Mmuroromele Yehova Elukuluku Yoothene!

“Roromelani va Yowo mahiku othene, atchu nyu.”​—Sal. 62:8.

MWAHAALA WAAKHULA HAI?

Ntakhara heeni ikwaha soothene Yehova hanaakhula mavekelo mwawaakuveya?

Olipiha taani munaphwanyaanyu mu yoororomeliha ya Yehova mu 1 Akorinto 10:13?

Miteko taani inahaala wookhaviheryaani waaceererya omuroromela wanyu Yehova ni olipiha onthamwene anyu ni yoowo?

1-3. Paulo omuroromela wawe Yehova waamulipinhe hai? (Moone eruku yoopacerya.)

YAARI elukuluku yawoopiha okhala Mukiristu o Roma. Akiristu yaanootheriwa weeyela epooma mu 64 E.K. ni owiica achu, nthowa na yeeyo, oomuchara a Kiristu yaaniikariwa vancipale. Waakhanle wi nyuwaano mwaari Mukiristu mu elukuluku yakhalai, nihiku nnihiku mwaahaala okumanaka ni wiikariwa naari ohooxiwa. Anna ni arokora anyu akina akhweya yaahaala waakachiwa ni axinama naari okhomeliwa vamwirini ni weeyeliwa yoonaka wi ekhale ntoko yoomwaaleela ohiyu.

² Yaari mu elukuluku ntoko yeela Paulo aawaleliweiye o Roma ekwaha yanaawiili. Apwanne Akiristu akina yaahaala omukhaviherya? Paulo akhweya aahuukhuwa mmwaha yoola, woona wi aamurepela Timoteo: “Vawírúha vaka vopacherya havovo mmoha nari ákikhavihenrye, nyenya othene yákihiya; yeyo ehalakhanyeryiwe ntoko yawáványa.” Naamwi hiiha, Paulo aanasuwela wi tahi wi haarino nikhaviheryo. Owo aarepa: “Nyenya Apwiya áhémela vamoha ni miyo akivaha ikuru.” Aai, Apwiya Yesu yamvaha Paulo ikuru aachuneiye. Nikhaviheryo nenlo noomuluku naakumihenrye eheeni? Moone sookhumelela sene: “Nave káhákihi-wa mwano mwa mwacho.”​—2 Tim. 4:16, 17.a

³ Wuupuwelela yaweereya yeela yaanamulipiha Paulo, emukhaviheryaka ororomela wi Yehova aahaala omulipiha wi avilele makacamiho awe ahiihaano ni a omwaahiyu yaawo yaahaala okhumelela. Owo aapwahiherya ariki: “Apwiya anarwa-akákiha o mitekoni yothene yonanara.” (2 Tim. 4:18) Aai, Paulo aasuwela wi naamwi nikhaviheryo na muchu nri nookotakota, nikhaviheryo nenlo Yehova ni Mwanawe anavahaaya ti neeparipari!

IKARI SA ‘WAROROMELA APWIYA’

4, 5. (a) Taani ikwaha soothene onahaala woovahaani nikhaviheryo munachunaanyu? (b) Munii mulipihe hai onthamwene anyu ni Yehova?

⁴ Montoko wiisoona okhala mukhatiinyu vaavaa mwaakumannaanyu ni yawuukhula? Eyo akhweya yaari nthowa na oyeleela muteko, okhinyererya oxikola, makacamiho a okumi naari mukhalelo mukina woovila. Akhweya nyuwaano mwaaveka nikhaviheryo, nyenya mwaavolola nthowa na akina ohiwerya woovahaani nikhaviheryo mwaachunaanyu. Mweeparipari, makacamiho makina hemalihiwa nnikhaviheryo na achu. Mmikhalelo seiyo, apwanne ekano ya Mpiipiliyani ya ‘waroromela Apwiya’ hiyaano mphurelo? (Masi. 3:5, 6, BNM) Apwanne hiyaano yootaphulela? Tahi yeeyo! Nikhaviheryo noomuluku ti neeparipari, ntoko enooniheryiwaaya ni saweereya sincipale sa Mpiipiliyani.

