Ciŵelu, November 14
Paliye aliyense angawele kwa neo kufumyapo ngati Atata amene enituma amudonsa.—Yoh. 6:44.
Ŵanthu anyinji masiku ŵano okamba kuti okhulupilila Yesu ndipo omuita kuti mpulumusi wao. (Yoh. 6:29, King James Version) Olo n’tetyo, ayakine mwa ŵanthu amene enzokamba kuti enzokhulupilila Yesu, m’kuluta kwa nthawi emukana. Ndaŵa yanji ecita izi? Ŵanthu anyinji amene enze pa gulu ya ŵanthu ŵecilyesha Yesu, enzokonkha Yesu cifukwa cakuti enzoŵapasa vinthu veenzofuna. Ove enzofuna kuti yove akoŵapasa vakulya, kuŵapolesha koma soti kuŵauzhya vinthu veenzofuna kumvwa. Olo n’tetyo, Yesu eonesha bwino kuti aliyowele pa calo kuzoŵapasa tyala vinthu veenzofuna. M’malo mwake, ewela kuti aŵaphunzise kuziŵa zeenzofunika kucita kuti ankhale okonkha ŵake acendi. Ove enzofunika kuvomelezhya ciitano cake cakuti ‘welani kuli neo,’ mwa kumvwila zinthu zonse zeciŵaphunzisa.—Yoh. 5:40. w24.12 12 ¶12-13
Sondo, November 15
Mweo analume, pitilizhyani kukonda azinakazi ŵanu monga ni mwamene Khristu ekondela mpingo.—Aef. 5:25.
Kansi analume olungula angagonjese tyani minkhalidwe iipa? Ofunika kuyesayesa kutolela cisanzo ca Yesu. Yove ni cisanzo cabwino pa nkhani yokhuza mwamene munalume wolungula ofunika kucitila zinthu na mkazi wake. Ganizilani zaangaphunzile analume olungula tikaona mwamene Yesu enzocitila zinthu na ophunzila ŵake. Nthawi zonse, Yesu enzocita zinthu mwacikondi koma soti mwaulemu na ophunzila ŵake. Olo kuti yove enze wamphamvu ngako kupambana ophunzila ŵake, aliyoseŵenzeshe mphamvu izi pofuna kuŵapangisha kuzimvwa kuti ni ofoka olo kuti akomuyopa. M’malo mwake, enzoŵatumikila molicefya. (Yoh. 13:12-17) Yove euzhya ophunzila ŵake kuti: “Lolani kuti nikuphunziseni, cifukwa n’ne wofasa koma soti wolicefya ndipo musisimuliwe.” (Mat. 11:28-30) Onani kuti Yesu enze wofasa. Munthu ngati ni wofasa, zutanthauza lini kuti ni wofoka. M’malo mwake, zuonesha kuti ni wozilesha. Ndipo akakhumudwishiwa, okwanisha kulamulila ukali wake. w25.01 10 ¶10-11
Mande, November 16
Zocita zako zonse uzisiye m’manja mwa Yehova.—Miy. 16:3.
Masilizhyilo a calo cino payovwendela pafupi, mavuto a zacuma ayangizhyilike cifukwa ca kucinja kwa maulamulilo, nkhondo, masoka acilengedwe olo milili. Ndipo payakine tingataikiliwe mwai wa nchito, zinthu zatili nazo olo payakine tingafunike kukukila ku malo ayakine. Kansi n’cinji cingatiyavye kupanga cosankha camene cingaoneshe kuti tudalila Yehova? Ni cinthu cofunikila ngako kumuuzhya Yehova nkhaŵa zanu. Musengeni kuti akupaseni nzelu kuti mukwanishe kupanga zosankha zabwino nokuyavyani kuti mupitilizhye kunkhala odekha nopewa kucita nkhaŵa. (Luka 12:29-31) Pitilizhyani kumusenga kuti akokuyavyani kunkhala okhutila na zinthu zamuli nazo. (1 Tim. 6:7, 8) Mukofufuza nkhani m’zofalisa zasu zamene zingakuyavyeni kulimbana na mavuto a zacuma. Ŵanthu anyinji apindula ngako na nkhani koma soti mavidyo opezeka pa jw.org, amene ofotokoza mwatingalimbanilane na mavuto a zacuma. w25.03 28-29 ¶10-11