Tiheeni Piipiliya Onaloceiye sa Soowurya Soohapaliha?

Orukurerya elapo achu aakhalano miyoonelo soohiyanahiyana vooloca sa soowurya soohapaliha. Vakina vaya akina annasiveliwa owurya eri ni asinthamwene aya. Akina annathanla ohiwuryaru. Nave akina annawuryaxa ophiyerya ohapaliwa. Tuuvi ori moonelo wa Piipiliya vooloca sa soowurya soohapaliha?

1. Apwanne ti yoonanara owuurya soohapaliha?

Piipiliya hanawatiiha owuurya soohapaliha. Moohiyana, vaavaa Piipiliya onaloceiye sa samahala Muluku onivanheiye, onaphitaanyerya “eviinyu yeeyo enahakalaliha murima wa muchu.” (Salumu 104:14, 15) Alopwana akina ni athiyana ororomeleya yaawo analociwa Mpiipiliyani yaanawurya soowurya soohapaliha.—1 Timóteo 5:23.

2. Ekano taani Piipiliya onavaheiye wa yaale analakelela owurya soohapaliha?

Yehova onaloca wi ti yoonanara owuryaxa ni okhala ohapaliwa. (Galasya 5:21) Masu awe anii: “Ohikhaleke vamoha ni achu oowuryasha eviinyu.” (Masiposipo 23:20) Mwawiihiiha, wakhala wi noolakelela owurya, nnaphwanela weerano mmukhalelo woophimelela naamwi nrivo meekhiihu. Owuryaxa onnamweeriha muchu ohuupuwela mookwakwaleya nave tho ohiwerya osuwela yeeyo onaloceiye ni oneereiye. Ohiya yeeyo, enanwerya onanariha okumi. Waakhanle wi hannawerya ovareryela mukhalelo nnawuryaahu nnaphwanela ohiya owurya moomalela.

3. Nni ncicimihe hayi yoolakelela ya akina vooloca sa owurya soohapaliha?

Owurya soohapaliha yoolakelela ya muchu mukhateiye. Hannaphwanela omuthoriha yoowo olakelenle owurya moophimelela. Hannaphwanela tho omukhinyererya muchu owurya. (Aroma 14:10) Ninnalakelela ohiwurya wakhala wi eyo ennawukhula akina. (Mwaalakhanye Aroma 14:21.) Hiyaano hannaavya ‘yoochuna ahu, aayi ya mukhwiihu.’—Mwaalakhanye 1 Korinto 10:23, 24.

OHUSERYA MWAWIISEELA

4. Mulakelele waakhanle wi munahaala owurya naari hooye

Yesu oona hayi vooloca sa owurya soohapaliha? Yootikhiniha yoopacerya Yesu aapankeiye ennanikhaviherya osuwela naakhulo. Mwaalakhanye Yohani 2:1-11, nave voocharela muthokororye makoho ala:

• Yootikhiniha yeela enanihusiha eheeni sa moonelo wa Yesu vooloca sa soowurya ni yaale analakelela owurya?

• Woona wi Yesu halonce wi ti yoonanara owurya, Mukristu onaphwanela omoonaka hai muchu yoole onalakelela owurya?

Nyenya woona wi Mukristu ori otaphuwa owurya soohapaliha, eyo henataphulela wi elukuluku yoothene ti yaphaama weerano hiihaa. Mwaalakhanye Masiposipo 22:3, nave voocharela muthokororye mukhalelo iponto inacharela ineeraaya ivolowele yoolakelela anyu ya owurya:

• Munaya weeciha ekaaro naari maakina.

• Nyuwaano murimurupala.

• Totore ohoovahaani ekano wi muhiwurye soohapaliha.

• Nyuwaano mookhalano nikacamiho na ovareryela waaca wa yoowurya.

• Nlamulo hinnaweemereryaani owurya soohapaliha.

• Muri ni muchu yoowo olakelenle ohiwurya woona wi khalai aahikhalano nikacamiho na ovareryela mawuryelo awe.

