Oreheryeya Mwawiiwanana ni Masu a Muluku

“Apwiya [Yehova] apatunse elapo yavathi ni miruku saya, apatunse elapo ya wirimu ni osuwela waya.”—MASIPOSIPO 3:19.

MACIPO: 105, 107

MWAAHAALA WAAKHULA HAI?

Tiheeni enoolekechaani wi Yehova tahi Muluku awaakanyeryeya?

Ntakhara heeni ninnaweherya wi yaale anamulapela Yehova ekhale ooreheryeya?

Masu a Muluku anakhaviherya hai muloko okhala waweela, wa murecele ni wawiiwanana?

1, 2. (a) Tiheeni achu akina analocaaya sa muupuwelo wawi Muluku ookhalano marehereryo? (b) Tiheeni nneeraahu nthokororye mmwaha yoola?

YAALOCIWAKA sa malapelo, achu anii: “Tahi woochuneya okhalano marehereryo wi yoohooleleke. Enachuneya ori okhalano onthamwene ni Muluku.” Apwanne eparipari? Saweereya sinooniherya eheeni?

² Mmwaha yoola, nnahaala woona wi Yehova onapaka ichu mmukhalelo wooreheryeya nave onachuna wi achu awe ekhale ooreheryeya. Nnahaala tho othokororya echu nnaphwanelaahu opaka vaavaa marehereryo a Yehova ananivahaaya ohoolela. (1 Korinto 14:33, 40) Mu nsana noopacerya, achu a Yehova yaanachara ohoolela wa Soorempwa nave yaanalaleerya michaka yaphaama mmapuro mancipale. Moolikana, ninneemererya wi Piipiliya anihoolele. Nave ninniiwelela mahusiheryo nnaakhelaahu orweela wa marehereryo a Muluku. Ntoko yookhumelela, ninnawerya olaleerya michaka yaphaama elapo yoothene. Nave tho ninnakhaviherya muloko okhala waweela, wa murecele ni wawiiwanana.

YEHOVA TAHI MULUKU AWAAKANYERYEYA

 3. Tiheeni enoolekechaani wi Yehova tahi Muluku awaakanyeryeya?

³ Vaavaa nnavareryaahu ichu Yehova opatunseiye, ninnoona mookwakwaleya wi owo tahi Muluku awaakanyeryeya. Owo ‘opatunse elapo yavathi ni miruku sawe, apatunse elapo ya wirimu ni osuwela wawe.’ (Masiposipo 3:19) Sookhalavo ichu sincipale nihisuwenlaahu seiyo Yehova opankeiye. Chiryene, “Pahiru oniiweya ovuwa wa miteko sawe sawiipitheya!” (Yobi 26:14, Tradução do Novo Mundo) Nyenya ti yawooneya orweela wa ichu sa vakhaani nsuwenlaahu wi erimu ti yooreheryeya. (Salumu 8:4, 5) Itheneeri sincipale sinneeceeca wirimu mmukhalelo wooreheryeya. Nave nkuupuwelani mukhalelo elapo ahu eneecaaya variyari va nsuwa. Orehereryeya yoola wootikhiniha onaweryeya pahiru nthowa nawi Yehova oorehererya mmukhalelo itheneeri ni elapo ahu inaphwanelaaya weeca. Vaavaa nnuupuwelaahu wi opatunse elapo, “erimu ni miruku,” ninnachuna omuhakalaliha, omulapela ni okhala oororomeleya wa yoowo.—Salumu 136:1, 5-9.

 4. Ntakhara heeni Masiyentista hanawerya waakhula makoho mancipale ookhweleya?

⁴ Masiyentista annapharihela ichu sincipale seiyo ahusenryaaya vooloca sa erimu ni elapo ahu wi nikhale phaama. Nyenya awo hanawerya waakhula makoho mancipale ookhweleya. Ntoko yootakiherya, achu anahuserya mukhalelo wa itheneeri hanawerya onleela mookwakwaleya mukhalelo wa erimu naari ntakhara heeni achu, asinama ni miri ikhanlaaya veelaponi yavathi. Nave achu ancipale hanawerya othariha ntakhara heeni achu aakhalano nchuno na okhalano ekumi yoohimala. (Eklesiyaste 3:11.) Nthowa nimoha nnaweeriha achu ohaakhula makoho yaala ti yawi Masiyentista ni achu akina analoca wi haavo Muluku nave anavuwiha othatuwa. Nyenya Muluku onnanivaha maakhulo mu Masu awe, Piipiliya.

