Amakangirirya w’Ekinywa ky’oMungu awite akaghala kanene. Omughulu tukakangiriraya abandu oko Yehova n’eribakangania ngoko ali kwenene-kwenene, tukayilangirira emyatsi eyikaswekaya. Obulangiti bw’amabehi wa Sitani, bukalwa oko meso wabo ko lyolo-lyolo, neryo ibatsuka erilangira emibere mibuya ya Tata wetu w’elubula. Bakaswekera akaghala kiwe kanene kutsibu, akatehwa. (Isa. 40:26) Bakabya babilangira eritunganene liwe erihika-hikene, ibigha eriyiketer’iye. (Ebih. 32:4) Bakigha emyatsi mingyi oko menge wiwe manene. (Isa. 55:9; Rom. 11:33) Kandi emitima yabo yikasika babiminya ngoko Yehova ni lwanzo. (1 Yoh. 4:8) Omughulu bakalola embere eriyitunda hakuhi na Yehova, amaha wabo w’erisyabyaho kera na kera ng’abana b’oMungu akawata. Ni lusunzo lunene kundu okw’itwe eriwatikya abandu eriyitunda hakuhi na Tata wabo w’elubula. Omughulu tukasangira oko mubiiri oyo, “tukakola haghuma n’oMungu.”​—1 Kor. 3:5. w24.02 12 enu. 15

Wamabya ighunemw’igha eBiblia kutse ababuti baghu ini Bimiri ba Yehova, unemulengekania okw’ibatisibwa? Oyo ni muradi oghuwene! Aliwe embere sy’eribatisibwa, litolere iwatsuka eriyiherera oko Yehova. Omundu akayiherera ati oko Yehova? Omundu oyukayiherera oko Yehova akamulagha omo musabe ati iye musa yo akendikolera kandi ati akendihira erisonda lya Yehova ly’embere omo ngebe yiwe. Aho ukalagha Yehova uti ukendilola embere erimukolera “n’omutima waghu wosi, n’obuyingo bwaghu bosi, n’obulengekania bwaghu bosi, n’akaghala kaghu kosi.” (Mar. 12:30) Ukakola eriyilagha eryo, iwe na Yehova, isihali oghundi mundu. Aliwe, olubatiso lo lukakanganaya abandu bosi ngoko wabiriyiherera oko Yehova. Eriyilagha lyaghu ni mwatsi ow’alitohire ogho utolere iwasikya. Yehova naye akalindirira ati ngambe iwasikya eriyilagha lyaghu eryo.​—Omug. 5:4. w24.03 2 enu. 2; 3 enu. 5

Obuli ndwa yiwite amaligho wayo. EBiblia muyabugha butsira eribisa yiti, “abakalunga bakendisyabya n’amaligho omo ngebe yabo.” (1 Kor. 7:28) Busanaki? Ni kundi, endwa yikamatanaya kughuma abandu babiri abatahika-hikene. Kandi obuli mundu awite emibere yiwe n’ebindu ebyo anzire, n’ebyatanzire. Kandi abatahenie banganabya imubatakulira omo mibere mighumerera. Ebiro bikalaba, oghundi anganafumbula emitsye y’oghundi eyo abya isyasi. Emyatsi yosi eyo yanganaleka endwa iyabyamo amaligho. Omo mwanya w’eriligha ngoko abosi ni b’amakosa, n’erilangira nga banganuwania emyatsi yo bati, abatahenie bangatsuka eribya bakahandanako omunwe. Nibya, banganatsuka erilengekania bati batolere ibaghabana kutse batolere eritwa endwa yabo. Aliwe, erighabana kutse eritwa endwa kyanganaleka emyatsi eyuwana kwe? Iyehe. Yehova anzire omulume n’omukali ibasighala kughuma nomo omughuma wa kubo anganabya ini mutsibu. w24.03 16 enu. 8; 17 enu. 11