Iyaakha Nsana Omwene Olamulelaka!

“Muluku a muretxele . . . okhweiheryeni mwa saphama sothene wera okhwela wawe..”​—AHEBRI 13:20, 21.

MACIPO: 136, 14

VARIYARI VA IYAAKHA 100 IVIRALE, . . .

ikaruma taani iphariheliwe wi imwaramwaxiwe michaka saphaama sa Omwene?

meerelo taani mavyaani aphariheliwe?

ovyakiha taani alaleeryi a Omwene avahiwaaya?

 1. Mutharihe ntakhara heeni olaleerya waari woochuneya wa Yesu.

YESU aanasiveliwa oloca sa Omwene wa Muluku. Vaavaa aareiye veelaponi ya vathi, owo aaloca sa Omwene ikwaha sincipale opwaha mwaha mukina. Mu olaleerya wawe, owo aaromola Omwene opwaha ikwaha 100. Chiryene, Omwene ti woochuneya wa Yesu.​—Mwaalakhanye Mateu 12:34.

 2. Achu akavi yaawiriyanne nlamulo nnaphwanyeya mu Mateu 28:19, 20, nave tiheeni enaneeriha oloca yeela?

² Amanle oviihiwa mookhwani, Yesu aahaaphiyerya achu 500 yaawo yaahaala okhala oomuchara awe. (1 Korinto 15:6) Akhweya yaari elukuluku yeeyo Yesu aavanheiye nlamulo na waalaleerya “atxhu othene.” Muteko owo hiwi okhale wookhweya.a (Moone masu a vathi.) Owo aahaaleela wi muteko wa olaleerya waahaala wiikhalelaru “ophiyerya nihiku nomaliha elapo.” Vaavaa munalaleeryaanyu michaka saphaama olelo, munnakhaviherya waakhwanela wa yooloherya yeela.​—Mateu 28:19, 20.

 3. Ichu taani raru inanikhaviherya olaleerya michaka saphaama?

³ Amanle ovaha nlamulo na olaleerya, Yesu aaloca: “Kinakhala ni nyuwo.” (Mateu 28:20) Mwawiihiiha, Yesu aahaaroromeliha oomuchara awe wi aahaala ohoolela muteko wa olaleerya ni waakhaviherya olaleerya elapo yoothene. Yehova tho ori ni hiyo. Owo onnanivaha “saphama sothene” wi anikhaviherye olaleerya. (Ahebri 13:20, 21) Mmwaha yoola, nnahaala othokororya ichu raru saphaama: (1) ikaruma nnavahiwaahu, (2) meerelo nnapharihelaahu, ni (3) ovyakiha nnaakhelaahu. Woopaceryani, hankooni nthokororye ikaruma nipharihenlaahu variyari va iyaakha 100 ivirale.

IKARUMA SINAAKHAVIHERYA ALAPELI A MULUKU OLALEERYA

 4. Ikaruma soohiyana hiyana inanikhaviherya hai mmuteko ahu wa olaleerya?

⁴ Yesu aalikanyiha michaka sa Omwene ni mmiso onaaliwa mu imaca soohiyana. (Mateu 13:18, 19) Wi arehererye echaya, namalima onnapharihela ikaruma soohiya hiyana. Moolikana, Omwene onnanivaha ikaruma wi niwerye waakhaviherya achu weemererya michaka sahu. Ikaruma ikina saaphariheliwa mu elukuluku vakhaani, nyenya ikina sinnaphariheliwa ophiyerya olelo. Nyenya soothene sinnanikhaviherya wunnuwiha mavyakelo ahu a olaleerya.

 5. Ekaarata ya onamoona yaari eheeni, nave yaaphariheliwa hai?

⁵ Mu 1933, alaleeryi yaapacerya opharihela ekaarata ya onamoona, yeeyo yaakhavihenrye ancipale olaleerya. Yaakhala ekaarata ekhaani erino muchaka wookhuveya wa Piipiliya. Yaanapakiwa ekaarata evyaani ni michaka mivyaani. Munna Erlenmeyer aarino iyaakha khumi vaavaa aapacenryeiye opharihela ekaarata ya onamoona. Owo onnathariha: “Masu oopacerya yaari: ‘Kinnoovekaani wi mwaalakhanye ekaarata ela!’ Namakhala amala waalakhanya naanamooniha yoolaleeryiwa nave naanapwahavo.”

