Mwiicani Ookuchula, Okhwa, Onarwa Apahuliwa

“Mwichani ókutchulela yowo ani arwe-apahuliwe ti okhwa.”​—1 AKOR. 15:26.

MWAHAALA WAAKHULA HAI?

Nlamulo taani noosivela nave ntokweene Yehova aamvanheiye Aatamu?

Okhwa waavolonwe hai mu emusi yaachu?

Ti liini oneereiye ‘apahuliwe mwichani ókutchulela, okhwa’?

1, 2. Mikhalelo taani Aatamu ni Haava yaaryaayano omapacereryo, nave makoho taani anakhumelela?

VAAVAA Aatamu ni Haava yapatuxiwaaya, hiyaarino mwiicani. Awo yaari achu oophaameya yaakhala mu parataiso. Yaanapuha onthamwene woophaameya ni Mpatuxa ntoko anamwane awe. (Map. 2:7-9; Luka 3:38) Ewehereryo aya ya okumi yaahooniheryiwa mu nlamulo Muluku aavanheiye. (Mwaalakhanye Maphatxuwelo 1:28, BNM.) Wi ‘esareye mwelapo yavathi ni olamulela elapo,’ yaanachuneya elukuluku. Nyenya wi etitelele ‘olamulela elapo ni okhala asinène . . . a inama sothene inetxa v’elaponi yavathi,’ Aatamu ni Haava yaaphwanela okhala a wiikhalelaru, Aatamu haahaala ohiya muteko awe nthowa na okhwa.

² Ntakhara heeni ichu siraaya soohiyana olelo? Ti mwawiihai akhanlaayavo amwiicani ancipale anuukhula ohakalala wa achu, nave okhwa okhala mwiicani mutokotoko? Tiheeni Muluku onahaaleiye opaka wi aapahule amwiicani yaawo? Maakhulo a makoho yaala ni makina anaphwanyeya mmwaha wa Piipiliya. Hankooni nthokororye makupa oochuneyaxa a mwaha yoowo.

YOOLOKOHA YA NSIVELO

3, 4. Nlamulo taani Yehova aamvanheiye Aatamu ni Haava? (b) Waari wookhweleya wiiwelela nlamulo nenlo?

³ Naamwi awo yaanaweherya okhala wookhala, Aatamu ni Haava hiyaarino okumi woohikhwa. Wi etitelele okhala, awo yaanaphwanela omumula, owurya, okona ni olya. Echu yoochuneyaxa, okumi aya waahaala orweela mu onthamwene aya ni Namavaha a Okumi. (Malam. 8:3) Weemererya ohoolela wa Muluku waari woochuneya wi etitelele opuha okumi. Yehova aathariha phaama yeeyo wa Aatamu ahaakumve opatuxiwa Haava. Mwawiihai? “Apwiya Muluku yàmulela mutxhu ole eriki: ‘Oni onalya sawima sa miri sa mmatxani, nto ohilye sawima sa mwiri yole onasuweliha yaphama ni yonanara. Walya sa yowo onamukhwa [nihiku nenlo!]”​—Map. 2:16, 17, BNM.

⁴ “Mwiri yole onasuweliha yaphama ni yonanara” weemelela ophwanelela wa Muluku wa olakelela yaphaama ni yoonanara. Aatamu, moohikhwa minikwa, aanasuwela yaphaama ni yoonanara; owo aapatuxiwe mu eruku ya Muluku nave aakhalano yaawuupuxerya-ya-murima. Mwiri yoole waahaala omuupuxeryaka Aatamu ni Haava wi wiiliwiili yaahaala ochuna ohoolela wa Yehova. Wa yaawo olya yawiima yaahaala wooniherya ochuna otaphuwa mmeecelo, yeeyo yaahaala otannya makacamiho mancipale wa awo ni anamwanaaya. Nlamulo na Muluku ni yookhumelela ya ohiiwelela nenlo yaahooniherya wunnuwa wa mwaha owo.

