MUTU 36
Mukochita vinthu vonse mwachilungamo
Munthu aliyense ofuna kunkhala na muyake wamene ochita vinthu mwachilungamo. Yehova naye ofuna ayake amene ochita vinthu mwachilungamo. Koma kuchita vamene ivi ni kupepulini muli chino chalo, chifukwa tunkhala mu chalo chamene ŵanthu anyinji ochita vinthu viliye chilungamo. Koma lomba tupindula tyani chifukwa chochita vinthu mwachilungamo?
1. Ndaŵa yanji kuchita vinthu mwachilungamo n’kofunika ngako?
Tikochita vinthu mwachilungamo tuwonesha kuti tukonda nolemekeza Yehova. Ganizilani ivi: Yehova oziŵa chilichonse chatuganiza komasoti chatuchita. (Aheberi 4:13) Yove owona tikochita vinthu mwachilungamo ndipo otembeja ngako. Mawu ŵake onena kuti: “Munthu wochita vachinyengo Yehova onyansiwa naye, koma okonda ŵanthu achilungamo.”—Miyambo 3:32.
2. Kansi tingawoneshe tyani kuti tuchita vinthu mwachilungamo?
Yehova ofuna kuti “tikolaŵila vachendi veka-veka kuli muyake na muyake.” (Zekariya 8:16, 17) Kansi vamene ivi vutanthauza chinji? Tikopewa kulaŵila wenye tikolaŵijana na ŵanthu a m’banja mwasu, ŵatukata nawo ntchito, Akhilisitu ayasu abale na alongo olosoti akulu-akulu a boma. Ŵanthu achilungamo oiŵilalini ŵanthu ayawo olo kuŵasempha. (Ŵelengani Miyambo 24:28 na Aefeso 4:28.) Komasoti ŵanthu achilungamo ojeŵalini kulipila misonkho. (Aroma 13:5-7) Tetyo, tufunika kuyeja-yeja “kuchita vinthu vonse mwachilungamo.”—Aheberi 13:18.
3. Kansi tupindula tyani tikochita vinthu mwachilungamo?
Tikochita vinthu mwachilungamo nthawe zonse, ŵanthu oyamba kutikhulupilila. Vamene ivi vuyavyasoti kuti ŵanthu onse akosangalala mu mpingo monga ni mwavunkhalila m’banja. Komasoti tunkhala na chikumbuntima chituŵa. Tikochita vinthu mwachilungamo “tuwamilija chiphunziso cha Mpulumusi wasu, Mulungu,” komasoti ŵanthu amene otumikilalini Mulungu akotiwona kuti tuchita vinthu mwachilungamo, angakopeke noyamba kuphunzila vokhuza Yehova.—Tito 2:10.
VATI TIPHUNZILE
Tiphunzile mwamene kuchita vinthu mwachilungamo mwakusangalasila Yehova komasoti mwamene mwakungakuyavyileni kuti vinthu vikokuyendelani luweme, komasoti vamungachite kuti mukochita vinthu mwachilungamo nthawe zonse.
4. Tukondwelesha Yehova tikochita vinthu mwachilungamo
Ŵelengani Salimo 44:21 na Malaki 3:16, ndipo pavuli pake mukambilane makonsho aŵa:
Ndaŵa yanji muganiza kuti ni kusoŵa nzelu kukhulupilila kuti tingamufisile vinthu viyakine Yehova?
Kansi muganiza kuti Yehova akumvwa tyani tikasankha kulaŵila vinthu vachendi olo kuti pa nthawe yamene iyo kulaŵila vinthu vachendi kungankhale kovuta?
Ŵana akolaŵila vinthu vachendi, okondwelesha makolo. Nase tikolaŵila vinthu vachendi, tukondwelesha Yehova
5. Mukochita vinthu mwachilungamo nthawe zonse
Ŵanthu anyinji oganiza kuti n’vosakwanishika kuchita vinthu mwachilungamo nthawe zonse. Koma onani chifukwa chake tufunika kuchita vinthu mwachilungamo nthawe zonse. Lolelani VIDIYO.
Ŵelengani Aheberi 13:18, ndipo pavuli pake mukambilane mwatingachitile vinthu mwachilungamo . . .
na ŵanthu a m’banja mwasu.
ku ntchito olo tili ku sikulu.
pa vochitika viyakine.
6. Vinthu vutiyendela luweme tikochita vinthu mwachilungamo
Nthawe ziyakine tikochita vinthu mwachilungamo tingakumane na mavuto. Koma lomba, pamapeto pake tufwana madaliso. Ŵelengani Salimo 34:12-16, ndipo pavuli pake mukambilane konsho iyi:
Kansi kuchita vinthu mwachilungamo kungakuyavyeni tyani?
Analume na anakazi olungulana akochita vinthu mwachilungamo onkhala na banja yosangalala
Mabwana okhulupilila ngako a ntchito amene ochita vinthu mwachilungamo
Nzika zamene zuchita vinthu mwachilungamo, zunkhala na mbili iweme kuli akulu-akulu a boma
ŴANTHU AYAKINE ONENA KUTI: “Wenye uyakine unkhala utontho-utontho ndipo uchitishalini nkhaŵa ngako.”
Ndaŵa yanji mukhulupilila kuti Yehova ozondana na wenye uliwonse?
MFUNDO ZACHIDULE
Yehova ofuna kuti azishamwali ŵake akochita vinthu vonse mwachilungamo.
Makonsho oweleja
Kansi tingawoneshe tyani kuti nise achilungamo?
Ndaŵa yanji muganiza kuti ni kusoŵa nzelu kukhulupilila kuti tingamufisile vinthu viyakine Yehova?
Ndaŵa yanji mufuna kuchita vinthu mwachilungamo nthawe zonse?
PHUNZILANI VINYINJI
Kansi makolo angaphunzise tyani ŵana ŵawo kuti akochita vinthu mwachilungamo?
Kansi kuchita vatalonjeza kuli na ubwino wotyani?
Onani keno mungafunikile kulipila mphela misonkho olo kuti ingokatishiliwa ntchito molakwika.
“Nsonkho—Kansi mungafunikile kulipila?” (Nsanja ya Olonda, 1 September, 2011)
Kansi n’chinji chilimbikisa munthu muyakine wachinyengo kuchinja moyo wake noyamba kufwana ndalama mwachilungamo?
“Niphunzila kuti Yehova ni wachifundo komasoti okhululuka” (Nsanja ya Olonda, 1 May, 2015)