Veveheaga 12

Totoko Atu ke he Tau Matakau Agaga Kelea

1. Fefe e aga a Iesu he magaaho ne feleveia a ia mo e tau agaga kelea?

HE MOLE laia e papatiso hana, ne fina atu a Iesu Keriso ke he tutakale a Iutaia ke liogi mo e ke manamanatu fakahokulo. Ti kua ha ha i ai ne lali e Tiapolo ko Satani ke taute a ia ke moumou e matafakatufono he Atua. Ka e, nakai talia e Iesu e page he Tiapolo mo e nakai kototia he hele hana. Kua fehagai foki a Iesu mo e falu agaga kelea he magahala he fekafekauaaga hana he lalolagi. Ka e, ke he tau magaaho loga, ne hataki mo e totoko atu a ia ki a lautolu.—Luka 4:1-13; 8:26-34; 9:37-43.

2. To manamanatu atu a tautolu ke he tau huhu fe?

² Ko e fakamaamaaga ke he tau fakamauaga he Tohi Tapu ke he tau fakafehagaiaga ia kua lata ke taute a tautolu ke tali tonu ko e ha ha i ai moli e tau matakau agaga kelea. Kua lali a lautolu ke fakahehe e tau tagata. Ka e pete ni a ia, kua maeke ia tautolu ke totoko atu ke he tau agaga kelea nei. Ka e o mai i fe e tau agaga kelea nei? Ko e ha kua lali a lautolu ke fakahehe e tau tagata? Mo e ko e heigoa e tau puhala ne fakaaoga e lautolu ke moua aki ha lautolu a tau foliaga? Ke kumikumi e tau tali ke he tau huhu pihia ha ko e mena nei ka lagomatai a koe ke totoko atu ke he tau matakau agaga kelea.

TAU AGAGA KELEA—KO E KAMATAAGA MO E FOLIA HA LAUTOLU

3. Kua hoko mai fefe a Satani ko e Tiapolo ke ha ha i ai?

³ Kua leva he taute he Atua ko Iehova e loga he tau mena momoui fakaagaga ato tufugatia e ia e tau tagata. (Iopu 38:4, 7) Tuga kua fakamaama mai he Veveheaga 6, ko e taha mai he tau agelu nei ne fakatupu e ia e manako ke tapuaki e tau tagata ki a ia ka e nakai ke tapuaki atu ki a Iehova. He tutuli atu ke he folia ia, ne totoko mo e pikopiko e agelu kelea nei ke he Tufuga, mo e kua talahau ai foki ke he fifine fakamua ko e pikopiko e Atua. Kua tonu lahi, mogoia, he eke e agaga fakafualoto nei ke iloa ko Satani (totoko) ko e Tiapolo (pikopiko).—Kenese 3:1-5; Iopu 1:6.

4. Kua hala fefe e falu he tau agelu he vaha a Noa?

⁴ Ke he magaaho fakamui, kua kau atu e falu agelu mo Satani ko e Tiapolo. He vaha he tagata tututonu ko Noa, kua tiaki he falu ia lautolu nei e fekafekauaga ha lautolu he lagi mo e fakafaliu fakatagata e tau tino ke fakamakona aki e tau manako ha lautolu ma e matutakiaga he mahani fakatane mo e fifine mo e tau fifine he lalolagi. Kua nakai fakauaua ko e fakaohooho e Satani e tau agelu nei ke liuliu. Kua takitaki atu ke eke a lautolu mo tau mamatua tane ke he fanau hafakati ne fakahigoa ai ko e tau tagata makimaki, ne kua eke ai mo tau tagata favale. He magaaho ne fakahoko e Iehova e Fakapukeaga kua mua atu, kua fakaotioti ai e tau tagata mahani kelea mo e fanau kehe nei he tau agelu liuliu. Kua hao mai ai e tau agelu fakafualoto he fakaotiotiaga he liu fakafaliu e lautolu e tau tino tagata ha lautolu mo e liliu atu ke he matakavi fakaagaga. Ka e kua taofi he Atua e tau temoni nei he hagaao ki a lautolu ke nonofo he pouligia fakaagaga. (Kenese 6:1-7, 17; Iuta 6) Ko Satani, “ko e iki he tau temoni,” mo e hana tau agelu kelea kua unu ki mua mo e ha lautolu a fakafualoto. (Luka 11:15) Ko e heigoa e folia ha lautolu?

