Munepa Onnahelela Onamoona wi na Anamwane a Muluku

“Ti munepa ene yowo onahelela onamona munepa ahu wi hiyo nri anamwane a Muluku.”—AROMA 8:16.

MACIPO: 109, 108

SOOREPA SEIYA SINANIHUSIHA EHEENI VOOLOCA SA MUKHALELO AKINA ANATHANLIWAAYA?

2 Korinto 1:21, 22; 2 Pedro 1:10, 11

Aroma 8:15, 16; 1 Yohani 2:20, 27

1-3. Tiheeni yeerinhe wi Pentekoste nikhale nihiku navameekhaaya, nave ti mwawiihai yaweereya eyo yaakhwaanihenryaya yeeyo yaaloheryiwe mu Soorempwa? (Moone eruku yoopacerya.)

WAARI woosiselo wa nihiku namurunku o Yerusalemu. Nno naari nihiku navameekhaaya ni noohakalaliha. Achu yaapaka efesta ya Pentekoste, yeeyo yaari yaweereya yaweela omapacereryo wa ohaciwa wa tiriku. Woosiselo yoowo, mu empa ya Muluku, mutokweene eephepa aanavaha mukucho. Voocharela, mu ewora ya neethanu naxexe aanavaha iphaawu soohikhalano yooruruvaliha saapakiwa ni soolepula soopacerya sa tiriku. Mutokweene eephepa aanaveleela iphaawu wi amvahe Yehova. Eyo yaari yaweereya ya Pentekoste ya eyaakha ya 33.—Onamukutxho 23:15-20.

² Mu iyaakha soothene, mutokweene eephepa aanapaka yoovaha yeeyo. Yaweereya eyo yaasiphela echu yookhweleya yeeyo yeeren’ye mu eyaakha ya Pentekoste a 33. Eyo yeeren’ye ni oohuserya 120 a Yesu yaawo yaavekela vamoha mpa o Yerusalemu. (Saweriwa T’arummwa 1:13-15) Iyaakha masana mathanu namararu muculi, mulipa a miririmo Yoweli aaloherya yaweereya yeeyo. (Yoweli 2:28-32; Saweriwa T’arummwa 2:16-21) Tiheeni yeeren’ye yaari yookhweleyaxa?

³ Mwaalakhanye Saweriwa T’arummwa 2:2-4. Mu nihiku nenlo Muluku aahaavaha munepa awe waweela, nave awo yaathanliwa. (Saweriwa T’arummwa 1:8) Voocharela muloko mutokweene waahaarukurerya, nave oohuserya yaapacerya oloca ichu sootikhiniha seiyo awo yoonnaaya ni yiiwalaaya. Murummwa Petro aathariha yeeyo yeeren’ye ni ntakhara heeni yaaryaaya yoochuneyaxa. Aaloca wa muloko: “Murukunuse mirima, nave mutxhu ti mutxhu akhele opatiso mwa nsina na Yesu Kiristu ileveleliwe sotxheka sanyu. Hiha munan’werya wakhela mahala a Munepa Wawela.” Nihiku nenlo yaapatisiwa achu awaakhwana 3.000, nave awo tho yaahaakhela munepa waweela.— Saweriwa T’arummwa 2:37, 38, 41.

 4. (a) Ntakhara heeni ninnaphwanela othokororya yeeyo yeeren’ye mu Pentekoste? (b) Yaweereya taani ekina yeeren’ye mu nihiku nimohamoha? (Moone masu a vathi omakuchuwelo.)

⁴ Tiheeni yaasiphela mutokweene eephepa ni yeeyo yaavahiwa mu Pentekoste ori oothene? Mutokweene eephepa aamusiphela Yesu. Iphaawu saasiphela oohuserya oopacerya a Yesu. Oohuserya yaale vamoha ni yaale yaahaala othanliwa voocharela yaarwenle wa achu oohiphaameya nave aniichaniwa “milepu.” (Tiyako 1:18) Muluku onnaweemererya ntoko anamwane awe nave onnaathanla wi yalamulele ntoko Mamwene vamoha ni Yesu wirimu mu Omwene wa Muluku. (1 Pedro 2:9) Yehova onahaala opharihela Omwene awe wi aareelihe achu awiiwelela. Moohipwacha waakhanle wi ewehereryo ahu eri oya wirimu naari veelaponi yavathi, Pentekoste a eyaakha ya 33 tookhweleya wa hiyo.^[1] (Moone masu a vathi ookuchula.)

