“Wopoliwa Wanyu Wohachamela”!

“Welihani miru anyu; ntakhara wopoliwa wanyu wohachamela.”​—LUKA 21:28.

MACIPO: 133, 43

MWAHAALA WAAKHULA HAI?

Saweereya taani soolikana sa 66 E.K. inahaala weereya moohilekela?

Elukuluku taani ya yaweeha enahaala weereya amanle opwexiwa “Babulo mtokotoko”?

Muteko taani wa othukumanya olociwe mu Mateyu 24:31?

 1. Ichu taani seeren’ye mu 66 E.K.? (Moone eruku yoopacerya.)

MWAANYIHERYE wi mwa mukiristu munakhala o Yerusalemu mu 66 E.K. Sinneereya ichu sincipale. Wuupaceryani, mutokweene o Roma iichaniwa Floro aakuxa italento 17 sa muhakhu wa empa ya Muluku. Moohilekela, Ayuuta yaamwaryeya, ewiipha anakhoco o Roma yaakhala o Yerusalemu nave etaphuwa wa Aroma. Nyenya achu o Roma yaaheeravo echu. Sihivinre miyeeri miraru, yaaphiya akhoco 30.000, ehooleliwaka ni mutokweene a Roma a Asiiriya Céstio Galo. Mwawaakuveya akhoco yaavolowa mmucecheni voorukurerya o Yerusalemu, nave ayuuta yaachawa, yaavyaka naakiho noophareleleya mu empa ya Muluku. Akhoco o Roma yaapacerya okumula ixiri sa empa. Muceche woothene ori mu sookacamiha. Mwahaala wi hai moonaka ichu soothene?

 2. Tiheeni akiristu yaaphwanelaaya weera mu 66 E.K., nave eyo yeeren’ye mwawiihai?

² Mmukhalelo yoola, moohikhwa minikwa, nyuwaano munnupuwela masu a Yesu arempwe ni namichaka Luka: “Nyenya vothe vene munirianyu mone Yerusalemu arukuryeryiwe ti miloko ya alipa-ekhocho, suwelashani vavo wi otoloshiwa waya wohachamela.” Amanle olopola, Yesu aavaha nlamulo: “Vavo yawo ari m’Yudeya etchawele o miakoni, nave yawo ari mpuwa mwa ola ekhume, nave yawo ari m’mawani ehivolowe’mo.” (Luka 21:20, 21) Akhweya nyuwaano munniikoha: ‘Kinii kiiwelele hai nlamulo nla? Kinii kikhume hai mu Yerusalemu anakhoco ancipale erukurenrye epooma yeela?’ Mootutuxa, enneereya echu yoohiwehereryeya. Moonaka ni miitho anyu, anakhoco annachikela muculi. Ntoko yaloheriwaaya, mahiku yaawo “yákhuvihiwa.” (Mat. 24:22) Vano nyuwaano munnoona ekari ya ochara nlamulo na Yesu. Mwawaakuveya munnachawa muyaaka mmiyaako okhopela wa muhice Yoortano, vamoha ni Akiristu akina oororomeleya ari mmucecheni ni moorukurerya.a Mu 70 E.K. nikhuuru nikina na anakhoco a Aroma yaaya o Yerusalemu nave etoloxa muceche. Nyenya okumi anyu onnavuluwa nthowa na wiiwelela masu a Yesu.

 3. Moohilekela, nnahaala okumana ni makacamiho taani, nave tiheeni nnahaalaahu othokororya mmwaha yoola?

³ Moohilekela, muchu ti muchu onahaala okumana ni mukhalelo woolikana. Yesu aahaalopola Akiristu ntakhara okumuliwa wa Yerusalemu, nyenya tho aapharihela saweereya seiyo sa nsana noopacerya wi ooniherye tiheeni enahaala weereya vaavaa “ekoi etokotoko” eneeraaya epacerye. (Mat. 24:3, 21, 29, BNM) Hiiha ntoko khalai, yoohakalaliha ti yawi anamukhala enii evuluwe: “muloko mtokotoko” onahaala ovuluwa mu epahu yeeyo ya elapo yoothene. (Mwaalakhanye Yawupulula 7:9, 13, 14.) Tiheeni Piipiliya onaloceiye sa saweereya seiya sa muhoolo? Enachuneya niiwexexe phaama naakhulo, nthowa na wi ovuluxiwa wahu ori mu sookacamiha. Hankooni noone ti mwawiihai saweereya seiyo inahaalaaya omvolowela muchu ori oothene.

