Awo “Yáhóna” Ichu sa Malakano

“Ehákhelaru malakano, nyenya yáhóna ni wulumano vachaichai, yemyeryerya wi ti alecho ni óhaya velaponi.”​—AHE. 11:13.

MUNANWERYA OTHARIHA?

Mavyakelo taani Yehova onivanheiye anakhaviherya nroromelo?

Nnasuwela hai wi alopwana ni athiyana oororomeleya aromoliwe mu Piipiliya yaanawerya omwaanyiherya phatamari aya?

Ntakhara heeni wuupuwelela ewehereryo ahu ti ya mphurelo?

 1. Mphurelo taani nnaweryaahu okhalano moorweela wa mavyakelo a owerya woona ichu nlelo sihooniwe? (Moone eruku yoopacerya.)

MAVYAKELO a owerya waanyiherya ichu nihonnaahu yamahala ya Muluku. Eyo ennanikhaviherya opaka marehereryo mwa miruku ni owehererya ichu saphaama. Yehova onnawerya woona ichu sa omwaahiyu, nave mu Soorepa, owo onnanleela yeeyo enahaala weereya muhoolo. Mwawiihiiha ninnawerya waanyiherya yeeyo enahaala weereya. Chiryene mavyakelo ahu a owerya waanyiherya ichu soohooneya ennanikhaviherya wooniherya nroromelo.​—2 Akor. 4:18.

2, 3. (a) Ntakhara heeni mathipelo a yeeyo nnaanyiheryaahu toochuneya? (b) Makoho taani nnahaalaahu othokororya mmwaha yoola?

² Tahi wi ikwaha soothene echu ya waanyiherya enathipeleya mu eparipari. Ntoko yootakiherya, wakhala wi mwaana onnaanyiherya avavaka awenle nikuruthu, eyo tahi yeeparipari. Nyenya Aana aakhalano mathipelo vaavaa aamaliheiye elukuluku aanyiheryaka mukhalelo mwanawe Samuwele aahaaleiye orumeela mu empa ya Muluku. Yaathipeleya mu yeeyo aalakelenleiye weera, nave eyo yaamukhaviherya wuumelela yoolakelela awe. (1 Sam. 1:22) Wakhala wi ninnaanyiherya yeeyo Muluku ororomelinheiye, nnaanyiherya echu yeeyo chiryene enahaala weereya.​—2 Pet. 1:19-21.

³ Moohikhwa minikwa, achu ancipale oororomeleya akhalai, yaanaanyiherya ichu Muluku aaroromelinheiye. Mano yaaphunre hai? Nave ntakhara heeni enahaala okhala ya mphurelo wa hiyo wuupuwelela ichu sootikhiniha seiyo Muluku aaroromelinheiye achu a wiiwelela?

OOLIPIHEYA MOORWEELA WA ‘WÓNA’ EWEHERERYO AYA

 4. Mathipelo taani Haavele aareiyeno a waanyiherya omwaahiyu?

⁴ Apwanne Haavele muchu oopacerya ororomeleya ‘áhóna’ yeeyo Yehova aaroromelinheiye? Henawerya olociwa wi Haavele aasuwela saweereya soomwaahiyu sa yooloherya ya Muluku yawi: “Kinan’witxaniha weyano ni muthiyana, ni kinamwitxanihatho nloko nà ni nloko nawe. Nloko nenlo nnamòphoreiha muru, weyano wavyaka omuluma nsitxa.” (Map. 3:14, 15, BNM) Naamwi hiiha, Haavele aahuupuwelela yooloherya yeeyo nave aaphiyerya osuwela wi ookhala aahaala ‘olummwa nsitxa’ wi achu ekookiheryiwe ophaameya ntoko yoowo Aatamu ni Haava yaaryaayano ehaakumve ocheka. Moohipwacha waakhanle wi Haavele aahaanyiherya omwaahiyu, owo aakhalano nroromelo noothipeleya mu yoororomeliha ya Muluku, mwawiihiiha Yehova aaheemererya mukucho awe.​—Mwaalakhanye Mapacereryo 4:3-5; Ahepri 11:4.

 5. Waanyiherya sa omwaahiyu waamukhavihenrye hai Enoki?

⁵ Enoki aakhalano nroromelo, naamwi aakhala variyari va achu oonanara yaawo yaamunyemula Muluku. Enoki aaveereliwa ti Muluku oloherya wi Yehova aahaala orwa “ni awéla awe, masanaru nsana nimoha, orwa-wathoriha othene, ni waványa othene yawo ehinathamalela, va miteko aya yothene yohithamalela, yeyo yénraya mohithamalela, ni va solipa hiho alipa-otcheka óhithamalela yámulochenlaya.” (Yuda 14, 15) Ntoko mulopwana a nroromelo, Enoki aanawerya waanyiherya elapo ehirino onanara woothene.​—Mwaalakhanye Ahepri 11:5, 6.