 6. Ekaarata ya onamoona yaakhavihenrye hai?

⁶ Ekaarata ya onamoona yaanaakhaviherya alaleeryi mmikhalelo soohiyana hiyana. Ntoko yootakiherya, alaleeryi akina yaari a woovelela, naamwi hiiha yaanachuna olaleerya nyenya hiyaasuwela echu yooloca. Alaleeryi akina yaari oolipa murima. Awo yanwerya omuleela namakhala ichu soothene asuwenlaaya mweelukuluku vakhaani, nyenya yeeyo yaalocaaya hiyaari yawaakhwanela. Ekaarata ya onamoona yaahaakhaviherya alaleeryi oothene olaleerya muchaka mmukhalelo wawaakhwanela ni wookhweya.

 7. Taavi yaari makacamiho a opharihela ekaarata?

⁷ Naakhalavo tho nikacamiho. Murokora Grace Estep aaloca: “Ikwaha ikina naanakohiwa: ‘Tiheeni muchaka owo onalocaaya? Honawerya oloca wi kiwiriyane?’” Nave tho, anamakhala akina hiyaalakhanya ekaarata. Akina yaamoona waakhela ekaarata nave ewala mukhora. Akina hiyaasiveliwa ni michaka sahu, mwawiihiiha yaanaahula ekaarata ahu. Moohipwacha makacamiho, ekaarata ya onamoona yaahaakhaviherya alaleeryi waalaleerya amwaacamani aya ni osuweliwa ntoko alaleeryi a Omwene.

 8. Ekhankoonya yooruma yaaphariheliwa hai? (Moone eruku yoopacerya.)

⁸ Ekaruma ekina yeeyo yaaphariheliwe opacerya 1930 yaari ekhankoonya yooruma. Anna akina yiichana Aaroni nthowa nawi ekhankoonya ti yaaloca ohiya muchu. (Mwaalakhanye Mukwaha 4:14-16.) Wakhala wi namakhala oheemererya, mulaleeryi aanarumiha mwaha wookhuveya wa Mpiipiliyani, voocharela aanamvaha yoolaleeryiwa. Ikwaha ikina, achu oothene a emusi yaanathukumana wi ewiriyane mwaha! Mu 1934, Sociedade Torre de Vigia aapacerya opaka ikhankoonya sooruma wi iphariheliwe mu olaleerya. Anna yaakravara miyaha 92 soohiyana.

 9. Tuuvi waari mphurelo wa ekhankoonya yooruma?

⁹ Vaavaa Hillary Goslin aawiriyanneiye mwaha mmoha, aapoleya ekhankoonya emoha wi apharihele esumana yantero arumihaka michaka sa Mpiipiliya wa amwaacamani awe. Ntoko yookhumelela, achu ancipale yaaheemererya eparipari nave yaapatisiwa. Ohoolo waya, anamwane aasithiyana a Munna Goslin yaapaka makupa a Exikola ya Kiliyati nave yaakhala mamisiyonaario. Moolikana ni ekaarata ya onamoona, ekhankoonya yooruma yaanaakhaviherya alaleeryi opaceryiha ovaanela. Voocharela, moorweela wa Exikola ya Orummwa Woomuluku, Yehova onnaavyakiha achu awe wi ekhale ahusiha aphaama.

OPHARIHELA MEERELO OOTHENE A WAAPHWANYA ACHU

10, 11. Iyornali ni raatio saaphariheliwe hai wi ilaleeryiwe michaka saphaama, nave ntakhara heeni meerelo yaala yaari a mphurelo?

¹⁰ Ni ohoolela wa Mwene ahu, achu a Muluku annapharihela meerelo oohiyana hiyana wi yaaphwanye achu ancipale mmuteko wa olaleerya. Meerelo awo yaari oochuneya xaxaxa vaavaa alaleeryi yaaryaaya vakhaani. (Mwaalakhanye Mateu 9:37.) Ntoko yootakiherya, khalai iyornali saanaphariheliwa wi ilaleryiwe michaka saphaama. Esumana yoothene Munna Russell aanavonya mwaha wa Piipiliya wa marehereryo a michaka. Voocharela, marehereryo awo yaanavonya mwaha mu iyornali o Kanata, Europa ni Estatu Unitu. Ophiyerya 1913, miyaha sa Munna Russell saavonyiwa mu iyornali 2.000 nave saahaalakhanyiwa ni achu awaakhwana 15.000.000!