OPACERYA WA EKOI ETOKOTOKO

 4. Ekoi etokotoko enahaala opacerya hai, nave enahaala weereya mwawiihai?

⁴ Ekoi etokotoko enahaala opacerya hai? Mwawiiwanana ni liivuru a Yawupulula, enahaala opacerya ni okumuliwa wa “Babulo mtokotoko”. (Yaw. 17:5-7) Ti woophwanelela olikanyihiwa wa malapelo awootha ntoko capaheya. Ahusiha annacapaheya ni alamuleli a elapo. Opwaha omukhaviherya Yesu ni Omwene awe, awo anaakhaviherya alamuleli a achu nave annahiya ochariha malakiheryo oomuluku pahiru wi evolowele miyaha sa elapo. Ninnoona ohiyana variyari wa awo ni awoocihiwa a Muluku, ari aweela nave analikanyihiwa ni asimwali. (2 Akor. 11:2; Yak. 1:27; Yaw. 14:4) Taani onahaala otoloxa marehereryo yaala analikanyihiwa ni capaheya? Yehova Muluku onamuhela muupuwelo awe mmurimani mwa “manyaka khumi” a ‘enama yorumála.’ Manyaka awo aneemelela makupa oothene a olamulela wa hiihaano yoowo onakhaviherya marehereryo a Maloko Awiiwanana, yaawo analikanyihiwa ni ‘enama yorumála’.​—Mwaalakhanye Yawupulula 17:3, 16-18.

5, 6. Ntakhara heeni nnawerya oloca wi opahuliwa wa Paapulu Mutokotoko, honataphulela wi achu oothene anakhala mwemmo anahaala okhwa?

⁵ Nnaphwanela oloca wi opahuliwa wa ikerexa sa Paapulu Mutokotoko enataphulela wi achu oothene anakhala mwemmo anahaala okhwa? Hooye, ntakhara mulipa a miririmo Sakariya aaveereliwa orepa sa elukuluku yeeyo. Elociwaka sa muchu aakhala mu malapelo atheru, masu anii: “Mutxhu ti mutxhu oni anàmulotxa: Miyano nka mulipa a miririmu, nto ka namalima. Muteko aka ti wolima ovinyerya kiri mmiravo ene. Nave akhala ani amukohe: Vano ti seni makhwatxa awo ari mmwilini mwà? Owo onamwakhula: Mwakhwatxa ala kiphoreihiwe mmavate mwa asinthamwene aka.” (Zak. 13:4-6, BNM) Mwawiihiiha, enooneya wi ahusiha akina a malapelo atheru anahaala ohiya muteko aya nave anamuloca wi hantonkoru opaka makupa a malapelo atheru.

⁶ Vano tiheeni enahaala weereya ni akapuro a Muluku mu elukuluku yeeyo? Yesu oothariha: “Yaháhiyaleke okhuvihiwa mahiku ala, hakávulushiwe mutchu mmoha: Nyenya ntakhara a óthanliwa’wo mahiku yawo yákhuvihiwa.” (Mat. 24:22) Ntoko noonnaahu, mu 66 E.K. mahiku “yákhuvihiwa”. Eyo yaaheeriha wi “óthanliwa’wo”, Akiristu awoocihiwa, echawe mpooma ni moorukurerya. Moolikana, makupa oopacerya a ekoi etokotoko anahaala okhuveihiwa ntakhara “óthanliwa’wo.” Henii yeemereryiwe “manyaka khumi” waapahula akapuro a Muluku. Onahaala okhalavo woopowa.

ELUKULUKU YA WEEHIWA NI OTHORIHA

7, 8. Ekari taani enahaala okhalavo emanle otoloxiwa malapelo atheru, nave akapuro a Muluku anahaala wooniherya hai wi toohiyana mu elukuluku yeeyo?

⁷ Tiheeni enahaala weereya emanle opahuliwa marehereryo a malapelo atheru? Enahaala okhala elukuluku ya wooniherya yeeyo nryaahuno mmurimani. Achu ancipale anahaala waavya okhapeleliwa mmarehereryo a achu, yaawo analikanyihiwa ni “miala ya miako.” (Yaw. 6:15-17) Moohiyana, akapuro a Muluku anahaala ochawela mu naakiho nenlo Yehova onahaaleiye waavaha. Mu nsana noopacerya elukuluku ya murecele hiyaari elukuluku yawi Ayuuta yeemererye Okiristu. Nyenya yaale yaari Akiristu yaaphwanela weeravo echu nave yooniherye wiiwelela. Moolikana, elukuluku ya murecele mu ekoi etokotoko, henii ekhale elukuluku yawi achu yeemererye Okiristu. Nyenya enahaala okhala elukuluku wi Akiristu eeparipari yooniherye osivela waya wa Yehova ni waakhaviherya anna a Kiristu.​—Mat. 25:34-40.