 6. Tiheeni Noowa aakhapelenleiye mmupuweloni emanle Maahi Mancipale?

⁶ Noowa aavuluwa mu Maahi Mancipale nthowa na nroromelo nawe. (Ahe. 11:7) Emanle Maahi Mancipale, nroromelo naamweeriha ovaha mikucho sa axinama. (Map. 8:20) Moolikana ni Haavele, owo tho aakhalano nroromelo wi moovira wa elukuluku achu yaahaala woopoliwa mu ocheka ni okhwa. Vaavaa yaaphiyalaaya elukuluku yeeyo Nimuroti enreiye moovanyihana ni Yehova, Noowa nlelo aakhalano nroromelo ni ewehereryo. (Map. 10:8-12) Moohikhwa minikwa, owo aanahakalala vaavaa aanyiheryeiye elukuluku yeeyo achu anahaalaaya otaphuwa mu olamulelo woohooxa, yoocheka ni okhwa. Hiyaano tho nnanwerya ‘wóna’ elukuluku yeeyo yootikhiniha​—nave eyo eri vakhiviru!​—Arom. 6:23.

‘WÓNA’ WAAKHWANELA WA MALAKANO

 7. Omwaahiyu taani Aaparahamu, Isaaki ni Yaakopo yaaweryaaya ‘wóna’?

⁷ Aaparahamu, Isaaki ni Yaakopo yaanaanyiherya omwaahiyu woona wi Muluku aaroromeliha wi maloko oothene a veelaponi ya vathi yaahaala oreelihiwa moorweela wa evyo aya. (Map. 22:18; 26:4; 28:14) Anamwane a makholo yaala yaahaala okhala ancipale nave yaahala okhalaka mu Elapo ya Nlakano yeeyo Muluku aahaaleiye waavaha. (Map. 15:5-7) Ni nroromelo, alopwana yaala yaanawerya ‘owóna’ anamwane aya eri mu elapo yeeyo. Mmwaha yoowo, ovinyerya vaavaa achu yaayelenlaaya ophaameya, Yehova onnaaroromeliha wi mareeliho yaawo Aatamu oyeleenleiye harimenle okhala wookhala.

 8. Tiheeni yaamukhavihenrye Aaparahamu okhalano nroromelo?

⁸ Ti yawooneya wi mavyakelo a Aaparahamu a waanyiherya yeeyo Muluku aaroromelinheiye yaamweeriha opaka miteko mitokweene sa nroromelo. Soorepa sinnooniherya wi naamwi Aaparahamu ni alapeli akina oororomeleya a Muluku ‘hiyákhenle malakano’ moovira wa elukuluku, “yáhóna ni wulumano vachaichai.” (Mwaalakhanye Ahebri 11:8-13.) Aaparahamu aakhalano sawooniherya sa yeeyo aaroromeleiye akhalaka ntoko aanoona yeeyo yaaheeren’ye!

 9. Nroromelo naamukhavihenrye hai Aaparahamu?

⁹ Aaparahamu ororomela wawe malakano a Muluku yaahaaceererya olakelela wawe weerano yoochuna ya Yehova. Nthowa na nroromelo aakhuma o Ur nave aakhooca omaka mu ipooma sa Kaanani. Moolikana ni Ur, ipooma iho hisaarino mathipelo eeparipari nthowa na onanara wa alamuleli aya. (Yos. 24:2) Mweekumi awe yoothene, Aaparahamu “táweheryeryiye muchetche wokhalano mathipelo, khachiri aya ni mulipa-otekáya ti Muluku.” (Ahe. 11:10) Aaparahamu aahaanyiherya akhalaka mweelapo elamuleliwaka ni Yehova. Haavele, Enoki, Noowa, Aaparahamu ni akina yaanaroromela oviihiwa wa alipa ookhwa nave yaanaweherya okhala mweelaponi ya vathi, “muchetche wokhalano mathipelo” eeparipari elamuleliwaka ni Omwene wa Muluku. Wuupuwelela mareeliho yaala yaanalipiha nroromelo naya wa Yehova.​—Mwaalakhanye Ahepri 11:15, 16.