 5. Mmukhalelo taani achu anaroromelaaya malamulo a maphacuwelo?

⁵ Yehova oopaka malamulo mancipale a maphacuwelo. Malamulo awo hanatorokeya. Alipa a makeesi, achu anasipiha mooro yakhumelela epahu, Manxinyeryo, alipa aneeciha maceeke, alipa anaathala areca ni akina, anaroromela malamulo yaala wi epakeke miteko saya. Ntoko yootakiherya, murima wa achu oothene onakhala mmakupa mamohamoha a mwiili, mwawiihiiha mulipa awaathala areca, oosuwela nipuro onaphwanyeyaayavo wa areca awe oothene. Nave muchu ti muchu oosuwela wi wakhala wi oocupha mmwirini naari mpuro woocukhuwa eereryaka ovava ntoko epalame, onahaala wintakeya nave onamukhwa.

TIHEENI MULUKU OREHERENRYEIYE?

 6. Nnasuwela hai wi Yehova onachuna wi achu emulapeleke mmukhalelo wooreheryeya?

⁶ Mweeparipari Yehova oorehererya erimu mmukhalelo wootikhiniha. Mwa yeeyo, owo onachuna wi achu awe emulapeleke mmukhalelo wooreheryeya. Aai, Yehova oonivaha Piipiliya wi anihusihe mukhalelo wa omulapela. Pahiru moorweela wa ochariha ohoolela onanivaheiye orweela Mpiipiliyani ni marehereryo awe nnahaala owerya okhalano ekumi yoohakalaliha ni yoopuheya.

 7. Tiheeni nnahuseryaahu orweela wa marepeliwo Piipiliya?

⁷ Piipiliya yamahala emoha pahiru enarweela wa Muluku. Alipa oohuserya akina analoca wi Piipiliya liivuru a Ayuta ni a Akristu ophitaanyeryiwe vamoha ni achu. Nyenya Muluku aalakelela taani aaphwanela waarepa aliivuru, elukuluku ya waarepa, ni echu ya orepa. Ti nthowa nene aliivuru oothene a Piipiliya ananikhaviheryaaya wiiwexexa muchaka wa Muluku. Ovinyerya mu Maphacuwelo ophiyerya Wupulula, Piipiliya onnooniherya wi nookhalawo “nloko [evyo]” naahaala weeriha elapo okhala parataiso wanaawiili. Nave noohuserya wi “nloko” nno ti Kristu Yesu nave Omwene awe onahaala wooniherya wi Yehova ookhalano ophwanelela wa waalamulela achu oothene.—Mwaalakhanye Maphatxuwelo 3:15; Mateu 6:10; Wupulula 11:15.

 8. Mmikhalelo taani Aisarayeli yaaryaaya ooreheryeya?

⁸ Aisarayeli yaanachara Nlamulo Muluku aavanheiye nave yaari ooreheryeya phaama. Ntoko yootakiherya, yaakhalawo “athiyana yàlapa vamilako va musakala w’okumana n’Apwiya.” (Mukwaha 38:8) Aisarayeli yaahusihiwa tho mukhalelo wa othaama ni omuthaamiha tapernaakulu mooreheryeya. Ohoolo waya Mwene Tavite aahaareherya anamukucho ni Alevi wi epakeke miteko mmusakalani. (1 Matharihelo 23:1-6; 24:1-3) Vaavaa Aisarayeli yamwiiwelelaaya Yehova, owo aanaareeliha. Vaya yaari ooreheryeya nave yaakhalano murecele ni wiiwanana.—Malamulo 11:26, 27; 28:1-14.

 9. Miloko sa nsana noopacerya saareheryen’ye hai?

⁹ Miloko sa nsana noopacerya saari sooreheryeya tho. Naakhalawo nikhuuru noolamulela, eyo ti wi, nikhuuru na alopwana yaawo yaahoolela miloko. Wuupaceryani nikhuuru nla yaari pahi arummwa. Ohoolo waya atokweene akina yaanapaka makupa. (Saweriwa T’arummwa 6:1-6; 15:6) Yehova aanaahoolela anna a nikhuuru noolamulela ni akina yaawo yaalapa vamoha wi erepe ikaarata saavahererya ekano ni sooleeliherya wa miloko. (1 Timóteo 3:1-13; Tito 1:5-9) Mano, miloko saaphura hai vaavaa saacharihaaya ohoolela wa nikhuuru noolamulela?

