”Aoha sa gölö dödö, ba no ambö faʼabölö nösi.” (Mat. 26:41b) Moroi ba wehede daʼö, iforomaʼö Yesu wa aboto ba dödönia wa lö moʼahonoa ita ba itaria tafalua zala. Hizaʼi, fehedenia göi andrö zamasugi ba dödöda enaʼö böi talafo abeʼe dödöda khöda samösa. Fatua lö iwaʼö wehede daʼö Yesu, si fao faʼafaduhu dödö lafaduhuʼö ira nifahaʼönia wa lö irai laröi ia. (Mat. 26:35) Sökhi sibai gangetula nihalöra. Hizaʼi, lö aboto ba dödöra wa tola manö alio awuwu wamatira na göna ira fanandraigö. Daʼö mbörö wa ifangelama ira Yesu simane niwaʼö ba ayati maʼökhö andre. Alimagö sibai, lö lafalua niwaʼö Yesu khöra. Me laraʼu Yesu, hadia nifalua ndra nifahaʼönia? Börö me lö mangelama ira, laröi Yesu ba lö lafalua zi no lawaʼö.—Mat. 26:56. w24.07 14 ¶1-2

Taya wahuwusara si sökhi niʼokhögö Gadamo hegöi Khawa khö Namara sotöi Yehowa. Ba zilalö, yaʼira andre ösi nomo Lowalangi. (Luk. 3:38) Hizaʼi, börö me lö khöra foloʼö, tebai saʼae tobali ira ösi nomonia. Alua daʼö fatua lö tumbu ngaʼötöra. (1 Mo. 3:​23, 24; 4:1) Börö me ngaʼötöra ita, moguna teʼatulöʼö ita khö Yehowa. (Rom. 5:​10, 11) Eluahania, moguna ifuli tafakhai wahuwusa si sökhi khönia. Moloʼö sambua referensi, ngawua wehede Yunani nifoʼeluaha tobali ”teʼatulöʼö”, tola göi mufoʼeluaha ia ”tabaliʼö awöda niha si faʼudu khöda ba zilalö”. Sahöli-höli dödöda, no iʼofönaiʼö ia Yehowa ba wangatulöʼö yaʼita khönia enaʼö tola taʼokhögö wahuwusa si sökhi. Hadia nifalua Yehowa? Ifazökhi gamakhoita fangatulö Yehowa enaʼö niha safönu horö tola ifuli laʼokhögö wahuwusa si sökhi khönia. Hewisa gamakhoita daʼö? Enaʼö ifuli taʼokhögö hadia zi no itayaigö Adamo, moguna ihenaigö Yehowa zi fagölö böli ba daʼö. Eluahania, hulö ifalua wamalali Yehowa. w25.02 4 ¶7-8

Iwaʼö Faulo wa ”no tobönö degu-tegu sabeʼe [nibeʼera] me no ato zangotuʼö niha daʼö”. (2 Ko. 2:​5-8) Eluahania, no mofozu degu-tegu nibeʼera, yaʼia daʼö ba wanolo niha sohoröni inania tiri andrö enaʼö ifalalini gera-erania. (1 Ko. 5:1; Heb. 12:11) Aefa daʼö, ibeʼe wanuturu lala daʼa Faulo ba mbanua niha Keriso ba Gorindro, ”Mibologö dödömi khönia ba mirara dödönia . . . uʼandrö khömi enaʼö faduhu dödönia wa miʼomasiʼö ia.” Omasi Waulo na lafuli latemaʼö niha daʼö tobali ösi nomo Yehowa. Hizaʼi, tenga daʼö manö. Iʼandrö göi khöra Faulo enaʼö lafaduhuʼö khö niha daʼö ba wehede, amuata hegöi nifaluara wa sindruhu-ndruhu no laʼefaʼö zalania ba laʼomasiʼö ia. Na lafalua daʼö, no laforomaʼö wa omuso dödöra me no mangawuli niha daʼö ba mbanua niha Keriso. w24.08 15 ¶4; 16-17 ¶6-8