Mwaakhaviherye Anna a Kiristu Moororomeleya

“Ntakhara mwáherela mmoha a annaka, nari akhanikhani ala, mwákerenle yeyo Miyo.”​—MAT. 25:40.

MWAHAALA WAAKHULA HAI?

Yehova uupulunle hai wiiwexexa wahu wookhweya vooloca sa niphwanaphwaniho na ipucepuche ni ipuri?

Taani onarummwa olaleerya?

Ntakhara heeni vano ti woophwanelela waakhaviherya anna a Kiristu?

1, 2. (a) Niphwanaphwaniho taani Yesu aalonceiye wa asinthamwene awe? (Moone eruku yoopacerya.) (b) Tiheeni nnachunaahu ohuserya vooloca sa niphwanaphwaniho na ipucepuche ni ipuri?

YESU aaloca ni asinthamwene awe Petro, Antreya, Yaakopo ni Yohane. Awo yaamala onwiriyana alocaka maphwanaphwaniho a kapuro oororomeleya ni amiruku, asimwali khumi ni italento. Yesu onnakuchula alocaka niphwanaphwaniho nikina. Owo onnaloca elukuluku yeeyo “Mwana a mutchu” oneereiye athorihe “miloko yothene” ya achu. Niphwanaphwaniho nenla naahaatikhiniha oomuchara awe! Mu niphwanaphwaniho nenlo, Yesu aaloca makhuuru meeli, noopacerya ntoko ipucepuche nave nikina ntoko ipuri. Aaloca nikhuuru naneeraru ntoko ‘anna’ a “Mwene.”​—Mwaalakhanye Mateyu 25:31-46.

² Ovinyerya khalai achu a Yehova annatikhina niphwanaphwaniho nenla woona wi Yesu onaloca sa mukhalelo wa achu. Owo onnuupulula ntakhara heeni akina anahaala waakhela okumi woohimala nyenya akina okhwa woohimala. Okumi ahu onahaala orweela wa wiiwexexa ni ochariha iparipari seiyo Yesu aalonceiye. Nrino yeeyo mmuupuweloni, nnaphwanela wiikoha: Yehova uupulunle hai wiiwexexa wahu wookhweya mu niphwanaphwaniho nenla? Ntakhara heeni nnanwerya oloca wi niphwanaphwaniho nnacicimiherya ochuneya wa muteko wa olaleerya? Taani onarummwa olaleerya? Nave ntakhara heeni ela elukuluku yoophwanelela ya okhala oororomeleya wa “Mwene” ni yaale onawiichaneiye “annaka”?

WIIWEXEXA WAHU WOOKHWEYA ONUUPULULIWA HAI?

3, 4. (a) Ichu taani soochuneya nnaphwanelaahu osuwela wi niiwexexe niphwanaphwaniho na ipucepuche ni ipuri? (b) Mulipeleli a 1881 aatharinhe hai niphwanaphwaniho nenla?

³ Wi niiwexexe phaama niphwanaphwaniho na ipucepuche ni ipuri, nnaphwanela osuwela ichu chaaru sa yaweereya yeeyo: maphacuwelo a yaawo anaromoliwa, elukuluku ya othoriha, ni nthowa na wooniwa ntoko ipucepuche naari ntoko ipuri.

⁴ Mulipeleli a 1881 aaloca wi “Mwana a mutchu,” yoowo oniichaniwa tho “Mwene” onaahiwa Yesu. Alipa oomuhuserya Piipiliya akhalai yiiwexexa wi masu aphariheliwe mu Piipiliya King James Version awi “akhwaaka” analociwa yaale anahaala olamulela ni Kiristu ni achu oothene emanle okookiheryiwa ophaameya veelaponi yavathi. Awo yoona wi omwalanyiwa wa ipucepuche ni ipuri waahaala weereya variyari va Olamulelo wa Kiristu wa Iyaakha Ekonto. Nave yaaneemererya wi achu yaahaala wooniwa ntoko ipucepuche nthowa na okhala mu nlamulo na Muluku na osivela.

