MASU AWAACEERERYA

Mikayeli Munkeelo Mutokotoko Taani?

YOPATUXIWA yoomunepani eniichaniwa Mikayeli henaromoliwa ikwaha sincipale Mpiipiliyani. Nyenya, yoopatuxiwa ela yaaromoliwaka, enaromoliwa epharaka muteko wakuru. Mu liivuru a Taniyeli, Mikayeli onnalociwa wi onawana ni masololo ootakhala; mu ekaarata ya Yuuta, Mikayeli onavanyihana ni Satana; nave mu liivuru a Wupulula, Mikayeli onawana ni Musaserya ni masololo awe. Moorweela wa waakiha olamulelo wa Yehova ni owana ni amwiicani a Muluku, Mikayeli onakhala mwawiiwanana ni yootaphulela ya nsina nawe: “Taani Onaphwanaphwana ni Muluku?” Nyenya Mikayeli taani?

Ikwaha ikina, achu annasuweliwa ni masina meeli. Ntoko yootakiherya, nikholo Yaakopo aasuweliwa tho ni nsina nawi Isarayeli, nave murummwa Petro aasuweliwa tho ni nsina nawi Simoni. (Maphatxuwelo 49:1, 2; Mateu 10:2) Moophwanaphwana, Piipiliya onooniherya wi Mikayeli ti nsina nikina na Yesu Kiristu, nsina nawe ahaakumve orwa veelaponi yavathi ni amanle okookela wirimu. Hankooni nthokororye mathowa ari Mpiipiliyani anneeriha oloca hiihaa.

Munkeelo Mutokotoko. Masu a Muluku annaloca wi Mikayeli ti “munkelo mutokotoko,” ela enataphulela wi muhooleli a ankeelo. (Yuda 9) Nkoonani wi Mikayeli onniichaniwa tho ‘munkeelo mutokotoko.’ Moone wi Mikayeli onniichaniwa tho munkeelo mutokotoko. Ela enooniherya wi munkeelo mmoha pahiru. Muteko wa Yesu onniiwanana ni nsina nawe. Vooloca sa Yesu Kiristu aaviihiwe muukhwani 1 Tesalònika 4:16 onii: “Apwiya anene anamukhuruwa wirimu nave atxhu akwile mwa Kristu, [munkeelo mutokotoko] t’eni epatxerye ovinya mokhwani.” Moolikana, nsu na Yesu nnalociwa okhala na munkeelo mutokotoko. Vanonto, yoorepa ela enooniherya wi Yesu mwaneene tori munkeelo mutokotoko naari Mikayeli.

Muhooleli a Anakhoco. Piipiliya onaloca wi “Miguel ni ankelo awe yàwana ekhotxo ni enama yawoopiha . . . ni ankelo aya.” (Wupulula 12:7) Mwawiihiiha, Mikayeli ti Muhooleli a muloko wa anakhoco, ankeelo oororomeleya. Liivuru a Yawupulula onnamuloca tho Yesu wi ti Muhooleli a muloko wa anakhoco, ankeelo oororomeleya. (Yawupulula 19:14-16) Nave murummwa Paulo onnaloca sa “Pwiya Yesu Kristu” ni “ankelo a owerya wawe.” (2 Tesalonika 1:7) Vanonto, Piipiliya onnaloca sa Mikayeli ni “ankelo awe,” nave Yesu ni “ankelo awe.” (Mateu 13:41; 16:27; 24:31; 1 Pedro 3:22) Vawoona wi Masu a Muluku hanaloca wi sookhalawo miloko miili sa anakhoco, ankeelo oororomeleya wirimu—ti woophwanelela oloca wi Mikayeli chiryene ti Yesu Kiristu mu muteko awe wa wirimu.a

[Nsu na vathi]