¹¹ Aaphariheliwa tho raatio wi ilaleeryiwe michaka saphaama. Mu 16 a Apirili a 1922, Munna Rutherford aapaka mwaha woopacerya o raatio, nave achu oophiyerya 50.000 yaawiriyana. Voocharela, naapacerya ompharihela raatio ahu iichaniwa WBBR, nave aapacenrye ophariheliwa mu 24 a Fevereru a 1924. Mulipeleli (a Ekunya) 1 a Tesempuru a 1924 aaloca: “Ninnasuwela wi raatio mukhalelo wookhweya ni wa mphurelo wa omwaramwaxa michaka sa eparipari.” Moolikana ni iyornali, raatio aanikhaviherya waaphwanya achu ancipale mmapuro yaahaariwo alaleeryi.

12. (a) Mukhalelo taani wa olaleerya onoosivelaani? (b) Tiheeni enahaala onikhaviherya ovootha woova olaleerya vanlakani?

¹² Olaleerya wa vanlakani meerelo makina anaphariheliwa olelo wi ephwanyiwe achu. Onnakhalavo wiilipixerya otokweene wi elaleeryiwe achu mmapuro a ikaaro, mapuro a vanlakani ni a maroca. Apwanne olaleerya wa vanlakani onnaweerihaani okhala awuukhuwa? Wakhala wi ti hiiha, mveke nikhaviheryo mu nivekelo nave muthokororye yeeyo elociwe ni ooweherya aweeceeca awiichaniwa Manera: “Matorokelo mavyaani a muteko nnoona ntoko mukhalelo mukina wa omurumeela Yehova, ntoko mukhalelo mukina wa wooniherya wiiwelela wahu, ntoko mukhalelo mukina wa wooniherya ororomeleya, nave naanakhala ootaphuwa omurumeela Yehova mmukhalelo vyakala aanivekeiye.” Vaavaa nnavoothaahu woova ni opharihela meerelo mavyaani a olaleerya, ninnalipiha omuroromela wahu Yehova nave ninnakhala alaleeryi aphaama.​—Mwaalakhanye 2 Korinto 12:9, 10.

13. Ntakhara heeni ompharihela site ahu mu orummwa meerelo a mphurelo, nave yaweereya taani mphwannyaanyu mmupharihelaka site?

¹³ Alaleeryi ancipale annasiveliwa waaleela achu sa site, jw.org., mwemmo anaweryaaya waalakhanya ni okumiha soolaleeryiwa sa Mpiipiliya mu ilocelo 700. Mahiku oothene achu, ncikhwi 1.6 annampharihela site ahu. Khalai raatio aanaaphwanyiha achu michaka mmapuro oorakamela. Olelo, site ahu onneera emohamoha.

WAAVYAKIHA ARUMMWA A MICHAKA SAPHAAMA

14. Ovyakiha taani alaleeryi yaachunaaya, nave exikola taani enaakhaviherya okhala alaleeryi aphaama?

¹⁴ Ikaruma ni meerelo nimanlaahu othokororya yaari a mphurelo. Nyenya, alaleeryi yaanachuna ovyakihiwa wi ekhale arummwa. Ntoko yootakiherya, ikwaha ikina namakhala heemererya yeeyo aawiriyaneiye mu ekhankoonya yooruma. Ikwaha ikina namakhala aanachuna ohuserya sincipale. Alaleeryi yaanachuna osuwela mukhalelo wa ovootha makacamiho mwaphaama ni okhala muhusiha aphaama. Akhaviheriwaka ni munepa waweela wa Muluku, Munna Knorr aahoona wi waari woochuneya alaleeryi ohuserya mukhalelo wa oloca mu orummwa. Ovinyerya 1943, miloko saapacerya okhalano Exikola ya Orummwa Woomuluku. Exikola ela ennaakhaviherya oothene okhala ahusiha aphaama.

15. (a) Akina yoonne hai vaavaa yaapakaaya mwaha mu Exikola ya Orummwa Woomuluku? (b) Yoororomeliha ya Yehova enaphwanyeya mu Salumu 32:8 yaakhwaanenle hai mwa nyuwo?