 5. Wiiwexexa wahu wookololiwe hai mu 1920?

⁵ Omapacereryo wa 1920, Yehova aahaakhaviherya achu awe wookolola wiiwexexa waya niphwanaphwaniho. Mulipeleli 15 a Otupuru a 1923, aaloca wi “Mwana a mutchu” onaahiwa Yesu. Nyenya, aavaha masu yooniherya maphacuwelo a anna a Kiristu yaawo anahaala olamulela ni yoowo wirimu, nave tho aaloca wi ipucepuche ti yaale arino ewehereryo ya veelaponi yavathi mu Omwene wa Kiristu. Hanka vooloca sa elukuluku ya omwalanya ipucepuche ni ipuri? Mwaha owo waaloca wi anna a Kiristu anahaala olamulela ni yoowo mu Olamulelo wa Iyaakha Ekonto, mwawiihiiha ale a veelaponi yavathi hewerya waakhaviherya naari waanyoosa. Nyenya, omwalanyiwa wa ipucepuche ni ipuri onahaala weereya Olamulelo wa Iyaakha Ekonto ohaakumve opacerya. Vooloca sa nthowa na wooniwa ntoko epucepuche, mwaha owo waathariha wi achu anahaala othorihiwa ntoko ipucepuche nthowa na omweemererya Yesu ntoko Pwiya aya ni ororomela Omwene wi onahaala oruuha mareeliho.

 6. Wiiwexexa wahu wookololiwe hai mwawaacererya mu 1990?

⁶ Ntoko yookhumelela ya wiiwexexa yoola wookwakwaleya, achu a Yehova yaanoona wi achu anahaala othorihiwa ntoko ipucepuche naari ipuri omakuchuwelo wa mukhalelo ola wa ichu, ethorihiwaka orweela wa waakhulela waya muchaka wa Omwene. Nyenya opacerya 1990 wiiwexexa wahu waahookololiwa. Miyaha miili sa Mulipeleli 15 a Otupuru a 1995 saaloca olikanela variyari va masu a Yesu arempwe mu Mateyu 24:29-31 (mwaalakhanye) ni masu mu Mateyu 25:31, 32. (Mwaalakhanye.)a Taavi yaari makuchuwelo ene? Mwaha mmoha waaloca: “Othorihiwa wa ipucepuche ni ipuri ti wa omwaahiyu.” Nave liini chiryene? “Onahaala weereya epacenrye ‘yohosha’ etokotoko enalociwa mu Mateyu 24:29, 30 nave Mwana a muchu ‘arikimórwa’ mu ncicimiho nawe. . . . Voocharela, omakuchuwelo wa mukhalelo wa ichu, Yesu onahaala opaka othoriha.”

 7. Wiiwexexa taani wookwakwaleya nryaahuno olelo?

⁷ Olelo, nookhalano wiiwexexa wookwakwaleya wa niphwanaphwaniho na ipucepuche ni ipuri. Vooloca sa maphacuwelo a yaale aromoliwe, Yesu ti “Mwana a mutchu,” yoowo ori Mwene. Yaale analociwa ntoko “annaka” ari alopwana ni athiyana awoocihiwa, yaawo anahaala olamulela ni Kiristu wirimu. (Arom. 8:16, 17) “Ipuchepuche” ni “ipuri,” inaweemelela achu a maloko oothene. Awo hoocihiwe ni munepa waweela. Hanka vooloca sa elukuluku ya othoriha? Othoriha onahaala weereya omakuchuwelo wa yoohooxa etokotoko. Vano, nthowa taani nnahaala weeriha wi achu ethorihiwe ntoko ipucepuche ni ipuri? Othoriha onahaala weereya moorweela wa waakhaliha waya anna awoocihiwa ni munepa waweela ahanle veelaponi yavathi. Ni makuchuwelo a mukhalelo yoola wa ichu ori vakhiviru, ninnamuthamalela Yehova onivaha wiiwexexa wookwakwaleya niphwanaphwaniho nenla nnaphwanyeya mu ikapitulu 24 ni 25 sa Mateyu!

NIPHWANAPHWANIHO NENLA NNACICIMIHERYA HAI MUTEKO WA OLALEERYA?

8, 9. Ntakhara heeni ipucepuche inalociwa wi ti ‘sékhaikhai’?

⁸ Mu niphwanaphwaniho na ipucepuche ni ipuri, Yesu haalonce mooluluwanya muteko wa olaleerya. Ntakhara heeni, enaweryaaya olociwa wi ninnacicimiherya ochuneya wa muteko wa olaleerya?

⁹ Woopacerya, moone wi Yesu onahusiha moorweela wa niphwanaphwaniho. Chiryene, tahi wi onaloca sa omwalanyiwa wa ipucepuche ni ipuri sawooneya. Moolikana, owo hanaloca wi muchu ti muchu yoowo onooniwa okhala epucepuche onaphwanela chiryene waalyiha, waawariha naari waaxekurya anna a Kiristu mukariposo. Ohiya yeeyo, owo onooniherya moonelo ipucepuche soosiphela inooniheryaaya wa anna awe. Owo onaloca wi ipucepuche ti ‘sékhaikhai’ ntakhara wi awo yaasuwela wi Kiristu ookhalano nikhuuru na anna awoocihiwa veelaponi yavathi, nave ipucepuche saahaakhaviherya awoocihiwa mmahiku yaala ookuchula.​—Mat. 10:40-42; 25:40, 46; 2 Tim. 3:1-5.