10. Moonelo wa Saara vooloca sa omwaahiyu waamukhavihenrye hai?

¹⁰ Mmuthokororye Saara, mwaara a Aaparahamu. Vaavaa aareiyeno iyaakha 90 nlelo ahirino mwaana, moonelo awe waphaama vooloca sa omwaahiyu, waamukhaviherya wooniherya nroromelo. Owo aahaanyiherya evyo awe epuhaka mareeliho Yehova aaroromelinheiye. (Ahe. 11:11, 12) Tiheeni yaamweerinhe okhalano ewehereryo yeeyo? Yehova aaloca wa iyawe: “Kinammurèliha Sara, onamukhala mai a maloko nave mwa yowo anamukhumamo mamwene.” (Map. 17:16, BNM) Saara amanle omuyara Isaaki, owo aakhalano mathowa a ororomela wi malakano makina Muluku aapankeiye ni Aaparahamu yaahaala waakhwanela. Yamahala etokweene nryaahu ya owerya waanyiherya ichu seiyo Muluku ororomelinheiye nave inahaala weereya chiryene!

ONWEHERYA PHATAMARI

11, 12. Moose annuwinhe hai osivela wa Yehova?

¹¹ Moose muchu mukina yoowo oonihenrye nroromelo wa Yehova moorweela wa wunnuwiha osivela wa yoowo. Vaavaa Moose aareiye mmirano akhalaka mu echoko ya Muyiikuputu, yaahaala okhala wookhweya osivela muhakhu. Moorweela wa asitiithi awe, Moose aahuserya sa Yehova ni yoochuna Awe ya owoopola Ahepri wookapuroni ni waavaha Elapo ya Nlakano. (Map. 13:14, 15; Muk. 2:5-10) Woona wi Moose aanaanyiherya mareeliho oomwaahiyu wa achu a Muluku, munoona wi tiheeni yaahaala wunnuwa mmurimani mwawe? Apwanne waahaala okhala ochuna ovuwa naari omusivela Yehova?

¹² Soorepa sinnaloca: “Ni nroromelo Mose, annuwale tákhonchiye weriwa mwanawe a mwana mwamuthiana a Fareo; athanla wereliwa sonanara vamoha ni atchu a Muluku, ahikhwelaru sohakalaliha sa sonanara nari vakhani mano; álakhanyerya munyemu wa Kristu wi muhakhu wopwaha marérelo a Aigupto; ntakhara áweheryerya yokokiherya ya phatamari.”​—Ahe. 11:24-26.

13. Moose aaphunre hai moorweela wa wuupuwelela mwawiiseela yeeyo Muluku aaroromelinheiye?

¹³ Vaavaa Moose uupuweleleiye mwawiiseela yeeyo Yehova aaroromelinheiye oweerela Aisarayeli, nroromelo ni omusivela wawe Muluku waanunnuwa. Moolikana ni alopwana akina oomoova Muluku, owo tho aanawerya waanyiherya elukuluku Yehova onahaaleiye owoopola achu mu okhwa. (Yupu 14:14, 15; Ahe. 11:17-19) Tahi yootikhiniha wi Moose aakuxeya murima omusivela Muluku yoowo aamoriwa ikharari ni Ahepri ni achu oothene. Nroromelo ni osivela waamukhaviherya Moose mu okumi awe woothene. (Malam. 6:4, 5) Vaavaa Farawo aamoopopinheiye omwiipha, nroromelo, ni omusivela Muluku saamukhaviherya Moose okhala oolipa murima.​—Muk. 10:28, 29.

WAANYIHERYA MAREELIHO A OMWENE

14. Muupuwelo taani ori watheru?

¹⁴ Achu ancipale olelo anaanyiherya ichu soohikhala seeparipari vooloca sa omwaahiyu. Naamwi ehirino ichu sincipale soomwiilini nave okumi ori woosareya ni “weteteya,” awo annaanyiherya eri ooreela ni awoopowa. (Sal. 90:10) Awo annaanyiherya ehirino sawuukhula elamuleliwaka ni achu, nyenya Piipiliya onooniherya wi Omwene wa Muluku tonavaha ewehereryo yeeparipari. (Tan. 2:44) Ancipale anuupuwela wi Muluku hanii atoloxe mukhalelo ola wa ichu, nyenya Piipiliya onaloca moohiyana. (Sof. 1:18; 1 Yoh. 2:15-17) Soowehererya seiya sa yaale ahinapwacha yoochuna ya Yehova ti satheru.

15. (a) Akiristu anaphura hai moorweela wa wuupuwelela ewehereryo aya? (b) Muloce echu munaweheryaanyu vaavaa Muluku oneereiye akhwaaniherya malakano awe.