5. Ko e heigoa e folia ha Satani mo e hana tau temoni, mo e ko e heigoa ne fakaaoga e lautolu ke hele aki e tau tagata?

⁵ Ko e folia kelea ha Satani mo e tau temoni ke fuluhi kehe e tau tagata mai he Atua ko Iehova. Ti, kua fakahehe, fakamatakutaku, mo e ekefakakelea ai e lautolu nei ne mahani kelea he tau tagata tali mai he vaha tuai he tau tagata. (Fakakiteaga 12:9) Kua fakamoli mai he tau fakafifitakiaga he vaha fou nei kua mua atu e ita he tau temoni he mogonei nakai pihia he tali mai. Ke hele ai e tau tagata, kua fa mahani e tau temoni ke fakaaoga e matutakiaga fakataulatua ke he tau lagatau oti. Maeke fefe e tau temoni ke fakaaoga e page nei, mo e maeke fefe ia koe ke puipui e koe a koe ni?

KO E PUHALA NE LALI E TAU AGAGA KELEA KE FAKAHEHE A KOE

6. Ko e heigoa e matutakiaga fakataulatua, mo e ko e heigoa e falu lagatau he mena ia?

⁶ Ko e heigoa e matutakiaga fakataulatua? Ko e putoia atu mo e tau temoni, po ke tau agaga kelea, pete ko e taute fakatonu ki ai po ke puhala atu he tagata hulalo. Kua lahi e aoga he matutakiaga fakataulatua ke he tau temoni ke tuga e aoga he page he tau tagata takafaga: Kua futiaki ai ke faiola. Ti tuga ni e tagata takafaga ne fakaaoga e tau page kehekehe ke uta aki e tau manu ki loto he hana a hele, kua fakamalolo ai he tau agaga kelea e tau lagatau kehekehe he matutakiaga fakataulatua ke tamai e tau tagata ki lalo he ha lautolu a pule. (Fakatatai Salamo 119:​110.) Ko e falu he tau lagatau nei ko e talahau tuai fakataulatua, mana, kumikumi ke he tau fakamailoga, taha taulatua, fakalatahaaga mo e tau fakamalaia, matutaki atu ke he tau hulalo, mo e kumikumi atu ki a lautolu kua mamate.

7. Kua laulahi fefe e matutakiaga fakataulatua, mo e ko e ha kua tupu ai ke he tau motu ne kua talahau ko e tau Kerisiano?

⁷ Kua gahuahua ai e page, ha kua futiaki he matutakiaga fakataulatua e tau tagata he lalolagi katoa. Ko lautolu ne nonofo he tau maga he vaouhi kua o atu ke he tau tagata tane ­taute vailakau, mo lautolu ne gahua he tau ofisa kua matutaki atu mo e tau makoi. Kua tupu lahi foki e matutakiaga fakataulatua ke he tau motu ne pehe ko e tau Kerisiano. Kua fakakite mai he kumikumiaga ke he Tau Fahi Kaufakalataha ni hokoia, kua 30 e tau mekasini kua tufatufa auloa ke molea e 10,000,000 kua fakamakutu ai ke he tau puhala kehekehe he matutakiaga fakataulatua. Ko e tau Parasili kua fakamole ai ke molea e 500 miliona tala ke he tau koloa taulatua he tau tau takitaha. Ka e, kua 80 e pasene ha lautolu ne o atu ke he tau fale taulatua ke tapuaki he motu ia ko e tau Katolika papatiso ne kua o atu foki ke he tau Mese. Ha kua fakagahuahua he falu akoako e matutakiaga fakataulatua, kua tokologa e tau tagata lotu kua manatu ko e fakagahuahuaaga he tau mena ia kua talia he Atua. Ka e pihia ka?