10. Ipucepuche inooniherya hai epewe wa anna a Kiristu?

¹⁰ Wanaawiili, muthokororye mwaya woothene wa masu a Yesu. Owo onathokororya eneneeryo ya orwa wawe ni okuchuwa wa mukhalelo wa ichu. (Mat. 24:3) Woopaceryani wa othokororya wawe, Yesu aaloca wi eneneeryo eyo yaahaala ophitaanyerya yaweereya etokweene​—michaka yaphaama ya Omwene yaahaala ‘olaleyeryiwa velaponi yothene ya vathi vano.’ (Mat. 24:14) Ahaakumve oloca sa ipucepuche ni ipuri, owo aaloca niphwanaphwaniho na italento. Ntoko ethokororyiwaaya mmwaha ovinre, Yesu aapaka niphwanaphwaniho nenla wi aaceenyerye oomuchara awe awoocihiwa, ‘anna’ awe wi anaphwanela ophara muteko wa olaleerya mwa mvai. Nyenya, nikhuuru nikhaani na awoocihiwa yaawo ahanle veelaponi yavathi mweelukuluku ya orwa wa Yesu aakhalano muteko mutokweene​—olaleerya wa “maloko othene” makuchuwelo ehaakumve ophiya. Niphwanaphwaniho na ipucepuche ni ipuri ninnooniherya wi awoocihiwa yaahaala okhalano nikhaviheryo. Mukhalelo woopacerya yaale ari ntoko ipucepuche anooniheryaaya epewe wa anna a Kiristu ori waakhaviherya mmuteko wa olaleerya. Ovaha nikhaviheryo enaphitaanyerya eheeni? Apwanne onaphitaanyerya pahiru ovaha sookhalano naari ohakararya, naari wi inavolowela ichu sincipale?

TAANI ONARUMMWA OLALEERYA?

11. Nikoho taani nnakhumelela, nave ntakhara heeni?

¹¹ Olelo, 8.000.000 oomuchara a Yesu, ancipale a yaawo tahi awoocihiwa ni munepa. Awo hiyaakhenle italento seiyo Yesu aavanheiye akapuro awe awoocihiwa. (Mat. 25:14-18) Mwawiihiiha ninnakhumelela nikoho: ‘Apwanne orummwa wa olaleerya onnaphariheleya chiryene wa yaale ahiri awoocihiwa ni munepa waweela?’ Muthokororye mathowa ene ntakhara heeni naakhulo ti nawi aai.

12. Tiheeni nnahuseryaahu orweela wa masu a Yesu mu Mateyu 28:19, 20?

¹² Yesu aahaahusiha oomuchara awe oothene olaleerya. Amanle oviihiwa mookhwani, Yesu aahaaleela oomuchara awe waapaka oohuserya, yaahusihaka okhapelela “itchu sothe sene” aalamulenleiye. Malamulo yaawo yaaphitaanyerya muteko wa olaleerya. (Mwaalakhanye Mateyu 28:19, 20.) Mwawiihiiha, oohuserya oothene a Kiristu anaphwanela olaleerya, moohipwacha ewehereryo aya yaari olamulela wirimu naari okhala veelaponi yavathi.​—Saw. 10:42.

13. Yawoona ya murummwa Yohane enathoonyerya eheeni, nave ntakhara heeni?

¹³ Liivuru a Yawupulula onnooniherya wi muteko wa olaleerya onahaala weeriwano ni awoocihiwa vamoha ni akina. Yesu amvaha murummwa Yohane yawoona ya “mulipa-otheliwa,” achu awoocihiwa 144.000 yaawo anahaala olamulela ni Kiristu wirimu, yaawopaka achu wi ‘yákhele mahi ókumi siyoene.’ (Yaw. 14:1, 3; 22:17) Maahi yaala oosiphela aneemelela yoovaha ya Yehova ya owoopola achu mu ocheka ni okhwa mmathipelo a mukucho wa Kiristu. (Mat. 20:28; Yoh. 3:16; 1 Yoh. 4:9, 10) Yawoopola mathipelo a muchaka yoowo nnalaleeryaahu, nave awoocihiwa annahoolela mu waakhaviherya achu ohuserya ni ophura yawoopola. (1 Akor. 1:23) Nyenya mu yawoona eyo, Yohane onnawoona akina yaawo ahiri a nikhuuru na mulipa ootheliwa. Awo tho annaleeliwa oloca: “Rwani!” Awo anniiwelela nave annaawopa akina wi ewurye maahi a okumi. Nikhuuru nenla nanawiili ti yaale arino ewehereryo ya veelaponi yavathi. Chiri, yawoona ela enooniherya phaama wi oothene yaale anaakhela nwopelo wawi “rwani” aakhalano murici wa olaleerya wa akina.