OKHWA OVOLONWE HAI MU EMUSI YA ACHU

 5. Aatamu ni Haava yaaphiyenrye hai ohiiwelela?

⁵ Haava aapatuxiwe, Aatamu aamuleela nlamulo na Muluku. Haava aanakhapelela nlamulo nlo nave aanawerya oromola nenlo. (Map. 3:1-3) Owo aaheerano yeeyo wa muchu oonen’ye ntoko enowa, yoopatuxiwa yoomaala. Muchu yoowo aari oculi wa enowa ti Satana Musaserya, mwaana oomunepani a Muluku yoowo eemerenrye wunnuwiha nchuno na otaphuwa ni olamulela mukhateiye. (Mulikanyihe ni Yakopo 1:14, 15.) Wi aakhwaniherye yoolakelela awe yoonanara, owo aamuthoonya Muluku ntoko mulipa awootha. Owo aamuroromeliha Haava wi okhala ootaphuwa hiwaahaala okumiherya okhwa, nyenya ahaala okhala ntoko Muluku. (Map. 3:4, 5) Haava aamweemererya owo, achunaka otaphuwa moorweela wa olya yawiima eyo, ni omulekecha Aatamu wi uukeno. (Map. 3:6, 17) Musaserya aamootha. (Mwaalakhanye 1 Timoteo 2:14.) Hiiha, Aatamu ‘aamwiiwelela muthiyana.’ Naamwi enowa yakhala ntoko nthamwene, Satana Musaserya chiryene aari mwiicani ootakhala yoowo aasuwenle sookhumelela soonanara sa masu awe wa Haava.

6, 7. Yehova aathorinhe hai alipa oocheka?

⁶ Ni mathowa aya, Aatamu ni Haava oopiili yaammwaryeela Yoowo aavanhe okumi ni ichu soothene yaaraayano. Yehova, moohikhwa minikwa, aahoona soothene seiyo seeren’ye. (1 Math. 28:9; mwaalakhanye Masiposipo 15:3.) Muluku aaheemererya wi achu ale araru yooniherye moonelo aya vooloca sa yoowo. Ntoko Tiithi, mweeparipari Yehova ahoona wiicela otokotoko. (Mulikanyihe ni Mapacereryo 6:6.) Voocharela, owo aaheeravo echu ntoko Muthoriha, aakihaka ni opharihela masu awe vooloca sa sookhumelela saya.

⁷ Muluku aaloca wa Aatamu: “Ohilye sa mwiri yole onasuweliha yaphama ni yonanara. Walya sa yowo onamukhwa [nihiku nenlo!]” Aatamu akhweya uupuwela “nihiku” na iwora 24. Amanle ochekela nlamulo na Muluku, owo aaweherya wi Yehova ahaala weeravo echu nsuwa nihineenle. “Osekuwaka,” Yehova aamwaacamela mutheli. (Map. 3:8) Owo aaheerano ntoko aalocenleiye, atikitheryaka mathipelo orweela wa waakhulela wa Aatamu ni Haava. (Map. 3:9-13) Voocharela owo aahaathoriha nthowa na yoocheka. (Map. 3:14-19) Waakhanle wi owo aahaatoloxa, yoochuna awe vooloca sa Aatamu ni Haava ni anamwane aya hiyaahaala waakhwaniheryeya. (Yes. 55:11) Naamwi owo eemerenrye yoolaka ya okhwa ni sookhumelela sa waakuveya sa yoocheka, owo aahiya wi Aatamu ni Haava yaayareke anamwane yaawo yaahaala ophura yamahala yeeyo owo aahaaleiye opaka. Hiiha, mmoonelo wa Muluku, Aatamu ni Haava yaakhwa nihiku nenno yaachenkaaya, nave awo yaakhwa mu “nihiku” nimoha na iyaakha 1.000.​—2 Pet. 3:8.

8, 9. Anamwane a Aatamu yaavoloweliwe hai ni yoocheka awe? (Moone eruku yoopacerya.)

⁸ Apwanne anamwane a Aatamu ni Haava yaahaala ovoloweliwa ni yeeyo asitiithi aya yeenraaya? Aai. Aroma 5:12 onnathariha: “Ntakhara awe, ntoko otcheka wávolowilaya mwilaponi ya vathi mwa mutchu mmoha, ni okhwa mwa otcheka; mwawihihá okhwa wáháphiyerya atchu othene, ntakhara wi othene yátcheka.” Oopacerya okhwa aari Haavele oororomela. (Map. 4:8) Vahoolo vaya anamwane akina a Aatamu yaanuuluvala ni okhwa. Apwanne awo yaahaala orava yoocheka vamoha ni okhwa? Murummwa Paulo onnaakhula: “Vawi ntoko ni ohiwelela wa mutchu mmoha, anchipale yáhériwa ótcheka.” (Arom. 5:19) Mwawiihiiha ocheka ni okhwa oraviwe orweela wa Aatamu, amwiicani oohichaweya aachu, achu oohiphaameya hanawerya okophola. Hiyaano hinnawerya othariha phaama soothene saavolowela mu Aatamu waaraviha anamwane awe oothene, nyenya eyo yoheereya chiri.

⁹ Moophwanelela, Piipiliya onnaloca wi ocheka ni okhwa oraviwe ntoko “ekuwo yàkhunenle atxhu a maloko othene.” (Isa. 25:7, BNM.) Okhuneela yoola woohooxa, naari ekuwo, mukhalelo yoola wa othorihiwa, onaahooxa achu oothene. Nyenya eparipari ti wi “mwa Adamu othene ennokhwa.” (1 Akor. 15:22) Nikoho nnacharela ti nenno nlociwe ni Paulo: “Tani onakakiha m’mwílini mwa okhwa wu? “Ookhala onawerya?a​—Arom. 7:24.

