No öforomaʼö wa ’lö abua gölöu wanemaʼö tome’ na öfalua zi sökhi ba niha böʼö, farahu ba daʼö niha si lö ahatö khömö. (1 Fe. 4:9) So sambua kamus Zura Niʼamoniʼö sanutunö wa ira matua si lö abua gölö wanemaʼö tome yaʼia daʼö ”niha samokai bawandruhö nomonia hegöi tödönia ba wanemaʼö niha si lö faʼila khönia”. Sofu khöu samösa, ’Hadia laʼila wa yaʼodo andre niha somasi manema tome?’ (Heb. 13:​2, 16, hegöi nisura ba gahe zura.) Niha simane daʼö omasi ia mamuala, duma-dumania khö ndra talifusöda si lö ebua okhöta ba samorege fohalöwö, simane ira satua samasui mazui samaʼema huhuo moroi ba mbanua niha Keriso tanö böʼö.—1 Mo. 18:​2-8; Amd. 3:27; Hal. 16:15; Rom. 12:13. w24.11 21 ¶6

Itutunö Yesu gamaedola sanandrösa khö ndraono alawe si dafulu si möi baero ba wotemaʼö marafule. (Mat. 25:​1-4) Omasi ira fao awö marafule ba walöwania. Itutunö Yesu wa so dalima ba gotaluara ’zatua-tua’ ba so göi dalima zi ”bodo”. Iraono alawe sagatua-tua, no lafaʼanö ira ba so khöra wangelama. Labaloi marafule hewaʼae na talu mbongi awena tohare ia. No laʼohe wandrura hegöi nönö-nönö wanikha enaʼö mohola manö wandrura irege tohare marafule. (Mat. 25:​6-10) Me tohare marafule andrö, fao khönia ndraono alawe sagatua-tua weʼamöi ba walöwa. Simane daʼö göi, niha Keriso nibayoini si no mamaʼanö yaʼira ba si lö faröi irege tohare Keriso, hasambalö latema luora yaʼia daʼö fao ira mamatörö awö Yesu si tobali marafule ba zorugo.—Fam. 7:​1-3. w24.09 21 ¶6

Ba ginötö taʼila mbua moroi ba halöwö fanuriaigö ba zi sagörö ulidanö, tatu tefarou dödöda ba wondrorogö faʼowölö-ölöda ba weʼamöi manuriaigö. Ero röfi, zuta niha sangondrasi Bongi Wanörö Tödö ba lafahaʼö ira ba Zura Niʼamoniʼö. Baero daʼö, so ngaotu ribu niha nibayagö idanö ba fao ira khöda ba wanuriaigö. Lö taʼila hawaʼato nasa niha somasi mamondrongo turia somuso dödö. Hizaʼi, faduhu dödöda wa so sambua ngawawa sato niha si teʼorifi moroi ba wamakao sabölö-bölö. (Fam. 7:​9, 14) Yehowa andrö Sokhö mbasitö ba faduhu dödönia wa ato nasa niha somasi manema turia somuso dödö. Börö daʼö, tatu lö taböhöli wanuriaigö. (Luk. 10:2) Tehöngö ndra nifahaʼö Yesu börö me owölö-ölö ira ba wanuriaigö. Me laʼila niha sato waʼabarani niforomaʼö ndra sinenge Yesu ba wanuriaigö, ”aboto ba dödöra wa si fao khö Yesu mböröta” ira. (Hal. 4:13) Iadaʼa, ato göi niha sonehe-nehegö halöwö fanuriaigö nifaluada. Yaʼaboto ba dödöra ba laʼila samösa wa owölö-ölö ita wamalua fanuriaigö simane faʼowölö-ölö Yesu. w25.03 18 ¶15; 19 ¶17-18