Mwaana Aarimenle Onnakooka

Yesu ovaha maphwanaphwaniho a epucepuche yoorimeela ni ekhorowa yoorimeela akhweya nlelo ori Pereya ohico wa Muhice Yortano. Muchaka yoowo ovuwihiwe mmahusiheryo oomeeli ala ti wawi nnaphwanela ohakalala vaavaa namacheka onacharuweiye ni okookela wa Muluku. Afarisi ni anamarepa annamwiica Yesu nthowa nawi owo annawaakhela phaama achu a mukhalelo yoola. Nyenya apwanne achu yaala anamwiica aahuseryavo echu orweela maphwanaphwaniho oomeeli a Yesu? Apwanne awo anniiwexexa mmukhalelo atiithi ahu a wirimu anoonaaya vavaa namacheka onacharuweiye? Yesu onnavaha niphwanaphwaniho nootannya murima nnaceenyerya yoohusiha emohamoha yeela yookhweleya, niphwanaphwaniho na mwaana aarimenle.

Niphwanaphwaniho nnamvolowela tiithi yoowo orino anamwane eeli, mwaana mwaamukhaani tonapaka makupa matokweene mu niphwanaphwaniho nenla. Makhuuru oomeeli Afarisi ni anamarepa, mwawooneya vamoha ni akinatho annawiriyana yeeyo Yesu onaloceiye, awo anaphwanela ohuserya orweela wa yeeyo onaloceiye vooloca sa mwaana yoola mwaamukhaani. Mwawiihiiha, niphwanaphwaniho Yesu onavaheiye vooloca sa tiithi ni mwanawe mutokotoko hinnaphwanela ohithokororyiwa, woona wi miyoonelo achu ala oopiili aryaayano sinnahusiha echu. Mwawiihiiha muupuwelele vooloca sa alopwana araru yaawo Yesu onaaloceiye mu niphwanaphwaniho.

“Mulopwana mmoha àkhalano anawe eli,” Yesu onnapacerya. “Mukhani àlotxa ni atithinya ariki: Tithi, okivahe muhakhu ori waka. Atithi yàhakawela muhakhu yale eli.” (Luka 15:11, 12) Moone mwaana mwaamukhaani ola tahi wi aaveka atiithi awe muhakhu nthowa nawi awo arimukhwa. Tiithi nlelo mukumi hakhwile. Naamwi hiiha mwaana owo onachuna muhakhu hiihaano wi awerye wiivalaanya veechokoni ni apakeno yeeyo owo othanlileiye. Tiheeni owo othanlileiye?

“Mahiku vakhani evinre,” Yesu onnathariha, ‘mwana mukhani athukumannyeiye muhakhu awe wothene, àtximula àya worakamawo, nave weiwo àyeha muhakhu wothene ni metxelo òtxapaheya.’ (Luka 15:13) Moohipwacha okhapeleleya wa vaate vawe, ni mukhalelo tiithi onamukhapeleleiye mwanawe, mwaana ola hanapwacha yeeyo nave owo onnaya elapo ekina. Ari weiwe, mwaana ola aahiyeeha ikhorowa sawe soothene ni athiyana oocapaheya. Voocharela owo amanle wiipuherya muhakhu woothene onnahaawa, ntoko Yesu onatiteleleiye oloca mmasu anacharela:

“Ayehà wothene, vano yàrwa etala etokotoko velaponi vavale, ni owo àpatxerya othoiwa. Àya omulapa mutxhu mmoha a elapo yele. Owo àmuruma okukhula ikupa. Yole ànakhwela wipha etala ni ihe salyaya ikupa, nave harivo onvaha.”—Luka 15:14-16.

Nlamulo na Muluku naaloca wi ikupa ti sooriipiheya, naamwi hiiha mwaana ola onnakhala mukukhula a ikupa. Etala yootepa onwerya, ophiyerya wi onnachuna olya soolya sa ikupa seiho onakukhuleiye. Vaavaa aakumaneiye ni makacamiho oohiwehereryeya, “Àpatxerya wisupuwelela.” Tiheeni owo eenreiye? Owo onnaloca mukhateiye ariki: “Owani, watxawo anamalapa analya phama ni enavona vantxipale, vano nno kinnakhwa etala. Kinanvinya wi kaphwanye atithi nave olotxa waka kere: tithi, kòmutxhekela Muluku ni kìhotxhekela, nkinaphwanela witxhaniwa mwana à. Okere ntoko namalapa à.” Avinyaka aacimula aya wa atiithinya.—Luka 15:17-20.

Apwanne atiithinya anahaala omwaakhula hai? Apwanne anahaala omunyimela mwanaya ni omwiikara nthowa na olosowa wawe opwahavo vaate woopaceryani? Apwanne atiithinya anahaala omooniherya mukhalelo woohiyana, muupuwelo woomukhooca? Waakhanle wi mwaari nyuwaano, mwaahaala waakhulela hai? Hanka waakhanle wi aari mwaninyu mwaamuthiyana naari mwaamulopwana mwaahaala weera hai?

Yesu onnathariha mukhalelo tiithi onooneiye ni onaakhuleleiye: “Ari nivano otxaiwene, atithinya yàmona, ni emoriwa ikharari, yatxhimaka emukhuparela, envahaka ebeijo.” (Luka 15:20) naamwi ekhalaka wi tiithi aahiwa wi mwanawe aari capaheya, owo onnamwaakhela phaama mwanawe vaavaa onakookeiye. Apwanne ahooleli a Ayuta, yaawo analoca wi aamusuwela Yehova ni omulapela, anahaala woona orweela wa niphwanaphwaniho nenla mukhalelo Tiithi ahu a wirimu onooneiye vaavaa namacheka onacharuweiye? Apwanne awo anahaala osuwela wi Yesu onnooniherya munepa mmohamoha wa owaakhela anamacheka?