YOOCHEKA NI OKHWA WA AATAMU INAHAALA OPAHULIWA

10. (a) Soorepa taani sa Mpiipiliyani inaloca wi Yehova onahaala opahula okhwa wa Aatamu? (b) Soorepa seiyo inooniherya eheeni vooloca sa Yehova ni Mwanawe?

¹⁰ Aai, Yehova aanwerya omwaakiha Paulo. Moophwanelela amanle oloca “ekuwo,” Yesaya aarepa: “Ananvuta mithori owanoni wa atxhu anan’wopola atxhu anloko naya [mookhwani].” (Isa. 25:8, BNM.) Ntoko tiithi yoowo onaviihavo ichu inaakacamiha anamwane awe ni ovuta miitho aya, Yehova onnahakalala vancipale opahula okhwa wa Aatamu. Owo ookhalano mukhaviheryi awe. Akorinto Oopacerya 15:22 onnaloca: “Vawi ntoko mwa Adamu othene ennokhwa, mwawihihátho mwa Kristu othene ennakhalihiwa akumi.” Moolikana, Paulo amanle okoha “Tani anakakihe?” owo aatitela: “Kinnamuthamala Muluku mwa Yesu Kristu Apwiyahu.” (Arom. 7:24) Mwawooneya, osivela yoowo waamweerinhe Yehova waapatuxa achu hiwaamalihiwe ni omwaryeya wa Aatamu ni Haava. Nave yoowo aamukhavihenrye Yehova mmuteko wa ompatuxa mutheli oopacerya haayelenle osivela wawe wa anamwane aya. (Masi. 8:30, 31) Nyenya woopola owo waahaala weereya hai?

11. Yoovaha taani Yehova opankeiye wi aakhaviherye achu?

¹¹ Ohiphaameya wa achu ni okhwa sookhumelela sa yoocheka ya Aatamu ni othoriha weekhaikhai wa Yehova. (Arom. 5:12, 16) Ninnaalakhanya: “Ntoko mwa otcheka omoha oványa wáháphiyerya atchu othene.” (Arom. 5:18) Tiheeni Yehova aaphwaneleiye weera wi aviihevo othoriha wawe ahinyemunle meecelo awe? Ninnaphwanya naakhulo mmasu a Yesu: “Mwana a mutchu hárúle oruméliwa nyenya . . . oveléla okumi awe oliva wa atchu anchipale.” (Mat. 20:28) Muchu yoowo aari mwaana oopacerya oomunepani a Yehova aahooniherya wi, oyariwa veelapo yavathi ntoko muchu oophaameya, yaahaala ovaha “wopola.” Woopola wu waahaala okhwaaniherya ekhaikhai mwawiihai?​—1 Tim. 2:5, 6.

12. Yawoopola taani yeeyo yaahaala waakhwanela ekhaikhai?

¹² Ntoko muchu oophaameya, Yesu aakhalano ewehereryo yoolikana ni Aatamu ahaakumve ocheka. Yoochuna ya Yehova yaari osareiha elapo yavathi ni anamwane oophaameya a Aatamu. Hiiha, ni osivela otokweene wa Tiithi awe ni wa anamwane a Aatamu, Yesu oovaha mwiili awe ntoko mukucho. Aai, Yesu oovaha mwiili woophaameya yoowo onaakhwanela ni yeeyo Aatamu oyeleenleiye. Ohoolo waya, Yehova aamukookiherya okumi Mwanawe ntoko munepa. (1 Pet. 3:18) Yehova pahiru aahaala weemererya mukucho wa muchu yoole oophaameya, Yesu, ntoko yawoopola, yoolivela, wi alivele emusi ya Aatamu nave aavahe awo ewehereryo ya okumi yeeyo Aatamu aayeleenleiye. Mwawiihiiha, Yesu ookuxa nipuro na Aatamu. Paulo onnathariya: “Wawihihátho worempwa, Mutchu ópacherya Adamu ári munepa wokumi. Adamu ókutchulela owo ári munepa wopachusha okumi.”​—1 Akor. 15:45.

13. “Adamu ókutchulela” onahaala weeravo echu mwawiihai wi aakhaviherye alipa ookhwa?

¹³ Elukuluku enahaala ophiya, yeeyo “Adamu ókutchulela” onahaaleiye weeravo echu ntoko “munepa wopachusha okumi” ntakhara achu oothene. Anamwane ancipale a Aatamu anahaala okookiheryiwa okumi. Mwawiihai? Woona wi awo yaakhala nave ekhwa. Awo anahaala ochuna oviihiwa mookhwani, ekookele okumi mu elapo yavathi.​—Yoh. 5:28, 29.

