Esera

7 Ka morago ga nako e itšego, ge go be go buša Kgoši Arithasasitha wa Peresia, Esera o ile a boela Jerusalema. E be e le morwa wa Seraya, morwa wa Asaria, morwa wa Hilikia, 2 morwa wa Shalume, morwa wa Tsadoko, morwa wa Ahitubo, 3 morwa wa Amaria, morwa wa Asaria, morwa wa Merayothe, 4 morwa wa Serahiya, morwa wa Usi, morwa wa Buki, 5 morwa wa Abishua, morwa wa Finease, morwa wa Eleasara, morwa wa Arone e lego moperisita yo mogolo. 6 Esera o ile a boa Jerusalema a etšwa Babilona. E be e le mongwalolodi, e bile a tloga a tseba Molao wa Moshe woo Jehofa Modimo a bego a o neile Baisiraele. Kgoši e ile ya nea Esera dilo ka moka tšeo a bego a di kgopela ka gobane Jehofa Modimo o be a na le yena.

7 Baisiraele ba bangwe, baperisita, Balefi, diopedi, batho bao ba bego ba šoma go leta dikeiting le batho bao ba hlankelago tempeleng, ba ile ba ya Jerusalema ka ngwaga wa bošupa wa ge go buša Kgoši Arithasasitha. 8 Esera o ile a fihla Jerusalema ka kgwedi ya bohlano, ka ngwaga wa bošupa wa ge kgoši yeo e buša. 9 O ile a tloga Babilona ka letšatši la pele la kgwedi ya pele, a fihla Jerusalema ka letšatši la pele la kgwedi ya bohlano, ka gobane Modimo wa gagwe o be a na le yena. 10 Esera o ile a lokiša pelo ya gagwe gore a tle a ithute molao wa Jehofa le go o latela, e bile a rute Baisiraele ditaelo le dikahlolo tša wona.

11 Lengwalo leo Kgoši Arithasasitha a le neilego moperisita Esera yo e bego e le mongwalolodi, e bile a tseba melao le ditaelo tšeo Jehofa a di neilego Baisiraele, le re:

12 “Nna Arithasasitha kgoši ya dikgoši, ke ngwalela wena moperisita Esera yo a ngwalollago Molao wa Modimo wa magodimo ke re: Khutšo a e be le wena. 13 Ke ntšhitše taelo ya gore yo mongwe le yo mongwe yo a bušwago ke nna wa setšhaba sa Isiraele gotee le baperisita le Balefi ba bona yo a nyakago go ya le wena Jerusalema, a ye le wena. 14 Kgoši le baeletši ba yona ba go roma gore o yo nyakišiša ge e ba batho ba Juda le ba Jerusalema ba latela molao wa Modimo wa gago woo o o tsebago goba ba sa o latele. 15 O sepele le silifera le gauta tšeo kgoši le baeletši ba yona ba di ntšheditšego Modimo wa Isiraele ka go rata, yoo ntlo ya gagwe e lego Jerusalema. 16 Le gona o sepele le silifera le gauta ka moka tšeo o di hweditšego nageng ka moka ya Babilona le dimpho tša batho le tša baperisita tšeo ba di ntšhitšego ka go rata gore di ye ntlong ya Modimo wa bona Jerusalema. 17 Ka tšhelete ye, kapelapela o reke dipoo, dinku tše tona, dikwana, dibego tša tšona tša mabele le dino gomme o di neele aletareng ya ntlo ya Modimo wa lena yeo e lego Jerusalema.

18 Le dire selo se sengwe le se sengwe seo lena le Bajudagotee le lena le bonago se lokile ka silifera le gauta tšeo di šetšego. Le dire bjalo go ya kamoo Modimo wa lena a nyakago ka gona. 19 Le gona, le dibjana ka moka tšeo o di neilwego gore di dirišwe go hlankela ntlong ya Modimo wa gago, o di neele Modimo kua Jerusalema. 20 E bile dilo tše dingwe ka moka tše di nyakegago tša ntlo ya Modimo wa gago tšeo o swanetšego go di ntšha, o di tšee dilong tše bohlokwa le mahumong a ka mošate.

21 “Nna Kgoši Arithasasitha ke laetše batho ka moka bao ba hlokomelago tšhelete le dilo tše bohlokwa, bao ba lego ka bodikela bja Noka ya Eforate gore selo se sengwe le se sengwe seo moperisita Esera, yena yo a ngwalollago Molao wa Modimo wa magodimo a le kgopelago sona le se dire kapelapela. 22 Le ntšhe silifera ya dikhilograma tše 3 420 (dikete tše tharo-makgolonne-masomepedi),* korong ya dikhilograma tše 17 000 (dikete tše lesomešupa),* beine ya dilithara tše 2 200 (dikete tše pedi-makgolopedi),* makhura a dilithara tše 2 200 (dikete tše pedi-makgolopedi) le letswai le lentšhi. 23 Anke dilo ka moka tše di laetšwego ke Modimo wa magodimo di direlwe ntlo ya Modimo wa magodimo ka mafolofolo, e le gore a se ke a galefela setšhaba sa ka, a galefela nna le barwa ba ka. 24 Le gona ke le tsebiša gore baperisita, Balefi, diopedi, batho bao ba letago mejako, batho bao ba hlankelago tempeleng le bao ba šomago ntlong ye ya Modimo, ba se ke ba patedišwa motšhelo le ge e le ofe.

25 “Wena Esera, diriša bohlale bjo Modimo a go filego bjona gore o kgethe baahlodi le batho bao ba ba thušago, gore ba ahlole batho ka moka bao ba lego ka bodikela bja Noka ya Eforate, e lego batho ka moka bao ba tsebago melao ya Modimo wa gago gomme o rute bao ba sa tsebego melao yeo. 26 Mang le mang yo a sa latelego molao wa Modimo wa gago le molao wa kgoši a ahlolwe kapelapela, a ka ahlolelwa lehu goba a rakwa nageng goba a patedišwa tšhelete goba a golegwa.”

27 Jehofa Modimo wa borakgolokhukhu ba rena a a retwe, yena yo a dirilego gore kgoši e botsefatše ntlo ya Jehofa yeo e lego Jerusalema! 28 Le gona o mpontšhitše botho bjo bogolo ka go dira gore kgoši, baeletši ba yona le dikgošana ka moka tše matla tša yona, di ntshware gabotse. Ke ile ka ba le sebete ka gobane Jehofa Modimo wa ka o be a na le nna gomme ka kgoboketša banna ba baetapele ba Isiraele gore ba ye le nna Jerusalema.