onakhumawo echeku ya murupi o Pereya eyaaka o Yerusalemu, awo annalapuwa muhice Yortano. Akina ari ni yaawo va mukwaha eyaaka o Paskha a 33 E.K.

Yesu ori ohoolo wa amuhuserya awe, ni yoolakelela ya okhala mu epooma mu elukuluku ya Paskha. Koma amuhuserya annova. Wuupaceryani, vaava Lasaro aakhwileiye nave Yesu achunaka ocimula o Pereya ayaaka o Yuteya, Tomasi aahaaleela akina ariki: “Hankoni hiyotho, nakhwe ni yowo!” (Yohani 11:16, 47-53) Mwawiihiiha oya o Yerusalemu ti yawoopiha, nave woova wa amuhuserya ti wawiiwexexeya.

Achunaka waalopola ntakhara ichu inaya ophacuwa ohoolo, Yesu onnawiichanela amuhuserya okhwipi nave onnaaleela ariki: “Onani wi vano nnawela o Yerusalemu, ni weiwo Mwana a mutxhu onanvelèliwa wa asitokwene a alipa a mukutxho ni wa alipa òrepa. Yawo anammuvaha ekoi yokhwa. Anammuperekha wa amalapo wi anyemuliwe, awasuliwe ni akhomeliwe [vamwirini]; nto nihiku naneraru naya onanvinya mokhwani.”—Mateu 20:18, 19.

Ela ekwaha yaneeraru Yesu onaaleeleiye amuhuserya vooloca sa okhwa wawe ni oviihiwa mookhwani. (Mateu 16:21; 17:22, 23) Opwaha yeeyo, mu elukuluku ela onnaaleela wi owo onahaala othomeiwa va mwirini. Awo annanwiriyana Yesu, nave awo haniiwexexa yootaphulela ene. Akhweya awo anawehererya okookiheryiwa veelaponi yavathi Omwene wa Isarayeli, eweheryaka opuha ovuwa ni ncicimiho mu omwene weelapo yavathi vamoha ni Kristu.

Mai a arummwa eeli Yakopo ni Yohani, mwawooneya ori Salome, ori variyari va mukwaha yoola. Arummwa yaala Yesu oomala waavaha masina yaawo arino yootaphulela yawi, “anamwane a etari,” hiwaavo minikhwa wi nthowa na olipa waya murima. (Marko 3:17; Luka 9:54) Mu elukuluku ekina, oopiili yaala yaahikhalano nchuno na okhalano murici mu Omwene wa Kristu. Mai aya annasuwela yeela. Vano owo onnamwaacamela Yesu vakhiviru, onnakokhora, nave annaveka mahala. Yesu onnamukoha: “Onakhwelani?” Nave mai owo onnaakhula: “Warume anaka ala eli wi ekirathi momweneni mwà, mmoha mono wolopwana, mukina mono wothiyana.”—Mateu 20:20, 21.

Yooveka ela enarweela wa Yakopo ni Yohani. Amanle wuupuwelela wuulihiwa muru ni onyoosiwa onahaleiye weereliwa, Yesu onnaloca wa yaawo: “Nyuwo hamunasuwela yeyo munavekanyu. Munawerya owuryerya ekahi yeyo kiniriaka kiwuryerye Miyo?” (Mateu 20:22, Nlakano Nahihano) Nlelo, enakhala ntoko wi awo haniiwexexa tiheeni ela enataphulelaaya wa yaawo.

Moohipwacha yeeyo, yesu onnaaleela: “Eparipari ekahi aka munan’wurya. Nto vawi mukirathi mono wolopwana nari wothiyana tahi miyo kinovahani, nto ori wa yale Atithi aka areheryenlaya.”—Mateu 20:23.

Mu osuwela yooveka ya Yakopo ni Yohani, arummwa akina khumi annatikhiniheya. Apwanne Yakopo ni Yohani yaahivahererya moonelo aya va mwaha waarivovo variyari va arummwa vooloca sa taani ori mutokweene? (Luka 9:46-48) Moohipwacha yeeyo, yooveka ela ennooniherya wi oothene Khumi Napiili ala hapharihenle ekano Yesu aavanheiye vooloca sa wiisoona okhala mukhaani wa oothene. Nchuno naya na okhalano murici ninnatitelela.

Yesu onnalakelela omaliha waakhulana wuuwu wookuchula, nave yoonanara onahaala okumiheryaka. Owo onnawiichana oothene Khumi Napiili nave onnaavaha ekano moosivela, alocaka: “Munnasuwela wi yawo eneriwa apwiya a amalapo ennálapiha; nave atokwene aya ennálamulela. Nyenya horwa-wihihá mwa nyuwo hoe; nyenya yowo anakhwela okhala mutokwene mwa nyuwo, anarwa-akhala namarika-mahi anyu; nave yowo anakhwela okhala ópacherya mwa nyuwo, anarwa-akhala kapuro a othene.” —Marko 10:42-44, NN.

Yesu onnaruuha vanlakani yootakiherya awo anaphwanelaaya ocharayootakiherya awe. Owo onnathariha: “Mwana a mutxhu harwele olampwa, nto walapa atxhu ni ovaha ekumi awe, wi awopole antxipale.” (Mateu 20:28) Mu iyaakha raru, Yesu oomala waarumeela akina. Nave nlelo onahaala weerano emohamoha moorweela mwa ohooxeya ni okhwa ntakhara achu! Arummwa tho anaphwanela okhalano nchuno noolikana na moonelo wa Okristu wa waarumeela akina oohikhala orumeeliwa, wiisoona okhala akhaani waapwaha akina ohiya wiisunnuwiha ni waavya otokweene.