KO E KAKANO NE FAKAHALA HE TOHI TAPU E FAKAGAHUAHUAAGA HE MATUTAKIAGA FAKATAULATUA

8. Ko e heigoa e onoonoaga faka-Tohiaga Tapu ke he matutakiaga fakataulatua?

⁸ Kaeke kua fakaako a koe ko e falu mena he matutakiaga fakataulatua ko e tau puhala a ia ke fakalataha atu ke he tau agaga mitaki, to ofo ai a koe ka ako ke he mena ne talahau he Tohi Tapu hagaao ke he matutakiaga fakataulatua. Kua hataki ai e tau tagata ha Iehova: “Aua neke hagao atu a mutolu kia lautolu ha i ai e tau agaga talahau tuai, aua neke kumi foki e mutolu ke he tau taulātua ke kelea ai a mutolu.” (Levitika 19:31; 20:6, 27) Kua foaki mai he tohi Tohi Tapu ia Fakakiteaga e hatakiaga ko “lautolu ne putoia ke he matutakiaga fakataulatua” to fakaoti ai ke he “loloto kua vela ke he afi mo e taio, ko e mate ua [tukumalagi] haia.” (Fakakiteaga 21:8, 22:15; fakatatai NW.) Ko e tau puhala oti he matutakiaga fakataulatua kua nakai talia he Atua ko Iehova. (Teutaronome 18:​10-12) Ko e ha ne pihia ai?

9. Ko e ha kua maeke ia tautolu ke talahau fakahiku ko e tau fekau he vaha fou nei ne mai he lalolagi fakaagaga kua nakai mai ia Iehova?

⁹ Kua fakafano mai e Iehova e tau agaga mitaki, po ke tau agelu tututonu, ke matutaki mo e falu tagata ato mau e Tohi Tapu. Tali mai he mau ai, ne foaki mai he Kupu he Atua e takitakiaga ma e manako he tau tagata ke fekafekau mo e talia ki a Iehova. (2 Timoteo 3:16, 17; Heperu 1:1, 2) Kua nakai toka kehe e ia e Kupu tapu hana he foaki age e tau fekau ke he tau hulalo. Ko e tau fekau oti ne mai he lalolagi fakaagaga he vaha nei kua o mai he tau agaga kelea. Ko e fakagahuahua he matutakiaga fakataulatua kua maeke ke fakataki atu ke he ekefakakelea he tau temoni po ke hufia ke he tau agaga kelea. Ti ko e mena ia, kua hataki mo e fakaalofa mai e Atua ki a tautolu ke nakai putoia atu ke he tau fakagahuahuaaga fakataulatua. (Teutaronome 18:14; Kalatia 5:19-21) Kua mua atu foki, kaeke ke fakatumau a tautolu ke fakagahuahua e matutakiaga fakataulatua he mole e iloa e onoonoaga ha Iehova ki ai, kua kau atu ai a tautolu mo e tau agaga fakafualoto kelea mo e eke ai mo tau fi he Atua.—1 Samuela 15:23; 1 Nofoaga he Tau Patuiki 10:13, 14; Salamo 5:4.

10. Ko e heigoa e talahau tuai fakataulatua, mo e koe ha kua lata ia tautolu ke kalo kehe mai i ai?

¹⁰ Taha e lagatau talahaua he matutakiaga fakataulatua ko e talahau tuai fakataulatua​—ko e lali ke kumikumi atu hagaao ki anoiha po ke ke he tau mena nakai fa iloa ha ko e lagomatai he tau agaga. Ko e falu a lagatau he talahau tuai fakataulatua, ko e onoono ki loto he fua polo kerutali, fakamatalaaaga he tau miti, totou alolima, mo e talahau mena tuai fakalataha mo e fakaaogaaga he tau pele pepa. Kua tokologa ne onoono ke he talahauaga tuai fakataulatua mo mena fakafiafia nakai fakahagahaga kelea, ka e kua fakakite mai he Tohi Tapu kua fakafetuiaki e tau talahauaga mena tuai mo e tau agaga kelea. Ke fakatai ki ai, kua talahau mai ia Gahua 16:16-19 ke he “temoni he talahau tuai fakataulatua” ne kua taute e taha tama fifine ke fakagahuahua e “makutu he talahau tuai.” (NW) Ka e pete ni ia, ko e iloilo hana ke talahau tuai e tau mena a anoiha kua galo he magaaho ne vega ai e temoni. Kua maaliali ai, ko e talahauaga tuai fakataulatua ko e page a ia ne fakaaoga he tau temoni ke fakataki atu e tau tagata ke he matahele ha lautolu.

