Yesithathu KaJwanisi

1 Mina indoda edala ngitlolela uGayusi othandekako engimthanda kwamambala.

2 Wena othandekako, ngithandazela bona uragele phambili uphumelela ezintweni zoke begodu ube nepilo ehle njengombana uphumelela kwanjesi. 3 Ngathaba khulu lokha abafowethu beza begodu bafakaza ngeqiniso olibambileko njengombana uragela phambili ukhamba eqinisweni.+ 4 Kungithabisa kwamambala ukuzwa ukuthi abantwabami baragela phambili bakhamba eqinisweni.+

5 Wena othandekako, utjengisa ukuthembeka kwakho ngalokho okwenzela abafowethu, ngitjho nalabo ongabaziko.+ 6 Laba banikele ubufakazi malungana nethando lakho phambi kwebandla. Nabakhambako, ngibawa ubasize ngendlela ethabisa uZimu.+ 7 Ngombana baphume ngebanga legama lakhe, akhenge bathathe litho+ ebantwini beentjhaba. 8 Nje-ke sinesibopho sokubamukela ngethando abanjalo+ bona sibe ziinsebenzi ezibambiseneko eqinisweni.+

9 Ngatlolela ibandla okuthileko kodwana uDiyotrefe othanda indawo yokuthoma hlangana nabo,+ akunalitho elivela kithi alamukela ngehlonipho.+ 10 Nje-ke nangingeza ngizoyembula imisebenzi ayenzako yokurhatjha ikulumo elimazako ngathi.+ Akaneliswa kukwenza lokho kwaphela kodwana uyabhala nokwamukela abafowethu+ ngehlonipho, nalabo abafuna ukubamukela ulinga ukubavimba begodu abaqothe ebandleni.

11 Wena othandekako, ungakulingisi okumbi kodwana lingisa okuhle.+ Loyo owenza okuhle uvela kuZimu.+ Loyo owenza okumbi akakamboni uZimu.+ 12 UDemetriyusi ukhulunywa kuhle ngibo boke neqiniso liyamfakazela. Kuhlekuhle nathi sifakaza ngaye begodu niyazi ukuthi ubufakazi esibunikelako buliqiniso.

13 Nginezinto ezinengi engifisa ukukutlolela zona kodwana angifisi ukuragela phambili ngikutlolela ngomsobo ne-enke. 14 Kunalokho nginethemba lokukubona msinyana begodu sikhulume ubuso nobuso.

Kwanga ungaba nokuthula.

Abangani abalapha bayakulotjhisa. Ngibawa ungilotjhisele abangani abangapho ngamagama.