¹⁵ Moohiyana, ntoko Akiristu ninnaceenyeryiwa wuupuwelela ewehereryo ahu, moohipwacha yaakhanle ya wirimu naari ya veelaponi ya vathi. Munnawerya wiisaanyiherya mpuhaka ichu seiyo Muluku ororomelinheiye? Wuupuwelela yeeyo munahaalaanyu weera vaavaa Muluku oneereiye aakhwaniherye malakano awe, moohikhwa minikwa ennahakalaliha murima anyu. Akhweya ‘munnisóna’ mukhalaka veelaponi ya vathi okhala wookhala. Muupuwele sa olapa ni akina mweerihaka wi elapo yoothene ekhale parataiso. Amwaacamani anyu emusivelaka Yehova, hiiha ntoko nyuwo. Murino ekumi yaphaama, ikuru ni miruku. Yaale anahoolela muteko wa oreherya ehakalalihaka okumi anyu. Munnasiveliwa opharihela mavyakelo anyu nthowa nawi soothene munapakaanyu sinnaakhaviherya akina nave sinnamucicimiha Muluku. Mwaanyiherye mmukhaviheryaka muchu ooviihiwa mookhwani ohuserya sa Yehova. (Yoh. 17:3; Saw. 24:15) Ela tahi oloha, hooye. Waanyiherya ola onathipeleya mu iparipari sa mu Soorepa vooloca sa omwaahiyu.​—Yes. 11:9; 25:8; 33:24; 35:5-7; 65:22.

NTAKHARA HEENI OLOCA SA EWEHERERYO AHU?

16, 17. Nnaphura hai moorweela wa oloca sa ewehereryo ahu?

¹⁶ Vaavaa nnalocaahu ni Akiristu akina sa yeeyo nnachunaahu weera Yehova amala waakhwaniherya malakano awe, sawaanyiherya sahu sa omwaahiyu sinnakhala seeparipari. Naamwi haavo mmoha a hiyo onawerya osuwela phaama mukhalelo ahu mu elapo yahiihaano, vaavaa nnalocaahu muupuwelo ahu, ninnalipiheya nave ninnooniherya nroromelo nahu wi yeeyo Muluku ororomelinheiye ti yeeparipari. Vaavaa murummwa Paulo aaxekunryeiye anna awe a Roma, awo yaathamalela olipihana “vamoha,” eyo tho ti yoochuneya mweelukuluku yeela yoovila okhala.​—Arom. 1:11, 12.

¹⁷ Waanyiherya tho omwaahiyu onahaala onikhaviherya ovootha moonelo woonanara vooloca sa makacamiho amutano. Murummwa Petro aakhalano wuukhuwa yoowo vaavaa aalonceiye ni Yesu: “Onani, hiyo náhiya sothene ni otchara Nyuwo; nki vano n’narwa-nikhala ni sheni?” Amukhaviheryaka Petro ni arummwa akina wuupuwelela omwaahiyu, Yesu aahaakhula: “Tchiri kinalocha wa nyuwo, wi yenyu mwákitchanre Miyo, mu oyariwa’tho, Mwana a mutchu aniriye arwe-akilathi va munyukhuni mtokotoko wa nchichimiho nawe, nyuwo’tho munarwa-mukilathi va minyukhuni mitokotoko khumi na mili, othoriha maloko khumi na meli a Israyeli. Nave othene yawo yáhiyale ipa, nari anna, nari arokora, nari atithi, nari amai, nari anamwane, nari imacha, ntakhara a nsina naka, enarwa-yakhela sokokiheryiwa sinchipale sene, nave enarwa-evolowa okumi wohimala.” (Mat. 19:27-29) Mwawiihiiha Petro ni oohuserya akina yaanawerya wuupuwelela muteko aya mu omwene yoowo onahaala olamulela elapo yavathi ni waareeliha achu awiiwelela.

18. Wuupuwelela waakhwanela wa malakano a Muluku onanikhaviherya hai olelo?

¹⁸ Alapeli a Yehova annaphura moorweela wa wuupuwelela waakhwanela wa malakano a Muluku. Haavele aasuwela soochuna sa Muluku wi aanyiherye sa omwaahiyu, okhalano nroromelo ni ewehereryo yeeparipari. Aaparahamu aapaka miteko sa nroromelo nthowa nawi ‘ahóna’ echu vooloca sa waakhwanela wa yooloherya ya Muluku ya “nloko.” (Map. 3:15, BNM) Moose “áweheryerya yokokiherya ya phatamari,” ooniheryaka nroromelo nave annuwihaka omusivela wawe Yehova. (Ahe. 11:26) Nroromelo ni omusivela wahu Muluku onahaala waaceereryeya vaavaa nnapharihelaahu mavyakelo a waanyiherya waakhwanela wa yeeyo Yehova ororomelinheiye. Mwaha onacharela onahaala othokororya mukhalelo wa opharihela phaama yamahala yeela yoorweela wa Muluku.