11. Maeke fefe e tau laliaga ke matutaki mo lautolu ne mamate ke fakataki atu ke he hele?

¹¹ Kaeke kua maanu a koe ha ko e mate he taha fakahele he magafaoa po ke ke he kapitiga tata, liga to mukamuka a koe ke futiaki ha ko e taha page foki. Liga to foaki atu he agaga hulalo e fakailoaaga pauaki po ke liga vagahau ke he leo ne tuga he tagata ne mate. Kia mataala! Ko e tau laliaga ke matutaki mo lautolu ne mamate ka fakataki atu ke he matahele. Ko e ha? Ha kua nakai maeke a lautolu ne mamate ke vagahau. Ke tuga he iloa e koe, kua talahau fakamaaliali mai he Kupu he Atua ki a tautolu ka mate e tagata “kua liu a ia ke he kelekele ne eke aki a ia, ko e aho ia ni kua mate ai hana tau manatu.” Ko lautolu ne mamate kua ‘nakai iloa ha mena.’ (Salamo 146:4; Fakamatalaaga 9:​5, 10) Kua mua atu foki, ko e tau temoni a ia ne kua fita he iloa ke fakafifitaki atu e leo hana ne mate mo e foaki age ke he agaga hulalo e fakailoaaga hagaao ki a ia ne kua mate. (1 Samuela 28:3-19) Ti ka ‘kumi atu e taha ki a lautolu ne mamate’ kua makototia ai ke he hele he tau agaga kelea mo e kua gahua ke kehe mai he finagalo he Atua ko Iehova.—Teutaronome 18:​11, 12; Isaia 8:19.

MAI HE FUTIAKIAGA KE HE EKEFAKAKELEAAGA

12, 13. Ko e heigoa e fakamoli kua ha ha i ai kua fakamakamaka e tau temoni ke kamatamata mo e ekefakakelea e tau tagata?

¹² Ka fakatatai atu a koe mo e fakatonutonuaga he Kupu he Atua hagaao ke he matutakiaga fakataulatua, kua kalo kehe mai a koe he page he tau temoni. (Fakatatai Salamo 141:9, 10; Roma 12:9.) Kua kakano ka e mena nei to nakai liliu e tau agaga kelea ke tapaki a koe? Nakai ke pihia! He mole e kamatamata atu ki a Iesu ke laga tolu, “ti fano kehe a [Satani] ia ia, ato hoko ke he taha aho.” (Luka 4:13) Kua tuga ai, ko e tau agaga ulukafilo kua nakai futiaki ni e tau tagata ka e kua ekefakakelea foki a lautolu.

¹³ Kia liu manamanatu atu ke he ha tautolu a onoonoaga ke he ekefakakeleaaga ha Satani ke he fekafekau he Atua ko Iopu. Kua fakahoko he Tiapolo e galo he hana a tau manu mo e mamate he tokologa he hana a tau fekafekau. Kua keli foki e Satani e fanau ha Iopu. He mui mai, ne ta foki e ia a Iopu mo e gagao kua mua atu e mamahi. Ka e kua tumau e mahani fakamoli ha Iopu ke he Atua ti kua lahi ai e fakamonuina. (Iopu 1:7-19; 2:7, 8; 42:12) Ti tali mai he magaaho ia, kua taute he tau temoni e falu tagata ke kuhukuhu po ke matapouli mo e kua fakatumau ke olioli ke he tau matematekelea he tau tagata. (Mataio 9:32, 33; 12:22; Mareko 5:2-5) He vaha nei, kua fakakite mai he tau hokotaki kua matahavala atu e tau temoni ke he tau tagata he taute e mahani fakatane mo e fifine ti taute e falu ke heketia. Kua taute agaia e lautolu e falu ke kelipopo mo e ke taupega, ko e tau agahala a ia ke he Atua. (Teutaronome 5:17; 1 Ioane 3:15) Ka e pete ni a ia, kua afe e tau tagata ne kua hele he tau agaga kelea nei kua maeke ke tokanoa mai ai. Kua maeke fefe e mena nei ki a lautolu? Kua taute pihia e lautolu he taute e tau lakaaga aoga lahi.

PUHALA KE TOTOKO E TAU AGAGA KELEA

14. Ke felautatai ai mo e fifitakiaga he tau Kerisiano Efeso he senetenari fakamua, maeke fefe ia koe ke totoko atu ke he tau agaga kelea?

