Yokuthoma YeenKronike

20 Ekuthomeni komnyaka,* ngesikhathi amakhosi aya emajimeni ngaso, uJowabi+ wadosa phambili ibutho lepi, wayokutjhabalalisa inarha yama-Amoni; weza begodu wavimbezela iRabha,+ kodwana uDavida bekahlezi eJerusalema.+ UJowabi wasahlela iRabha waliqeda nya.+ 2 Ngemva kwalokho, uDavida wathatha isihlohlo sakaMalikamu ehlokwakhe, wafumana bona ubudisi baso bulitalende* legolide begodu kiso bekunamatje aligugu; sathweswa uDavida. Wathumba nepahla enengi edorobhenelo.+ 3 Wakhupha abantu bedorobhelo wabasebenzisa+ ekusarheni amatje nekusebenzeni ngeensetjenziswa zesimbi ezibukhali nangamazembe. Ngilokho uDavida akwenza kiwo woke amadorobho wama-Amoni. Ekugcineni uDavida nawo woke amasotja babuyela eJerusalema.

4 Ngemva kwalokho, kwaba nepi namaFilista eGezeri. Ngesikhatheso uSibekayi+ weRhutjha wabulala uSipayi, obekasizukulwana samaRafa+ begodu amaFilista ahlulwa.

5 Kwaba nepi godu namaFilista, u-Elirhanana indodana kaJayire wabulala uLarhimi umfowabo kaGoliyadi+ umGathi, loyo umkhontwakhe ebewunomphini onjengesigodo sabaluki.+

6 Kwaba nenye ipi godu eGathi,+ lapho bekunendoda ekulu ngendlela erarako,+ beyinemino esi-6 esandleni ngasinye namazwani asi-6 enyaweni ngalinye, sekukoke bekuma-24 nayo beyisizukulwana samaRafa.+ 7 Beyisolo inyefula+ ama-Israyeli. Nje-ke uJonathani indodana kaTjhimeya,+ umfowabo kaDavida, wayibulala.

8 Lezi bekuziinzukulwana zamaRafa+ eGathi+ begodu zabulawa nguDavida neensebenzi zakhe.