Puku ya Bobedi ya Dikgoši

5 Bjale Naamane, e lego molaodi wa mašole a kgoši ya Siria, e be e le monna wa go tuma e bile mong wa gagwe a mo tšeela godimo, ka gobane Jehofa o be a mo dirišitše go phološa Basiria. E be e le lešole le matla le ge a be a na le lephera.* 2 Ka letšatši le lengwe ge Basiria ba ile go hlasela Baisiraele ba ile ba thopa ngwanenyana yo mongwe gore e tle e be mohlanka wa mosadi wa Naamane. 3 Ngwanenyana yoo o ile a bolela le mong wa gagwe yoo e lego mosadi wa Naamane a re: “Ge mong wa ka Naamane a be a ka etela moporofeta kua Samaria o be a tla mo alafa lephera la gagwe.” 4 Ka gona a* ya go botša kgoši ya Siria dilo tšeo ngwanenyana yo a tšwago nageng ya Isiraele a di boletšego.

5 Ka gona kgoši ya Siria ya re go Naamane: “Sepela, gomme nna ke tla romela lengwalo go kgoši ya Isiraele.” Ka gona Naamane a tšea silifera yeo e imelago dikhilokgerama tše 340 (makgolotharo-masomenne)* le dikarolwana tše 6 000 (dikete tše tshelelago) tša gauta le diaparo tše lesome. 6 Ke moka Naamane a iša lengwalo leo go kgoši ya Isiraele. Lengwalo leo le be le re: “Ke go romela mohlanka wa ka Naamane yoo a go tlišeditšego lengwalo le e le gore o mo fodiše lephera la gagwe.” 7 Ge kgoši ya Isiraele e se na go bala lengwalo leo, e ile ya gagola diaparo tša yona gomme ya re: “Na ke nna Modimo, moo nka bago le matla a go dira gore batho ba hwe goba ba phele? Ke ka baka la eng a nthometše monna yo mo e bile a mpotša gore ke mo fodiše lephera? Le lena le a iponela gore o nyaka go lwa le nna.”

8 Eupša ge Elisha monna wa Modimo wa nnete a se na go kwa gore kgoši ya Isiraele e gagotše diaparo tša yona, o ile a romela molaetša go kgoši yeo a re: “Ke ka baka la eng o gagotše diaparo tša gago? Hle, mo dumelele gore a tle go nna e le gore a tle a tsebe gore go na le moporofeta mo Isiraele.” 9 Ka gona Naamane a tla le dipere tša gagwe le dikariki tša gagwe tša ntwa gomme a ema kgauswi le mojako wa ntlo ya Elisha. 10 Ke moka Elisha a romela moromiwa go Naamane gore a fihle a mmotše a re: “Sepela o yo hlapa gašupa Nokeng ya Jorodane ke moka letlalo la gago le tla boela sekeng, gomme wa hlweka.” 11 Ka gona Naamane a galefa kudu gomme a thoma go sepela: “Ge a dutše a sepela o be a re: ‘Ke be ke ipotša gore o tla tšwa a tla a ema mo pele ga ka a bitša leina la Jehofa Modimo wa gagwe gomme a iša letsogo la gagwe pele le morago moo go nago le lephera gore a mphodiše.’ 12 Na Abana le Farapara e lego dinoka tša Damaseko ga di phale dinoka ka moka tša Isiraele? Na nka se hlape go tšona ka hlweka?” A re go bolela bjalo a retologa a tloga a selekegile kudu.

13 Bjale bahlanka ba gagwe ba mmatamela ba re go yena: “Tate, ge nkabe moporofeta a go laetše gore o dire selo se segolo, na o be o ka se se dire? Gona bjale o go boditše feela gore: ‘Sepela o yo hlapa gomme o hlweke.’ Ke ka baka la eng o sa nyake go dira bjalo?” 14 Ka gona Naamane a theoga a ya a itahlela ka Nokeng ya Jorodane gašupa go ya ka seo monna wa Modimo wa nnete a se boletšego. Ke moka letlalo la gagwe la boela sekeng la swana le la mošemane yo monyenyane gomme a hlweka.

