Yesibili YamaKhosi

6 Amadodana wabaphorofidi+ athi ku-Elitjha: “Qala! Indawo le esihlala nawe kiyo yincani khulu. 2 Sibawa usivumele siye eJordani. Ngamunye wethu azithathele isigodo lapho senze indawo esingahlala kiyo.” Wathi: “Khambani.” 3 Omunye wawo wathi: “Ungakuthabela na ukukhamba neensebenzi zakho?” Wathi: “Ngizokukhamba nani.” 4 Nje-ke wakhamba nawo, bafika eJordani bathoma ukuqunta imithi. 5 Kuthe omunye wabo nakasaqunta umuthi, ihloko yezembe yawela ngemanzini, warhuwelela wathi: “Maye! Kosami, kazi libolekiwe.” 6 Umuntu kaZimu weqiniso wathi: “Liwelephi?” Wamtjengisa lapha liwele khona. Yeke waqunta isigojwana wasilahlela lapho wenza ihloko yezembe yathaya. 7 Wathi: “Likhuphe.” Wathabulula isandla sakhe walikhupha.

8 Nje-ke ikosi yeSiriya yayokulwa no-Israyeli.+ Yabonisana neensebenzi zayo yathi: “Ngizokuhloma amatende nani endaweni ethileko.” 9 Umuntu kaZimu weqiniso+ wathumela ilizwi ekosini yakwa-Israyeli, wathi: “Yelelani ningadluli endaweni le ngombana amaSiriya azokwehlela ngapho.” 10 Nje-ke ikosi yakwa-Israyeli yathumela ilizwi endaweni umuntu kaZimu weqiniso ayiyelelise ngayo. Wasolo ayiyelelisa nayo yahlalela kude nendawo leyo iinkhathi ezimbalwa.+

11 Lokhu kwasilinga ikosi yeSiriya, nje-ke yabiza iinsebenzi zayo yathi kizo: “Akheningitjele! Ngubani hlangana nathi osehlangothini lekosi yakwa-Israyeli?” 12 Enye yeensebenzi zayo yathi: “Akakho kithi kosami! Ngu-Elitjha umphorofidi wakwa-Israyeli otjela ikosi yakwa-Israyeli izinto ozitjho usekumbenakho.”+ 13 Yathi: “Khambani niyokufuna lapho akhona bona ngithumele abantu bayombamba.” Ngokukhamba kwesikhathi, yafumana umbiko othi: “UseDotani.”+ 14 Msinyana yathumela iinjomani neenkarana zepi lapho nebutho elikhulu; bafika ebusuku babhoda idorobho.

15 Umsizi womuntu kaZimu weqiniso nakavukako ekuseni aphumela ngaphandle, wabona idorobho libhodwe libutho neenjomani neenkarana zepi. Khonokho umsizi wathi ku-Elitjha: “Maye! Kosami, sizokwenza njani?” 16 Kodwana wathi: “Ungasabi!+ Ngombana abanathi banengi kunabanabo.”+ 17 U-Elitjha wathandaza wathi: “Jehova, ngibawa uvule amehlwakhe ukuthi abone.”+ Khonokho uJehova wavula amehlo womsizakhe wabona. Qala! Esifundeni seentaba bekuzele iinjomani neenkarana zomlilo+ zibhode u-Elitjha.+

18 AmaSiriya nakehlela kuye, u-Elitjha wathandaza kuJehova wathi: “Ngibawa ubethe isitjhabesi ngobuphofu.”+ Nje-ke wababetha ngobuphofu njengombana u-Elitjha abawile. 19 U-Elitjha wathi kibo: “Indlela le akusingiyo eniyifunako nedorobheli akusingilo enilifunako. Ngilandelani, nginise emuntwini enimfunako.” Kodwana wabasa eSamariya.+

20 Nabafika eSamariya u-Elitjha wathi: “Jehova, vula amehlwabo ukuthi babone.” Nje-ke uJehova wavula amehlwabo, babona ukuthi baphakathi kweSamariya. 21 Ikosi yakwa-Israyeli nayibabonako yathi ku-Elitjha: “Ngibabulale, ngibabulale na baba?” 22 Kodwana wathi: “Ungababulali. Ungabulala abantu obathumbe ngesabulakho nangomsubelakho? Baphe uburotho namanzi bona badle, basele+ bebabuyele ekosinabo.” 23 Nje-ke wabenzela umnyanya omkhulu, badla bebasela, ngemva kwalokho wabakhambisa babuyela ekosinabo. Amabutho wabadlelezeli wamaSiriya+ akhenge asabuyela enarheni yakwa-Israyeli.

24 Ngemva kwalokho, uBhen-Hadadi ikosi yeSiriya wabuthelela loke ibutho lakhe wakhuphuka wayokuvimbezela iSamariya.+ 25 Nje-ke kwaba nendlala ekulu+ eSamariya, balivimbezela bekwaba kulapho ihloko kadumbana+ ithengiswa ngeempaparwana zesiliva ezima-80, ubulongwe bamajuba obungagcwala izandla ezimbili* bebuthengiswa ngeempaparwana zesiliva ezi-5. 26 Njengombana ikosi yakwa-Israyeli idlula ebodeni, kwarhuwelela umfazi wathi kiyo: “Sisiza kosami!” 27 Wathi: “UJehova nakanganisiziko, mina ngizanifumanelaphi isizo? Ngeselelweni? Namkha ngebutlhodlhelweni bewayini namkha bamafutha?” 28 Ikosi yambuza yathi: “Ulila ngani?” Wathi: “Umfazi lo uthe kimi, ‘Letha indodanakho sidle yona namhlanjesi, kusasa sizokudla indodanami.’+ 29 Yeke sapheka indodanami sayidla.+ Ngelanga elilandelako ngathi kuye, ‘Letha indodanakho siyidle.’ Kodwana wayifihla.”

30 Kuthe ikosi nayizwa amezwi womfazi lo, yarathula izambatho zayo.+ Nayidlula ebodeni, abantu bayibona yembethe umgodla ngaphasi kwezambatho zayo. 31 Yeke yathi: “Kwanga uZimu angangijezisa kabuhlungu nange ngingaqunti ihloko ka-Elitjha indodana kaTjhafathi namhlanjesi!”+

32 U-Elitjha bekahlezi nabadala endlinakhe. Ikosi yathumela umuntu phambi kwayo kodwana ngaphambi kobana isithunywa sifike, u-Elitjha wathi kubadala: “Niyibonile na indlela indodana yombulali+ le ethumele ngayo isithunywa bona sizokuqunta ihlokwami? Qalani, isithunywa nasifikako, nivale umnyango, niwubambe sivaleleke ngaphandle. Niyalizwa na itjhada leenyawo zekosaso ziza msinyana ngemva kwaso?” 33 Kuthe asakhuluma nabo, isithunywa safika kuye, ikosi yathi: “Ihlekelele le ivela kuJehova. Kubayini kusafuze ngilinde uJehova?”