⁵ Mwawaacererya, ohiya okuha mathowa vaavaa achu ahinaweryaaya ovaha nikhaviheryo, moone mukhalelo yoowo ntoko murummwa oonneiye​—ntoko ekari ya omuroromela phaama Yehova ni opuha okhapelela wawe woosivela. Ela enahaala waaceererya omuroromela wanyu ni olipiha onthamwene anyu ni yoowo opwaha khalai.

OROROMELA TI WOOCHUNEYA MU ONTHAMWENE AHU NI MULUKU

 6. Ntakhara heeni onamukhala woovila omuroromela Yehova vaavaa nnakhalaahu mmakacamiho?

⁶ Apwanne munnaphwanela omuleela Muluku makacamiho anyu mu nivekelo ni okhalano murecele, musuwelaka wi moheera yeeyo munaweryaanyu ntakhara nikacamiho nanyu nave wi owo onahaala opaka makupa awe? Aai, chiryene! (Mwaalakhanye Salmo 62:8; 1 Petro 5:7.) Ohuserya weerano yeeyo ti woochuneya wi munnuwihe onthamwene anyu ni Yehova. Naamwi hiiha, onamukhala woovila ororomela wi Yehova onahaala ovaha yeeyo enoothowaani. Ntakhara heeni? Nthowa nimoha ti nawi Yehova akhweya hanaakhula mwawaakuveya.​—Sal. 13:1, 2; 74:10; 89:46; 90:13; Hap. 1:2.

 7. Ntakhara heeni Yehova wiiliwiili hanaakhula mavekelo ahu mwawaakuveya?

⁷ Ntakhara heeni Yehova hananivaha naakhulo nawaakuveya wa sooveka sahu soothene? Muupuwele wi owo onalikanyiha onthamwene ahu ni yoowo ni onthamwene wa mwaana ni tiithi. (Sal. 103:13) Mwaana hanaphwanela oweherya wi tiithi onahaala waakhula sooveka soothene naari weerano eyo mwawaakuveya. Sooveka ikina sa mwaana hisaano mphurelo. Ikina inaphwanela owehereryiwa ophiyerya elukuluku yoophwanelela. Sooveka ikina hini imukhaviherye mwaana naari waakhaviherya akina anavoloweliwa. Mwawaacererya, omvaha mwaana mwawaakuveya sooveka sawe soothene waahaala otoroka wiiwanana waya ntoko wa pwiya ni kapuro, mwaana akhalaka ntoko pwiya. Moolikana, Yehova onneemererya wi evire elukuluku wi aakhule mavekelo ahu nthowa na ochuna okhala wahu phaama. Owo ookhalano ophwanelela yoola ntoko Mpatuxa ahu amiruku, Pwiya oosivela ni Tiithi a wirimu. Waakhwaniherya mwawaakuveya sooveka sahu soothene waahaala onanariha wiiwanana variyari va hiyo ni yoowo.​—Mulikanyihe ni Yesaya 29:16; 45:9.

 8. Tiheeni Yehova onaroromeliheiye vooloca sa okotakota wahu?

⁸ Nthowa nikina ti nawi Yehova oosuwela phaama okotakota wahu. (Sal. 103:14) Mwawiihiiha, owo hanaweherya wi nivilele mu ikuru sahu nyenya onnanivaha nikhaviheryo nawe. Mweeparipari, mu ilukuluku ikina, nnahaala wiisoona wi haniwerya oya vahoolo. Nyenya Yehova onnaniroromeliha wi harwa eemererya wi akapuro awe ehooxeye opwaha anaweryaaya ovilela. Aai, owo “anarwa iyathitho vovuluwelavo.” (Mwaalakhanye 1 Akorinto 10:13.) Mwawiihiiha, nookhalano mathowa oophwanelela ororomela wi moonelo wa Yehova ti wawookololowa.

 9. Tiheeni nnaphwanelaahu weera wakhala wi woopowa honarwa mwawaakuveya nimanle ovekela?

⁹ Vaavaa woopowa ohinarwaaya mwawaakuveya nimanle ovekela, hankooni ninweherye Yoowo osuwenle phaama elukuluku yoophwanela weeravo echu ntakhara hiyaano. Muupuwele tho wi owo onnapixa murima, woona wi onnachuna onoopola. “Nto Apwiya annatxhuna wolevelelani. Annatxhuna womorelani ikharari, ntakhara awo anera mahiku othene yele ere yawokololowa. Itxhàle yole onàroromela Apwiya.”​—Isa. 30:18, BNM.