¹⁴ Ko e heigoa e taha puhala ke maeke ia koe ke totoko ke he tau agaga kelea mo e puipui mai a koe mo e hau a magafaoa mai he tau matahele ha lautolu? Ko e tau Kerisiano he senetenari fakamua i Efeso ne kua fakagahuahua e matutakiaga fakataulatua ato eke mo tau tagata talitonu kua taute e tau lakaaga kua hako. Kua totou ai e tautolu “na tokologa foki a lautolu ne eke e tau lagatau he tau taulaatua, kua fakapotopoto e lautolu e tau tohi ha lautolu, mo e huhunu ai ki mua he tau tagata oti.” (Gahua 19:19) Pete ni he nakai fakagahuahua e koe e matutakiaga fakataulatua, kia tiaki e ha mena ne kua ha ha i ai e fakaaogaaga ke he fakataulatua po ke fakafetui atu ki ai. Kua putoia e tau mena nei ke he tau tohi, tau mekasini, tau vitio, tau fakatino tautau, tau leo kofe tapaki, mo e tau mena fakaaoga pauaki ma e fakataulatua. Kua putoia atu foki ko e tau tupua, tau amulete mo e falu a koloa foki ne kahoa ma e puipuiaga, mo e tau mena fakaalofa ne kua moua mai ia lautolu ne fakagahuahua e matutakiaga fakataulatua. (Teutaronome 7:​25, 26; 1 Korinito 10:21) Ke fakatai: Ko e faoa tokoua he fakamauaga i Tailani kua leva e ekefakakelea he tau temoni. Ti kua tiaki e laua e tau mena ne kua fakalataha atu mo e matutakiaga fakataulatua. Ko e heigoa e fua? Kua tokanoa tuai a laua mai he tau ekefakakelea he tau temoni mo e he magaaho fakamui kua taute moli ke tolomaki fakaagaga.

15. He totoko atu ke he tau matakau agaga kelea, ko e heigoa e taha lakaaga kua lata?

¹⁵ Ke totoko atu ke he tau agaga kelea, ko e taha lakaaga kua mua atu foki ko e fakagahua e fakatonuaga he aposetolo ko Paulo ke tui e tapulu tau katoa fakaagaga ne foaki mai he Atua. (Efeso 6:​11-17) Kua lata he tau Kerisiano ke fakamalolo e tau puipuiaga ha lautolu ke he tau agaga kelea. Kua putoia e lakaaga nei ke he heigoa? “Ka e mua hanai ke he tau mena oti,” he talahau e Paulo, “kia toto e akau punuti, ko e tua hia, kia maeke ai ke tamate e tau fana kaka oti hana kua kelea.” Kua moli ai, ka malolo lahi hau a tua, to mua atu e maeke hau ke totoko atu ke he tau matakau agaga kelea.​—Mataio 17:14-20.

16. Maeke fefe ia koe ke fakamalolo e tua hau?

¹⁶ Kua maeke fefe ia koe ke fakamalolo e tua hau? He fakatumau ke fakaako e Tohi Tapu mo e fakagahua ai e fakatonuaga i ai ke he moui hau. Ko e malolo he tua he taha kua lahi e falanaki ke he mauokafua ni he fakaveaga ki ai​—ko e iloilo ke he Atua. Nakai kia tali tonu a koe ke he iloilo tonu ne kua moua e koe mo e kua uta ke he loto he fakaako ai a koe ke he Tohi Tapu kua ati hake hau a tua? (Roma 10:10, 17) Ti, nakai fakauaua, he fakatumau ai a koe ke he fakaakoaga nei mo e taute ai mo mahani hau ke fina atu ke he tau feleveiaaga he Tau Fakamoli a Iehova, to mua atu e fakamalolo ke he tua hau. (Roma 1:11, 12; Kolose 2:6, 7) To eke ai mo puipuiaga malolo ke he tau ekefakakelea fakatemoni.​—1 Ioane 5:5.

17. Ko e heigoa foki e falu lakaaga kua liga lata he totoko atu ke he tau matakau agaga kelea?

¹⁷ Ko e heigoa foki e tau lakaaga ka taute he tagata ne kua manako lahi ke totoko atu ke he tau matakau agaga kelea? Kua lata e tau Kerisiano Efeso ke moua e puipuiaga ha kua nonofo a lautolu he maaga ne kua puke ke he tau mena fakatemoni. Ti ko e mena ia, ne tala age e aposetolo ko Paulo ki a lautolu: “Kia olelalo atu a mutolu ke he Agaga nakai noa ke he tau ole mo e tau liogi oti.” (Efeso 6:18) Ha kua nonofo a tautolu ke he lalolagi ne puke ai ke he tau temoni, ko e liogi fakamakamaka ma e puipuiaga he Atua kua aoga lahi ke totoko aki e tau agaga kelea. (Mataio 6:13) Ko e mena kua mua atu e lagomatai ke he mena nei ko e lagomatai fakaagaga mo e tau liogi he tau momotua kotofa he fakapotopotoaga Kerisiano.​—Iakopo 5:​13-15.