TIHEENI ENEEREYA VAAVAA MUCHU ONATHANLIWEIYE?

 5. Nnasuwela hai wi tahi wi oothene yaale yaapatisiwe hiyaakhenle eneneeryo emohamoha?

⁵ Oohuserya yaale yaari mu empa yeele heki ecuwale nihiku nenle. Mmoha ti mmoha aahaakhela echu yeeyo yaakhala ntoko nikalume va muru. Yehova aahaavaha owerya oloca ilocelo sookhopela. Hiyaarino minikwa wi yaathanliwa ni munepa waweela. (Saweriwa T’arummwa 2:6-12) Nyenya ichu seiya sootikhiniha hasineereya ni Akiristu oothene vaavaa anathanliwaaya. Ntoko yootakiherya, Piipiliya hanaloca wi echu ntoko mooro yaahaamorela achu macikhwi macikhweene o Yerusalemu yaawo yaathanliwe ohoolo waya. Awo yaathanliwe vaavaa yaapatisiwaaya. (Saweriwa T’arummwa 2:38) Ikwaha ikina, Asamariya yaathanliwa emanle opatisiwa. Nyenya, tahi wi Akiristu oothene yaathanliwe vaavaa yaapatisiwaaya. (Saweriwa T’arummwa 8:14-17) Ntoko yootakiherya Korneliyo ni achu a emusi awe yaathanliwa ehaakumve opatisiwa.—Saweriwa T’arummwa 10:44-48.

 6. Tiheeni anaakhelaaya oothanliwa oothene, nave eyo enaavolowela hai?

⁶ Chiryene, Akiristu annoona mmikhalelo soohiyana hiyana wi aathanliwa. Akina annoona mwawaakuveya wi Yehova ohaathanla. Akina anoona moovira wa elukuluku. Nyenya murummwa Paulo oothariha yeeyo eneereya wa muchu ti muchu. Owo ooloca: “Nave mwemerenryanyu, nyuwotho mòrempwa eneneryo yohisipiheya ya Munepa wa nroromeliho, munepa wawela ori nemeseryo na muhakhu wohiyeriwa.” (Éfeso 1:13, 14) Mwawiihiiha Yehova onnapharihela munepa awe waweela wi ooniherye wa Akiristu yaale aathanlileiye wi eye wirimu. Mmukhalelo yoowo munepa waweela ori “nemeseryo,” naari yawooniherya wa yaawo wi omwaahiyu anahaala okhalaka wirimu ohiya veelaponi yavathi.—Mwaalakhanye 2 Korinto 1:21, 22; 5:5.

 7. Mukiristu oothanliwa tiheeni onaphwaneleiye weera wi amwaakhele phatamari awe wirimu?

⁷ Apwanne enataphulela wi Mukiristu athanliwaru onahaala omwaakhela phatamari awe? Hooye. Owo onnasuwela wi oowompwa wi aye wirimu. Nyenya onahaala omwaakhela phatamari wakhala wi ootitelela okhala oororomeleya wa Yehova. Petro oothariha eyo mmukhalelo ola: “Vanonto asinnaka mutepeke olipiserya witxhaniwa ni othanliwa wanyu. Mwerà hiha, himurwaru mukwatxuliwa. Nave hiha munamukhweiheryiwa ovolowa momweneni wa Pwiya ni Nvulusa ahu Yesu Kristu.” (2 Pedro 1:10, 11) Mwawiihiiha Mukiristu oothanliwa ori oothene hanaphwanela weemererya wi echu vyakala emuhiihe omurumeela Yehova. Naamwi awompwe naari iichaniwe wi aye wirimu, wakhala wi hatitelenle okhala oororomeleya hani amwaakhele phatamari awe.—Ahebri 3:1; Wupulula 2:10.

MUCHU ONASUWELA HAI?

8, 9. (a) Ntakhara heeni onakhalaaya woovila wa akina wiiwexexa yeeyo eneereya vaavaa muchu onathanliweiye? (b) Muchu onasuwela hai wi oothanliwa ntakhara okumi wirimu?