10. Tiheeni yeereya vaavaa miloko sa nsana noopacerya saacharihaaya ohoolela wa nikhuuru noolamulela? (Moone eruku yoopacerya.)

¹⁰ Mwaalakhanye Saweriwa T’arummwa 16:4, 5, Nlakano Nahihano. Mu nsana noopacerya, anna akina yaanaxekurya miloko wi yaaleele anna “malamulo [wi] ekhapelele, yawo yálamulenlaya arummwa ni atokwene a va Yerusalemu,” eyo ti wi nnikhuuru noolamulela. Miloko saanachariha ohoolela yoola nave “yákhomálihiwa mu nroromelo, enácha vowalakhanya nihiku nnihiku.” Tiheeni nnahuseryaahu orweela wa yootakiherya aya, nave eni enikhaviherye hai mmuloko ahu?

MANO MUNNACHARIHA OHOOLELA?

11. Tiheeni atokweene ni arummwa oorumeela anaphwanelaaya opaka vaavaa anaakhelaaya ohoolela onarweela mmarehereryo a Muluku?

¹¹ Anna a Nikhuuru na Efiliyale, ooweherya a ekulucu, atokweene ni arummwa oorumeela, annaphwanela wiiwelela ohoolela anaakhelaaya mmarehereryo a Muluku. Chiryene, Masu a Yehova annanleela owiiwelela yaale ari ahooli ahu. (Malamulo 30:16; Ahebri 13:7, 17) Yaale ari oororomeleya wa Yehova hanamwaryeya, nave hanaakaaha ohoolela anaakhelaaya. Hinnachuna okhala ntoko Tiotrefe, yoowo ahaacicimiha anna yaari ahooleli. (Mwaalakhanye 3 Yohani 9, 10.) Vaavaa nnacharihaahu ohoolela nnavahiwaahu, ninnakhaviherya okhapelela murecele ni wiiwanana mmulokoni. Mwawiihiiha, muchu ti muchu onaphwanela wiikoha: ‘Apwanne kinnaalipiha anna ni arokora aka otitelela okhala oororomeleya wa Yehova? Kinnaakuvela ochariha ohooleela kinaakhelaaka mmarehereryo a Muluku?’

12. Atokweene ni arummwa oorumeela anathanliwa hai?

¹² Mwahiihaanoru, Nikhuuru Noolamulela nootoroka mukhalelo wa waathanla atokweene ni arummwa oorumeela mmiloko soothene. Mu “Makoho a Alipa Waalakhanya” anaphwanyeya mu Mulipeleli 15 a Novempuru a 2014, yaatharihiwa wi mu nsana noopacerya nikhuuru noolamulela naanavaha ooweherya aweeceeca olamulelo wa waathanla atokweene ni arummwa oorumeela. Ovinyerya Setempuru a 2014, ooweherya a ikulucu yaapaceryiha mukhalelo yoola wa waathanla. Vaavaa atokweene anamweemereryaaya munna ntoko mutokweene naari murummwa oorumeela, ooweherya a ekulucu onneererya omusuwela phaama munna ni emusi awe. Ntoko yootakiherya, owo onanwerya olapa ni munna mmuteko woolaleerya. (1 Timóteo 3:4, 5) Voocharela ooweherya a ekulucu ni atokweene annathukumana. Awo annaalikhela Soorempwa sinooniherya mikhalelo sa mutokweene naari murummwa oorumeela.—1 Timóteo 3:1-10, 12, 13; 1 Pedro 5:1-3.

