Munanwerya Owana ni Satana ni Omvootha!

“M’mukhoche [Satana] ókilatheya mu nroromelo.”​—1 PET. 5:9.

NNII NIMUKHOOCE HAI SATANA NI .. . .

osepa wiirumiha?

osepa wiithukumanyerya?

osepa mararuwo?

 1. (a) Ntakhara heeni ekhoco ahu ni Satana ti yoochuneya olelo? (b) Nnasuwela hai wi ti wooweryeya ovootha mu ekhoco ahu ni Satana?

SATANA onnawana ni awoocihiwa oohalela ni “ipuchepuche sikina.” (Yoh. 10:16) Musaserya onachuna waamirya alapeli ancipale a Yehova mweelukuluku vakhaani oreiyeno. (Mwaalakhanye Yawupulula 12:9, 12.) Apwanne nnanwerya ovootha ekhoco ahu ni Satana? Aai! Piipiliya onii: “Munakhoma ni Sàtana nave owo onamutxhawa wa nyuwo.”​—Tiy. 4:7, BNM

2, 3. (a) Muupuwelo wawi Satana hakhanle eniiwanana hai ni yoochuna ya Musaserya? (b) Munasuwela hai wi Satana ookhala?

² Ancipale haneemererya wi Satana ookhala. Wa achu yaawo, Satana ni masololo achu a mu anovela, ixilema sa ekhoco naari apasakhwe a mu ikhankoonya. Achu yaawo, anoona wi muchu orino miruku hanaphwanela weemererya wi minepa seiha sookhala. Vano, munuupuwela wi Satana onnasooseya nthowa na ovonyeriwa veelaponi yavathi vamoha ni akhaviheryi awe? Hooye! Opwaha soothene, ti wookhweya wa Satana wuumiha muupuwelo wa yaale anakhwa minikwa sa okhala wawe. (2 Akor. 4:4) Mukhalelo mmoha Satana onaahuweliheiye achu ori ovuwiha michaka sawii minepa soonanara hisaavo.

³ Ntoko alapeli a Yehova hanri variyari va yaawo anawokiwa. Noosuwela wi Musaserya ookhala, wi aari Satana yoowo aalonce ni Haava moorweela wa enowa. (Map. 3:1-5) Satana aamwaakaaha Yehova vooloca sa Yupu. (Yupu 1:9-12) Aari Satana yoowo aamwenhe Yesu. (Mat. 4:1-10) Nave omanle oyariwa Omwene wa Muluku mu 1914, aari Satana yoowo aapacenrye ‘ekhocho’ ni awoocihiwa oohalela. (Yaw. 12:17) Ekhoco yeeyo ennaaceereryeya vaavaa Satana onaavyaavyeiye waatoloxa oohalela a 144.000 ni ipucepuche sikina. Wi nivoothe ekhoco eyo nnaphwanela okhoma ni Satana, okhala oothipeleya mu nroromelo. Mwaha ola onnathokororya mikhalelo miraru sa weerano yeeyo.

MUSEPE WIIRUMIHA

 4. Satana oonihenrye hai wi tawiirumiha?

⁴ Satana tahi awiiyeviha. Mweeparipari waakaaha wawe olamulelo wa Yehova ni wiiseeriha wi akhale mwiicani ennooniherya wi owo tawiirumiha. Mwawiihiiha, mukhalelo mmoha wa okhoma ni Satana ori osepa wiirumiha ni okhala awiiyeviha. (Mwaalakhanye 1 Petro 5:5.) Nyenya wiirumiha tiheeni? Apwanne mukhalelo woothene wa wiirumiha ti woonanara?

5, 6. (a) Apwanne mukhalelo woothene wa wiirumiha ti woonanara? Mutharihe. (b) Mukhalelo taani wa wiirumiha ori wawoopiha, nave sootakiherya taani sa mu Soorepa inooniherya yeeyo?

⁵ Liivuru mmoha onathariha wiirumiha ntoko “wiicukhula ni wiicicimiha” ni ntoko “wiithamala naari ohakalala nthowa na nyuwaano naari nthamwene anyu weera yaphaama naari okhalano echu yaphaama.” Wiithamala tahi woonanara. Murummwa Paulo aaloca wa Atesalonika: “Hiyo mkhatihu ninnithamalano sa nyuwo m’miloko ya Muluku, ntakhara a ovilela wanyu, ni nroromelo nanyu, muhóshiwa wanyu wothene ni masóso awo munonanyu.” (2 Ates. 1:4) Mwawiihiiha ohakalalela miteko sa akina naari wiithamalano ti yaphaama wa hiyo. Henaweheryiwa wi nuuliweke muru ni emusi ahu, sookhovelela naari elapo niyariwaahuwo.​—Saw. 21:39.