⁸ Akapuro ancipale a Muluku olelo anoona okhala woovila wiiwexexa yeeyo eneereya vaavaa Muluku onamuthanleiye muchu. Onnakhala woovila woona wi awo hathanliwe. Muluku aapatunxe achu wi ekhaleke veelaponi yavathi okhala wookhala, ohiya wirimu. (Maphatxuwelo 1:28; Salumu 37:29) Nyenya Yehova onnaathanla akina wi yakhale mamwene ni alipa eephepa wirimu. Mwawiihiiha vaavaa onaathanleiye, ewehereryo ni muupuwelo aya sinnatorokeya, ewehereryo aya enakhala okumi wa wirimu.—Mwaalakhanye Éfeso 1:18.

⁹ Nyenya muchu onasuwela hai wi oothanliwa wi aye wirimu? Muthokororye yeeyo Paulo aalonceiye wa anna oothanliwa o Roma, yaawo ‘yitxhaneliwe okhala awela’ Owo aaloca wa yaawo: “Txhiri nyuwano himwakhenle Munepa wowerihani akapuro, wi mukhale wiliwili n’wovani, nto mwakhenle Munepa wawokhalihani ana a Muluku. Ti Munepa yowo nnakhuwelahuno nriki: Abbá, Tiithi. Ti munepa ene yowo onahelela onamona munepa ahu wi hiyo nri anamwene a Muluku.” (Aroma 1:7; 8:15, 16) Moorweela wa munepa waweela, Muluku onnamweeriha muchu olekecheya wi oowompwa wi alamule ntoko mwene wirimu vamoha ni Yesu.—1 Tesalónika 2:12.

10. Tiheeni 1 Yohani 2:27 onataphuleleiye vaavaa onaloceiye wi Akiristu oothanliwa hanaweherya wi muchu mukina aahusihe?

¹⁰ Yaale anaakhela nwopelo wa Muluku hanaweherya wi muchu aaleele wi aathanliwa. Yehova toonaalekecha awo. Murummwa Yohani aahaaleela Akiristu oothanliwa: “Nyuwo mùhakhela otxikitxheliwa wa awela nave mòsuwela sothesene.” Owo tho aaloca: “Wa nyuwano, otxikitxheliwa mwakhenlanyu wa yowo, onnakhala mwa nyuwo, henakhweleya wi mutxhu ohusiheni. Vano, ntoko otxiketxheliwa wawe onohusihayani ni oryaya weparipari ni wohotha, mukhale mwa yowo ntoko wohusinhayani.” (1 Yohani 2:20, 27) Akiristu oothanliwa annachuna ohusihiwa ni Yehova hiiha ntoko Akiristu akina. Nyenya awo hanaweherya wi muchu aaleele wi aathanliwa. Yehova onnapharihela ikuru sawe itokotoko wi ooniherye wa yaawo wi aathanliwa!

AWO ‘ANNAYARIWA WILIWILI’

11, 12. Mukiristu oothanliwa tiheeni oniikoheiye, nyenya tiheeni ohinakhweiye minikwa?

¹¹ Vaavaa Akiristu anathanliwaaya ni munepa waweela, annatorokeya hiiha ntoko Yesu aalonceiye awo ‘annayariwa wiliwili.’ (Yohani 3:3, 5) Owo tho aathariha: “Ohitikhine yeyo kilontxaka, wi munnakhweleya oyariwa wiliwili. Etxheku enopela enakhwelayavo, nave onniwa oruma waya, nto hosuwenle enarwayawo nari enayayawo; Ti hihatho wa othene oyariwe mwa Munepa.” (Yohani 3:7, 8) Mweeparipari, muchu ohithanliwe onakhala woovila wiiwexexa yeeyo eneereya wa muchu othanliwe.^[2]—Moone masu a vathi omakuchulo.