⁸ Naamwi nihisuwelaka soothene inahaala weereya mu elukuluku yeeyo, nnaphwanela osuwela wi onamukhalavo oyeleela ichu. Mu nsana noopacerya, Akiristu yaahiya muhakhu aya nave yaakumanano makacamiho. (Mar. 13:15-18) Wi ntitelele okhala oororomeleya, apwanne nnahaala weemererya oyeleela muhakhu ahu? Nnahaala oreheryeya wi nipake yeeyo nneeraahu niwerye wi ntitelele okhala oororomeleya wa Yehova? Muupuwele ela: Mu elukuluku yeeyo, nnahaala okhala yeehuru nnii nchariheke yootakiherya ya mulipa miririmu Taniyeli ya otitelela omuthamala Muluku ahu, moohipwacha yookhumelela.​—Tan. 6:10, 11.

9, 10. (a) Michaka taani akapuro a Muluku anahaalaaya olokoha variyari va ekoi etokotoko? (b) Tiheeni amwiicani a akapuro a Muluku anahaala weera?

⁹ Eyo heeni ekhale elukuluku ya olaleerya “mitchaka . . . ya Omwene.” Elukuluku ya weerano yeeyo enii eneera emanle. Enii eneera ephin’ye “makutchuwelo”. (Mat. 24:14) Moohikhwa minikwa akapuro a Muluku anahaala olokoha michaka sa othoriha. Iho inahaala okhala michaka sa olokoha wi elapo yoonanara ya Satana enahaala omala. Piipiliya onalikanyiha michaka iho ni maluku a maralala, vaavaa onaloceiye: “Nave yákhuruwa wirimu maralala matokotoko, olimela wa nimoha wi talenti, emorela va atchu; nave atchu yámwerela Muluku opwalu ntakhara a epahu ya maralala, ntakhara epahu aya ti etokotoko tchiri.”​—Yaw. 16:21.

¹⁰ Amwiicani ahu anahaala weeravo echu. Mooveereliwa, mulipa a miririmu Esekiyeli oothariha yeeyo Koki a Makoki, nikhuuru na maloko nnahaalaaya weera: “Vano miyano, Apwiya Muluku, kinnalotxa wi elukuluku yeyo onamupuwela itxhu sintxipale nave onamutxhuna owerela sotakhala atxhu awo. Onamupuwela otxuphela elapo yohilipihiwa. Atxhu a elapo yeyo, atxhu a muretxele, ari awitxhàla mwa ipoma sohilipihiwa, ipoma ihirino isiri nari masele. Onamukusa muhakhu w’atxhu anakhala vapoma, epoma khalai yari milepe. Atxhu ala, yahin’yaya maloko a amalapo, yàthukumana wili-wili, yàkhalano mihuwo ni muhakhu mukina. Atxhu awo anakhala veri v’elapo.” (Ezek. 38:10-12) Mmukhalelo woomunepani, akapuro a Muluku anahaala wooneya ntoko ari “veri v’elapo”. Maloko heni yeemererye eyo. Aai, heeni yuupuwele itila piili wi yaapahule awoocihiwa a Yehova, vamoha ni asinthamwene aya.

11. (a) Tiheeni nnaphwanelaahu osuwela vooloca sa mukhalelo ichu inahaalaaya weereya mu ekoi etokotoko? (b) Achu anahaala woona hai ntakhara ineneeryo soorweela wirimu?

¹¹ Vaavaa nnaalikhelaahu yeeyo enahaala weereya voocharela, nnaphwanela osuwela wi Masu a Muluku hanooniherya mookwakwaleya mukhalelo ichu inahaalaaya weereya. Akhweya saweereya ikina inahala weereya mu elukuluku emohamoha. Yesu mu yooloherya awe vooloca sa makuchuwelo a mukhalelo yoola wa ichu aaloca: “Nsuwa n’narwa-n’rípihiwa, nave mweri horwa-woniha omwaléla waya, ni itheneri sinarwa-simora wirimu, ni ikuru siri wirimu sinarwa-sichikinyeya. Nave vavo enarwa-emona Mwana a mutchu arikimorwa m’mekuni ni ikuru sitokotoko, ni nchichimiho.” (Luka 21:25-27; mwaalakhanye Marko 13:24-26.) Apwanne waakhwaniheryeya wa yooloherya yeeyo onahaala okhalavo ineneeryo ni saweereya sawoopiha soorweela wirimu? Nnaphwanela oweherya wi noone. Moohipwacha mukhalelo taani, ineneeryo inahaala owoopopiha amwiicani a Muluku.