15 Ka morago ga moo a boela go monna wa Modimo wa nnete a na le mašole ka moka ao a bego a sepela le ona, gomme a ema pele ga gagwe a re: “Bjale ke a tseba gore lefaseng ka moka Modimo wa nnete o Isiraele feela. Bjale ke kgopela o amogele mpho yeo nna mohlanka wa gago ke go fago yona.” 16 Eupša Elisha a re: “Ke ikana ka Jehofa Modimo yo a phelago yo ke mo hlankelago, nka se e amogele.” Naamane a mo phegelela gore a e amogele, eupša Elisha a gana. 17 Mafelelong Naamane a re: “Ge e ba o sa e amogele, hle nna mohlanka wa gago ke kgopela gore ke fiwe mmu wo o tšwago nageng ye wo o ka rwalwago ke dimeila* tše pedi, ka gobane nna mohlanka wa gago nka se sa neela dibego tša go fišwa goba dihlabelo go medimo e mengwe eupša ke tla di direla Jehofa feela. 18 Eupša eka Jehofa a ka ntebalela nna mohlanka wa gago, ka gobane ge kgoši mong wa ka a eya ntlong ya Rimone gore a yo mo khunamela, o ithekga ka letsogo la ka. Ka gona le nna ke swanetše go khunama le yena ka ntlong yeo ya Rimone. Bjale ge ke khunama ka moo ntlong ya Rimone eka Jehofa a ka ntebalela nna mohlanka wa gago.” 19 Ka gona Elisha a re go yena: “Sepela ka khutšo.” Ka morago ga ge a tlogile go Elisha gomme a sepetše sebaka se se telele, 20 Gehasi yo a bego a hlankela Elisha monna wa Modimo wa nnete o ile a ipotša a re: “Mong wa ka o tlogetše Naamane wa Mosiria a sepela gomme a se amogele dimpho tšeo Naamane a bego a nyaka go mo fa tšona. Bjale ke ikana ka Jehofa yo a phelago gore ke tla mo kitimela ka yo tšea se sengwe go yena.” 21 Ka gona Gehasi a kitimela Naamane. Ge Naamane a bona gore go na le motho yo a kitimago ka morago ga gagwe o ile a fologa kariki ya gagwe ya ntwa gore a yo mo gahlanetša gomme a re: “Na dilo ka moka di gabotse?” 22 Gehasi a re: “Tšohle di lokile. Mong wa ka o nthomile a re: ‘Go sa tšwa go tla masogana a mabedi ao a tšwago dithabeng tša Efuraime go barwa ba baporofeta. Hle ba fe silifera yeo e imelago dikhilokgerama tše 34,2* le diaparo tše pedi.’” 23 Naamane a re: “Tšea silifera yeo e imelago dikhilokgerama tše 65.”* Ke moka Naamane a mo phegelela gore a di tšee, a mo phuthelela silifera yeo e imelago dikhilokgerama tše 65 a e tsenya ka mekotleng e mebedi a tsenya le diaparo tše pedi ke moka a di fa bahlanka ba Gehasi ba babedi bao ba ilego ba eta Gehasi pele.

24 Ge a fihla Ofele, o ile a ba tšeela tšona gomme a di bea ka ntlong ya gagwe ke moka a re ba sepele. Ge ba se na go sepela, 25 a boela ka ntlong gomme a ema kgauswi le mong wa gagwe. Ke moka Elisha a re go yena: “Gehasi o tšwa kae?” Eupša yena a re: “Nna mohlanka wa gago ga ke tšwe felo.” 26 Elisha a re go yena: “Na o nagana gore ga ke tsebe gore o ile wa šala monna yola morago gomme yena a fologa kariki ya gagwe ya ntwa e le gore a go gahlanetše? Na ye ke nako ya go amogela silifera, diaparo, mehlware, meterebe, dinku, dikgomo, bahlanka ba banna le ba basadi? 27 Ka gona bolwetši bja Naamane bja lephera bo tla go kgomarela bja ba bja kgomarela le ditlogolo tša gago go ya go ile.” Ka yona nako yeo, Gehasi a tloga moo pele ga Elisha a na le bolwetši bja lephera e bile letlalo la gagwe le šweufetše go swana le kapoko.