Wabambanyila Na Kuti Ubhabhatizwe?

Kuva pawakatanga kubala iBhayibhili walayijwa zunji nozwaJehova. Pamwe wachincha malalamilo awo kuti ekwendelane nozwawakalayijwa. Posa panachimwe chinu chimukukoneja kuti uzupile kuna Jehova akale kuti ubhabhatizwe. Muchilayijo yechi uchalayijwa nozunu zungakukoneja kuti ubhabhatizwe akale kuti ungamisikijana chini nazo.

1. Unokwelela kuziba zunu zunji zulichini usanu wabhabhatizwa?

Kuti ukwelele kubhabhatizwa unokwelela kuba “noluzibo lwechokomende.” (1 Timoti 2:4) Yozu azutova kuti unokwelela kuziba inshandulo jemibhuzo yose imomuBhayibhili usanu wabhabhatizwa. NamaKristo anonshaji ndefu bekabhabhatizwa banolamba belayijwa. (BaKolose 1:9, 10) Koga unokwelela kuziba indayijo jilokosha jimomuBhayibhili. Bakulwana bamomugubungano bachakubhancha kuti uzibe unanoluzibo lulokwelela na.

2. Matano api awunokwelela kuta usanu wabhabhatizwa?

Usanu wabhabhatizwa unokwelela “kushanduka . . . akale uzufije.” (Balani Mishingo 3:19.) Yozu zunova kuti unokwelela kuzusola nozubi zwawakata akale ukumbile Jehova kuti ekulekelele. Unova wasiya ungalilo umbi akale unoba nechinangwa chokulalama nenzila inoshantisa Jehova. Pezhulu pozo unokwelela kutanga kungwina mishangano yegubungano akale unokwelela kutanga kupupula sonshobeleli wendebo imbuya usijilobhabhatizwa.

3. Neni usinokwelela kutya kubhabhatizwa?

Bamwe banotya kuti abatookwanisa kuta zwabakabimbisa Jehova. Ichokomende kuti panomwe nshaji unosolundula, sozwakabeta bamwe banhulume nabanhukaji balobimbika banolebelekwa nozwabo muBhayibhili. Koga Jehova aatolingilila kuti banamati babe bebe balopelelela. (Balani Lwimbo 103:13, 14.) Unoshanta yopo pawunokweja kuta zwose zwawunokwanisa kuti unshatise! Uchakubhancha. Jehova unotibimbisa kuti “apana chimwe chinu chingatipalajanisa noludo [lulwe].”​—Balani BaRoma 8:38, 39.

FUNDA ZUNJI

4. Ziba Jehova zubuyanana

Unokwelela kunziba zulichini Jehova usanu wabhabhatizwa? Unokwelela kunziba zubhodo kusikila pakunda akale ute zunonshantisa. Yebani iVIDIYO ubone kuti bamwe bamulayijwa iBhayibhili munyika jilosiyana-siyana bamuzuta chini. Akale kwejisani nombuzo unotobela.

IVIDIYO: Ongakwenza Ukuze UBhabhatizwe (3:56)

• Muvidiyo yeyi, ini zwakabhancha banhu balosiyana-siyana kuti bebhabhatizwe?

Balani BaRoma 12:2, akale kwejisani nemibhuzo yeyi:

• Unokahajika na nozunolebwa neBhayibhili akale nokuti baSumikiji baJehova banolayija ichokomende?

• Kana zukadalo ini zwawunokwelela kuta?

5. Koma zunu zumukukoneja kubhabhatizwa

Unhu wose paanoshala kuzupila kuna Jehova nokubhabhatizwa unoshangana nobukukutu. Kuti ubone unkwejaniso, yebani iVIDIYO, akale kwejisani nemibhuzo inotobela.

IVIDIYO: Ukuthanda UJehova Kusenza Sinqobe Ubunzima (5:22)

• Muvidiyo yeyi, Narangerel wakabekwelela kukoma bukukutu bupi kuti etubule kunamata Jehova?

• Kuda Jehova kwakombhancha chini kuti ekome bukukutu yobu?

Balani Zwichimbe 29:25 na2 Timoti 1:7, akale kwejisani nombuzo yoyu:

• Ini chinotipa isimba lyokukoma bukukutu bwatinoshangana nabo?

6. Bimba kuti Jehova uchakubhancha

Jehova uchakubhancha kuti unshantise. Yebani iVIDIYO, akale kwejisani nemibhuzo inotobela.

IVIDIYO: UJehova UNkulunkulu Uzakuncedisa (2:50)

• Muvidiyo yeyi, ini zwakakoneja chifundo cheBhayibhili yechi kuti chisibhabhatizwe?

• Ini zwaakafunda zwakata kuti esimise kudimbwa kukwe kuna Jehova?

Balani Izaya 41:10, 13, akale kwejisani nombuzo yoyu:

• Ini zungakupa chibimbo chokuti unokwanisa kuzhajikija zwawunobabimbisa pawunozupila?

7. Tondejela kuti unomboka Jehova nokuda kwaanokuta

Kuyeyesesa nokuda kwaanokuta Jehova kuchata kuti umboke akale ude kuunamata nokusinopela. Balani Lwimbo 40:5, akale kwejisani nombuzo yoyu:

• Makombolelo api anova kuna Jehova awungade kumboka?

Umprofeti Jelemiya wakabonda Jehova newhi lilye akale wakabebona chili chikombolelo kushobwa nezina lilye. Wakati: “Mawhi enu akata kuti moyo wangu unakilwe akale ushante zuva pomoyo nokuti ndimushobwa nezina lyenu, O Jehova Mwali.” (Jelemiya 15:16) Shandula mibhuzo yeyi:

• Neni chili chikombolelo kuba umwe wabaSumikiji baJehova?

• Unoda kubhabhatizwa na somwe wabaSumikiji baJehova?

• Pana zungakukoneja na kuta alo?

• Unoyeya kuti ini zwawunokwelela kuta kuti ubhabhatizwe?

INI ZWAWAFUNDA

Nolubhancho lwaJehova unotubula kukoma bose bukukutu bungakukoneja kubhabhatizwa.

Kubwilulula

• Unokwelela kuba noluzibo lunji chini kuti ukwelele kubhabhatizwa?

• Ini zwawunokwelela kuta usanu wabhabhatizwa?

• Neni usinokwelela kuvumila lutyo kuti lukukoneje kubhabhatizwa?

PAMIJA PANA ZWAWAWANA

Bona kuti ini chinokwelela kukuta kuti ushaluje kubhabhatizwa .

“Usukulungele Yini Ukubhabhatizwa?” (INqabayokulinda, March 2020)

Bona kuti ungakoma chini bukukutu bungakukoneja kubhabhatizwa.

“Kuyini Okungivimbela Ukuthi Ngibhabhatizwe?” (INqabayokulinda, March 2019)

Bona kuti umwe unhulume wakakoma chini bukukutu kuti ekwanise kubhabhatizwa.

‘Kuyini Okukuvimba Ukuthi Ubhabhatizwe?’ (1:10)

Pokutanga Ataa wakabetya kubhabhabtizwa. Bona kuti ini zwakombancha kuti etubule kubhabhatizwa.

Kambe Yimi Lowu? (7:21)