12, 13. (a) Tiheeni enahaala weereya vaavaa Yesu oneereiye arwe ni “ikuru sitokotoko, ni nchichimiho”? (b) Akapuro a Muluku anahaala weera eheeni mu elukuluku yeeyo?

¹² Tiheeni enahaala weereya vaavaa Yesu oneereiye arwe ni “ikuru sitokotoko, ni nchichimiho”? enahaala okhala elukuluku ya waavaha phatamari oororomeleya ni waapahula oohiroromeleya. (Mat. 24:46, 47, 50, 51; 25:19, 28-30) Mwawiiwanana ni Mateyu, amalaka oloca ichu sahaala weereya, Yesu aaloca niphwanaphwaniho na ipucepuche ni ipuri, ariki: “Nyenya Mwana a mutchu aniriye arwe mu nchichimiho nawe, vamoha ni angelo othene, vavo Yowo anarwa-akilathi va munyukhuni mtokotoko wa wárya wawe: nave enarwa-ethukumana va mithoni vawe atchu a miloko yothene: Nave Yowo anarwa-amwalanyiha yawo mukina ni mukina, ntoko mukukhula anamwalanyihiye ipuchepuche ni ipuri: anarwa-emesha ipuchepuche o ntatani nawe nolopwana, nyenya ipuri o nothiana.” (Mat. 25:31-33) Othoriha taani ipucepuche ni ipuri inahaalaaya waakhela? Niphwanaphwaniho nnakuchuwa ni masu ala: “Nave yala [ipuri] enarwa-eya wulakiwani wa mahiku othene; nyenya ékhaikhai wukumini wa mahiku othene.”​—Mat. 25:46.

¹³ Tiheeni ipuri inahaalaaya weera yamala osuwela wi “enarwa-eya wulakiwani wa mahiku othene”? Awo “enarwa-yísukutcha va nákhopeni”. (Mat. 24:30) Nyenya tiheeni anna a Kiristu ni asinthamwene aya anahaalaaya weera? Yooniheryaka nroromelo noolipa mwa Yehova Muluku ni Mwanawe, Yesu Kiristu, anahaala wiiwelela nlamulo na Yesu: “Nyenya siniriaya sipacherye wereya iha innuwani, welihani miru anyu; ntakhara wopoliwa wanyu wohachamela.” (Luka 21:28) Aai, nnahaala ohakalala, nroromelaka woopoliwa wahu.

YAARYAKA MU OMWENE

14, 15. Othukumanya taani onahaala okhalavo opacenrye ohiphela wa Kooki ni Makoki, nave eyo enaphitaanyerya eheeni?

¹⁴ Tiheeni enahaala weereya vaavaa Koki a Makoki onahaaleiye waavolowela akapuro a Muluku? Yooloherya ya Mateyu ni Marko ennaloca yaweereya emohamoha: “Nave Yowo [Yesu] anarwa-arumiha angelo awe ni oruma otokotoko wa nipeka. Nave yawo enarwa-ethukumanya óthanliwa awe witchekuni sheshe, o makutchuwelo a erimu ophiyerya makutchuwelo aya makina.” (Mar. 13:27; Mat. 24:31) Eyo henaloca sa othukumanyiwa woopacerya wa awoochihiwa ari veelaponi. (Mat. 13:37, 38) Othukumanyiwa iwo oneereya ehaakumve opacerya ekoi etokotoko. (Yaw. 7:1-4) Nave, tiheeni othukumanyiwa iwo Yesu olonceiye? Enahaala okhala elukuluku yeeyo oohalela a 144.000 anahaalaaya omwaakhela phatamari aya wirimu. (1 Ates. 4:15-17; Yaw. 14:1) Eyo enahaala weereya opacenrye ohiphela wa Koki ni Makoki. (Esek. 38:11) Voocharela masu ala a Yesu anahaala okhwaaniheryeya: “Vavo ékhaikhai awo enarwa-yárya ntoko nsuwa, mu Omwene wa Atithaya.”​—Mat. 13:43.b