⁶ Moohiyana, wookhalavo mukhalelo wa wiirumiha yoowo onamaliha onthamwene ni onanariha wiiwanana wahu ni Yehova. Wiirumiha iwo onnakumiherya ikuhu ni okhooca ekano yoochuneya ohiya weemererya mwa wiiyeviha. (Sal. 141:5) Mukhalelo yoola wa wiirumiha onatharihiwa ntoko “wiicicimiha woohiphwanela” naari “moonelo woonanara onooniheryiwa ti achu aneemererya wi toophwanelela waapwaha akina.” Yehova onniica mukhalelo yoola wa wiirumiha. (Esek. 33:28; Amosi 6:8) Nyenya Satana onnahakalala onawooneiye achu yooniheryaka mukhalelo yoola woonanara wa wiirumiha, woona wi anatakiherya wiirumiha wawe. Satana aahela wiirumiha mu alopwana ntoko Nimuroti, Farawo ni Apusalamu​—oothene yaala yaakhalano wiirumiha woohiphwanelela! (Map. 10:8, 9; Muk. 5:1, 2; 2 Sam. 15:4-6) Wiirumiha tho waamweeriha Kayine opaka yoocheka. Owo aalopoliwa ti Muluku nyenya heemerenrye ekano nthowa na wiirumiha. Mwaayiini haapwanche olopola wa Yehova nave aamorela mu epahu.​—Map. 4:6-8.

7, 8. (a) Nthalu tiheeni, nave ti mwawiihai nthalu nikhanlaaya mukhalelo wa wiirumiha? (b) Wiirumiha onananariha hai murecele wa muloko?

⁷ Olelo, achu ancipale annooniherya wiirumiha woopahula. Ikwaha sincipale wiirumiha oneeca ni nthalu. Liivuru mmoha onathariha nthalu ntoko “muupuwelo woonanara ntakhara achu a nloko nikina” ni ntoko “muupuwelo wawi achu a maloko oohiyana ta makhalelo ni mavyakelo oohiyana, yeerihaka wi maloko makina ekhale a vasulu waapwaha akina.” Wiirumiha nthowa na nloko ennatannya owanawana, ikhoco ophiyerya wiiphana.

⁸ Moohikhwa minikwa, ichu seiha hasinaphwanela opaka makupa a muloko Weekiristu. Naamwi hiiha, ohiiwanana variyari va achu a mmulokoni yoowo ikwaha ikina onarweela wa wiirumiha, onanwerya okhala otokweene. Eyo yaaheereya ni Akiristu akina a nsana noopacerya yaawo Yaakopo aarepenleiye makoho ala: “Ikhocho sinarwela wowi? Wakhulana onarwela wowi mwa nyuwo?” (Yak. 4:1) Aai, moonelo wa mpuwa wa wiisoona okhala a vasulu onnooniheryeya mmasu ni saweera, ekumiheryaka wiicela otokweene wa akina. (Masi. 12:18) Mweeparipari, wiirumiha onnananariha murecele mmulokoni.

 9. Piipiliya onanikhaviherya hai osepa nthalu ni mikhalelo soothene sa wiirumiha woohiphwanelela? (Moone eruku yoopacerya.)

⁹ Wakhala wi nookhalano mathitimanelo a wiisoona okhala awaapwaha akina, nnaphwanela wuupuwela wi “Apwiya hanàsivela mutxhu awisona.” (Masi. 16:5, BNM) Ti yaphaama tho waalikhela moonelo ahu vooloca sa achu a nloko naari nihimo nikina. Wakhala wi nookhalano moonelo wa wiirumiha nthowa na nloko, hanneemererya wi Muluku “ni mmoha ápachusha maloko othene a atchu.” (Saw. 17:26) Mmukhalelo yoowo, nrivo nloko nimoharu ntakhara achu oothene arino nikholo nimoha, Aatamu. Mwawiihiiha, tahi yoophwanela weemererya wi maloko makina ta vasulu naari wi toohichuneya. Muupuwelo yoola muraakho Satana onaphariheleiye wi ananarihe wiiwanana ni osivela wahu Weekiristu. (Yoh. 13:35) Wi niwane ni Satana ni omvootha, nnaphwanela osepa mukhalelo woothene wa wiirumiha woohiphwanelela.​—Masi. 16:18.

OSEPA WIITHUKUMANYERYA NI OSIVELA ELAPO

10, 11. (a) Ntakhara heeni ti wookhweya osivela elapo? (b) Tema oonihenrye hai osivela elapo?

