CHILAYIJO 26

Neni Zunu Zubi Zutikana Akale Neni Banhu Besheta?

Printed Edition

Panotikana zunu zubi towaja kuzubhuza kuti “Neni zunu yozu zwatikana”. Zunoshantisa ndizokuti iBhayibhili linotishandulila umbuzo yoyu nenzila inoguncha!

1. Ini zwakatiwa naSatani kuti munyika mubenamasheto?

Satani Guluzhanje wakapandukila Mwali. Satani wakabeda kutonga bamwe ndizo akanyepela banhu bokutanga Adamu naEva kuti bebhatisane naye pakupandukila Mwali. Satani wakabuja Eva mawhi okunyepa. (Matangisilo 3:1-5) Wakata kuti eyeye kuti Mwali umunjibisa zumwe zunu zubhodo. Mawhi awe akabeva kuti banhu bangashanta bengosowhilila Mwali. Satani wakatanga kunyepa nokubuja Eva kuti aatofa. Ndizo iBhayibhili linshoba liti “unyepi akale ndiye tate bamanyepwa.”—Johani 8:44.

2. Adamu naEva bakashaluja kutani?

Jehova wakapa Adamu naEva zwose zwabakabeda. Wakababuja kuti bengalya michelo yemiti yose kuzhe koomwempela chete. (Matangisilo 2:15-17) Koga bakashaluja kulya unchelo wonti wadeni. Eva “wakachela zwizwalo zwawo akalya.” Paba yopaya, Adamu “nebo akalya.” (Matangisilo 3:6) Bose abajakawhilila Mwali. Kuwhilila Mwali akujalobashupa nendaba jokuti abajakabelina chibi. Bakachinyila Mwali beziba. Chitalo chabakata chakababuzila bukukutu bukulwana.—Matangisilo 3:16-19.

3. Tobhataniswa chini nokusowhilila kwakata Adamu naEva?

Kuchinya kwakata Adamu naEva kwakata kuti bebenechibi akale bakachitabukija kubana babo. IBhayibhili linoti nozwaAdamu: “Luchinyo lwakangwina penyika nonhu umwempela, akale noluchinyo kwakangwina lufu, nokudalo lufu lwakabazhalila bose banhu.”—BaRoma 5:12.

Zunji zuzatu zunotisa kuti tishete. Umwe nshaji tozubuzila toga masheto nozushalujo zwatinota. Umwe nshanji tosheta nozushalujo zunobatiwa nabamwe. Umwe nshaji tongwina mumasheto nokuba ponshaji nendawu isijilokwelela.—Balani Mbhaunuli 9:11.

FUNDA ZUNJI

Bona neni titi Mwali atoba iye unotibuzila bukukutu bumomunyika akale kuti unowha chini kana tisheta.

4. Ndiyani umuta kuti tishete

Banhu banji banoyeya kuti Mwali ndiye umutonga inyika. Zungaba alo na? Yebani iVIDIYO.

IVIDIYO: Ngubani Obusa Umhlaba? (1:24)

Balani Jemusi 1:13 na 1 Johani 5:19, akale kwejisani nombuzo yoyu:

NdiMwali umutisa kuti banhu beshete na?

5. Bona zwakabuzwa nokutonga kwaSatani

Yebani iVIDIYO.

IVIDIYO: Yindaba UNkulunkulu Evumela Ukuhlupheka?—Isiqephu (3:07)

Balani Matangisilo 3:1-6, akale kwejisani nemibhuzo yeyi:

Ndiyapi manyepwa akalebwa naSatani?—Linga vesi 4 na 5.
Satani wakatamila chini Jehova kuti unazunu zubhodo zwakabeminya banhu?
Mawililano nozwakalebwa naSatani, kutongwa naJehova kunota kuti banhu beshantilwe na?

Balani Mbaunuli 8:9, akale kwejisani nombuzo yoyu:

Ini zwakatikana pakuti Jehova atoba iye umutonga inyika?

Mapikicha: Amutondeja inyika kuva pakutanga kuswika muPaladayisi limubimbiswa. A. Ipaladayisi penyika linazulimwa zubhodo. B. Kuva ntolo banhu betonga, inyika izhele nobunamati bwamanyepwa, kusobhatana, jihondo akale iloswibhiswa . Jimwe ihulumende jinamasimba jipopa jinoshanganisila iEgypt, iChina, iGreece, iRome, iGreat Britain, ne United States. C. Banhu bagele muPaladayisi lyakalungiswa.

Adamu naEva abajakabelina chibi akale begala muPaladayisi. Koga bakawhilila Satani bakapandukila Jehova
Pabakapanduka inyika yakazhala nechibi, kusheta nolufu
Jehova uchoopeja chibi, kusheta nolufu. Inyika ichooba iPaladayisi kabili ilinabanhu basinachibi

6. Jehova unolwajilwa nokusheta kwatinota

Mwali unowha chini kana tisheta? Iwha zwakalebelekwa naShe Davida nompositoli Pita. Balani Lwimbo 31:7 na 1 Pita 5:7, akale kwejisani nombuzo yoyu:

Unowha chini kuziba kuti Jehova unokubabayilila akale unobona kusheta kwawunota?

7. Mwali uchoopeja kusheta kose

Balani Izaya 65:17 naZwakatondejelwa 21:3, 4, akale kwejisani nombuzo yoyu:

Neni zunyalaja kuziba kuti Mwali uchoopeja kusheta kose kumushangana nabanhu?

Wabezuziba na?

Satani paakaleba manyepwa okutanga, wakaswibhisa izina lyaJehova. Wakata kuti banhu beyeye kuti Jehova untongi umbi akale usina ludo. Jehova paachapeja kusheta kose uchachenesa izina lilye. Uchatondeja kuti ndiye untongi umbodo wabanhu. Kulwilwa kokuchenesa izina lyaJehova chinhu chilokosha kudenga nopenyika.—Mateu 6:9, 10.

BAMWE BANOTI: “Kusheta kuda kwaMwali.”

Ungowha unhu edalo ungonshandula utini?

INI ZWAWAFUNDA

Satani Guluzhanje nabanhu babili bokutanga Adamu naEva ndibo bakatisa kuti munyika muzhale bubi. Jehova unolwajilwa nokusheta kwatinota akale kwabapelyo kuti ekupeje.