14. Yoovaha taani ya Yehova enahaala okhaviherya otoroka ohiphaameya yoowo Aatamu aaravinheiye anamwane awe?

¹⁴ Achu anahaala otaphuliwa hai mu owana waya ni ohiphaameya aramvaaya? Yehova oovaha Omwene yoowo orinono “Adamu ókutchulela” ni asinthamwene awe oothanliwa variyari va achu. (Mwaalakhanye Yawupulula 5:9, 10.) Yaale anahaala wuuka ni Yesu wirimu yaarava ohiphaameya. Mu miyaakha masanaru khumi, oothanliwa awo anahaala wuuka mu olamulelo yoowo onahaala waalamulela yaale a elapo yavathi, yaakhaviheryaka awo omaliha ohiphaameya yoowo ohinaweryeya omaliha ni ikuru saya.​—Yaw. 20:6.

15, 16. (a) Tuuvi ori “Mwichani ókutchulela,” nave ti liini onahaaleiye opahuliwa? (b) Mwawiiwanana ni 1 Akorinto 15:28, tiheeni Yesu onahaaleiye weera va elukuluku aya?

¹⁵ Omakuchuwelo wa olamulelo wa Omwene wa miyaakha masanaru khumi, achu awiiwelela anahaala okhala ootaphuwa mu amwiicani oothene yaawo avoliihiwe ni ohiiwelela wa Aatamu. Piipiliya onnaloca: “Vawi ntoko mwa Adamu othene ennokhwa, mwawihihátho mwa Kristu othene ennakhalihiwa akumi. Nyenya mukina ni mukina múthola wawe wa yowo mekhiye; yawima yamulepulo Kristu; vavo yawo a Kristu, vokóka vawe. Vavo vari makutchuwelo, aniriye arwe-aveléle omwene wa Muluku, ti Atithi, avelihale othoriha wothene, ni olamulelo wothene, ni ikuru sene. Vawi onnaphwanelela olamulela ophiyerya awiyanthe amwichani othene vathi va manani awe. Mwichani ókutchulela yowo ani arwe-apahuliwe ti okhwa.” (1 Akor. 15:22-26) Aai okhwa orweela wa Aatamu onahaala omalihiwa. “Ekuwo” yeeyo enahooxa emusi ya achu enahaala oviihiwavo okhala wookhala.​—Isa. 25:7, 8, BNM.

¹⁶ Murummwa Paulo ookuchula masu awe ni yoorepa ela: “Nave alapiheryiwa sothe sene iho, vavo Mwana owo anarwa-alapiheryiwa wa Yowo ámulapihenrye itchu sothe sene, wi Muluku akhale sothe sene mu sothe sene.” (1 Akor. 15:28) Yoochuna ya olamulelo wa Mwaana enahaala waakhwaniherya. Ohoolo waya, ni ohakalala otokweene, onahaala oveleela olamulelo awe wa Yehova ni otheteya wa yoowo emusi yoophaameya ya achu.

17. Satana onahaala otoloxiwa hai?

¹⁷ Hanka vooloca sa Satana, yoowo opacerinhe makacamiho oothene achu anakumanaayano? Yawupulula 20:7-15 onnaakhula. Mu weehiwa wookuchula wa achu oothene oophaameya, Satana onahaala weemereryiwa weererya waahuweliha yaawo. Musaserya ni yaale anachara ohoolela wawe anahaala otoloxiwa khuluwi mu “okhwa wanawili.” (Yaw. 21:8) Woona wi yaawo enii evoloweliwe ni yoowo herwa ekhala okhala wookhala, okhwa wu horwaru opahuliwa. Mwawiihiiha, “okhwa wanawili” tahi mwiicani wa achu yaale anamusivela ni omurumeela Mpatuxa aya.

18. Muteko yoowo Muluku aamvanheiye Aatamu onahaala waakhwaniheryeya hai?

¹⁸ Achu oophaameya anahaala omwaacamela Yehova ntoko oophwanelela okumi woohimala, ohirino amwiicani makupa oothene. Muteko yoowo waavahiwe Aatamu onahaala weeriwano owo ahirivo. Elapo yavathi enahaala osareya ni anamwane awe, yaawo anahaala ohakalala okhapelela ni opuha mikhalelo saya soohiyana sa ikumi. Nihirwe n’yeleele othamalela mukhalelo yoowo Yehova moosivela onahaaleiye ompahula mwiicani ookuchula, okhwa!

[Nsu na vathi]

[Eruku va epaaxina 26]

Haavele, opacenrye okhwa, onahaala ophura mukucho wa Yesu (Moone eparakrafo 13)