¹⁵ Apwanne eyo enataphulela wi onahaala okhalavo ‘oshopholiwa’ wa awoocihiwa? Ancipale aniiseera Akiristu, mwawiiwanana ni nsu nenla, aneemererya wi Akiristu anahaala okusiwa wi eye wirimu ni mwiili wanama. Mwawiihiiha, anaweherya wi Yesu onahaala okooka mmwiilini wi alamulele elapo yavathi. Nyenya Piipiliya onnooniherya wi “mwana a mutchu” onahaala orweela wirimu nave wi Yesu onahaala orwa “va mekuni a wirimu”. (Mat. 24:30) Masu yaala anooniherya wi haani ooneye. Opwaha yeeyo, “mwili nnikhami hinawerya mekhaya wakhela omwene wa Muluku”. Mwawiihiiha, ale enii ekerihiwe wirimu woopaceryani anahaala othatuwa “mwa elukuluku emoha, mwa waphila wa nitho ni oruma wa nipetxa nomaliherya”.c (Mwaalakhanye 1 Korinto 15:50-53, BNM.) Awoocihiwa oororomeleya enii ekhale veelaponi yavathi anahaala othukumanyiwa mu elukuluku vakhaani.

16, 17. Ohaakumve opakeya othela wa Epucepuche wirimu, tiheeni enaphwanela weereya woopaceryani?

¹⁶ Vaavaa 144.000 oothene eneeraaya ekhale wirimu, anahaala opacerya marehereryo ookuchula a othela wa Epucepuche. (Yaw. 19:9) Nyenya yookhalavo enaphwanela weereya ehakumve ophiya elukuluku yeeyo yoohakalala. Muupuwele wi ehaakumve oohalela a 144.000 oya wirimu, Koki onahaala waahiphela akapuro a Muluku. (Esek. 38:16) Tiheeni enahaala okhumelela? Achu a Muluku veelaponi enii ekhale ntoko haanono naakiho. Anahaala ochariha sooleeliherya saavahiwe mmahiku a Mwene Yosafati: “Tahi nyuwo muni n’wane ni yawo. Mwemele weiwo, mpheremane, nave munamona Apwiya wovulusani waya.Atxhu nyu o Yerusalemu ni o Yudeya, muhòve nave muhivolole.” (2 Math. 20:17, BNM) Satana ni masosolo awe anahaala okhalano moonelo woohiyana. Alocaka elukuluku yeeyo awoocihiwa oothene eneeraaya ekhale wirimu, Yawupulula 17:14 onnaloca sa amwiicani a akapuro a Muluku: “Yawo enarwa-ewana ekhocho ni Mwana épuchepuche, nave Mwana épuchepuche anarwa-álapiha, ntakhara ori Pwiya a asápwiya, ni Mwene a mamwene; nave onarwa-álapihatho yawo oriyeno awitchaniwa, ni óthanliwa ni óroromeleya.” Vamoha ni 144.000 wirimu, Yesu onahaala orwa wi awoopole akapuro a Muluku veelaponi yavathi.

¹⁷ Eyo enahaala opaceryiha ekhoco ya Armaketo, yeeyo enahaala weeriha wi nsina na Yehova neelihiwe. (Yaw. 16:16) Mu elukuluku yeeyo, achu oothene analikana ni ipuri “enarwa-eya wulakiwani wa mahiku othene”. Voocharela elapo enahaala woopowa ni onanara woothene, nave muloko mutokotoko onahaala ovuluwa makupa ookuchula a ekoi etokotoko. Ni marehereryo oothene yaakhwaanenle, othela wa Epucepuche, makupa a vasulu a liivuru a Yawupulula, onahaala weereya. (Yaw. 21:1-4)d Oothene enii evuluwe veelaponi yavathi anamuhakalala nthowa na weemereryiwa ni Muluku nave anahaala waakhela mareeliho a osivela waya. Owo onahaala okhala ohakalala otokweene wa othela! Chiryene, ninnaweherya vancipale elukuluku yeeyo!​—Mwaalakhanye 2 Petro 3:13.

18. Vaavaa nnaweheryaahu saweereya sootikhiniha, tiheeni nnaphwanelaahu olakelela weera?

¹⁸ Ni saweereya seiya soohakalaliha muhoolo, tiheeni muchu ti muchu onaphwaneleiye weera? Mooveereliwa Murummwa Petro aarepa: “Sothe sene iha nto siniriaya sirwe-sukuluwe mwawihihá, nyuwo munaphwanela okhala atchu awihai nki, m’makhalelo awéla ni m’mathamalelo, muweheryeryaka ni wakuvela orwa waya wa nihiku na Muluku, . . . ósiveliwa, munaweheryeryanyu iha, khalani amvai wi mphwanyiwe ti Yowo m’murecheleni, óhikhalano nthepa ni óhikhalano murala.” (2 Pet. 3:11, 12, 14) Mwawiihiiha, hankooni ntitelele okhala aweela mmakupa oomunepani, nimukhaviheryaka Mwene a Murecele.

[Masu a vathi]