¹² Akhweya muchu othanliwe onamwiikoha: ‘Ntakhara heeni Yehova ookithanla ohiya omuthanla muchu mukina?’ Owo onniikoha waakhanle wi toophwanelela ntakhara murici yoowo. Nyenya hanakhwa minikwa wi Yehova oomuthanla. Opwaha yeeyo, owo onnakhalano ohakalala wawaaca nave onnathamalela vancipale yoovaha yeeyo. Oothanliwa onnoona mukhalelo mmohamoha ntoko wa murummwa Petro vaavaa aalonceiye: “Atxitximihiwe Muluku, Tithi a Apwiyahu Yesu Kristu. Yowo mwa ikharari sawe sintxipale, òn’yara wili mwa ovinya mokhwani wa Yesu Kristu wa owehererya wa ekumi, ni wa nihiyeriwo nohùtxa, naphama, nohirimela, nvitheliwanyu wirimu.” (1 Pedro 1:3, 4) Vaavaa oothanliwa onaalakhanyeiye masu yaala, hanakhwa minikwa wi Tiithi onaloca ni yoowo.

13. Ti mwawiihai muupuwelo wa muchu onatorokeyaaya vaavaa onathanliweiye ni munepa waweela, nave eyo eneeriha eheeni?

¹³ Yehova ahaakumve waawopa Akiristu wi eye wirimu, yaakhalano ewehereryo ya okhala wookhala veelaponi yavathi. Yaanaweherya elukuluku yeeyo Yehova onahaaleiye oreherya elapo yavathi okhala parataiso ni omalihavo makacamiho oothene. Akhweya yaaniisaanyiherya ewaakhelaka amusi ni asinthamwene yaawo akhwile. Yaanaweherya opaka empa ni okhala mwemmo ni waala miri nave olya sawiima saya. (Isaiya 65:21-23) Vano ntakhara heeni annapacerya wuupuwela moohiyana? Apwanne atoronke nthowa na ohooxeya? Apwanne anoona wi yaahaala okhala yoohiphwanelela okhala veelaponi yavathi naari wi hiyi ekhale oohakalala okhala veelaponi? Naari anachuna olawiha okumi wa wirimu? Hooye. Moohiyana, Muluku tonalakelela yeeyo wa yaawo. Vaavaa onaawopeiye, onnapharihela munepa awe waweela wi atoroke muupuwelo aya ni phatamari yoowo anahaalaaya omwaakhela.

14. Oothanliwa yoona hai vooloca sa okumi aya veelaponi yavathi?

¹⁴ Apwanne enataphulela wi oothanliwa annachuna okhwa? Paulo oothariha moonelo wa oothanliwa. Owo aalikanyiha mwiili aya woomuchu ntoko ‘musakala’ nave aaloca: “Hiyo nri nivano mmusakalani wa vathiva, ninnupulelatho vatokoveni, wona wi hinnakhwela oruliwa, nto nnakhwela wi yokhwa yela emiriheliwe ni ekumi.” (2 Korinto 5:4) Akiristu yaawo hanachuna okhwa. Annapuha okumi nave anachuna opharihela nihiku nri noothene wi emurumeele Yehova ni amusi ni asinthamwene aya. Moohipwacha yeeyo anapakaaya, annuupuwela yeeyo Muluku aaroromelinheiye vooloca sa omwaahiyu.—1 Korinto 15:53; 2 Pedro 1:4; 1 Yohani 3:2, 3; Wupulula 20:6.

APWANNE YEHOVA OHOOTHANLAANI?

15. Tiheeni enooniherya wi muchu hathanliwe ni munepa waweela?

¹⁵ Akhweya munniikoha waakhanle wi Yehova ohoothanlaani wi muye wirimu. Wakhala wi munoona wi munnaphwanela, muupuwelele phaama makoho ala anacharela: Munoona wi mookhalano mvai mmuteko woolaleerya? Munnasiveliwa omuhuserya Piipiliya ni ohuserya “mpuwa mwenesa mwa Muluku”? (1 Korinto 2:10) Munoona wi Yehova onnoovahaani yookhumelela yaphaama mmuteko anyu woolaleerya? Munnachuna opaka yeeyo Yehova onachuneiye opwaha echu ekina? Mookhalano osivela otokweene ntakhara akina nave munnoona wi mookhalano murici mutokweene wa waakhaviherya omurumeela Yehova? Mookhalano sawooniherya wi Yehova onnookhaviheryani mmakhalelo oohiyanahiyana a okumi? Waakhanle wi naakhulo nanyu ti aai, apwanne enataphulela wi moothanliwa wi muye wirimu? Hooye. Ntakhara heeni? Nthowa nawi akapuro oothene a Muluku anoona mmukhalelo yoowo, moohipwacha waakhanle wi toothanliwa naari hooye. Nave moorweela wa munepa waweela, Yehova onnaavaha akapuro awe ikuru imohamoha, moohipwacha phatamari aya. Mweeparipari waakhanle wi munnakhwa minikwa wi munahaala oya wirimu, enataphulela wi himuthanliwe. Yaale athanliwe ti Yehova hanakhwa minikwa! Awo annasuwela!

