Moroi siʼaikö ba gera-era Yesu wangomasiʼönia Yehowa. Iʼila hadia gohitö dödö Lowalangi khönia, ba no ihalö gangetula ba wamalua daʼö hewaʼae göna ia famakao. Börö me iʼosambuaʼö dödönia ba gohitö dödö Namania, lö itehegö na so zi möi famangoloi dödönia. Fetero hegöi ira sinenge tanö böʼö, tebeʼe khöra ginötö si tohude börö me tola fariawö ira khö Yesu ba lafahaʼö ira ba lala wangera-ngerania. Me isura zurania siföföna Fetero niʼehehaini Lowalangi, ibeʼe mene-mene khö ndra niha Keriso enaʼö laʼokhögö lala wangera-ngera Keriso. (1 Fe. 4:1) Ba li sindruhunia, ngawua wehede ”mifaʼanö ami” niʼogunaʼö Wetero, hulö zaradadu si no mamaʼanö yaʼia ba solohe fangöna weʼamöi fasuwö. Börö daʼö, na laʼoʼö ira niha Keriso lala wangera-ngera Yesu, hulö no lafaʼanö ira faoma fangöna sebua ba wolawa isö-isö dödö si fasala hegöi ulidanö nifatörö Zatana.—2 Ko. 10:​3-5; Ef. 6:12. w25.03 8-9 ¶1-3

Hadia zi tola mifahaʼö ami sagötö fakawa? Fatua lö itugu ebua waʼomasimi, tola mitutunö ngawalö zabölö tohude, duma-dumania sanandrösa ba gohitö dödömi zamösana. Hewisa niha si fakawa enaʼö aboto ba dödöra nawöra? Sambua lala yaʼia daʼö na faoma fahuhuo ba mitörö zindruhu khö nawömi. Anofu khönia ba haogö wamondrondrongo fanema linia. (Yak. 1:19) Te tola fao ami wamalua si sambua halöwö enaʼö aoha khömi fahuhuo. Duma-dumania, fao ami manuriaigö, fao ami manga, mazui mitörö tanö ba nahia sato niha. Tola göi miʼogunaʼö ginötö wefao khö ndra awö-awömi mazui ösi nomomi. Baero daʼö, angeragö göi wamalua halöwö sanolo yaʼugö ba wangila hewisa gamuatania ba niha böʼö mazui na tebulö zalua. w24.05 27-28 ¶6-7

Ba zi lö ara tö, tataögö ginötö sabua fanaögö ba moguna taʼodaligö Yehowa töra moroi ba zilalö. Waö-waö si so ba Zura Niʼamoniʼö hegöi si no irai alua khö ndra Samaduhuʼö Yehowa ba götöda iadaʼa sanolo yaʼita ba wonehegö hadia nifalua Yehowa ba wanolo ono mbanuania. Na öʼangerönusi daʼö, tola tetolo ndraʼugö ba wombaliʼö Yehowa tobali Gowe Saro khöu. Baero daʼö, tola itugu sökhi wameʼeu famarou dödö khö ndra talifusöda ba mbanua niha Keriso. Duma-dumania, no irai ibeʼe Yesu gamalalata döi khö Zimoni, yaʼia daʼö Kefa (na mufoʼeluaha ia ”Fetero”), eluahania ”Sambua Kara”. (Yoh. 1:42) Iwaʼö Yesu wa Fetero andrö tobali umbu wondrara dödö ba mbanua niha Keriso ba sangaʼaroʼö famati ndra talifusönia. Muʼamaedolagö göi ndra satua sokubaloi ba mbanua niha Keriso simane ”lumö hili sokara”. Eluahania, yaʼira zolumöʼö ira talifusö ba mbanua niha Keriso. (Yes. 32:2) Tatu manö so mbuania ba mbanua niha Keriso na fefu ndra talifusö laʼoʼö gamuata Yehowa si hulö gowe saro. w24.06 28 ¶10-11