“MWANO MWA MWACHO”

10-12. (a) Ti mwawiihai mikhalelo inakhalaaya soovila vaavaa Mukiristu onamuthokororyeiye muhima awiiceliwa? (b) Omuroromela Yehova mu ilukuluku sookacamiha onavolowela hai onthamwene wa muchu ni yoowo? Mulikanyihe.

¹⁰ Vaavaa munakhalaanyu mmikhalelo soovila, nyuwaano akhweya munahaala woona ntoko Paulo onneiye​—wi muri waacamela “mwano mwa mwacho.” Ti ilukuluku seiyo omuroromela Yehova onakhalaaya woovila​—nave woochuneyaxa. Ntoko yootakiherya, mwaanyiherye wi munamuthokororya mmusi yoowo orino ereca etokweene. Akhweya moovekela mvekaka miruku.b Mmanle weera yoothene yeeyo munaweryaanyu, apwanne hamunalipiheya osuwela wi Yehova onnoovareryaani nave wi onahaala ovaha yeeyo munachunaanyu wi mvilele?​—Sal. 32:8.

¹¹ Mikhalelo sinamukhala soohiyana. Akhweya munamwaakhela ikano soohiyana hiyana soorweela wa matotore. Naari ahima mwaawehereryaanyu wi evahe nikhaviheryo enamweeriha wi ekhale yookacamihaxa wa nyuwaano. Mutitelele oweherya ikuru sa Yehova. Mutitelele omwaacamela yoowo. (Mwaalakhanye 1 Samuwele 30:3, 6.) Vaavaa ohakararya onaphiyaaya onthamwene anyu ni yoowo onamukhala woolipa.

¹² Lintac ohoona wi ela eparipari variyari va iyaakha seiyo aakhaviheryeiye asitiithi awe yiiceliwaka mu iyaakha saya sookuchula. “Mmukhalelo yoola, miyaano, aiyaka ni munnaka hinaasuwela echu yaweera. Noona wi hinaarino nikhaviheryo. Nuupuwelaka muculi ninnoona wi Yehova aari ni hiyaano. Owo aananilipixa nave aananivaha echu yaanithowa, naamwi nahaasuwela echu yaweera.”

13. Omuroromela Yehova waamukhavihenrye hai murokora mmoha ovilela ni saweereya soothananiha?

¹³ Omuroromela Yehova onnanikhaviherya vaavaa nnakumanaahu ni epahu. Mu elukuluku yeeyo iyawe Ronta yoowo aahiri Namoona aachuneiye omwalanano, munnawe aakhalano ereca etokweene. Miyeeri vakhaani mulamu awe amwaamuthiyana aakhwa. Vaavaa Ronta ooneiye wi vakhaani vakhaani aanawerya ovilela ni saweereya soothananiha, owo aakhala piyoneero a elukuluku yoothene. Moohilekela amannya yaakhwa. Tiheeni yaamukhavihenrye Ronta ovilela? Owo onnathariha: “Kaanaloca ni Yehova mahiku oothene, ophitaanyerya soolakelela ikhaani kaachunaka opaka. Eyo yaakeeriha omoona Yehova okhala eeparipari. Kaahuserya omuroromela yoowo opwaha wiiroromela mukhataaka naari achu akina. Nave nikhaviheryo nenlo aakivanheiye naari neeparipari​—owo aahaakhwaniherya soothowa saka soothene. Ntoko yookhumelela, kaapuha olapa vakhiviru khiviru ni Yehova.”