13. Nni nooniherye hai wi ninnakhaviherya ohoolela nnaakhelaahu orweela wa atokweene.

¹³ Atokweene annanivaha ohoolela orweela Mpiipiliyani nthowa nawi anachuna onikhapelela ni okhapelela muloko. Nnaphwanela wiiwanana ni yaawo woona wi mahusiheryo aya tamphurelo ahu. (1 Timóteo 6:3) Mu nsana noopacerya, achu akina yaapacerya ohusiha ichu “sovitxhana.” Awo hiyaalapa mwa soothene, nto yaahiivoliiherya mu ichu seiyo saahaaphwanela. Atokweene yaaheererya waalaka, nyenya yaakhooca otoroka mukhalelo aya. Paulo aahaaleela anna mukhalelo yaahaalaaya omukhalihaka muchu ntoko yoowo. Owo aaloca: “Mmusuwelihe phama ni muhikhaleke ni yowo.” Awo yaaphwanela ohaataana ni muchu owo, nto hiyaaphwanela omukhaliha ntoko mwiicani. (2 Tesalónika 3:11-15) Ntoko yootakiherya, olelo, atokweene anneererya omukhaviherya muchu yoowo onakhooca malakiheryo a Muluku vooloca sa omwaakamela muchu ohiri mwa Apwiya. (1 Korinto 7:39) Wakhala wi muchu owo ookhooca otoroka muupuwelo awe, atokweene anamulakelela ovaha mwaha onathariha wi muupuwelo ntoko yoowo onanweeriha akina okhalano moonelo woonanara vooloca sa muloko. Hanka wakhala wi atokweene aaloca mwaha ntoko yoowo mmulokoni mwanyu, muni moone hai? Wakhala wi moomusuwela muchu ene, munahaala osepa waataanano? Mmukhalelo yoola, nyuwaano munaphwanela omukhaviherya osuwela wi muupuwelo awe ti wooheseya nave honamuhakalaliha Yehova, nave wi onaphwanela otoroka moonelo awe.^[1]—Moone masu avathi omakuchuwelo.

MWEERIHE WI MULOKO OKHALE WAWEELA, WA MURECELE NI WAWIIWANANA

14. Nni nikhaviherye hai muloko okhala waweela?

¹⁴ Masu a Muluku annanleela yeeyo oothene ahu nnaphwanelaahu opaka wi niheemererye mukhalelo woonanara mmulokoni mwahu. Muthokororye yeeyo yeeren’ye o Korinto. Paulo aanasivela anna ni arokora a weiwo. Owo aahaakhaviherya ancipale ohuserya eparipari. (1 Korinto 1:1, 2) Vano Nkaanyiheryani mukhalelo onneiye voosuwela wi akina a yaawo yaanapaka mararuwo nave anna yaanamweemererya muchu yoowo otitelela opaka makupa a muloko! Paulo aahaaleela atokweene wi “avelèliwe mulopwana owo wa satana.” Awo yaaphwanela omviihamo mmulokoni muchu yoowo, eyo ti wi, omwiikara mmulokoni. (1 Korinto 5:1, 5-7, 12) Olelo, atokweene annalakelela omwiikara muchu nthowa nawi oopaka yoocheka etokweene nave hanacharuwa. Vanonto, apwanne nnahaala omukhalihaka muchu awiikariwa hiiha ntoko Soorempwa sinanleelaya? Wakhala wi ninneerano, ninnakhaviherya muloko okhala waweela. Nave tho nnammukhaviherya muchu osuwela wi ti woochuneya ocharuwa ni omveka Yehova wi amulevelele.

15. Nni neerihe hai muloko okhala wa murecele?

¹⁵ Naakhalawo tho nikacamiho nikina o Korinto. Akina yaanaasomela annaya. Paulo aahaakoha: “Mwaphutxiwà, muhinavilela wa nthowa na seni?” (1 Korinto 6:1-8) Olelo, akina a mmulokoni annampaka nakoso ni annaya, nto ikwaha ikina sinnarimeela ikhorowa naari wuupuwela wi annaya annawiiyera. Mwawiihiiha awo annaasomela annaya. Nyenya, yeereya hiiha, enanweeriha achu omuloca moonanara Yehova ni achu awe. Nave eyo enahaala oruuha makacamiho mmulokoni. Masu a Muluku annanikhaviherya osuwela okhapelela murecele ni annihu, naamwi eyo etaphulelaka oyeleela ikhorowa.^[2] (Moone masu avathi omakuchuwelo.) Mweeparipari, Yesu oohusiha mukhalelo wa omaliha makacamiho ni ohiiwanana. (Mwaalakhanye Mateu 5:23, 24; 18:15-17.) Vaavaa nniiwelelaahu ohoolela wawe, ninneeriha muloko okhala waweela ni wawiiwanana.