Tiithi awuupuwelela, onanwerya osuwela wuukhuwa wa mwanawe orweela wa ethoi onooniheryeiye wi owo oocharuwa. Mwawiihiiha, mukhalelo woosivela tiithi onapaceryeiye ommwenyerya mwanawe onnamweeriha mwaana owo oloca soocheka sawe mookhweya. Yesu onnaloca: “Mwana ole àlotxa: Tithi, kòmutxhekela Muluku ni kìhotxhekela, nkinaphwanela weriwa mwana-à.”—Luka 15:21.

Tiithi onnaalamulela anamalapa: “Mwakuve, muruhe yowara yorèrasa, mun’warihe; navetho mun’warihe munela mukathani mwawe ni isapatho mwinani mwawe. Mmuruhe mwasana òneneva a emope, mmwiphe; nimukhure nave nihakalale, ntakhara mwana aka ola àkhwa, vano òhuhumuwa; àrimeIa, vano òhoneya.” Voocharela “efesta yàpatxerya.”—Luka 15:22-24.

Mu elukuluku, yeela mwaana mutokotoko nlelo ori omaca. Yesu onnathariha vooloca sa yoowo: “Aruleiye, atxamelaka vale, àniwa wipa ni wìna. Àmwitxhana namalapa mmoha ni àmukoha etxhu yereya owani. Namalapa àhakhula ariki: ‘Munna-à òkòka ni atithi-à àmwipha mwasana oneneva a emope, ntakhara munna-à òrwa ni ekumi’. Vawihiha ànyenyeya ni anakhotxa ovoIowa. Nto atithinya yàkhuma ni emulapelela wi avolowe. Owo àwakhula atithinya ariki: ‘Sòvira miyakha mintxipale kolapaka ni kihitonko onanariha etxhu nari mano okhotxa, nave hòtonko okivaha epuri wi kihakalale ni asinthamwene aka. Vano oruleiye mwana-à ola oyen’he muhakhu wothene ni athiyana otxapaheya, wòmwiphela mwasana òneneva a emope.’”—Luka 15:25-30.

Taani, onalikana ni mwaana mutokotoko, yoowo oniica oreera murima ni nchuno Yesu oonihenryeiye wa achu vyakala ni anamacheka? Ti anamarepa ni Afarisi. Omwiica waya Yesu ntakhara owaakhela achu onnooneya mu niphwanaphwaniho nenla. Mweeparipari, oothene yaale aniica wooniherya mahala a Muluku onaphwanela ohuseryavo echu ni oviihamo mmurimani mwawe moonelo yoowo woonanara.

Yesu onnakuchula niphwanaphwaniho nawe orweela mwa oloca ekano yeeyo tiithi onamvaheiye mwanawe a mutokotoko: “Mwanaka, weyano onakhala ni miyo mahiku othene, nave sothene iri saka ti sawà. Vano yàri yaphama ohakalala vatokovene, ntakhara munna-à ola àkhwa ni òhuhumuwa; àrimela ni ohoneya.”—Luka 15:31, 32.

Yesu hanuupulula yeeyo mwaana mutokotoko onapakeiye. Mwawiihiiha Yesu amanle okhwa ni oviihiwa mookhwani, “alipa a mukutxho antxipale yànemererya.” (Saweriwa T’arummwa 6:7) Eyo ennaphitaanyerya ancipale a yaale yaamwiiwale Yesu alocaka niphwanaphwaniho nawe nakuru vooloca sa mwaana arimeenle. Aai, ela yaari yooweryeya wa yaawo waakhanle wi yaahiya mikhalelo saya soonanara, echaruwa, nave ekookela wa Muluku.

Ovinyerya nihiku nenla oyaaka muhoolo, amuhuserya a Yesu ananwerya nave anaphwanela okuha mmurimani miyaha mitokweene seiho Yesu oonihenryeiye vanlakani mu niphwanaphwaniho naphaama nenla. Nihusiheryo nenla noopacerya nri namiruku ti nawi nnaphwanela otitelela okhapeleleya mwa achu a Muluku, vathi va naakiho na Tiitihi ahu yoowo onanisivela nave onavaha, ohiya oya ocaiwene ohoolo waya nriki neehiwe ni soopuha “worakamawo.”

Nihusiheryo nikina ti nawi wakhala wi mmoha a hiyo ohiivalaanya ni Muluku, nnaphwanela wiiyeviha ni okookela wa Tiithi ahu wi nipuhe mahala awe wanaawiili.

Nihusiheryo nikinatho nnanwerya wooneya okhala noohiyana variyari va waakhela wa tiithi, munepa woolevelela, ni muupuwelo wooximwa, wa mwaana mutokweene woohichuna omwaakhela munnawe. Mwawooneya, alapeli a Muluku annachuna omulevelela ni omwaakhela wakhala wi muchu yoowo aapherunwe oocharuwa mweeparipari ni okookela ‘vaate va atithinya.’ Hankooni nihakalale woona wi munnihu yoowo ‘àkhwile vano òhuhumuwa;’ navetho wi owo ‘àrimela nave ohoneya.’