¹⁰ Satana “mutokwene a elapo ela ya vathi,” nave elapo enakona mmatani mwawe. (Yoh. 12:31; 1 Yoh. 5:19) Mwawiihiiha, ichu sincipale inaphwanyeya mweelaponi ti soohiyana ni malakiheryo a Piipiliya. Nto, tahi wi ichu soothene sa mweelaponi ti soonanara. Nyenya, nnaphwanela osuwela wi Satana onnapharihela elapo awe wi ananarihe soochuna sahu ni weererya oneeriha opaka yoocheka naari osivela elapo ni onicuwaliha malapelo ahu wa Yehova.​—Mwaalakhanye 1 Yohane 2:15, 16.

¹¹ Osivela elapo waahaavolowela Akiristu akina a nsana noopacerya. Ntoko yootakiherya, Paulo aarepa: “Dema ókihiya, asivela elapo ela ya vathi.” (2 Tim. 4:9) Piipiliya hanaloca mukhalelo taani wa elapo Tema aasiveleiye, emweerihaka omuhiya Paulo. Akhweya Tema aasivela ichu soomwiilini ohiya muhakhu woomunepani. Wakhala wi ti hiiha, Tema aayeleela ikari soomunepani​—nave aarino mphurelo taani? Apwanne elapo yaahaala omvaha echu yaahaala ovirelela mareeliho yaawo Yehova aahaaleiye omvaha ntoko mukhaviheryi a Paulo?​—Masi. 10:22.

12. Mmikhalelo taani naahaalaahu omorela mu “owoka wa muhakhu”?

¹² Emohamoha enanwerya weereya ni hiyo. Ntoko Akiristu nookhalano nchuno na wiivakulela ni ovakulela emusi ahu. (1 Tim. 5:8) Yehova onachuna wi nikhaleno okumi waphaama​—eyo ennooneya vaavaa nnathokororyaahu ichu saphaama seiyo owo aamvanheiye Aatamu ni Haava. (Map. 2:9) Nyenya Satana onanwerya onanariha soochuna sahu ni “owoka wa muhakhu.” (Mat. 13:22) Ancipale anuupuwela wi ikhorowa inahaala waavaha ohakalala naari wi wiithukumanyerya soomwiilini onnakhaviherya okhumelela phaama. Muupuwelo yoowo ti woowoka, nave onanwerya oniyeleeliha muhakhu wa esisapo etokweene nryaahuno​—onthamwene ahu ni Yehova. Yesu aahaalopola oomuchara awe: “Hávovo mutchu anawerye okhala kapuro a apwiya awe eli: vawi akhweya anarwa-amwicha mmoha owo, ni osivela mukina owo; akhweya anarwa-ákelela wa mmoha, avevula mukina owo. Hamuwerya okhala kapuro a Muluku ni a Muhakhu.” (Mat. 6:24) Wakhala wi ninnaavya vancipale Muhakhu, nnahaala ohiya omulapela Yehova, nave ti yeeyo Satana onachuneiye wi neere! Niheemererye wi ikhorowa naari ichu inathummwa ni ikhorowa inanarihe onthamwene ahu ni Yehova. Wi niwane ni Satana, nnaphwanela okhalano moonelo woophimelela vooloca sa ichu soomwiilini.​—Mwaalakhanye 1 Timoteo 6:6-10.

MUSEPE MARARUWO

13. Elapo ela enavuwiha hai moonelo woonanara vooloca sa othela ni okonihana?

¹³ Muraakho mukina wa elapo ya Satana mararuwo. Olelo, achu anoona ororomeleya mu othela okhala ntoko ti woovireliwa. Ntoko yootakiherya, mulipa a mathatelo aaloca: “Ohaaceya tahi wooweryeya wa alopwana ni athiyana. Nkimusuwenle muchu mmoharu mano yoowo ori oororomeleya naari onachuna.” Mulipa a mathatelo mukina aaloca: “Nkinasuwela waakhanle wi ti wa muyareriwo ahu okhala ni muchu mmoha mu okumi ahu woothene.” Satana onnahakalala vaavaa onaweeriheiye achu onanariha yamahala ya Muluku ya othela. Satana haanono nchuno na okhaviherya othela naari woona oyaaka vahoolo. Wi niwane ni Satana ni omvootha, nnaphwanela ocicimiha marehereryo a Muluku a othela.

14, 15. Nnii nsepe hai okonihana woohiphwanelela?