Apwanne munnaphwanela okawa yoowurya yoohapaliha va kasamentoni naari mmapuro makina a ochekulela? Wi moone echu eni yookhaviheryeeni olakelela, moone EXILEMA.

EXILEMA: Devo servir bebidas alcoólicas? (2:41)

Mwaalakhanye Aroma 13:13 ni 1 Korinto 10:31, 32. Mmanle waalakhanya yoorepa ti yoorepa, muthokororye nikoho nla:

• Opharihela nlakiheryo nenla, eni yookhaviheryeeni hai opaka yeeyo eni emuhakalalihe Yehova?

5. Mulakelele waaca wa yoowurya munayaanyu owurya

Wakhala wi moolakelela owurya, muupuwele ela: Yehova hanawatiiha owurya soohapaliha, nto owo onawatiiha owuryaxa. Ntakhara heeni? Mwaalakhanye Oseya 4:11, 18, nave voocharela muthokororye nikoho nla:

• Tiheeni eni yeereye wakhala wi muchu onnawurya vancipale?

Nni niwerye hai osepa owurya vancipale? Nnaphwanela okhala awiiyeviha naari osuwela okotakota wahu. Mwaalakhanye Masiposipo 11:2, nave voocharela muthokororye nikoho nla:

• Ntakhara heeni eryaaya yaphaama otikitherya mphimo vooloca sa waaca wa yeeyo munayaanyu owurya?

6. Nikhaviheryo wa ale anawuryaaxa

EXILEMA: ‘Eu estava cheio da minha vida’ (6:32)

• Mu exilema, tiheeni Dmitry eereiye amanle ohapaliwa?

• Apwanne aahiwerya omaala owurya vaavaa eerenryeiye ohiya mu ekwaha yoopacerya?

• Ti mwawihai owo aawenryeiye ovootha yookhovelela awe ya owuryaxa?

Mwaalakhanye 1 Korinto 6:10, 11, nave voocharela muthokororye makoho ala:

• Apwanne ohapaliwa nikacamiho ntokweene?

• Tiheeni enooniherya wi muchu oowuryaxa soohapaliha onanwerya opaka matorokelo?

Mwaalakhanye Mateu 5:30, nave voocharela muthokororye nikoho nla:

• Mu niphwanaphwaniho na Yesu na okwasa ntata, owo aachuna oloca wi akhweya onamuchuneya wiilipixerya wi nimuhakalalihe Yehova. Tiheeni munaphwanelaanyu weera wakhala wi munnawaniha ni yookhovelela ya owuryaxa?a

Mwaalakhanye 1 Korinto 15:33, nave voocharela muthokororye nikoho nla:

• Wakhala wi mookhalano asinthamwene anyu oowuryaxa, eyo eni yoovoloweleeni hai?

MUKWASU

Yoowurya eri emoha ya samahala seiho Yehova onivanheiye, nyenya owo onniica owuryaxa ni ohapaliwa.

Makoho awuuluulela

• Tuuvi ori moonelo wa Piipiliya vooloca sa soowurya soohapaliha?

• Sawoopiha taani irivovo va nthowa na owuryaxa?

• Nni ncicimihe hai yoolakelela ya akina vooloca sa owurya?

OTHOLATHOLA

Ti mwawihai amiravo eniraya epake soothanla saphaama vooloca sa soowurya soohapaliha?

Pare e pense: devo beber? (2:31)

Moone tiheeni munaphwanelaanyu weera wi nwerye ovootha nikacamiho nanyu na owurya soowurya soohapaliha.

“Manter a bebida no devido lugar” (A Sentinela, 1.º de janeiro de 2010)

Apwanne Akristu annaphwanela waamaniha akoopho?

“Perguntas dos leitores” (A Sentinela, 15 de fevereiro de 2007)

Mwaalakhanye yaweereya “Eu era um ‘barril sem fundo’” moone mukhalelo mulopwana mmoha ahin’yeiye owuryaxa.

“A Bíblia muda a vida das pessoas” (A Sentinela, 1.º de maio de 2012)