CHILAYIJO 43
MaKristo Anokwelela Kuba Namabonelo Alichini Nobusukwa?
Banhu banamabonelo alosiyana-siyana pezhulu pobusukwa. Bamwe banonakilwa kunwa pamwempela belinabakwayina babo. Bamwe banoshala kusobunwa. Bamwe banonwa kuswika pakukolwa. IBhayibhili linotini pezhulu pobusukwa?
1. Kunwa busukwa kubi na?
IBhayibhili alitolambija kunwa busukwa. IBhayibhili palinolebeleka nozupo zwatakapiwa naMwali linoshanganisila “iwayini inoshantisa moyo wonhu.” (Lwimbo 104:14, 15) IBhayibhili linolebeleka nabanhulume nabanhukaji balombika bakabenwa busukwa.—1 Timoti 5:23.
2. Ndikupi kulaya iBhayibhili kwalinopa yabo banoshaluja kunwa?
Jehova unolambija kunwa kokupindilija nokukolwa. (BaGalatiya 5:21) IWhi lilye linoti: “Usube pakati pabo banonwa zokupindilija iwayini.” (Zwichimbe 23:20) Kana tishala kunwa tilitoga atitokwelela kunwa zulopindilija tipejeleja tisichinoyeya zubhodo kana tisichinokwanisa kuzubhata pokulebeleka nozuto kana tisichinokwanisa kulilitila bupenyu bwedu. Kana usinokwanisa kuzutinha pakunwa zubuya kuti uleke kunwa kwadeni.
3. Tingalemekeja chini chishalujo chabamwe penyaya yobusukwa?
Umwe nomwe unokwelela kuzushalujila kunwa busukwa kana kusobunwa. Atitokwelela kutongesa unhu unonwa ezutinha akale atitokwelela kumanikija usinonwa kuti enwe. (BaRoma 14:10) Toshaluja kusonwa busukwa kana buta kuti bamwe bepingwe. (Balani BaRoma 14:21.) Tisishake “zunobhancha [isu] chete, koga zunobhanchabo bamwe.”—Balani 1 BaKolinte 10:23, 24.
FUNDA ZUNJI
Yeyesa nozumiso zweBhayibhili zuchakubhancha kushaluja kuti uchanwa busukwa na akale uchanwa bunji zulichini. Akale funda zwawungate kana ulinobukukutu bokunwa zulopindilija.
4. Zushalujile zwawunoda penyaya yobusukwa
Jesu wakabekubona chini kunwa busukwa? Kuti uwane inshandulo yeyesesa nozwechichenamiso chokutanga chaakata. Balani Johani 2:1-11, akale kwejisani nemibhuzo yeyi:
Chichenamiso yechi, chinotondeja kuti Jesu unamabonelo api penyaya yobusukwa akale nabo banobunwa?
Sezwo Jesu esijakalambija kunwa busukwa, tokwelela kumbona chini unKristo unoshaluja kunwa?
Kojoba maKristo ekasupuka kunwa busukwa koga azutoleba kuti anokwelela kunwa samadilo. Balani Zwichimbe 22:3, akale mubone kuti zulokwelela na kunwa muzumo zunotobela kana kuti pe:
Kana uda kukwendesa imota kana kushingisa munchina.
Ulinemimba.
Dokotela akubuja kuti usinwe busukwa.
Kana usinokwanisa kuzutinha pakunwa.
Undawu wehulumende usinokuvumila kunwa.
Ulinonhu usichidi kunwa busukwa wakabeli nobukukutu bokunwa zulopindilija.
Unokwelela kupa banhu busukwa na ponchado kana kuti pamapati? Kuti ubone zwawunokwelela kuta, yebani iVIDIYO.
Balani BaRoma 13:13 na1 BaKolinte 10:31, 32. Mungopeja kubala ivesi imwe nemwe kwejisani nombuzo yoyu:
Kungakubhancha chini kushingisa chimiso yechi kuti ushale nenzila inoshantisa Jehova?
UnKristo umwe nomwe unozushalujila ega kunwa kana kusonwa. Kojoba ebunwa panawumwe unshaji engashala kusobunwa
5. Shaluja kuti unganwa zunji zulichini
Kana ushala kunwa busukwa yeya yozu: Jehova aatolambija kunwa busukwa koga unobenga kunwa zulopindilija. Neni? Balani Hoseya 4:11, 18, akale kwejisani nombuzo yoyu:
Ini zunotikana unhu angonwa zulopindilija?
Tingata chini kuti tisinwe zulopindilija? Tokwelela kuzutinha akale tizibe pokujibila. Balani Zwichimbe 11:2, akale kwejisani nombuzo yoyu:
Neni zulizubhudo kuti ugale ukayeya kuti unoda kujibila poni pakunwa?
6. Koma bukukutu bokukolwa
Bona zwakabhancha umwe nhulume kuti ekoma bukukutu bokukolwa. Yebani iVIDIYO, akale kwejisani nemibhuzo inotobela.
Muvidiyo yeyi, Dmitry wakabetani angokolwa?
Zwakabeli zulelu na kuti esiye busukwa?
Ini zwakombhancha kuti ekome bukukutu bokunwa busukwa?
Balani 1 BaKolinte 6:10, 11, akale kwejisani nemibhuzo yeyi:
Kukolwa chibi chikulwana zulichini?
Ini zunotondeja kuti unhu wakabekolwa unokwanisa kuchincha?
Balani Mateu 5:30, akale kwejisani nombuzo yoyu:
Kudumula luboko kunokwejaniswa nokusiya zumwe kuti ushantise Jehova. Ini zwawungate kana ulinobukukutu bokunwa zulopindilija?a
Balani 1 BaKolinte 15:33, akale kwejisani nombuzo yoyu:
Ini zunotikana kana ulinabakwayina banonwa zulopindilija?
UMWE ANGABHUZA KUTI: “Kunwa kubi na?”
Ungashandula utini?
INI ZWAWAFUNDA
Busukwa chipo chatakapiwa naJehova kuti tinakilwe koga unolambija kunwa zulopindilija nokukolwa.
Kubwilulula
IBhayibhili linamabonelo api nobusukwa?
Ndibupi bukukutu bunobayipo nokunwa zulopindilija?
Neni tikwelela kulemekeja zushalujo zunotiwa nabamwe penyaya yokunwa?
PAMIJA PAN ZWAWAWANA
Bachinokubuka bangata chini zubhodo penyaya yobusukwa?
Bona zwawungate kuti ukome bukukutu bokunwa zulopindilija.
“Amacebo Azakunceda Ukuthi Unganathi Wedlulise” (INqabayokulinda, January 1, 2010)
UnKristo unokwelela kulobanisa magilazi nabamwe na?
“Imibuzo Ebuzwa Ngabafundi” (INqabayolinda, February 15, 2007)
Bona kuti umwe nhulume wakabenwa zulopindilija kuti wakasiya chini busukwa penyaya inoti “Ndakabeli Chidakwa”.
“IBhayibhili Liyamtshintsha Umuntu” (INqabayokulinda, May 1, 2012)
a Yabo basichinokwanisa kulalama besanwa busukwa banoda lubhancho kunabo banobona nozobupenyu. Madokotela banokutayija kuti banhu bakabeli nobukukutu bokunwa zulopindilija besiyilatu kunwa busukwa.