16. Ntakhara heeni achu a Muluku aryaaya awiiwanana?

¹⁶ Masu a Muluku annanleela: “Onani, ti worera ni wohakalaliha tchiri; Wi anna ekhaleke vamoha” mwawiiwanana! (Salmo 133:1, NN ) Vaavaa yaamwiiwelelaaya Yehova, Aisarayeli yaanakhala ooreheryeya ni awiiwanana. Muluku aalaiherya vooloca sa achu awe: “Kinamothukumanyani ntoko iputxeputxhe munikholani.” (Mikeya 2:12) Yehova aalaiherya tho wi achu awe yaahaala ohuserya eparipari yoorweela mu Soorempwa nave yaahaala omurumeelaka mwawiiwanana. Owo aaloca: ‘Nihiku nenlo kinamurukunusa mirima sa maloko, kinamurèriha iyano sa amalapo. Hiha anan’werya okiphwanyiha mavekelo aya ni okitxitximiha ni murima mmoha.’ (Sofoniya 3:9) Ninnatepa othamalela omulapela Yehova mwawiiwanana!

17. Tiheeni atokweene anaphwanelaaya opaka wakhala wi muchu a mmulokoni oopaka yoocheka etokweene?

¹⁷ Wakhala wi muchu oopaka yoocheka etokotoko, atokweene anaphwanela waakuvela omulaka mmukhalelo woosivela. Awo aasuwela wi Yehova onachuna wi ekhapelele muloko orweela wa ovolowela woonanara ni okhapelela okhala wawiiwanana ni waweela. (Masiposipo 15:3) Paulo aanaasivela annawe o Korinto nave aanaalaka wakhala woochuneya, ntoko naalakhanyaahu mu ekaarata awe yoopacerya. Noosuwela wi atokweene a weiwo yaanaakuvela ochariha ohoolela wa Paulo nthowa nawi ohoolo waya, owo aahaathamalela mu ekaarata awe yanaawiili aarepenleiye. Wakhala wi munna ‘ophariwe ni yotxheka,’ atokweene anaphwanela omulaka mmukhalelo waphaama.—Galasya 6:1.

18. (a) Ohoolela wa Masu a Muluku waakhavihenrye hai muloko wa nsana noopacerya? (b) Tiheeni nnahaalaahu othokororya mmwaha onacharela?

¹⁸ Ti yawooneya wi vaavaa Akristu a nsana noopacerya yaacharihaaya ohoolela wa Masu a Muluku, miloko saya saanakhala saweela, sa murecele ni sawiiwanana. (1 Korinto 1:10; Éfeso 4:11-13; 1 Pedro 3:8) Ntoko yookhumelela, anna ni arokora yaanawerya olaleerya michaka yaphaama wa “sopatusiwa sothene sa vathi verimu.” (Kolosi 1:23) Olelo tho, achu a Yehova ari awiiwanana ni ooreheryeya, nave annalaleerya michaka yaphaama mu elapo yoothene. Mmwaha onacharela onahaala ovaha sawooniherya sincipale wi nchuno naya ori omucicimiha Pwiya Mulamuleli Yehova ni wiiwelela ohoolela wa Masu awe, Piipiliya.—Salumu 71:15, 16.

[Masu a vathi]

[Yooleeliherya va epaaxina 12]

Atokweene annanivaha ohoolela orweela Mpiipiliyani nthowa nawi anachuna onikhapelela ni okhapelela muloko

[Ekaaxa va epaaxina 14]

MASU ATHARIHIWE

Waarehererya achu awe: Yehova onnavaha ohoolela yoowo onanooniherya mukhalelo wa omulapela, mmulokoni ni opaka muteko wa olaleerya

Weeriha muloko okhala waweela: Nnakhala mwawiiwanana ni malakiheryo a Yehova anaphwanyeya Mpiipiliyani. Wakhala wi muchu oopaka yoocheka etokotoko, atokweene annaakuvela omulaka moosivela. Wakhala wi ookhooca otoroka moonelo awe, owo hani apake makupa a muloko. Soorempwa sinnathariha mukhalelo nneeraahu nimukhaliheke muchu ntoko yoowo