¹⁵ Anna ancipale hiyaakhovelenle oloca variyari va achu ancipale. Munna Ramu onnuupuwela mwaha awe woopacerya mu 1944. Mwaha owo waaloca sa Towexi yoowo onaromoliwa Mpiipiliya. Owo onnaloca: “Makutha aka yaanakhomana, matata aka yaanathukumela, nave miino aka yaanakirikira.” Owo onnaaceererya: “Yaari ekwaha yoopacerya oloca ohoolo, nyenya nkaahiyale.” Naamwi waari woovila, anamwane tho yaanapaka miyaha mu exikola yeela. Munna Manera onnuupuwela vaavaa mmiravo mukhaani aapankeiye mwaha awe woopacerya: “Owo aatepa wuukhuwa ophiyerya wi arikimpaceryaru aanakukuma. Nyenya alakelenle opaka mwaha, owo aakukuma ophiyerya omakuchuwelo.” Akhweya nyuwaano hamunavaha maakhulo mmithukumano nthowa na woovelela naari woona wi hamunawerya weerano. Wakhala wi ti hiiha, mumveke Yehova wi ookhaviheryeeni ovootha woova wanyu. Owo onamookhaviheryaani ntoko enreiye ni anaxikola oopacerya a Exikola ya Orummwa Woomuluku.​—Mwaalakhanye Salumu 32:8.

16. Tiivi yaari yoolakelela ya Exikola ya Kiliyati (a) khalai ni (b) oopacerya 2011?

¹⁶ Marehereryo a Muluku annavaha tho ovyakiha orweela Exikola ya Kiliyati. Yoolakelela emoha ya exikola yeela ori waakhaviherya anna olipiha nchuno naya na olaleerya michaka saphaama. Exikola ya Kiliyati epacenrye mu 1943, nave opacerya eyaakha yeeyo aavyakihiwa anna ni arokora 8.500 ni orumihiwa mu ilapo 170. Opacerya 2011, yaale anawompwa wa exikola yeela anaphitaanyerya mapiyoneero avameekhaaya, ooweherya aweeceeca, Mapetelita, naari mamisiyonaario yaawo ahaakumve ovolowa mu exikola yeela.

17. Tuuvi okhanle mphurelo wa ovyakiha wa Kiliyati?

¹⁷ Apwanne Exikola ya Kiliyati ti ya mphurelo? Aai. Muthokororye yeeyo yeeren’ye o Xapau. Mu Akostu a 1949, alaleeryi a weiwo hiyaakhwana khumi. Nyenya omakuchuwelo wa eyaakha yeele, mamisiyonaario 13 yaanalaleerya weiwo ni alaleeryi a vanipuroni. Olelo, o Xapau aakhalawo alaleeryi 216.000, nave emeya mapiyoneero!

18. Ixikola taani ikina nryaahuno?

¹⁸ Nookhalano ixikola sincipale, ntoko Exikola ya Orummwa wa Omwene, Exikola ya Muteko Woopiyoneero, Exikola ya Alaleeryi a Omwene, Exikola ya Ooweherya Ekulucu ni Asaaraya, ni Exikola ya Nikhuuru na Efiliyale ni Asaaraya. Ixikola seiya sinnaavyakiha anna ni arokora nave sinnalipiha nroromelo naya. Ti yawooneya wi Yesu onnatitelela waavyakiha achu ancipale.

19. Tiheeni Munna Russell aalonceiye sa muteko wa olaleerya, nave eyo enakhwaanela hai?

¹⁹ Omwene wa Muluku onnalamulela opwaha iyaakha 100. Variyari va elukuluku yeeyo, Mwene ahu Yesu Kiristu onnahoolela muteko wa olaleerya. Mu 1916, Munna Russell aanaroromela wi muteko wa olaleerya michaka saphaama waahaala weereya elapo yoothene. Owo aaloca: “Muteko onnaacereryeya, nave onamutitelela waaceereryeya, woona wi wookhalavo muteko mutokweene wi ilaleeryiwe ‘michaka sa omwene.’” (Faith on the March, by A. H. Macmillan, epaaxina 69) Muteko owo onneeriwano olelo! Ninnamuthamalela Yehova, Muluku a murecele nthowa na onivaha yeeyo nnachunaahu wi nipake yookhwela awe!

[Nsu na vathi]

[Ekaaxa va epaaxina 30]

MASU ATHARIHIWE

Yehova onnanivaha “saphama sothene” wi anikhaviherye mmuteko wa olaleerya. Ichu iho saphaama inaphitaanyerya ikaruma, meerelo ni ovyakiha