14. Wiiwelela “malamulo a Kristu” onaphitaanyerya eheeni?

¹⁴ Oothene yaale ari mu “malamulo a Kristu” anaphwanela olaleerya. (Akal. 6:2) Meecelo a Yehova hanavuhana. Ntoko yootakiherya, owo aaloca wa Aisarayeli: “Malamulo ala t’atxhu a Isarayeli ni anamarwa amanke vamoha ni nyuwano.” (Muk. 12:49; Onam. 24:22, BNM) Akiristu hari vathi va Nlamulo na Mose. Nyenya oothene hiyo moohipwacha naari awoocihiwa naari hooye nri vathi va “malamulo a Kristu.” Malamulo yaawo anaphitaanyerya soothene Yesu aahusinheiye. Nlamulo nimoha na Yesu ti nawi oomuchara awe yooniheryeke osivela. (Yoh. 13:35; Yak. 2:8) Nave mukhalelo woopacerya wa wooniherya omusivela Muluku, Kiristu ni achu akina ori olaleerya michaka yaphaama ya Omwene.​—Yoh. 15:10; Saw. 1:8.

15. Ntakhara heeni ennawerya olociwa wi nlamulo na Yesu ninnaphariheleya wa oomuchara awe oothene?

¹⁵ Masu a Yesu aalonceiye wa nikhuuru nikhaani annaphariheleya wa nikhuuru ntokweene. Ntoko yootakiherya, Yesu oopaka nlakano na Omwene ni arummwa 11, nyenya nlakano nlo mweeparipari ninnaphariheleya wa oothene yaawo a 144.000. (Luka 22:29, 30; Yaw. 5:10; 7:4-8) Moolikana Yesu aalamulela nikhuuru nikhaani na oohuserya awe​—yaale aaphiyenryeiye amanle oviihiwa mookhwani​—wi elaleerye. (Saw. 10:40-42; 1 Akor. 15:6) Nyenya oohuserya awe oothene a nsana noopacerya yaanasuwela wi nlamulo naanaphariheleya wa yaawo, naamwi yaahinwiriyanne Yesu alocaka. (Saw. 8:4; 1 Pet. 1:8) Olelo tho, Yesu halonce naari mano ni mmoha a 8.000.000 a alaleeryi a Omwene. Nyenya oothene annasuwela wi anaphwanela omuroromela Kiristu ni wooniherya nroromelo nenlo moorweela wa muteko wa ovaha onamoona.​—Yak. 2:18.

VANO ELUKULUKU YA OKHALA OOROROMELEYA

16-18. Ale ari ipucepuche enii yaakhaviherye hai anna a Kiristu, nave ntakhara heeni anaphwanelaaya weerano yeeyo hiihaano?

¹⁶ Satana onnawaniha ekhoco ni Akiristu awoocihiwa ahanle veelaponi yavathi, nave owo onahaala waaceererya ohiphela wawe vaavaa “mahiku [awe] avakhani” anavukuwaaya. (Yaw. 12:9, 12, 17) Moohipwacha saweeha anakumanaayano, awoocihiwa annayano vahoolo mukipici mutokweene wa olaleerya. Moohikhala minikwa, Yesu ori ni yaawo, akhaviheryaka wiilipixerya waya.​—Mat. 28:20.

¹⁷ Muloko mutokweene wa ipucepuche onnoona okhala ekari etokweene waakhaviherya anna a Kiristu ohiya pahiru mmuteko wa olaleerya nyenya tho mmikhalelo mikina sa mphurelo. Ntoko yootakiherya, awo annavaha ikhorowa saya mahaleene wi itekiwe Ipa sa Omwene, Ipa sa Mithukumano mitokweene, ni ifiliyale, nave moororomeleya annamwiiwelela yaale “kapuro óroromeleya” ni a miruku aathanlileiye wi ehooleleke.​—Mat. 24:45-47; Ahe. 13:17.

¹⁸ Moohilekela ankeelo anahaala ocuula echeku yootoloxa ya yoohooxa etokotoko. Ela enahaala weereya anna oothene a Kiristu ahanle veelaponi yavathi emanle ovahiwa eneneeryo aya yookuchula. (Yaw. 7:1-3) Ahaakumve opacerya Armaketo, awoocihiwa anahaala okerihiwa wirimu. (Mat. 13:41-43) Mwawiihiiha, vano elukuluku yoophwanelela wi yaale anahaala wooniwa ntoko ipucepuche yaakhaviherye anna a Kiristu moororomeleya.

[Nsu na vathi]