¹⁴ Moohipwacha waakhanle wi noothela naari hooye, nnaphwanela osepa makhalelo oothene a okonihana woohiphwanelela. Apwanne eyo ti yookhweya? Hooye! Waakhanle wi nyuwaano mwa mmiravo, akhweya munnawiiwa asinthamwene anyu a oxikola elocaka sa okonihana naari sexting meerelo yaawo mmapuro makina, anooniwa wi analikana ni okawa iruku sa epwitikiri sa anamwane. Piipiliya onii: “Òrope [mulipa ooraruwa] anatchekela mwíli awe wa yowo mekhiye.” (1 Akor. 6:18) Onnakhumelela ohooxeya ni okhwa yoowo onarweela wa omwaramwaxeya wa ireca sinaraviwa mu okonihana. Nave amiravo ancipale yaawo ayelenle omwali aya annaloca wi aakhalano ekeerelani nthowa na yeeyo yenraaya. Eparipari vooloca sa okonihana woohiphwanelela ti yoohiyana ni yeeyo enavuwihiwa mmathatelo, echunaka oneeriha wuupuwela wi ochekela malamulo a Muluku hiwaano sookhumelela sawoopiha. Muupuwelo yoowo onnaweeriha achu omorela mu “ophyaka wa sotcheka.”​—Ahe. 3:13.

¹⁵ akhala wi munnawana ni yaweeha ya opaka mararuwo, tiheeni munaphwanelaanyu weera? Musuwele sooceecheya sanyu. (Arom. 7:22, 23) Mvekele wa Muluku mvekaka ikuru. (Afil. 4:6, 7, 13) Musepe mikhalelo saahaala oweerihaani opaka mararuwo. (Masi. 22:3) Nave vaavaa yaweeha enakhumelelaaya, mukhooce mwawaakuveya.​—Map. 39:12.

16. Yesu aakhulenle hai yaweeha ya Satana, nave tiheeni nnaweryaahu ohuserya orweela wa yootakiherya yeeyo?

¹⁶ Yesu ootikitherya yootakiherya yaphaama ya okhooca saweeha. Owo haalekechen’ye ni soovaha sa Satana, nave haamalinhe elukuluku uupuwelelaka. Ohiya yeeyo, owo aahaakhula mwawaakuveya ni masu ala: “Wórepiwa.” (Mwaalakhanye Mateyu 4:4-10.) Yesu aasuwela Masu a Muluku, nave eyo yaamukhaviherya weeravo echu mwawaakuveya ni oromola soorepa variyari va yaweeha. Wi niwane ni Satana ni omvootha, hannaphwanela weemererya weehiwa wa opaka mararuwo.​—1 Akor. 6:9, 10.

MVOOTHE MOORWEELA WA OVILELA

17, 18. (a) Miraakho taani Satana onaphariheleiye, nave ntakhara heeni eyo henantikhiniha? (b) Tiheeni Satana onaweheryeiye, nave eyo enoolipihaani hai ovilela?

¹⁷ Wiirumiha, wiithukumanyerya, ni mararuwo miraakho miraru seiyo Satana onaphariheleiye. Sookhalavo miraakho mikina. Ntoko yootakiherya, Akiristu akina anniiciwa ni achu a veemusini, ophuciwa ni asinthamwene a oxikola, owatiihiwa olaleerya ni alamuleli. Makacamiho yaala hanantikhiniha, ntakhara wi Yesu aahaalopola oomuchara awe: “Nave enarwa-yicha nyuwo atchu othene ntakhara a nsina naka; nyenya yowo óvilela ophiyerya makutchuwelo, yola anarwa-avulushiwa.”​—Mat. 10:22.

¹⁸ Nnii niwane hai ni Satana ni omvootha? Yesu aaloca wa oohuserya awe: “Munarwa-mukhalano okumi anyu mwivilelelo.” (Luka 21:19) Hiyaavo echu muchu onaneereleiye enahaala onipahula okhala wookhala. Haavo onahaala owerya omaliha onthamwene ahu ni Muluku waahikhala wi noheemererya wi eyo yeereye. (Arom. 8:38, 39) Okhwa wa alapeli a Yehova honamvaha Satana ovootha, woona wi Yehova onahaala waaviiha mookhwani! (Yoh. 5:28, 29) Moohiyana, Satana haano ewehereryo. Emanle otoloxiwa elapo awe yoonanara, Satana onahaala owaleliwa mu iyaakha 1.000. (Yaw. 20:1-3) Omakuchuwelo wa Olamulelo wa Yesu wa Iyaakha Ekonto, Satana taneereiye “ataphuliwe mu kariposo mwawe” mweelukuluku vakhaani wi aweehe achu oophaameya. (Yaw. 20:7-10) Satana onaweherya okhwa, nyenya eyo heni yeereye ni nyuwo! Mukhome ni Satana, oothipeleya mu nroromelo. Munanwerya owana ni Satana ni omvootha!