14. Nroromelo taani Akiristu yaawo mmusi aya iikariwe mmulokoni aryaayano?

¹⁴ Muthokororye yaweereya ekina. Mwaanyiherye wi mmusi ohiikariwa mmulokoni. Moorweela wa omuhuserya Piipiliya, nyuwaano moosuwela mukhalelo muchu awiikariwa onaphwaneleiye okhalihiwa. (1 Akor. 5:11; 2 Yoh. 10) Naamwi hiiha, wiiwelela yoolakelela ya wiikariwa onamukhala woovila ilukuluku ikina, naari woohiweryeya.d Apwanne munahaala ororomela wi Tiithi anyu a wirimu onahaala woovahaani ikuru munachunaanyu wi mukhale oolakelela wiiwelela ohoolela wa Mpiipiliyani vooloca sa muchu awiikariwa? Munnawerya woona ekari ya olipiha onthamwene anyu ni Yehova moorweela wa waataana ni yoowo?

15. Ntakhara heeni Aatamu aachekela nlamulo na Yehova mu Eeteni?

¹⁵ Vooloca sa mwaha yoola, muupuwele sa mulopwana oopacerya, Aatamu. Apwanne owo uupuwela wi aahaala omuchekela Yehova nave atitelele okhala ni okumi? Hooye, Soorempwa sinnanleela wi “Adamu háwokiwe.” (1 Tim. 2:14) Vano ntakhara heeni owo aacheka? Mwawooneya, Aatamu aalya yawiima aavahiweiye ni Haava nthowa na omusivela mwaariye. Owo aawiriyana nsu nawe opwaha nsu na Muluku awe Yehova.​—Map. 3:6, 17.

16. Taani nnaphwanelaahu omusivela vancipale, nave ntakhara heeni?

¹⁶ Apwanne ela enaceenyerya wi hinnaphwanela okhalano osivela woolipa ni amusi ahu? Tahi yeeyo! Osivela onnaakhaliha phaama amusi ahu, moohipwacha waakhanle wi annamurumeela Yehova naari hooye. (Mwaalakhanye Mateyu 22:37, 38.) Nyenya osivela wahu otokweene onaphwanela okhala wa Yehova. Mwawiihiiha, mutitelele wunnuwiha osivela wanyu wa Yehova ni omuroromela. Nave waakhanle wi munnuukhuwa ni mwaha wa wiikariwa wa mmusi, muhule murima anyu wa Yehova mu nivekelo.e (Arom. 12:12; Afil. 4:6, 7) Mpharihele nikacamiho nenlo wi mulipihe onthamwene anyu ni Yehova. Ntoko yookhumelela, ela enahaala wookhaviheryaani onweherya Yehova wi avahe sookhumelela saphaama.

VAAVAA NNAWEHERYAAHU

17. Vaavaa nnaweiwaahu mmuteko wa olaleerya Omwene, nnooniherya hai wi ninnamuroromela Yehova?

¹⁷ Tiivi yaari yoolakelela ene vaavaa Paulo oopoliweiye “mwano mwa mwacho”? Owo onnaloca: “Wi mwa miyo olaleyerya ovuwe mothe mwene, nave amalapo othene yiwe.” (2 Tim. 4:17) Ntoko Paulo, ninnaweiwa mmuteko wa olaleerya, ninnaroromela wi Yehova onahaala woona nikacamiho nlo nave wi ichu ikina soochuneya “sinarwa-sachereryiwa” wa hiyo. (Mat. 6:33) Ntoko alaleeryi a Omwene, noohiyeryiwa “Mitchaka Yaphama,” nave Yehova onanoona ntoko “alipa-muteko akhwawe.”(1 Ates. 2:4; 1 Akor. 3:9) Moorweela wa owetha mmuteko wa Muluku ntoko nnaweryelaahuvo, nnahaala woona okhala wookhweya oweherya nihakararyo.

18. Taavi ari makhalelo a waaceererya omuroromela wahu Yehova ni wunnuwiha onthamwene ahu ni yoowo?

¹⁸ Hankooni nipharihele elukuluku yeela wi nilipihe onthamwene ahu ni Muluku. Wakhala wi nikacamiho ninnaneeriha ovelavela, nipharihele wi nimwaacamele Yehova. Aai, moorweela wa ohuserya mwawiiseela Masu a Muluku, ovekela moohihiyererya ni oweiwa mmiteko soomunepani, hankooni nroromele wi Yehova onnawerya nave onahaala onikhapelela mmakacamiho amutano ni ichu soothene sinarwa muhoolo.

[Masu a vathi]