KIA TUMAU E TAU HAU KE HE TAU AGAGA KELEA

18, 19. Ko e heigoa ka taute ka liliu e tau temoni ke ekefakakelea e tagata?

¹⁸ Pete ni kua taute ai e tau lakaaga nei, kua ekefakakelea agaia he tau agaga kelea e falu. Tuga a nei, taha e tagata tane i Kote Ivoira ne fakaako e Tohi Tapu mo e Tau Fakamoli a Iehova ti moumou ai e tau amulete oti hana. He magaaho fakamui, kua mitaki e tupuaga hana, tukulele ai e moui hana ki a Iehova, mo e papatiso. Ka e he mole e fahi tapu ne papatiso a ia, ne liliu e tau temoni ke ekefakakelea a ia, mo e tau leo kua tala age ki a ia ke tiaki e tua moua fou hana. Ka tupu e mena nei ki a koe, kua kakano ka ia kua galo e koe e puipuiaga ha Iehova? Nakai pihia.

¹⁹ Pete ni kua ha ha he tagata mitaki katoatoa ko Iesu Keriso e puipuiaga faka-Atua, kua logona e ia e leo he mena moui ko e agaga kelea ko Satani ko e Tiapolo. Kua fakakite e Iesu e mena ke taute ka fai mena tupu pihia. Ne tala age a ia ke he Tiapolo: “Ato fano kehe a a koe ma Satani.” (Mataio 4:​3-10) Ke tuga a ia, kua lata ia koe ke ua fanogonogo ke he tau leo mai he lalolagi fakaagaga. Totoko atu ke he tau agaga kelea he hea ki a Iehova ma e lagomatai. E, kia liogi fakalahi he fakaaoga e higoa he Atua. Kua tala mai he Tau Fakatai 18:10: “Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.” Kua pihia e mena ne taute he tagata tane Kerisiano i Kote Ivoira, ti oti e ekefakakelea he tau agaga kelea a ia.​—Salamo 124:8; 145:18.

20. Kia fakaku mai, ko e heigoa kua maeke ia koe ke taute ke totoko atu ke he tau agaga kelea?

²⁰ Kua fakaata e Iehova e tau agaga kelea ke tumau ke ha ha i ai, ka e kua fakakite e ia e malolo hana, ke mua atu ai ke he tau tagata hana, mo e ha ne fa e fakapuloa ai e higoa hana ke he lalolagi katoa. (Esoto 9:16) Kaeke ke nofo tata a koe ke he Atua, to nakai lata ia koe ke matakutaku atu ke he tau agaga kelea. (Numera 23:​21, 23; Iakopo 4:​7, 8; 2 Peteru 2:9) Kua fakakaupa e malolo ha lautolu. Kua fakahala a lautolu he vaha ha Noa, nakai la leva e tolo kehe mai he lagi, mo e he mogonei kua fakatalitali ke he fakafiliaga fakahiku. (Iuta 6; Fakakiteaga 12:9; 20:​1-3, 7-10, 14) Ti moli ai, kua lahi e matakutaku ha lautolu ke he ha lautolu a fakaotiotiaga ka hoko mai. (Iakopo 2:19) Ti pete he lali e tau agaga kelea ke futiaki a koe aki e falu faga page po ke ekefakakelea atu ki a koe ke he taha puhala ni, kua maeke ia koe ke totoko a lautolu. (2 Korinito 2:11) Kia tiaki e tau lagatau matutakiaga fakataulatua, fakagahuahua e fakatonuaga he Kupu he Atua, mo e kumi atu ke he fiafia ha Iehova. Kia taute e mena nei mo e nakai fakatuai, ha kua falanaki e moui hau ke he hau a totoko atu ke he tau matakau agaga kelea!

KAMATAMATA E ILOILO HAU

Maeke fefe e tau agaga kelea ke lali ke fakahehe e tau tagata?

Ko e ha kua fakahala ai he Tohi Tapu e matutakiaga fakataulatua?

Maeke fefe e tagata ke tokanoa mai he tau matakau agaga kelea?

Ko e ha kua lata ai ia koe ke fakatumau ke totoko atu ke he tau agaga kelea?

[Fakatino he lau 110]

Fefe e onoonoaga hau ke he matutakiaga fakataulatua mo e hana tau lagatau loga?