Mbali imozi yakuganizila Yehova akaliyokhululukila munthu ni kuona ngati munthu wamene uyo enzoziŵa kuti zeenzocita zenze zolakwika. Yesu efotokoza momvwika bwino mfundo iyi pa Luka 12:​47, 48. Ngati munthu wacitopanga makonzedwe akuti acite cinthu ciipa pamene oziŵa kuti Yehova angasangalale lini naco, niye kuti wacita cimo ikulu. Yehova angasankhe kusakhululukila munthu woteti. (Mko. 3:29; Yoh. 9:41) Kansi pali ciyembekezo ciliconse cakuti Yehova angatikhululukile? Eee. Pali soti mbali iyakine yakuganizila Yehova akaliyopanga cosankha cokhululukila munthu olo yai. Kulapa kutanthauza kucinja “kaganizidwe, zocita na zolinga.” Ndipo kuyangizhyilapo zinyinji osati tyala kumvwa cisoni cifukwa ca zinthu ziipa zecicita munthu. Kuyangizhyilapo kumvwa cisoni cifukwa colola kuti ushamwali wake na Yehova usokonezeke. w22.06 5-6 ¶15-17

Adani ŵasu ankhala olaŵila nkhani zawenye zokhuza akwasu amene osogolela m’gulu ya Mulungu kupitila pa mawailesi, TV koma soti pa intaneti. (Sal. 31:13) Ayakine mwa akwasu emangiwa nopasiwa mlandu wakuti ni anyankapondo. Nao Akhristu a m’vyaka 100 voyambilila, ekumana na vuto yolinganako, pamene mtumwi Paulo enze epasiwa mlandu wawenye nomangiwa. Ayakine eleka kumuyavya mtumwi Paulo pavuli pakuti waikiwa m’jele ku Roma. (2 Tim. 1:​8, 15) Ganizilani mwecimvwila Paulo. Yove epilila mavuto anyinji ndipo eika moyo wake pa ngozi cifukwa ca ove. (Mac. 20:​18-21; 2 Akor. 1:8) Tufunika kupewa kunkhala monga ni ŵanthu amene ekana kuyavya Paulo. Tetyo, tufunika lini kudabwa tikaona kuti Satana oukila makamaka akwasu amene osogolela m’gulu yasu. (1 Pet. 5:8) Pitilizhyani kucilikiza akwasu nonkhala nao pafupi.—2 Tim. 1:​16-18. w22.11 16-17 ¶8-11

Cuoneka kuti nyankapondo wamene elapa enze Myuda. Ayuda enzolambila Mulungu m’mozi, koma ŵanthu a mitundu iyakine enzolambila milungu inyinji. (Eks. 20:​2, 3; 1 Akor. 8:​5, 6) Tetyo, kuti nyankapondo uyu enze wa mitundu iyakine, sembe mu lemba yasiku yalelo ekonsha kuti: “Kansi uyopa lini milungu?” Kuyangizhyila apo, Yesu aliyotumiwe ku ŵanthu a mitundu iyakine, koma ku “mbelele zosoŵa za ng’anda ya Isiraeli.” (Mat. 15:24) Ndipo Mulungu enze eululila Aisiraeli kuti akaukishe akufwa. Tetyo, payakine nyankapondo wolapa enzoziŵa za nkhani iyi. Ndipo mau yecilaŵila yoonesha kuti enzokhulupilila kuti Yehova akaukishe Yesu kuti akalamulile mu Ufumu wa Mulungu. Cuoneka kuti nyankapondo uyu enze na ciyembekezo cakuti Mulungu akamuukishe. Pofwana kuti nyankapondo wolapa enze Myuda, cuoneka kuti enzoziŵa zokhuza Adamu na Eva koma soti Paladaiso wamene Yehova enze eŵaikamo. Cuoneka soti kuti enzokhulupilila kuti Paladaiso wecilaŵila Yesu ukankhale munda wooneka bwino pano pacalo.—Gen. 2:15. w22.12 8-9 ¶2-3