16. Nnasuwela hai wi tahi wi oothene anaakhela munepa waweela annathanliwa wi eye wirimu?

¹⁶ Mpiipiliya, sookhalamo sootakiherya sa achu oororomeleya yaawo yaakhenle munepa waweela, nyenya heni eye wirimu. Yootakiherya emoha ti Yohani Mpatisi. Yesu aaloca wi haarivo muchu mutokweene ompwaha Yohani, nyenya Yesu aaloca wi Yohani hani alamulele ntoko mwene wirimu. (Mateu 11:10, 11) Tavite tho aahooleliwa ni munepa waweela. (1 Samuwele 16:13) Munepa waweela waamukhaviherya wiiwexexa ichu sawiiseela vooloca sa Yehova nave tho waamuhoolela orepa makupa a Piipiliya. (Marko 12:36) Naamwi hiiha, murummwa Petro aaloca wi Tavite ‘hawenle wirimu.’ (Saweriwa T’arummwa 2:34) Yehova aapharihela munepa awe waweela wi aavahe ikuru wi epake ichu sootikhiniha, nyenya haapharihenle wi aathanle ntakhara okumi wa wirimu. Apwanne enataphulela wi ororomeleya waya waari vakhaani woohiphiyerya wi elamulele wirimu? Hooye. Enataphulela wi Yehova onahaala waakookiherya okumi wi ekhale Mparataiso veelaponi yavathi.—Yohani 5:28, 29; Saweriwa T’arummwa 24:15.

17, 18. (a) Phatamari taani ananweheryaaya akapuro ancipale a Muluku? (b) Tiheeni nnahaalaahu othokororya mmwaha onacharela?

¹⁷ Akapuro ancipale a Muluku heeni eye wirimu. Ntoko Aaparahamu, Tavite, Yohani Mpatisi, ni akina, ophitaanyerya alopwana ni athiyana anaromoliwa Mpiipiliyani, anaweherya okhala veelaponi yavathi elukuluku yeeyo Omwene wa Muluku onahaalaaya olamulela elapo yoothene. (Ahebri 11:10) Pahiru 144.000 tanahaala olamula vamoha ni Yesu wirimu. Nyenya tho Piipiliya onnaloca sa yaale ‘ahanle’ a oothanliwa nlelo ari veelaponi yavathi mu elukuluku yeela yookuchula. (Wupulula 12:17) Mwawiihiiha ancipale a 144.000 akhwile ari wirimu.

¹⁸ Vano hanka wakhala wi muchu onaloca wi oothanliwa, ale arino ewehereryo ya okhala veelaponi yavathi anaphwanela weera eheeni? Wakhala wi muchu mmulokoni mwanyu oopacerya olya ephaawu ni owurya eviinyu, munaphwanela omukhaliha hai? Hanka wakhala wi yaale analoca wi aathanliwa annapacerya waaca? Munaphwanela okacamiheya ni yeeyo? Nnahaala othokororya makoho yaala mmwaha onacharela.

[Masu a vathi]

[Ekaaxa va epaaxina 21]

MASU ATHARIHIWE

Othanliwa ni munepa waweela: Yehova onnapharihela munepa awe waweela wi amuthanle muchu wi alamulele ni Yesu wirimu. Moorweela wa munepa waweela, Yehova onnamvaha muchu ewehereryo ya omwaahiyu, naari “nemeseryo.” Akiristu yaawo annawerya oloca wi munepa waweela ‘onnahelela onamona,’ naari onneeriha mwawooneya wi phatamari aya ori wirimu